Matiye 12
12
Há̧a̧ tân an o wɔɔk náa Yuuda o ve yo̧o̧ wə̧ə̧ri ba yɔ
Mar 2:23-28; Luk 6:1-5
1Bolaa kaʼso pik an, Yeesu daa bəle hǎn náa Yuuda o ve yo̧o̧ wə̧ə̧riba. Kaam an gɔ̧ll ho̧o̧ vorɛ; Ve gə bəle sokkɔ ve yəʼ dȩȩtɔrɛ#12:1 Vo to Dət 23:26. 2Náa Farize ve fee ka ve hə̧ ɛnɔ, ve feeza Yeesu: «Mɔ torɛ, kaam mɔn vey kɔra hɛn moò buu ban vo ponn ya̧a̧ kɔra náa Yuuda o ve yo̧o̧ wə̧ə̧riba yɛ nɛy!» 3Yeesu hi̧i̧t vo: «Bɔk vo waʼan hɛn Davit bɔk kɔ yo̧o̧n gɔ̧ll ya̧ʼa̧ tin vega náa an ve daŋŋɔ yɛrɛɛ? 4O dɔ Go̧o̧ge ligi vega náa an ve daŋ ve lɛ lɛm bɔk ve po Go̧o̧ge nɔrɛ; bɔk ve liin kaà ve lɛ yɔ yɛ, kaà Daviti, kaà náa an vey moò buu ban vo po ya̧a̧ náa kɔ maak ak doò ve lɛ yo zaʼ#12:4 Vo to 1Sam 21:2-7 po ya̧a̧ náa kɔ maak ak vey zaʼ Vo to Lɛv 24:9. 5On vo waʼan de Moyi̧zə moò buu an yɛ ɓim, náa Yuuda o ve yo̧o̧ wə̧ə̧riba nɔ, náa kɔ maak ak vey kɔra kɔm Go̧o̧ge ligi yo̧o̧ ɛnɔ oppo nɔ, ve zɛbin moò buu náa Yuuda ve yo̧o̧ wə̧ə̧ri von nɔ yɛ, Ɛnɔ o ve po de gbɔ̧ɔ̧k o yɛrɛ? 6Ɛn mi feet vora, ɛtɛɛ nɔ hɛn ɗəə maak likkɔ derɛ! 7Kaà vo gaa de za̧a̧za̧a̧ hɛn Dɛptɛl fee: “Mi hi̧i̧ de sosinna paam maak gokinna vey hɛn za̧a̧n nɔ ve nɛy yɛ”, kaà vo sonin náa ve ɛ̂n gbo̧o̧k yɛ ɛn ve yak yɛ. 8Ɛnɔ há̧a̧ tân an o wɔɔk náa Yuuda o ve yo̧o̧ wə̧ə̧riba yɔ.»
Wa̧y naak vɔɔri akka
Mar 3:1-6; Luk 6:6-11
9Yeesu luu tuu tak dɔ náa Yuuda o ve lik faa yakke. 10Wa̧y naak vɔɔri ak zɔʼ bɔk tuu tin. Náa farize ve hi̧i̧ ka ve kə̧ə̧za Yeesu moǒ; moò an oy ve viʼi: «Moò buu ban vo po ya̧a̧ ho̧o̧ poozii náa Yuuda o ve yo̧o̧ wə̧ə̧ribarɛrɛ?» 11Yeesu hi̧i̧t vo: «Há̧a̧ von daŋga o vo tiŋza̧a̧re oò ɛ tɛ̧ɛ̧ wagaǎ an daŋga, ke pɛ va̧a̧ surire náa Yuuda o ve yo̧o̧ wə̧ə̧ribarɛ, o tak vuksinnay ǐntuu yɛrɛ? 12Ɛn há̧a̧ zɛ ɗəə tɛ̧ɛ̧rɛ! Ɛnɔ, moò buu ban vo po ya̧a̧ há̧a̧ hɛn za̧a̧ kɔzaa náa Yuuda o ve yo̧o̧ wə̧ə̧ribarɛ.» 13Ɛnɔ Yeesu feeza wa̧y nɔ: «Mɔ yɔll naak mɔn nɔrɛ.» O yɔllɛ ɛn naak an nɔ sȩȩ kə za̧a̧za̧a̧ too zɔʼ nɔm. 14Náa Farize ve luu tak visin ka ve kɔ tuubɔgɛ ka ve vɔ̌t yeesu ze nɛy.
