Urom 1
1
1Mi Upọl, ubọyi Ujeso Kristi, angwu Unim a waa kung mi le mi kwu Unwaa-kisọm uma, u sọm mi le mi le bun kisọm kinunung kima. 2Kisọm kinunung kimen i na le-iti Unim a ma ke ukyeb gbe ha bitye-ugie kisọm kima, befe be fee ashi he kushia Unim, 3gbe le Unwaama na undi-gye, a be ubu le he kikwu-lihwan Udebid a. 4Na Unim, kife na a wum le he lihwu gbe he ikeb Ukatia Kunyọng angwu a shi-e u yi utaa-utaa. Ashina ki tyung gboo le u yi Ada Ujeso Kristi, Unwaa Unim a. 5Gbe he ahe na bel li kpe beshi Unim na bebwaa-kisọm le li be le bendi abe be ngye Unim ye, be ke-e ife angi be le he abọng-ale gbe he lizen lima. 6Men ọ titi ma yi he liwu bendi abe Unim a ko le be kwu bendi Ujeso Kristi.
7Mi fee kushia ahwun hwaa le men puu he Urom abe ki nyin Unim le men, abe a waa kung tata le ma kwu bendi bema.
Unim Atya-tyan le Ada Ujeso Kristi be ha ke men kukwun, be shi ki kwun amen he atyam kpatia.
Upọl u yi le kigyọ le u gya he Urom
8He lizen Ujeso Kristi, mi pee Unim ugi he kuhwo kumen, likọye bendi mbee igye puu be gyo na ma bọng ha Ujeso Kristi. 9Unim angwu mi fe-e lityam ken he abun-ale kisọm kinunung gbe le Unwaama, a naa mi ushada le mi kọng he ahe mbee kunyọng ka amen. 10Mbee kunyọng puu mi kọng ha Unim, mi bii he le gbe ki ngbeb he, u ma buu mi kukwo mi be ha amen ha.
11Mi yi le kigyọ kaang le hang mi nde men, he abele ugi ha u be le kuke le ha Ukatia Kunyọng ke men, u shi amen ma naa gen fe Unim. 12Ashi mi kọng ana ki ze le, mi kee le abọng-ale atyan a fe bende ingie. 13Bebuye, mi kee amen le ma ngye le, kpam be wu kunyin i, mi kaa le mi be ha amen ha, mi nda kunyọng ye. Mi kee le mi ba ha, mi shi aki angi a kwu le lifem linunung he liwu limen na mi shi he abọng angi a teng.
14Ki yi kpe-kpe le mi bun kisọm kinunung de bendi Igrik le abe be yi bendi igrik a ye. Ki yi le mi bun ashi de bendi abe be buu ashi, le abe be so ashi kpi-kpi, mi bun de bendi abe be yi dang le abe be yi kpelye ọ. 15He ashin, mi yi le kigyọ kaang le mi bun kisọm kinunung da amen abe he Urom ọ titi.
16Ishwia i sha-m he abun-ale kisọm kinunung ashin ye. Kife na ki yi ikeb Unim angi i ke likpan. Gbe he kisọm kinunung kimen i na Unim u kpan bendi puu abe be bọng he ahe. Be bun ashi de Ijuus, saa be ha bun de bendi abe be yi Ijuus a ye. 17Kisọm kinunung kimen i ki tyung na kanaa-anaa i Unim u shi bendi be fel benunung he ashi ama kee-kee gbe he abọng-ale ufe-ufe a, gbe he kisuso pel ha abọng-ale ye. Ki yi nya ana be fee he kushia Unim a le, “Bendi abe be yi kpa-kpa, be kpan gba he abọng-ale abel.”#1:17 Uhabakọk 2:3, 4
Ingyo Unim ha bendi kiban
18Unim u tyung ingyo ima le he lifung-atabe ha bendi bebibi le aki abel, abe be ngyo kigyang fa he bibibi bibel. 19Gbe kiyang-yang ashi ki yi gbe le Unim, be ngye shi, likọye Unim a fem ashi tyung abe. 20Kung le ha kunyọng ahwu Unim a shi igye anyin puu, biwọm abi a shi bi tyung bendi gboo kitaa Unim u yi, ma na be nde-e le atọng-shi ye ọ. Bi tyung gboo le ikeb ima i yi kitaa ken ngyọ igye, bi tyung le u yi Unim ugyang angwel a. He atan-lengi angwun, bendi-biban abena be yi le ashi be kwu kubwo hwaa ingyo Unim ye.
21Ma na be ngye gbe le Unim ọ, be ka he ife angi i kee he ahe ọ, nyọng be pee he ọ ye. Igim ibel i fel kididing, be fel he kifufeb, ashi ki yi kpa-kpa ki tem nung abe ye. 22Be kọng le be yi dang, ukpọ be yi bikwaa a. 23Ashi le be fe Unim angwu a sho le ifem, u hwo ye, be tem fel fa litelakpa angi be tan na bendi-gye abe be hwo, le linyun, le inyia, le ishii angi i suu lifung he itang.
24He ashina Unim a tyang abe abwo le be ndu shi bibibi abi bi kee ha atyam abel, be mbee shi biwọm ishwia ha bende. 25Be swan kigyang ashi gbe le Unim, be fel tan he akwo iman. Be fa biwọm abi Unim a shi a, fem Unim ugyang angwu a shi biwọm puu tyang. Ki shi le Unim a kpe le be pee he ngyọ igye kpam. Ki ngyọ na li kọng.
26He atan-lengi angwuna Unim a tyang abe kikung le be ndu shi biwọm ishwia abi bi yi bigyọ bibel. Bengingye bebel ọ be tyang bengikye tem fel gba ipel ha bende ashi ki tel Unim kaang. 27Bengikye ọ titi, be tyang andele ipel ha bengingye tem fel nda ipel ha bende. Biwọm abi be shi bi yi ishwia-ishwia. Be ba le ushe Unim angwu a kee ha swa kuhwobel he lishi.
28He ashin, nya ana be kwu igil gbe le lingye Unim ye, Unim a tyang abe kikung le be fel shi bibibi faale abwo akwole. 29Atyam abel a sho le biban le bibibi, be ndọ lishi biwọm bendi, be sha kibibi ha bende, be ban lityam fe kiwọm undi, be gwu bendi, be shwan kushwan, be ndo kundo, be lam bendi, be bel bendi kibibi, be kem bende, 30be kọng bia bendi, be shi bendi-linaa Unim, be kaa lishi, be dim idim, be pwọm ungwu, mbee kunyọng puu be gim kukwo kufufe ahwu be shi kiban, be fa betya-bel ọ, nyọng bendabel ọ ye. 31Be yi faale le unung-ale, be ndọ ikyeb ibel ye, be yi faale benyin, be shi faale beshi. 32Ma na be ngye le Unim a de le bendi abe be shi bitaa biwọm abina be ba le lihwu ka kuhwobel ọ, be so-i gya kushu sha abi. Ashina kife-kife a ye, be bọng fa bendi abe be shi biwọm bimen abin ọ.
Currently Selected:
Urom 1: KUIL
Highlight
Copy
Compare
Share
Want to have your highlights saved across all your devices? Sign up or sign in
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.