Matiu 24
24
Jisọs Ese Ini Iso
1Nte Jisọs osuk asañade ọwọrọ ọkpọñ añwa itie ukpono, mbet Esie esaña etiene Enye, enyuñ eyom ndida Enye nsaña ñkanade nse kpukpru esit ufọk emi edude ke itie ukpono.
2Edi Enye ama ọdọhọ mmọ ete, “Nte mbufo emekut kpukpru ñkpọ emi? Ami ntiñ akpanikọ nnọ mbufo nte, ke idiyakke itiat ndomokiet odoro ke eken, eyedoñode kiet kiet eduọñọ.”
3Nte Jisọs etiede ke obot Ọlif, mme mbet Esie edi edibup Enye ke ndibe, ete, “Tiñ nọ ñnyin ini emi mme ñkpọ emi editibede, ye se ididide idiọñọ edidi fo ye eke utit ini.”
4Jisọs ama ọbọrọ mmọ ete, “Ekpeme, ekuyak owo ndomokiet abiaña mbufo. 5Koro ediwak owo eyedi ke enyiñ Mi, enyuñ edọhọ ete, ‘Ami ndi Kraist oro,’ ndien mmọ eyebiaña ediwak owo. 6Mbufo eyekop ebaña ekọñ ñkpet-ñkpet, ye uyom ekọñ ke anyan ebiet, edi, ekuyak ndik anam mbufo. Mme ñkpọ ntem enyene nditibe, edi mmọ iwutke nte ke utit ini edisim. 7Mme idut eyeñwana ye idem mmọ, mme ndidem eyeñwana ye idem mmọ, ndien akañ ye unyekisọñ eyedu ke ediwak itie. 8Kpukpru mme ñkpọ emi edi akpa ntọñọ ubiak uman.”
9“Ndien mmọ eyemum mbufo eyak enọ emia ufen enyuñ ewot. Ofuri mme idut eyesua mbufo ke ntak Mi. 10Ediwak owo eyesana mbuọtidem mmọ ke ini oro eyak, mmọ eyetap kiet eken, enyuñ esua idem mmọ, 11ndien ediwak mme nsu nsu oku eyedaha eda, enyuñ ebiaña ediwak owo. 12Ke ntak emi idiọkñkpọ editọtde ke kpukpru ebiet, ima ediwak owo eyebit. 13Edi owo eke ọsọñọde ada tutu osim utit eyenyaña enye.
14Ndien eyekwọrọ Eti Mbuk emi abañade Obio Ubọñ Abasi ke ofuri ererimbot nte ñkpọ ntiense ọnọ ofuri ubon owo, do ndien, ke utit edidi.”
15“Ke ntre, ke ini mbufo ekutde mme mbubiam ñkpọ nsobo emi Asiak Uduak Abasi Daniel eketiñde abaña adade ke edisana ebiet, yak añwaña okot ñwed Abasi. 16Do yak mmọ emi edude ke Judia efeñe edọk mme ikpọ obot. 17Yak mmọ emi edude ke mme ọkọm ufọk ekukpa ndisuhọde nduk esit ufọk ñkemen mme inyene mmọ. 18Yak owo emi odude ke iñwañ okuka ufọk ndimen ọfọñidem esie.”
19“Eyenyene ndik eti eti ke mme usen oro ye mme iban emi esañade ye idibi, ye mmọ emi ekamade nsek nditọ ke ubọk. 20Ebọñ akam, itọk mbufo okudi ke ini ekarika mme ke usen ederi mme Ju. 21Koro ọkpọsọñ ukut eyedu ke ini oro ke usuñ emi akananam miduhọ tọtọñọ ke ntọñọ ererimbot tutu osim ini emi, mbiet esie idinyuñ iduhodu.”
22“Edieke mikpakanamke mme usen oro emuhọ, baba owo ndomokiet ikpeduhọ uwem, edi ke ntak mmọ emi Abasi emekde eyenam mme usen oro emuhọ.
23Ke ini oro, owo ndomokiet ekpedọdọhọ mbufo ete, ‘Sese, Kraist oro mi,’ mme, ‘Se Enye ko,’ ekunim ke akpanikọ. 24Koro mme nsu nsu kraist ye mme nsu nsu mme ọkwọrọ ikọ eyewọñọ ewut idem, ndien enyuñ enam mme ikpọ idiọñọ ye mme utibe ñkpọ ndibiaña mmọ emi emekde edieke emi ekpedide mmem mmem. 25Sese Ami mmeduri mbufo utọñ ke eti ini.”