Kɔm ak Go̧o̧ge wəʼə nɛy
15Yeesu fee ka kii ɛnɔ, o luu yɛɛ ɛnɔ oppo tuurɛ ɛn náa ve duʼza̧a̧ ve òorarɛ. O poozi náa ho̧o̧ nɔ verɛ tɛʼ, 16Ɛn Yeesu dìn vo kɔʼ tin za̧a̧za̧a̧ doò ve fee o bo hii yɛɛ nɔ sɛ. 17Hɛn nɔ daa too ɛnɔmmɔ kǔt Go̧o̧ge yaʼyɛɛ an Ezǎy yak moot an bɔk fee: 18«Go̧o̧ge fee, yaʼyɛɛ min mi wəʼə nɔ oy nɛ, sȩȩzi orɛ. Mii ɛtta Fəəm dȩȩt min oppo ɛn de feezaa náa ve moò yȩʼȩ za̧a̧ min yɔ. 19Oy yusingaa moò vey há̧a̧ yɛ ɛn de gbazinna wɔɔk yɛ, vey kiina pamò an yanaa yɛ. 20Hɛ̧ɛ̧k oo nuksin ma nɔ oy gənaa ɓɛ yɛ ɛn de ninina lalap oo ʼwap ma nɔ yɛ. De kɔra too ɛnɔm de yaa ɗaksii moò yȩʼȩ za̧a̧ lîkka doʼ. 21Náa ve tɛʼ vey ɛtta si̧i̧ oppo.
Yeesu nɛn fəəm ɓɛɛ nɔ vey
Mar 3:22-30; Luk 11:14-23
22Ve panzay Yeesu wa̧y yə̧ə̧̀ zɔʼ o munna moò fəəm ɓɛɛ bɔk dɔza fɔn. Yeesu poozi wa̧y ɛnɔrɛ, ɛn kəzəkɔ wa̧y nɔ bi̧i̧ yak moo kə hə̧ nɔttɛ. 23Náa ve tɛʼ kɔ vo bit ve fee: «Paam de ɛn Davit tân nɔ oy yɛrɛ?» 24Náa Farize ve fee ka ve kii ɛnɔ, ve fee: «Wa̧y ɛnɔ de nɛnna fəəm ɓɛɛ nɔ ve nɔ Bɛʼɛlzebul, fəəm ɓɛɛ nɔ ve kɛŋ von bo poʼo gɔti yɔ!» 25Ɛn Yeesu gaa moò vəʼəra von nɛ; ɛnɔ o feet vo: «Náa vey kanna gbɛ̧ɛ̧ yɛɛ daŋga nɔ vɛ oo ve kɔsin seè o ve fo̧o̧ni nɔ, gbɛ̧ɛ̧ yɛɛ ɛn nɔ turɛ. Náa vey kanna kap da̧a̧ nɔ vɛ ongɛɛ náa eek da̧a̧ vɛ oo ve kɔsin seè o ve fo̧o̧ni nɔ vey diina yɛ. 26Ɛn Sɛɛɗan o fəəm ɓɛɛ̌, oo nɛn fəəm ɓɛɛ nɔ verɛ nɔ, ɛn o kɔsinga seè vere wɔɔk ani vin. Ɛnɔ, gbɛ̧ɛ̧ an nɔ kaà tak tinba tuubɔgɛ? 