Umatiu 27
27
Ujudas a shwia kuhwo-ma
(Mak 15:1; Luk 23:1-2; Jọn 18:28-32)
1Ashi a taa le-iti-le-iti, bekandi bishang Unim le bekandi kubọng be gbọng kiteng ken tim le be gwu Ujeso. 2Be ha kwu-e bwọ indii he abwo te le he le ke Upontus Palet angwu a ma yi ufaa-ukwob he Urom.
3He kunyọng ahwu Ujudas angwu a ma ndyeb Ujeso zi a nde le be kam le be gwa Ujeso, unde angwu bekandi bishang Unim le abe he kubọng be ma ke-e ndyeb Ujeso, a tem le he le ke be likọye ki tem fel ban he. 4Ujudas a de bekandi ana le, “Mi shi kiban a he andyeb-ale undi ununung zi le be gwu.”
Befe be de-e le, “Ashina ki gbee li bel na a? Ashina ki yi ka-a wo ututeb a.”
5Ujudas a zob unde ana wu abe ha he Ushọm Unim. A gbe le ha le shwia kuhwo-ma.
6Bekandi bishang Unim be kung unde umen ana. Be de le uten ubel a bọng le be kung unde anung fe he ibam kuke he Ushọm Unim ye. 7Be kwu azu gbe le unde umen ana. Be kung he ndyeb kiteng ashi be fel ngi begaa-ndi. Be ndyeb kiteng ashi ha le ha undi angwu u mbe biki a. 8Kung le ha ana kpam be wu kunyin nyin, be ko kiteng kimen ana le kiteng anung. 9Ki shi nya ana Ujerimaya utye-ugie kisọm Unim, a ma kọng a. A ma de le, “Be kung ikwudi lisi le ngi lihwo imen ana angi bendi Izwel be ma bọng le be ka ndyeb he. 10Be kung unde umen ana ndyeb itang undi angwu u mbe biki nya ana Ada Unim a ma de-m a.”#27:10 Uzakariya 11:12
Ujeso a naa he kushu Upalet
(Mak 15:2-5; Luk 23:3-5; Jọn 18:33-38)
11Be te le Ujeso le hwaa le Usu Upalet. Upalet a bii Ujeso le, “Wo yi usu Ijuus a?”
Ujeso a fan he le, “wogyang na wo kọng na.”
12Biwọm puu abi bekandi bishang Unim le abe he kubọng be kọng fe Ujeso, a fan abe kikpukpo ukung ọ ye. 13Upalet a ha kung bii he le, “Wo gyo biwọm abi be kọng fa-a i ye a?” 14Ujeso a ha fan he zang ọ ye. Ki kwu Upalet he kuhwo kaang na a kwu-e he ungwu kpii.
15He lize liyang-yang he kunyọng ahwu be shi kipam agbele-gyọng, Upalet u shaa tyang undi igaadye ken abwo angwu ufam itang a waa le u tyang he. 16He kunyọng kumen ana undi ken a ma yi he igaadye, be maa ko he le Ujeso Barabas. A maa sha bibibi kaang. 17Ufam itang puu a kpee liwu. Upalet a bii abe le u fem ayang a tyang abwo: Ujeso Barabas a, ha Ujeso angwu be ko le Ukristi a? 18Ufe-gyang ọ a ma ngye dang le be kwu Ujeso be ke-e he katel a.
19Nya ana Upalet a ma so kwu he kidem usu, ungye-ma a sọm kisọm hwaa le he le, u nde le a shi undi ununung angwu u maa he ushe ana kiwọm kiyang-yang ye. Ufe a shi itam gbe le he i ngbeb he ye.
20Bekandi bishang Unim le abe he kubọng be fe bendi ingie le be le de Upalet le u waa Ubarabas tyang abwo, u gwu Ujeso.
21Ufaa-ukwob Upalet a ha bii liwu bendi le, “Bendi befee abena, ayang angwu ma kee le mi fe-m he tyang abwo?”
Be de-e le u waa Ubarabas a.
22Upalet a bii abe le, u ha shi Ujeso angwu be ko le Ukristi na a?
Be de-e le, “Maa gwu-e bee he kikpakpa!”
