Matiye 17
17
Yeesu fo̧o̧ an fillɛ
Mar 2:2-13; Luk 9:28-36
1Yo̧o̧ dɔʼ guu pik an, Yeesu iŋ Piyɛri Zâki vere Zâŋŋi, Zâk daak an nɛy, dɔkki vo gbɔk biri ba o ve da̧a̧re. 2O fill o ve timba tuu, gbɔy an dȩȩzin too yo̧o̧ vin ɛn sam an vɛ fi buyya too yɛɛ dȩȩt vin. 3Ɛtuu vin, kaam ta̧a̧to nɔ ve hə̧ Moyi̧zə vere Eli vey moogaa Yeesu yakka. 4Ɛnɔ Piyɛr feeza Yeesu: «Gbɛ̧ɛ̧ kɛŋ, sȩȩ kaà ba kan vo vo ɛtɛɛ. Oò mɔ hi̧i̧rɛ nɔ, kay waa wàà ta̧a̧to, daŋga nɔ moni, daŋga nɔ Moyi̧zə ani, kə daŋga nɔ Eli ani.» 5Oy moo tin nɔ oppo kete án ku̧ʼ dȩȩzinna zɔʼ yaa waa vorɛ, ɛn wɛll zɔ kini ku̧ʼre tuu fee: «Wa̧y nɛnɔ o Tân min mi hi̧i̧i̧ ɓimmɛy, sȩȩzi orɛ mi wəʼə ze. Vo kiizarɛ!» 6Kaamɔ ve fee ka ve kii yak ɛnɔ kəzəkɔ dòó kɔ vorɛ kpɛ̌ŋ ve wan ve zuʼ gbɔy von ve hɛge. 7Yeesu diŋ tak o ve po, so̧o̧ vo kə fee: «Vo luu gǎŋ, dòo do kɔ vo sɛ.» 8Ve gan nɔt bɛlba ve hən há̧a̧ zɔʼ yɛ ɛn Yeesuy zaʼ. 9Vey si zo̧o̧y gbɔkkə tin nɔ, Yeesu pɛɛ vo fee: «Vo feeza há̧a̧ zɔʼ hɛn ke vo hə̧ nɔ sɛ, do gbɔ yo̧o̧n há̧a̧ Tân an de niŋzi kə̌y vɔɔ yɛɛre tin nɔ oppo.» 10Pik an kaamɔ ve vi Yeesu: «Náa it Moyi̧zə moò buu an vɛ ve fee: “Eli doò kəy doʼ nɔ moò nɛɛ?”» 11Yeesu hi̧i̧t vo: «Ɛnuu, Eli de yaa sɛkka hɛn nɔ ve tɛʼ za̧a̧za̧a̧. 12Ɛn iipo nɔ, mii feet vora: Eli o yaa ma, náa ve gaana yɛ, ɛn ve kɔʼɔ too ve hi̧i̧ nɔ̌m. De daa Há̧a̧ Tân an oppo too ɛnɔ̌m vin, o sɛw vey ɗeʼenaa.» 13Ɛnɔ kaamɔ ve gaa Yeesu bo de moot voo Zâŋ Batis moò ani.