27Vo fee boy de nɛnna fəəm ɓɛɛ vɛ nɔ Bɛʼɛzɛbull bo poy gɔti yɔ nɔ; Ɛnɔ von hii po dǎmza̧a̧ vɛ gɔti nɛnin voo yɛ? dǎmza̧a̧ vey vin vey kə̧́ə̧t vora moò yɔ! 28Ɛn min Go̧o̧ge fəəm an poy gɔti feem ɓɛɛ nɔ vɛ nɛnin voo yɔ, ɛn feeri an Go̧o̧ge Gbɛ̧ɛ̧ an yaay o vo po ma. 29«Há̧a̧ oo hi̧i̧ ka dɔ há̧a̧ gɔti ak o kàa ka fa̧a̧ hell an vɛy nɔ, do vɔ̌l há̧a̧ gɔti akkɔ doʼ. Ɛn de hak fa̧a̧ra hɛn an o kàa nɔ ve tɛʼ ze. 30Há̧a̧ oò paam vega mii yɛ o za̧a̧k mini; ɛn ha̧a̧ o maʼzinni sɔ̌ŋŋinna yɛ nɔ oy wɛksii 31Moò an oy, mii feet vora: Há̧a̧ ve tɛʼ hɛn ɓɛɛ von vɛ vere yak zɛɛk von vey zɛɛra Go̧o̧ge nɔ ve tɛʼ de hoozii; Ɛn há̧a̧ oò zɛɛ fəəm dȩȩta nɔ hɛn ɓɛɛ an hoozin yɛ. 32Há̧a̧ oò moo ɓɛɛ Há̧a̧ tân an oppo hɛn ɓɛɛ an de hoozii; ɛn há̧a̧ oò moo ɓɛɛ Fəəm dȩȩt oppo dɔmmɔ hɛn ɓɛɛ an hoozin yɛ, kaà hɛk nɛnɔ oppo, ɛn kaà hɛk de yaay nɔ oppo si̧ʼ.
Tappa vere leet an vɛy
Luk 6:43-45; Mat 7:16-20
33«Tap oò sȩȩrɛ, leet an nɔ vɛy sȩȩ vin. Tap oò ɓɛɛ, leet an vɛy fira ɓɛɛ̌ vin. Ɛnuu, tap de gaana o leet ba. 34Kpəlum sâm vɛ! Lɔ tuubɔgɛ kaà vo fee hɛn za̧a̧ verɛ, ɛnɔ von vo ɓɛɛ̌ nɛy? Ɛnɔ yak de moo vuksii hɛn hi̧ʼ de si̧i̧ ba nɔ vɛy. 35Há̧a̧ za̧a̧ de vuksii hɛn za̧a̧ hi̧ʼ de o si̧i̧ za̧a̧ ba nɔ vɛy; há̧a̧ ɓɛɛ de vuksii hɛn ɓɛɛ hi̧ʼ de o si̧i̧ ɓɛɛ ba nɔ vɛy. 36Mi feet vora: Yo̧o̧ moò yȩʼȩ ba nɔ, Go̧o̧ge de vira náa vɛ, vey hi̧i̧ra yak moot von bɔk ve moo ɓa ɓa nɔ vɛ opporɛ. 37Ɛnɔ vey yȩʼȩmma um yak moot ba, oò mɔ ɛ de gbò̧ò̧kɛ, oò mɔ ɛ̂n de yɛ vey feezumma ze.»
