Urom 16
16
Upọl a bii atye
1Mi kee le mi sha amen ma ngye Ufibi, unwaa-ndatyan ungingye. U sha aki kaang he liwu bendi abọng-ale angi he Usenkrea. 2Gbe a be ha amen ha, ma kpe-e abwo afee-afee, likọye u yi undi Ada a na men a. Ma kpe-e nya ana ki yi le bendi Unim be shi. Ma ke-e ukpel uyang-yang angwu a kee le ha amen. A ke bendi gbam ukpel, u ke-m migyang i ọ.
3Ma kọng mi le Uprisila le Akwila bendi-utung aki begi ha Ujeso Kristi. 4Be gbe he be-gyọng he kuhwo kugi, mimi a ye, bendi abọng-ale puu abe be yi abe be yi Ijuus a ye ọ, be pee abe titi.
5Ma mbee kọng mi le liwu bendi abọng-ale angi li kpee ha abe ushọm fe Unim.
Ma kọng mi le Epanetus, udimgi lityam. Ufe na a kpi-kikwu bọng ha Ujeso Kristi kushu he kigie Eshia.
6Ma kọng mi le Umeri angwu a shi aki kaang he liwu limen.
7Ma mbee kọng mi le Andronikus le Ujuniya, bendi kubọng kugi abe be ma yi he igaadye utung ha ami. Be yi bebwaa-kisọm Ujeso Kristi abe be fem lizen a, be bọng ha Unim teng mi.
8Ma kọng mi le Ampiatus, udimgi lityam angwu u fe Ada utyan Ujeso lityam ken ana.
9Ma kọng mi le Ubanus undi-utung aki utyan ha Ukristi. Ma mbee kọng mi le Ustakis, udimgi lityam.
10Ma kọng mi le Apelis angwu Ukristi a nde shob he, bendi be ngye-e dang le u fa Ujeso Kristi lityam ken ana.
Ma kọng mi le bendi Alistobulus.
11Ma kọng mi le Uherọdiyọn, undegi undi Ijuus.
Ma mbee kọng mi le bendi Unasisus abe be yi ke Ada.
12Ma kọng mi le Utirafena le Utirafosa. Bengingye aben be shi Ada utyan Ujeso aki.
Ma kọng mi le Upesis, udimgi lityam. Ungingye angwun ọ a fe ikeb kaang shi Ada utyan Ujeso aki.
13Ma kọng mi le Urufọs angwu Ada a waa kung le u shi-e aki ana. Ma kọng le anam angwu a kung mi na unwaama.
14Ma kọng mi le baa Asinkritus, Ufelegọn, Uhemis, Upatrobas, Uhemas, le bebwaa-ndatyan, bendi Unim, abe be yi ha abe ha.
15Ma mbee kọng mi le baa Ufilologes le Ujulia, Unirius le unwaa-nam ungingye, le Olimpas le bendi Unim puu abe be yi ha abe ha.
16Na bebwaa-nam bende gbe ha Ujeso Kristi, ma gaa bende le uko le uko.
Awu bendi abọng-ale puu a kọng le men.
17Bebuye, mi tim amen anung le ma baa bendi abe be tan le bikwu agie-ale, be mbeb bendi. Biwọm abi be hwọ amen bi yi linaa ha kigyang ashi ma ngye. Ma gbe kpee bendi abe kitaa ana ye. 18Atan-lengi u yi le be fa Ada utyan Ujeso Kristi a ye, be kee-kee shi ashi ki ngbeb abe befe-gyang a. Be kung igie inunung kọng ngbeb bendi le he be be lam kwu bendi abe be nde shob kibibi ye a. 19Bendi puu be ngye le men ma ka igie Unim ife. Mi yi le igọ kaang he kuhwo kumen. Ukpọ mi kee amen le ma bilishi he angyele kinunung. Kibibi kife, mi hwọ amen le ma gbe le abwo fe ha ye.
20Ma Unim angwu u ke ikwun u hwa Usu bibibi, ma tem he abee lishi fa he itang.
Ushang ugi u yi le Ada utyan Ujeso u ke men puu kukwun.
21Utimoti undi-utung aki ugi a kọng le men. Ulusiyus, Ujesen le Usosipata, bebwaa-ndagi Ijuus.
22Mi Utetiyus angwu mi kpel Upọl fee kushia ahwun, mi kọng le men na undemen, undi Ada.
23Ugayus angwu a kpe-m le liwu bendi abọng-ale gye he ahe ushọm ọ, u kọng le men.
Erastus angwu u yi ukandi abe be shi aki kubọng le Ukwatus, be kọng le men.
[ 24Ada Ujeso Kristi u ha ke men puu kukwun. Ki ngyọ na mi kọng.]
25Ma li kung ipee ke Unim! U yi le ikeb le u sha atyam amen a naa gen he kigyang. Ashin na mi de men nyọng mi bun kisọm kinunung gbe le Ujeso Kristi. Ashin na ki yi kigyang ashi Unim a fem ashi tyung he igye gboo. Le ha linde-linde ki ma yi he kundyel, 26ukpọ kanaa-anaa i gbe he igie angi bendi abe be tye ugie kisọm Unim be fee gbe he ikeb Unim angwu u yi ngyọ igye kpam, he kushia Unim, be fem kigyang kimen ana tyung he igye gboo. Be bun ashi de bendi abe be yi Ijuus a ye puu he igye i, nya ana Unim a kọng le be kpe shi, be ke shi ife. 27Unim ufe-ufe na a bilishi! Ipee i kwu ke-e ngyọ igye kpam gbe ha Ujeso Kristi. Ki ngyọ na mi kọng.
Currently Selected:
Urom 16: KUIL
Highlight
Copy
Compare
Share
Want to have your highlights saved across all your devices? Sign up or sign in
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.