Matiu 20
20
Ñke mme Anam Utom ke Iñwañ Vain
1Koro Obio Ubọñ Abasi ebietde enyene iñwañ kiet, emi akabakde ọwọrọ ke usenubọk aka ndikpe mme anam utom nsin ke iñwañ esie. 2Ndien ke enye ama ekenyime ete ke iyekpe mmọ okuk kiet ke ofuri usen utom kiet, enye ama ọdọñ mmọ eka ekenam utom.
3Nte enye ọkọwọrọde añwa ke ñkpọ nte ñkanika usukkiet usen ubọk, enye ama okut ndusuk mme owo ekedade ke añwa urua inyeneke se enamde. 4Ndien Enye ama ọdọhọ mmọ ete, mbufo eka ñko ke iñwañ mi ekenam utom, ndien ami ñyekpe, mbufo nte odotde. 5Ke ntre mmọ ema eka. Ke ufọt uwemeyo, ye ke ñkpọ nte ñkanika ita, enye ama afiak okot mbon efen, onyuñ ọdọhọ eka ñko ke iñwañ ekenam utom.
6Ke ñkanika ition mbubreyo, enye ama afiak aka añwa urua ndien okokut mme irenowo efen nte edade do ntre. Enye ama obup mmọ ete, “mbufo eda didie ntre ebiat usen emi, inyeneke se enamde?”
7Mmọ ema ebọrọ enye ete, “Koro owo ndomokiet ikekpehe ñnyin utom,” Enye ama ọdọhọ mmọ ete, “Eka ñko ke iñwañ mi ekenam utom.”
8Ke mbubreyo oro, enyene iñwañ ama ọdọhọ ese utom esie ete, kot mme anam utom edi, ñnyuñ kpe mmọ okuk mmọ, ọtọñọde ke mme ekperedem tutu osim mme ebem iso. 9Mme anam utom ekedade ke ñkanika ition ema edi ndien ema ekpe mmọ okuk silfa kiet. 10Ke ntre, ke ini mbon emi ekebemde iso etọñọ utom ekedide ndibọ okuk, mmọ ema ekere ete ke mmimọ iyebọ okuk awak akan. Edi mmọ ekebọ kpa ukem okuk silfa kiet.
11Ke mmọ ema ekebọ okuk mmọ, mmọ ema etọñọ ndikuni mbaña enyene iñwañ. 12Mmọ emi ekpede utom akpatre, enam utom ñkpasip awa kiet kpọt edi ebọ okuk ukem nte mmimọ emi ikọtọñọde utom ọtọñọde ke usenubọk inyuñ inam utom ke idak ufiop eyo.
13Enyene inwañ oro ama ọbọrọ kiet ke otu mmọ ete, “Ufan nsehe nte motuk fi, akam edi afo ekenyime ke idem fo ndibọ silfa kiet ke utom usen kiet. 14Da okuk utom fo nyọñ. Ami ñkemek ndinọ owo emi ñkekpede ukperedem ukem ukem nte ami nnọde fi. 15Nte ami ñnyeneke unen ndinam ye okuk mi nte ami mmade? Mme afo ọdiọk esit koro ami mfọnde ido?” 16Ke ntre mmọ emi ekperede edem, eyebe iso, ndien mmọ emi ebede iso eyekpere edem.
Ada Usuñ Enyene Ndinam Ñkpọ Mmọ Eken
17Nte Jisọs akasañade ke usuñ aka Jerusalem, Enye ama ada mbet Esie duopeba esihede ada ñkañ kiet, onyuñ ọdọhọ mmọ ete, 18ñnyin ika Jerusalem, ndien eyetap Eyen owo enọ mme ikpọ oku ye mme andikpep ibet. Mmọ eyebiere ikpe ñkpa enọ Enye. 19Ndien mmọ eyeyak Enye esin ke ubọk mme mmọ emi midighe Ju, ndien mmọ eyesak Enye, enyuñ emia Enye, enyuñ ekọñ Enye ke Krọs. Ndien ke ọyọhọ usen ita eyemenerede Enye ke ñkpa esin ke uwem.
20Ekem eka nditọ iren Sebidi asaña ye nditọ iren esie ekebine Jisọs editọñọ edọñ ke iso Esie onyuñ anam ebeñe oto Enye.
21Ndien Jisọs obup enye ete, “Nso ke afo oyom nnam nnọ fi?” Enye ama ọbọrọ ete, “Nyime ete ke nditọ iren mi iba emi, kiet eyetie ke ubọk nnasia Fo kiet ke ubọk ufien Fo ke Obio Ubọñ Fo.”
22Edi Jisọs ama ọdọhọ enye ete, “Afo ufiọkke se ebeñede.” Ntem ke enye ọkọwọñọde enyin ese Jems ye Jọn ndien obup mmọ ete, “Nte mbufo emekeme ndinwọñ kọb emi Ami ñkade ndiñwọñ?” Mmọ ema ebọrọ ete, “Ñnyin imekeme.”
23Jisọs ama ọdọhọ mmọ ete, “ke akpanikọ mbufo eyeñwọñ eto ke kọb Mi, edi nditie ke ubọk nnasia Mi, ye ke ubọk ufien Mi, idighe Ami ñnyene ndinam emi. Mme itie emi enyene mmọ emi Ete Mi eketimde itie emi enim ọnọ mmọ.”
24Mbet duop eken ema edu ke ọkpọsọñ iyaresit ke ini mmọ ekekopde se Jems ye Jọn ekebeñede Jisọs.
25Edi Jisọs ama okot kpukpru mmọ obon ebiet kiet onyuñ etiñ ete, “Mbufo emefiọk ete ke mme andikara mme idut ekara mmọ ke nsọñubọk, ikpọ owo mmọ enyuñ ebre odudu ye mmọ. 26Inaha edi ntre ke otu mbufo. Owo ekededi eke oyomde ndikpon ñkan ke otu mbufo enyene ndidi asañautom mbufo. 27Ndien owo emi oyomde ndidi adausuñ ke otu mbufo, enye enyene ndinam ñkpọ nnọ mbon eken nte ofin. 28Kpa nte Eyen Owo mikedighe man enam ñkpọ enọ Enye, edi ekedi ndinam ñkpọ nnọ mme owo, ñnyuñ nnọ uwem Esie nte usio isop idiọkñkpọ nnọ ediwak owo.”
29Nte Jisọs ye mbet Esie ekekpọñde obio Jeriko, akwa otu owo ema etiene mmọ ke edem.
30Nnan iba eketie ke mben usuñ, ndien ke ini mmọ ekekopde ete ke Jisọs ke ededi ke usuñ oro, mmọ ema etọñọ ndifiori ete “Ọbọñ, Eyen Edidem Defid, tua ñnyin mbọm!”
31Edi otu owo oro ema esua enọ mmọ enyuñ edọhọ mmọ ekibi inua, edi mmọ enenehede efiori ke ọkpọsọñ uyo, “Ọbọñ, tua ñnyin mbọm, Afo Eyen Edidem Defid.”
32Ndien Jisọs ama atuak ada, onyuñ okot mmọ obup ete, “Nso ke mbufo eyom Mi nnam nnọ mbufo?” 33Mmọ ema ebọrọ Enye ete, “Ọbọñ iyom atat ñnyin enyin.”
34Mbọm mmọ ama anam Jisọs, ndien Enye ama otuk mmọ enyin, ndien ndo ndo oro mmọ ema ekut usuñ, enyuñ etiene Enye.
Currently Selected:
Matiu 20: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