Náa ve haa Yeesu doò kɔt vo hɛn yella
Mar 8:11-12; Luk 11:29-32
38Ɛnɔ náa it Moyi̧zə moò buu an zɔʼ vɛ vere náa Farize zɔʼ vɛ ve feeza Yeesu: «Wa̧y it hɛn, vi hi̧i̧ mɔ kɔt vi hɛn yell ka vi hə̧ ivi timba tɛɛ.» 39Yeesu hi̧i̧t vo: «Náa munɛ nɔ ve ɓɛɛ̌, ve sȩȩn Go̧o̧ge oppo yɛ, vey haara hɛn yella, ɛn vey hakinna yɛ de nan yaʼyɛɛ Zonas an nɛy zaʼ. 40Ɛnuu, de da̧a̧ nɔm vin Zonas bɔk nə yo̧o̧ dɔʼ ta̧a̧to vi̧i̧ dɔʼ ta̧a̧to dut aʼ o pə̧ə̧re, too ɛnɔm vin Há̧a̧ tân an de nəra hɛtte yo̧o̧ dɔʼ ta̧a̧to vi̧i̧ dɔʼ ta̧a̧to. 41Yo̧o̧ moò yȩʼȩ ba nɔ, náa vey kanna Ninivə nɔ vɛ vey luura náa munɛnɔ o ve timba vey kə̧ə̧t voo moǒ, ɛnɔ náa Ninivə bɔk ve kii Zonas pamo an nɔ ve fill kandi von verɛ. Ɛn há̧a̧ ɗəə Zonasɔ oy nɛ! 42Yo̧o̧ moò yȩʼȩ ba nɔ, gbɛ̧ɛ̧ kep zɔʼ sɛk gǎŋ gɔɔ nɔ oppo de luu dii náa munɛ nɔ o ve timba de kə̧ə̧t voo moǒ, ɛnɔ o yaay hɛk yɛɛ yəə ɗəə tin nɔ vɛ oppo hɛkpa ka kii Salomɔŋ yak moot an hi̧ʼ vey moò gaa nɛy#12:42 Vo to Gbg 1 dən 10:1-10. Ɛn há̧a̧ ɗəə Salomɔŋŋɔ oy nɛ!»
Fəəm ɓɛɛ nɔ ɗɛɛ kəyrɛ
Luk 11:24-26
43«Fəəm ɓɛɛ oò vuk há̧a̧ o fɔn, o tak de kəla yɛɛ děmmɔ vɛ oppo ka tee yɛɛ wə̧ə̧rii tin nɛy. Ɛn oò hakin yɛ, 44oy fee: “Mii ɗɛɛ kəra ii kàa, yɛɛ bɔk mi luuy tin nɔ oppo”. O ɗɛɛ kərɛ ɛn tak zee ka̧a̧ nɔ za̧a̧ vin, ve zeerɛ, sɛ̂kkɛ dȩȩt za̧a̧. 45Ɛnɔ o luu tak pani fəəm zɔʼ ve gutambe ve kɔ ɓɛɛ ɗəəərɛ; Vey dɔ kanna kàa tuu daŋ. Si̧ʼtum an, há̧a̧ nɔ kandi an de ya̧tta ɗəəra bɔk tinba nɔrɛ. Hɛn ɛn de daa náa ɓɛɛ munɛ nɔ o ve po too ɛnɔm vin.»
Yeesu eraa ɓimmɔ vey
Mar 3:31-35; Luk 8:19-21
46Yeesu de moogaa náa duʼ nɔ vey keto, ɛn naʼ an vere daak an vɛ ve gbɔ̌yrɛ. Ve diiy gɔn ve tèè ka ve mooga yakka. 47Há̧a̧ zɔʼ feeza Yeesu: «Mɔ kiirɛ, naʼ mɔn vega daam vɛ vey gɔn, vey hi̧i̧ra ka ve moogummɛ.» 48Yeesu hi̧i̧za há̧a̧ ɛnɔ: «Hii o naʼa min yɛɛ ɛn hii ve daak min ve yɛɛ?» 49Pik an o yek naak kaam an o ve po kə fee: «Vo torɛ: naʼa min vere daay vɛ vey nɛ. 50Ɛnɔ há̧a̧ oò kɔ hɛn Baa min oy bɛlba gǎŋ gɔɔ nɔ hi̧i̧ nɔrɛ nɔ, há̧a̧ ɛn o daay yɔ, o dɛ̧ɛ̧kii yɔ ongɛɛ naʼ min yɔ.»