23Upalet a bii abe le, kibang kibibi ashi a shi ukpọ?
Be kung gaa kaang le, “Maa gwu-e bee he kikpakpa!”
24Upalet a nde le u fel ban kunyọng likọ a, likọye bendi be ma fel he ashi linaa-linaa. A ha kọng, be be le umbwo ke-e. He ashi bendi puu a to abwo ama, u de be le, “Mi na mi ke men ikeb le ma gwu-e ye. Gbe ma gwu-e, ha mi yi amen le abwo he anung ama ye.”
25Befe puu be kung fan le, “Anung ama a kwu he lishi lityan le bebwaa-tyan!”
26Upalet a ha fem Ubarabas le he igaadye tyang abwo. U de ishogya le i le kwu Ujeso kpam. A ha kwu-e ke be le be maa he bee he kikpakpa.
Ishogya i nyan Ujeso
(Mak 15:16-20; Jọn 19:2-3)
27Ishogya Ufaa-ukwob i kwu Ujeso te le he gye he kudyan usha-ale Upalet. I ko bebel ishogya puu be ukem. 28Be waa he aliga le he inyia-hwo ndọ he itang, be tem le aliga uwulu abwaa shi-e. 29Be tim kishi-lishi itọng shi-e he lishi. Be kung utyuu fe-e he kubwo lizen. Be nyan he le bel tim anung he itang le be fa he. Be de-e le, “Usu Ijuus, li kọng le wo.” 30Be sho akung wu-e. Be kpe kung utyuu le he ahe, be tem le he kpam he he lishi, be mbee bwan kpam he. 31Be nyan he puu, be ha waa he aliga uwulu abwaa tem le ama agyang shi-e. Be ha ndu gbe le he gye he kiteng ashi be le maa he bee he kikpakpa.
Be maa Ujeso bee he kikpakpa
(Mak 15:21-32; Luk 23:26-43; Jọn 19:17-27)
32Nya ana be maa ndọ ashi gye, be kpee le ungikye ken angwu be ko le Usaimọn. A ma yi undi kubọng Usairen a. Ishogya i kwu-e he ikeb le u so kikpakpa ashi be le maa Ujeso bee. 33Be le wu he kiteng ashi be ko le Ugolgọta (ashi ki ze le, “Kiteng kikpukpo lishi”). 34Nya na be kung kutyo bel pel ha kiwọm ashi ki zu, ke Ujeso le u ngwo. Be kung abi gwaa Ujeso he ungwu, ukpọ a ngwo ye. 35Be kwu-e le maa bee he kikpakpa, kung ashi beb he itang. Be kung inditen ima hwọ ke bende gbe he ububo-ububo atyele. 36He kunyọng ahwu be hwọ inditen ima puu, be ngyọ kwu ha, be kang he. 37Be fee fe ha he kusi kikpakpa gbe le kiwọm ashi be de le a shi le,
Angwun na u yi Ujeso, Usu Ijuus.
38Be maa bendi bikpung befee bee utung ha Ujeso. Be maa angwu ken bee he le he kubwo lizen, be maa angwel bee he le he kubwo limbel. 39Bigbe kukwo abe be ma nde Ujeso na a bee he kikpakpa, be yii lishi, be kọng bia he. 40Be de-e gye ha le, “Engheng, wo angwu wo de le wo gyeb ushọm Unim tem le he tya he ati akie. Gbe wo ma ma yi Unwaa Unim a, shul le he kikpakpa be he itang wo kpan kuhwo-gang.” 41Bekandi bishang Unim le bitisha Iten le bekandi kubọng be fel nyan he kitaa ken. 42Be kọng ha bende le, “U kpan bendi, ukpọ u kpan kuhwo-ma mbee ye. Usu Izwel a? U shul le he kikpakpa be he itang kanaa-anaa i, ma bel li bọng he ahe. 43Gbe u kee-kee fe lityam ha Unim ufe-ufe a, u de le u yi Unwaa Unim a, bel li kee le li nda na Unim u kpan he kanaa-anaa i.” 44Bendi bikpung abe be maa abe bee he kikpakpa utung he ahe ọ titi, be maa kọng bia he.