26“Do edieke owo ndomokiet ọdọhọde ete, se Enye ko ke isọñ utatan, ekuwọrọ eka, mme ke edọhọde ete se Enye mi ke esit ubet, ekunim ke akpanikọ. 27Koro kpa nte emireñ-mireñ otode ke usiahautin asiaha aka ke usoputin, kpa ntre ke edidi Eyen owo editie. 28Ebiet ekededi emi okpo ñkpọ anade do ke mme utere eboho.”
29“Ndo ndo emi ukut mme usen oro edibede, utin eyeduk ekim, ndien ọfiọñ idiyamake aba, mme ntantaọfiọñ eyeduọñọ eto ikpa enyọñ, ndien eyenyuñ enyeñe mme odudu enyọñ.”
30“Ke ini oro idiọñọ Eyen owo eyewọrọ ke ikpa enyọñ ndien kpukpru idut ke isọñ eyefuhọ. Mmọ eyekut Eyen Owo nte Enye edide ke obubit ikpa enyọñ, ye odudu ye akwa ubọñ. 31Ndien Enye ọyọdọñ mme enjel Esie ye akwa uyo obukpoñ ukot owo, ndien mmọ eyetañ mme mmọ emi Enye emekde obok ke ituñ enyọñ mbinañ, otode ke ituñ enyọñ kiet tutu osim ituñ eken.”
32“Do ndien eda ukpepñkpọ eto eto Fik. Ini ekededi emi ñkpri ñkọk esie ememde, mme ikọñ esie enyuñ efiaride, mbufo eda oro ediọñọ ete ke ndaeyo ekpere. 33Kpasuk ntre ñko ke ini mbufo edikutde kpukpru mme ñkpọ emi nte etọñọde nditibe, emekeme ndifiọk ete ke ini edidi Mi ekpere. 34Ami ntiñ akpanikọ nnọ mbufo, nte, ke emana emi idibehe ifep, tutu mme ñkpọ emi ewọrọ esu.”
35“Enyọñ ye isọñ eyebe efep, edi mme ikọ Mi idibehe ifep.” 36Baba owo ndomokiet idiọñọke ibaña usen oro mme ñkanika oro, tutu osim idem mme enjel ke enyọñ idiọñọke, kpa ye Eyen Owo nde, edi, edi Ete ikpọñ ikpọñ ọdiọñọ.
37Nte ekedide ke mme usen Nua, kpa ntre ke edidi ke ini edidi Eyen Owo. 38Koro ke mme usen emi ekebemde ukwọ iso, mme owo ke eketa enyuñ eñwọñ ñkpọ, ke ekedọ ndọ enyuñ enọ mme owo ke ndọ, tutu osim usen emi Nua okodukde ubom; 39ndien mmọ ikọdiọñọke baba ñkpọ ndomokiet ibaña se iditibede tutu mmọñ ukwọ oto edikpọri mmọ efep.
40Owo iba eyeda enam utom ke iñwañ, ndien eyemen kiet enyuñ ekpọñ eken. 41Iban iba eyekọk ñkpọ ke ukọk ibokpot; eyemen kiet ekpọñ kiet.
42“Ke ntre edu ke ukpeme koro mbufo midioñọke usen emi Ọbọñ mbufo edidide.
43Edi etim efiọk emi: Edieke enyene ufọk ọkpọdiọñọde ini emi inọ edidide ke okoneyo, enye ekpekpeme, ikponyuñ iyakke ebuñ ufọk esie eduk. 44Ke ntre mbufo ñko enyene ndidu ke mbeñeidem, koro Eyen Owo eyedi ke ini ñkanika emi mbufo mikebeñeke idem inọ Enye.”
45“Anie ndien edi anam akpanikọ ye enyene ibuot eyen utom, ndi enye emi eteufọk esie ọnọde enye ubiọñ mme nditọ ufọk esie eken, ndinọ mmọ udia mmọ ke eti ini? 46Eyefọn ye eyen utom oro, emi eteufọk esie edikutde nte enye anamde ntre ke enye ama ọnyọñ edi. 47Ami ntiñ akpanikọ nnọ mbufo nte, ke eteufọk esie eyeyak ubiọñ kpukpru inyene esie esin enye ke ubọk.”
48“Edi edieke eyen utom oro edide owo ibak onyuñ ọdọhọ ke esit esie, ete ‘Eteufọk mi eyebighi,’ 49ndien enye ọtọñọ ndimia ekemọ nditọ ufọk, ndien adia onyuñ ọñwọñ ñkpọ ye mme akpaña mmin. 50Ete ufọk esie eyedi ke usen emi enye mikebeñeke idem ibet enye ye ke ini ñkanika emi enye midiọñọke. 51Enye eyekpok enye idem onyuñ ọnọ enye itie ye mme mbon mbubik, ke ebiet emi eyet ye ntaedet edidude.”
Currently Selected:
Matiu 24: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