Currently Selected:
Matiye 12: dae
Highlight
Copy
Compare
Share
Want to have your highlights saved across all your devices? Sign up or sign in
Matiye 12
12
Há̧a̧ tân an o wɔɔk náa Yuuda o ve yo̧o̧ wə̧ə̧ri ba yɔ
Mar 2:23-28; Luk 6:1-5
1Bolaa kaʼso pik an, Yeesu daa bəle hǎn náa Yuuda o ve yo̧o̧ wə̧ə̧riba. Kaam an gɔ̧ll ho̧o̧ vorɛ; Ve gə bəle sokkɔ ve yəʼ dȩȩtɔrɛ#12:1 Vo to Dət 23:26. 2Náa Farize ve fee ka ve hə̧ ɛnɔ, ve feeza Yeesu: «Mɔ torɛ, kaam mɔn vey kɔra hɛn moò buu ban vo ponn ya̧a̧ kɔra náa Yuuda o ve yo̧o̧ wə̧ə̧riba yɛ nɛy!» 3Yeesu hi̧i̧t vo: «Bɔk vo waʼan hɛn Davit bɔk kɔ yo̧o̧n gɔ̧ll ya̧ʼa̧ tin vega náa an ve daŋŋɔ yɛrɛɛ? 4O dɔ Go̧o̧ge ligi vega náa an ve daŋ ve lɛ lɛm bɔk ve po Go̧o̧ge nɔrɛ; bɔk ve liin kaà ve lɛ yɔ yɛ, kaà Daviti, kaà náa an vey moò buu ban vo po ya̧a̧ náa kɔ maak ak doò ve lɛ yo zaʼ#12:4 Vo to 1Sam 21:2-7 po ya̧a̧ náa kɔ maak ak vey zaʼ Vo to Lɛv 24:9. 5On vo waʼan de Moyi̧zə moò buu an yɛ ɓim, náa Yuuda o ve yo̧o̧ wə̧ə̧riba nɔ, náa kɔ maak ak vey kɔra kɔm Go̧o̧ge ligi yo̧o̧ ɛnɔ oppo nɔ, ve zɛbin moò buu náa Yuuda ve yo̧o̧ wə̧ə̧ri von nɔ yɛ, Ɛnɔ o ve po de gbɔ̧ɔ̧k o yɛrɛ? 6Ɛn mi feet vora, ɛtɛɛ nɔ hɛn ɗəə maak likkɔ derɛ! 7Kaà vo gaa de za̧a̧za̧a̧ hɛn Dɛptɛl fee: “Mi hi̧i̧ de sosinna paam maak gokinna vey hɛn za̧a̧n nɔ ve nɛy yɛ”, kaà vo sonin náa ve ɛ̂n gbo̧o̧k yɛ ɛn ve yak yɛ. 8Ɛnɔ há̧a̧ tân an o wɔɔk náa Yuuda o ve yo̧o̧ wə̧ə̧riba yɔ.»
Wa̧y naak vɔɔri akka
Mar 3:1-6; Luk 6:6-11
9Yeesu luu tuu tak dɔ náa Yuuda o ve lik faa yakke. 10Wa̧y naak vɔɔri ak zɔʼ bɔk tuu tin. Náa farize ve hi̧i̧ ka ve kə̧ə̧za Yeesu moǒ; moò an oy ve viʼi: «Moò buu ban vo po ya̧a̧ ho̧o̧ poozii náa Yuuda o ve yo̧o̧ wə̧ə̧ribarɛrɛ?» 11Yeesu hi̧i̧t vo: «Há̧a̧ von daŋga o vo tiŋza̧a̧re oò ɛ tɛ̧ɛ̧ wagaǎ an daŋga, ke pɛ va̧a̧ surire náa Yuuda o ve yo̧o̧ wə̧ə̧ribarɛ, o tak vuksinnay ǐntuu yɛrɛ? 12Ɛn há̧a̧ zɛ ɗəə tɛ̧ɛ̧rɛ! Ɛnɔ, moò buu ban vo po ya̧a̧ há̧a̧ hɛn za̧a̧ kɔzaa náa Yuuda o ve yo̧o̧ wə̧ə̧ribarɛ.» 13Ɛnɔ Yeesu feeza wa̧y nɔ: «Mɔ yɔll naak mɔn nɔrɛ.» O yɔllɛ ɛn naak an nɔ sȩȩ kə za̧a̧za̧a̧ too zɔʼ nɔm. 14Náa Farize ve luu tak visin ka ve kɔ tuubɔgɛ ka ve vɔ̌t yeesu ze nɛy.