Lihwu Ujeso
(Mak 15:33-41; Luk 23:44-49; Jọn 19:28-30)
45He libwee kudyan lishi, kifufeb ki ma gye kpen he kubọng kumen ana kpam le kwọm he inde-ikie le ishu likwu-lukwu. 46He inde-ikie le ishu, Ujeso a kung kaang he igie ibel le, “Eli, Eli, lema sabake-tani,” ashi ki ze le, “Unim ugi, Unim ugi, kibang a, wo mọ mi?”#27:46 Agyam 22:1
47Bendi besuso abe be ma yi naa ha, abe be gyo he, be fel da le, u ko Elaija a.
48Undi ken a buu le kung kudedel le kib he kimia kutyo, kung kil he ukwan le nda tyọ Ujeso he kikpu-ngwu le u ngwo. 49Bendi abe be teng be de bende le, “Ma li kwu he li nde le Elaija u ba kpan he a.”
50Ujeso a mbee kung kaang, u tyang kunyọng kuma abwo.
51Kihwọm kikandi ashi be tye tang kipo he afee Ushọm Unim, ki gie kung le he kusi be tang he itang. Isun i ma kwuo. Akọ a kpam gie bigie. 52Akwun a buu ingwu fel hwuo. Agwo bendi Unim gbam abe be ma hwo le-iti, be tem wum. 53Le he kushu he kunyọng ahwu Ujeso a wum le he lihwu, befe ọ titi be fem be he igye le ha abe akwun, gbe ndo he Ujeruselem he kipi bendi gbam be nde be.
54Ukandi ishogya le ishogya ima abe be ma yi naa ha be kang Ujeso, be nde na isun i kwuo le biwọm puu abi bi shi. Be fel he kushel kaang. Be de le, “Ungikye angwun u yi Unwaa Unim a kigyang-kigyang.”
55Bengingye gbam be ma yi naa ha, be nda ba ha le kigbe-kigbe. Be ma pwọm Ujeso le he Ugalili he be be nde gbe le he. 56Umeri Magdalen le Umeri anam Ujems befe le Ujosef, le anam bebwaa Uzebedi be ma yi he liwu bengingye bemen ana.
Angyele Ujeso
(Mak 15:42-47; Luk 23:50-56; Jọn 19:38-42)
57Likwu-lukwu li gyeb, undi-kingbeb ken angwu be ko le Ujosef, angwu a ma yi undi-utung Ujeso, u shi kubọng Alimatia, a ma wu ha. 58He kunyọng ahwu Ujeso a hwo, a le hwaa le Upalet, u bii he le u ke-e ikeb he u le gye le likwọm Ujeso. Upalet a ke ikeb le be ke Ujosef kukwo he u gye le likwọm Ujeso. 59Ujosef a le kung likwọm ana, kung kihwọm kifung ashi ki yi kitaa-kitaa kung nii angi. 60A te le likwọm Ujeso ana le ngi he likwun angi a tem lifufe he kukọ ndọ kuhwo-ma. A mung kukọ kukandi le shi ha ungwu likwun. A ha gbe ligye. 61Umeri Magdalen le Umeri ususo be ma yi kwu he kigie kee ashi ha likwun, be nda ashi gya he likwun.
Bendi abe be kang likwun
62He utepwọm liti angi li yi liti-uwel Ijuus, bekandi bishang Unim le bendi Iferesis be ma kpee he ukem le hwaa le Upalet. 63Be de-e le, “Ukandi, li wel le he kunyọng ahwu undi-ilam angwuna a ma so uwum, a maa da bendi le, ufe u hwa, u tem wum he liti lekie. 64Ke uten le be kang likwun ana kpam le kwọm ati akie teng bendi-utung bema be ba le kusu be za fem likwọm lima, be be uman le a wum le he lihwu. Gbe ki shi na, ha uman ubel angwun u fel ban ashi hwa angwu a ma be he kunyọng ahwu a ma yi uwum.”
65Upalet a ke be uten le be le waa kung ishogya ima te le ngi i le kang likwun limen ana mbee le ikeb ibel puu. 66Be bo ndo ha le shi ungwu likwun le kukọ, be ndọ bendi le be kang angi.
