Matiu 7
7
1Ekusioño owo ndo, man edisioño mbufo ndo. 2Koro nte mbufo esioñode owo ndo, kpa ntre ke edisioño mbufo ndo. Ndien udomo emi mbufo edade edomo, ke edida idomo inọ mbufo. 3Ntak emi afo esede ekpri mbio emi odude ke enyin eyen ete fo, edi ukereke ibio eto emi odude ke enyin fo? 4Didie ke afo edidọhọ eyen ete fo ete, yak nsio ekpri mbio ke enyin fo, ndien sese, ibio eto mmọdo ke enyin fo? 5Afo mbubik, bem iso sio ibio eto oro ke enyin fo fep, ndien afo eyetim okut usuñ nte adade osio ekpri mbio ke enyin eyen ete fo efep.
6Ekumen edisana ñkpọ enọ ebua, ekunyuñ eduọñọ ñkpọuto mbufo ke iso mme edi, man mmọ edidighi ke ukot mmọ, enyuñ ewọñọrede ebine mbufo.
7Ebeñe, ndien eyenọ mbufo, eyom, ndien mbufo eyekut, etuak ndien eyeberede usuñ enọ mbufo; 8koro owo kiet kiet emi ebeñede, eyebọ; ndien owo ekededi emi oyomde, eyekut; ndien eyeberede usuñ enọ enyemi atuakde. 9Anie ke otu mbufo edinọ eyen esie itiat ke ini enye ebeñede uyo? 10Mme ndinọ enye urukikọt ke ini enye ebeñede iyak? 11Edieke mbufo emi ediọide efiọkde ndinọ nditọ mbufo nti enọ, adaña didie ke Ete mbufo emi odude ke enyọñ edinọ mmọ emi ebeñede Enye nti ñkpọ ikan oro!
12Ke ntre se ededi emi mbufo eyomde owo anam ye mbufo, enam kpa ntre ye mmọ, koro emi edide se ibet ye mme prọfet Abasi ekpepde.
Usuñ Obio Ubọñ Abasi
13Ebe ke mfafaha usuñ eduk, koro usuñ emi adade owo aka nsobo atara, ọkpọusuñ esie onyuñ añwaña, mme mmọ emi edukde ebe ke esit ewak. 14Edi usuñ emi adade owo osim Obio Ubọñ Abasi afafaha, ọkpọusuñ esie onyuñ afaha ndien mmọ emi ekutde enye iwakke.
15Ekpeme mme andikpep emi ekpepde mme nsu nsu ukpepñkpọ, emi efọrọde ikpa erọñ, edi etiene mbufo. Edi ke esit mmọ, mmọ edi ekpe ikọt. 16Mbufo eyeda mfri mmọ ediọñọ mmọ. Nte owo ekeme nditet sokoro nto kpukpru eto ñkukim? Mme udari ke mbaraekpe? 17Kpa ntre ke kpukpru nti eto eñwum nti mfri, edi ndiọi eto eñwum ndiọi mfri. 18Eti eto ikemeke ndiñwum idiọk mfri, idiọk eto inyuñ ikemeke ndiñwum eti mfri. 19Eto ekededi emi miñwumke nti mfri, eyesibe enye enyuñ emen esin ke ikañ. 20Ke ntre mbufo eyeda mfri eto ediọñọ eto.
21Idighe kpukpru mmọ emi ekotde Mi ete, Ọbọñ, Ọbọñ, ediduk ke Obio Ubọñ Abasi; edi enyemi akade iso ndinam uyo Ete Mi emi odude ke enyọñ. 22Ediwak owo eyedọhọ Mi ke usen oro, ete, Ọbọñ, Ọbọñ, nte ñnyin ikadaha enyiñ Fo isiak uduak Fo, inyuñ ida enyiñ Fo ibin mme dimọn, inyuñ ida enyiñ Fo inam mme ediwak utibe ñkpọ? 23Ndien Ami ñyedọhọ mmọ iso ye iso nte, akananam Ami ndiọñọke mbufo, edaha Mi ke iso, mbufo mme oburobut owo.
24Ntem owo kiet ekededi emi okopde ikọ Mi emi, onyuñ anamde mmọ, ñyedomo enye ye enyene ibuot owo emi ọbọpde ufọk esie ke enyọñ akamba itiat. 25Edim edep, ukwọ onyuñ edi, ofum onyuñ abara, onyuñ ebere ke ufọk oro, ndien enye iduọhọ koro ebọpde enye ke enyọñ akamba itiat.
26Edi owo kiet ekededi emi okopde ikọ Mi emi, ndien inamke, eyedomo enye ye ndisime owo emi ọbọpde ufọk esie ke enyọñ utatan. 27Edim edep, mmọñ ukwọ onyuñ edi, ofum onyuñ abara ebere ufọk oro ndien enye ọduọ, ñwure esie onyuñ okpon. 28Edikem ke ini Jisọs ama eketiñ mme ikọ emi ama, idem ama akpa mme otu owo oro ke abaña mme ukpepñkpọ Esie. 29Koro Enye ekekpepde mmọ ñkpọ ye uko, ọkpuhọde ye mme andikpep mme Ju.
Currently Selected:
Matiu 7: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