Kɔm ak Go̧o̧ge wəʼə nɛy
15Yeesu fee ka kii ɛnɔ, o luu yɛɛ ɛnɔ oppo tuurɛ ɛn náa ve duʼza̧a̧ ve òorarɛ. O poozi náa ho̧o̧ nɔ verɛ tɛʼ, 16Ɛn Yeesu dìn vo kɔʼ tin za̧a̧za̧a̧ doò ve fee o bo hii yɛɛ nɔ sɛ. 17Hɛn nɔ daa too ɛnɔmmɔ kǔt Go̧o̧ge yaʼyɛɛ an Ezǎy yak moot an bɔk fee: 18«Go̧o̧ge fee, yaʼyɛɛ min mi wəʼə nɔ oy nɛ, sȩȩzi orɛ. Mii ɛtta Fəəm dȩȩt min oppo ɛn de feezaa náa ve moò yȩʼȩ za̧a̧ min yɔ. 19Oy yusingaa moò vey há̧a̧ yɛ ɛn de gbazinna wɔɔk yɛ, vey kiina pamò an yanaa yɛ. 20Hɛ̧ɛ̧k oo nuksin ma nɔ oy gənaa ɓɛ yɛ ɛn de ninina lalap oo ʼwap ma nɔ yɛ. De kɔra too ɛnɔm de yaa ɗaksii moò yȩʼȩ za̧a̧ lîkka doʼ. 21Náa ve tɛʼ vey ɛtta si̧i̧ oppo.
Yeesu nɛn fəəm ɓɛɛ nɔ vey
Mar 3:22-30; Luk 11:14-23
22Ve panzay Yeesu wa̧y yə̧ə̧̀ zɔʼ o munna moò fəəm ɓɛɛ bɔk dɔza fɔn. Yeesu poozi wa̧y ɛnɔrɛ, ɛn kəzəkɔ wa̧y nɔ bi̧i̧ yak moo kə hə̧ nɔttɛ. 23Náa ve tɛʼ kɔ vo bit ve fee: «Paam de ɛn Davit tân nɔ oy yɛrɛ?» 24Náa Farize ve fee ka ve kii ɛnɔ, ve fee: «Wa̧y ɛnɔ de nɛnna fəəm ɓɛɛ nɔ ve nɔ Bɛʼɛlzebul, fəəm ɓɛɛ nɔ ve kɛŋ von bo poʼo gɔti yɔ!» 25Ɛn Yeesu gaa moò vəʼəra von nɛ; ɛnɔ o feet vo: «Náa vey kanna gbɛ̧ɛ̧ yɛɛ daŋga nɔ vɛ oo ve kɔsin seè o ve fo̧o̧ni nɔ, gbɛ̧ɛ̧ yɛɛ ɛn nɔ turɛ. Náa vey kanna kap da̧a̧ nɔ vɛ ongɛɛ náa eek da̧a̧ vɛ oo ve kɔsin seè o ve fo̧o̧ni nɔ vey diina yɛ. 26Ɛn Sɛɛɗan o fəəm ɓɛɛ̌, oo nɛn fəəm ɓɛɛ nɔ verɛ nɔ, ɛn o kɔsinga seè vere wɔɔk ani vin. Ɛnɔ, gbɛ̧ɛ̧ an nɔ kaà tak tinba tuubɔgɛ? 