Currently Selected:
Umatiu 27: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
Umatiu 27
27
Ujudas a shwia kuhwo-ma
(Mak 15:1; Luk 23:1-2; Jọn 18:28-32)
1Ashi a taa le-iti-le-iti, bekandi bishang Unim le bekandi kubọng be gbọng kiteng ken tim le be gwu Ujeso. 2Be ha kwu-e bwọ indii he abwo te le he le ke Upontus Palet angwu a ma yi ufaa-ukwob he Urom.
3He kunyọng ahwu Ujudas angwu a ma ndyeb Ujeso zi a nde le be kam le be gwa Ujeso, unde angwu bekandi bishang Unim le abe he kubọng be ma ke-e ndyeb Ujeso, a tem le he le ke be likọye ki tem fel ban he. 4Ujudas a de bekandi ana le, “Mi shi kiban a he andyeb-ale undi ununung zi le be gwu.”
Befe be de-e le, “Ashina ki gbee li bel na a? Ashina ki yi ka-a wo ututeb a.”
5Ujudas a zob unde ana wu abe ha he Ushọm Unim. A gbe le ha le shwia kuhwo-ma.
6Bekandi bishang Unim be kung unde umen ana. Be de le uten ubel a bọng le be kung unde anung fe he ibam kuke he Ushọm Unim ye. 7Be kwu azu gbe le unde umen ana. Be kung he ndyeb kiteng ashi be fel ngi begaa-ndi. Be ndyeb kiteng ashi ha le ha undi angwu u mbe biki a. 8Kung le ha ana kpam be wu kunyin nyin, be ko kiteng kimen ana le kiteng anung. 9Ki shi nya ana Ujerimaya utye-ugie kisọm Unim, a ma kọng a. A ma de le, “Be kung ikwudi lisi le ngi lihwo imen ana angi bendi Izwel be ma bọng le be ka ndyeb he. 10Be kung unde umen ana ndyeb itang undi angwu u mbe biki nya ana Ada Unim a ma de-m a.”#27:10 Uzakariya 11:12
Ujeso a naa he kushu Upalet
(Mak 15:2-5; Luk 23:3-5; Jọn 18:33-38)
11Be te le Ujeso le hwaa le Usu Upalet. Upalet a bii Ujeso le, “Wo yi usu Ijuus a?”
Ujeso a fan he le, “wogyang na wo kọng na.”
12Biwọm puu abi bekandi bishang Unim le abe he kubọng be kọng fe Ujeso, a fan abe kikpukpo ukung ọ ye. 13Upalet a ha kung bii he le, “Wo gyo biwọm abi be kọng fa-a i ye a?” 14Ujeso a ha fan he zang ọ ye. Ki kwu Upalet he kuhwo kaang na a kwu-e he ungwu kpii.
15He lize liyang-yang he kunyọng ahwu be shi kipam agbele-gyọng, Upalet u shaa tyang undi igaadye ken abwo angwu ufam itang a waa le u tyang he. 16He kunyọng kumen ana undi ken a ma yi he igaadye, be maa ko he le Ujeso Barabas. A maa sha bibibi kaang. 17Ufam itang puu a kpee liwu. Upalet a bii abe le u fem ayang a tyang abwo: Ujeso Barabas a, ha Ujeso angwu be ko le Ukristi a? 18Ufe-gyang ọ a ma ngye dang le be kwu Ujeso be ke-e he katel a.
19Nya ana Upalet a ma so kwu he kidem usu, ungye-ma a sọm kisọm hwaa le he le, u nde le a shi undi ununung angwu u maa he ushe ana kiwọm kiyang-yang ye. Ufe a shi itam gbe le he i ngbeb he ye.
20Bekandi bishang Unim le abe he kubọng be fe bendi ingie le be le de Upalet le u waa Ubarabas tyang abwo, u gwu Ujeso.
21Ufaa-ukwob Upalet a ha bii liwu bendi le, “Bendi befee abena, ayang angwu ma kee le mi fe-m he tyang abwo?”
Be de-e le u waa Ubarabas a.
22Upalet a bii abe le, u ha shi Ujeso angwu be ko le Ukristi na a?
Be de-e le, “Maa gwu-e bee he kikpakpa!”