Yeesu poozi tân zɔʼ ɛ ho̧o̧ gǐkka
Mar 9:14-29; Luk 9:37-43a
14Ɛn ve gbɔ yɛɛ náa ve sɔŋ duʼza̧a̧ tin nɔ oppo nɔ, wa̧y zɔʼ diŋŋi Yeesu o hɛge, ɗiksi o timba 15kə feeza: «Wa̧y it hɛn, gim do kɔzum tân min paa gee. O ɛ de ho̧o̧ gǐkka oy gaa de gimma, yɛɛ zɔʼ o wan vɛre ongɛɛ maame. 16Mi panay kaam mɔn o ve po ve lɔn poozinnaa yɛ.» 17Yeesu fee: «Náa ɓɛɛ tu̧u̧n si̧i̧ yɛ ɛn voy! Kǎy kan vega vo dɔʼ baʼgɛ? Dɔʼ baʼgɛ kǎy hi̧i̧t vo moò ze nɛy? Vo panzi yaa tân nɔ ɛtɛɛ.» 18Yeesu zɛt fəəm ɓɛɛ nɔrɛ; ɛn fəəm ɓɛɛ nɔ vuk tân nɔ o fɔn tuurɛ. Ho̧o̧ nɔ poorɛ naʼa tuu vin. 19Ɛnɔ kaamɔ ve diŋŋi Yeesu o hɛge o ve da̧a̧re ve kə feeza: «Moò nɛɛ vin vi lɔn feem ɓɛɛ ɛn nɔ nɛninaa yɛ nɛy?» 20Yeesu hi̧i̧t vo: «Moò si̧i̧ tu̧u̧ von ɓoonɛ nɛy. Mi feet vora moò za̧ǎ̧ de ginu kaà vo ɛ de si̧i̧ tu̧u̧ von kaʼso too saŋ noʼ yên vin nɛ nɔ, kaà voy fee gbɔk ɛnɔ: “Mɔ ti̧i̧ ɛtɛɛ mɔ, tak iituu”, ɛn kaà de ti̧i̧. Hɛn kaà de baʼan vora yɛ. 21Ɛn hɛn ka vo kɔ fəəm gaʼ ɛnɔ ka vuk ze nɔ, de yak faaraa vere hɛn kɛ̧ɛ̧ɛ̧ zaʼ.»
Yeesu de fee kəra moò vɔɔ an vere niŋzi kəy an nɛy ɓɛʼ
Mar 9:30-32; Luk 9:43b-45
22Yo̧o̧ zɔʼ kaamɔ ve sɔŋ yɛɛ daŋ Galile, Yeesu feet vo: «Há̧a̧ Tân an vey heʼee há̧a̧ o ve naʼá, 23vey vɔ̌zaa; ɛn ɗaa, yo̧o̧ dɔ ta̧a̧to an, oy niŋzi kə̌y za̧a̧na.» Ɛnɔ kaamɔ ve lu vorɛ kpɛ̌ŋ.
Yeesu vere Piyɛr ve tòk zɔmɔgɔl Go̧o̧ge liki nɛy
24Ɛn Yeesu vere kaam an vɛ ve gbɔ Kapɛrnaûm, náa ɓa zɔmɔgɔl Go̧o̧ge liki nɔ ve diŋ Piyɛr o hɛge ve viʼi: «Wa̧y it hɛn von tokin an zɔmɔgɔl Go̧o̧ge liki nɔ yɛrɛ?» 25Piyɛr hi̧i̧: «Ə̧ə̧ oy tokkaa.» Yɛɛ Piyɛr bɔk de dɔra kàa tin nɔ oppo, Yeesu iŋ yak moot tiyɔ kə fee: «Mɔ vəʼə tuu bɔgɛ Simɔŋ? Hii kaà tok zɔmɔgɔl vere tiki gbɛ̧ɛ̧ hɛkpa nɔ o ve po nɔ yɛɛ? Náa hɛk akkɔ veyrɛɛ ha̧a̧rɔɔ náa yaarɛ nɔ veyrɛ?» 26Piyɛr hi̧i̧: «Yaarɛ nɔ vey, ɛn Yeesu hi̧i̧za, náa hɛk akkɔ ve tokin yɛ. 27Ɛn ɗaa, ka do no náa ɛnɔ ve zat sɛ nɔ. Moò an oy, mɔ tak lɛk âʼre, mɔ gbəll galumma, dut mɔy bi̧i̧ sora nɔ mɔ taa yak an nɔrɛ: mɔy zee sann waa de lii zɔmɔgɔl min tokkarɛ vere mɔn nɔ daŋ; Mɔ iŋ mɔ tokin vo zɔmɔgɔl ban nɛy.»
Currently Selected:
Matiye 17: dae
Highlight
Copy
Compare
Share
Want to have your highlights saved across all your devices? Sign up or sign in