27Vo fee boy de nɛnna fəəm ɓɛɛ vɛ nɔ Bɛʼɛzɛbull bo poy gɔti yɔ nɔ; Ɛnɔ von hii po dǎmza̧a̧ vɛ gɔti nɛnin voo yɛ? dǎmza̧a̧ vey vin vey kə̧́ə̧t vora moò yɔ! 28Ɛn min Go̧o̧ge fəəm an poy gɔti feem ɓɛɛ nɔ vɛ nɛnin voo yɔ, ɛn feeri an Go̧o̧ge Gbɛ̧ɛ̧ an yaay o vo po ma. 29«Há̧a̧ oo hi̧i̧ ka dɔ há̧a̧ gɔti ak o kàa ka fa̧a̧ hell an vɛy nɔ, do vɔ̌l há̧a̧ gɔti akkɔ doʼ. Ɛn de hak fa̧a̧ra hɛn an o kàa nɔ ve tɛʼ ze. 30Há̧a̧ oò paam vega mii yɛ o za̧a̧k mini; ɛn ha̧a̧ o maʼzinni sɔ̌ŋŋinna yɛ nɔ oy wɛksii 31Moò an oy, mii feet vora: Há̧a̧ ve tɛʼ hɛn ɓɛɛ von vɛ vere yak zɛɛk von vey zɛɛra Go̧o̧ge nɔ ve tɛʼ de hoozii; Ɛn há̧a̧ oò zɛɛ fəəm dȩȩta nɔ hɛn ɓɛɛ an hoozin yɛ. 32Há̧a̧ oò moo ɓɛɛ Há̧a̧ tân an oppo hɛn ɓɛɛ an de hoozii; ɛn há̧a̧ oò moo ɓɛɛ Fəəm dȩȩt oppo dɔmmɔ hɛn ɓɛɛ an hoozin yɛ, kaà hɛk nɛnɔ oppo, ɛn kaà hɛk de yaay nɔ oppo si̧ʼ.
Tappa vere leet an vɛy
Luk 6:43-45; Mat 7:16-20
33«Tap oò sȩȩrɛ, leet an nɔ vɛy sȩȩ vin. Tap oò ɓɛɛ, leet an vɛy fira ɓɛɛ̌ vin. Ɛnuu, tap de gaana o leet ba. 34Kpəlum sâm vɛ! Lɔ tuubɔgɛ kaà vo fee hɛn za̧a̧ verɛ, ɛnɔ von vo ɓɛɛ̌ nɛy? Ɛnɔ yak de moo vuksii hɛn hi̧ʼ de si̧i̧ ba nɔ vɛy. 35Há̧a̧ za̧a̧ de vuksii hɛn za̧a̧ hi̧ʼ de o si̧i̧ za̧a̧ ba nɔ vɛy; há̧a̧ ɓɛɛ de vuksii hɛn ɓɛɛ hi̧ʼ de o si̧i̧ ɓɛɛ ba nɔ vɛy. 36Mi feet vora: Yo̧o̧ moò yȩʼȩ ba nɔ, Go̧o̧ge de vira náa vɛ, vey hi̧i̧ra yak moot von bɔk ve moo ɓa ɓa nɔ vɛ opporɛ. 37Ɛnɔ vey yȩʼȩmma um yak moot ba, oò mɔ ɛ de gbò̧ò̧kɛ, oò mɔ ɛ̂n de yɛ vey feezumma ze.»