23Upalet a bii abe le, kibang kibibi ashi a shi ukpọ?
Be kung gaa kaang le, “Maa gwu-e bee he kikpakpa!”
24Upalet a nde le u fel ban kunyọng likọ a, likọye bendi be ma fel he ashi linaa-linaa. A ha kọng, be be le umbwo ke-e. He ashi bendi puu a to abwo ama, u de be le, “Mi na mi ke men ikeb le ma gwu-e ye. Gbe ma gwu-e, ha mi yi amen le abwo he anung ama ye.”
25Befe puu be kung fan le, “Anung ama a kwu he lishi lityan le bebwaa-tyan!”
26Upalet a ha fem Ubarabas le he igaadye tyang abwo. U de ishogya le i le kwu Ujeso kpam. A ha kwu-e ke be le be maa he bee he kikpakpa.
Ishogya i nyan Ujeso
(Mak 15:16-20; Jọn 19:2-3)
27Ishogya Ufaa-ukwob i kwu Ujeso te le he gye he kudyan usha-ale Upalet. I ko bebel ishogya puu be ukem. 28Be waa he aliga le he inyia-hwo ndọ he itang, be tem le aliga uwulu abwaa shi-e. 29Be tim kishi-lishi itọng shi-e he lishi. Be kung utyuu fe-e he kubwo lizen. Be nyan he le bel tim anung he itang le be fa he. Be de-e le, “Usu Ijuus, li kọng le wo.” 30Be sho akung wu-e. Be kpe kung utyuu le he ahe, be tem le he kpam he he lishi, be mbee bwan kpam he. 31Be nyan he puu, be ha waa he aliga uwulu abwaa tem le ama agyang shi-e. Be ha ndu gbe le he gye he kiteng ashi be le maa he bee he kikpakpa.
Be maa Ujeso bee he kikpakpa
(Mak 15:21-32; Luk 23:26-43; Jọn 19:17-27)
32Nya ana be maa ndọ ashi gye, be kpee le ungikye ken angwu be ko le Usaimọn. A ma yi undi kubọng Usairen a. Ishogya i kwu-e he ikeb le u so kikpakpa ashi be le maa Ujeso bee. 33Be le wu he kiteng ashi be ko le Ugolgọta (ashi ki ze le, “Kiteng kikpukpo lishi”). 34Nya na be kung kutyo bel pel ha kiwọm ashi ki zu, ke Ujeso le u ngwo. Be kung abi gwaa Ujeso he ungwu, ukpọ a ngwo ye. 35Be kwu-e le maa bee he kikpakpa, kung ashi beb he itang. Be kung inditen ima hwọ ke bende gbe he ububo-ububo atyele. 36He kunyọng ahwu be hwọ inditen ima puu, be ngyọ kwu ha, be kang he. 37Be fee fe ha he kusi kikpakpa gbe le kiwọm ashi be de le a shi le,
Angwun na u yi Ujeso, Usu Ijuus.
38Be maa bendi bikpung befee bee utung ha Ujeso. Be maa angwu ken bee he le he kubwo lizen, be maa angwel bee he le he kubwo limbel. 39Bigbe kukwo abe be ma nde Ujeso na a bee he kikpakpa, be yii lishi, be kọng bia he. 40Be de-e gye ha le, “Engheng, wo angwu wo de le wo gyeb ushọm Unim tem le he tya he ati akie. Gbe wo ma ma yi Unwaa Unim a, shul le he kikpakpa be he itang wo kpan kuhwo-gang.” 41Bekandi bishang Unim le bitisha Iten le bekandi kubọng be fel nyan he kitaa ken. 42Be kọng ha bende le, “U kpan bendi, ukpọ u kpan kuhwo-ma mbee ye. Usu Izwel a? U shul le he kikpakpa be he itang kanaa-anaa i, ma bel li bọng he ahe. 43Gbe u kee-kee fe lityam ha Unim ufe-ufe a, u de le u yi Unwaa Unim a, bel li kee le li nda na Unim u kpan he kanaa-anaa i.” 44Bendi bikpung abe be maa abe bee he kikpakpa utung he ahe ọ titi, be maa kọng bia he.