Náa ve haa Yeesu doò kɔt vo hɛn yella
Mar 8:11-12; Luk 11:29-32
38Ɛnɔ náa it Moyi̧zə moò buu an zɔʼ vɛ vere náa Farize zɔʼ vɛ ve feeza Yeesu: «Wa̧y it hɛn, vi hi̧i̧ mɔ kɔt vi hɛn yell ka vi hə̧ ivi timba tɛɛ.» 39Yeesu hi̧i̧t vo: «Náa munɛ nɔ ve ɓɛɛ̌, ve sȩȩn Go̧o̧ge oppo yɛ, vey haara hɛn yella, ɛn vey hakinna yɛ de nan yaʼyɛɛ Zonas an nɛy zaʼ. 40Ɛnuu, de da̧a̧ nɔm vin Zonas bɔk nə yo̧o̧ dɔʼ ta̧a̧to vi̧i̧ dɔʼ ta̧a̧to dut aʼ o pə̧ə̧re, too ɛnɔm vin Há̧a̧ tân an de nəra hɛtte yo̧o̧ dɔʼ ta̧a̧to vi̧i̧ dɔʼ ta̧a̧to. 41Yo̧o̧ moò yȩʼȩ ba nɔ, náa vey kanna Ninivə nɔ vɛ vey luura náa munɛnɔ o ve timba vey kə̧ə̧t voo moǒ, ɛnɔ náa Ninivə bɔk ve kii Zonas pamo an nɔ ve fill kandi von verɛ. Ɛn há̧a̧ ɗəə Zonasɔ oy nɛ! 42Yo̧o̧ moò yȩʼȩ ba nɔ, gbɛ̧ɛ̧ kep zɔʼ sɛk gǎŋ gɔɔ nɔ oppo de luu dii náa munɛ nɔ o ve timba de kə̧ə̧t voo moǒ, ɛnɔ o yaay hɛk yɛɛ yəə ɗəə tin nɔ vɛ oppo hɛkpa ka kii Salomɔŋ yak moot an hi̧ʼ vey moò gaa nɛy#12:42 Vo to Gbg 1 dən 10:1-10. Ɛn há̧a̧ ɗəə Salomɔŋŋɔ oy nɛ!»
Fəəm ɓɛɛ nɔ ɗɛɛ kəyrɛ
Luk 11:24-26
43«Fəəm ɓɛɛ oò vuk há̧a̧ o fɔn, o tak de kəla yɛɛ děmmɔ vɛ oppo ka tee yɛɛ wə̧ə̧rii tin nɛy. Ɛn oò hakin yɛ, 44oy fee: “Mii ɗɛɛ kəra ii kàa, yɛɛ bɔk mi luuy tin nɔ oppo”. O ɗɛɛ kərɛ ɛn tak zee ka̧a̧ nɔ za̧a̧ vin, ve zeerɛ, sɛ̂kkɛ dȩȩt za̧a̧. 45Ɛnɔ o luu tak pani fəəm zɔʼ ve gutambe ve kɔ ɓɛɛ ɗəəərɛ; Vey dɔ kanna kàa tuu daŋ. Si̧ʼtum an, há̧a̧ nɔ kandi an de ya̧tta ɗəəra bɔk tinba nɔrɛ. Hɛn ɛn de daa náa ɓɛɛ munɛ nɔ o ve po too ɛnɔm vin.»
Yeesu eraa ɓimmɔ vey
Mar 3:31-35; Luk 8:19-21
46Yeesu de moogaa náa duʼ nɔ vey keto, ɛn naʼ an vere daak an vɛ ve gbɔ̌yrɛ. Ve diiy gɔn ve tèè ka ve mooga yakka. 47Há̧a̧ zɔʼ feeza Yeesu: «Mɔ kiirɛ, naʼ mɔn vega daam vɛ vey gɔn, vey hi̧i̧ra ka ve moogummɛ.» 48Yeesu hi̧i̧za há̧a̧ ɛnɔ: «Hii o naʼa min yɛɛ ɛn hii ve daak min ve yɛɛ?» 49Pik an o yek naak kaam an o ve po kə fee: «Vo torɛ: naʼa min vere daay vɛ vey nɛ. 50Ɛnɔ há̧a̧ oò kɔ hɛn Baa min oy bɛlba gǎŋ gɔɔ nɔ hi̧i̧ nɔrɛ nɔ, há̧a̧ ɛn o daay yɔ, o dɛ̧ɛ̧kii yɔ ongɛɛ naʼ min yɔ.»
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in