Lihwu Ujeso
(Mak 15:33-41; Luk 23:44-49; Jọn 19:28-30)
45He libwee kudyan lishi, kifufeb ki ma gye kpen he kubọng kumen ana kpam le kwọm he inde-ikie le ishu likwu-lukwu. 46He inde-ikie le ishu, Ujeso a kung kaang he igie ibel le, “Eli, Eli, lema sabake-tani,” ashi ki ze le, “Unim ugi, Unim ugi, kibang a, wo mọ mi?”#27:46 Agyam 22:1
47Bendi besuso abe be ma yi naa ha, abe be gyo he, be fel da le, u ko Elaija a.
48Undi ken a buu le kung kudedel le kib he kimia kutyo, kung kil he ukwan le nda tyọ Ujeso he kikpu-ngwu le u ngwo. 49Bendi abe be teng be de bende le, “Ma li kwu he li nde le Elaija u ba kpan he a.”
50Ujeso a mbee kung kaang, u tyang kunyọng kuma abwo.
51Kihwọm kikandi ashi be tye tang kipo he afee Ushọm Unim, ki gie kung le he kusi be tang he itang. Isun i ma kwuo. Akọ a kpam gie bigie. 52Akwun a buu ingwu fel hwuo. Agwo bendi Unim gbam abe be ma hwo le-iti, be tem wum. 53Le he kushu he kunyọng ahwu Ujeso a wum le he lihwu, befe ọ titi be fem be he igye le ha abe akwun, gbe ndo he Ujeruselem he kipi bendi gbam be nde be.
54Ukandi ishogya le ishogya ima abe be ma yi naa ha be kang Ujeso, be nde na isun i kwuo le biwọm puu abi bi shi. Be fel he kushel kaang. Be de le, “Ungikye angwun u yi Unwaa Unim a kigyang-kigyang.”
55Bengingye gbam be ma yi naa ha, be nda ba ha le kigbe-kigbe. Be ma pwọm Ujeso le he Ugalili he be be nde gbe le he. 56Umeri Magdalen le Umeri anam Ujems befe le Ujosef, le anam bebwaa Uzebedi be ma yi he liwu bengingye bemen ana.
Angyele Ujeso
(Mak 15:42-47; Luk 23:50-56; Jọn 19:38-42)
57Likwu-lukwu li gyeb, undi-kingbeb ken angwu be ko le Ujosef, angwu a ma yi undi-utung Ujeso, u shi kubọng Alimatia, a ma wu ha. 58He kunyọng ahwu Ujeso a hwo, a le hwaa le Upalet, u bii he le u ke-e ikeb he u le gye le likwọm Ujeso. Upalet a ke ikeb le be ke Ujosef kukwo he u gye le likwọm Ujeso. 59Ujosef a le kung likwọm ana, kung kihwọm kifung ashi ki yi kitaa-kitaa kung nii angi. 60A te le likwọm Ujeso ana le ngi he likwun angi a tem lifufe he kukọ ndọ kuhwo-ma. A mung kukọ kukandi le shi ha ungwu likwun. A ha gbe ligye. 61Umeri Magdalen le Umeri ususo be ma yi kwu he kigie kee ashi ha likwun, be nda ashi gya he likwun.
Bendi abe be kang likwun
62He utepwọm liti angi li yi liti-uwel Ijuus, bekandi bishang Unim le bendi Iferesis be ma kpee he ukem le hwaa le Upalet. 63Be de-e le, “Ukandi, li wel le he kunyọng ahwu undi-ilam angwuna a ma so uwum, a maa da bendi le, ufe u hwa, u tem wum he liti lekie. 64Ke uten le be kang likwun ana kpam le kwọm ati akie teng bendi-utung bema be ba le kusu be za fem likwọm lima, be be uman le a wum le he lihwu. Gbe ki shi na, ha uman ubel angwun u fel ban ashi hwa angwu a ma be he kunyọng ahwu a ma yi uwum.”
65Upalet a ke be uten le be le waa kung ishogya ima te le ngi i le kang likwun limen ana mbee le ikeb ibel puu. 66Be bo ndo ha le shi ungwu likwun le kukọ, be ndọ bendi le be kang angi.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.