Matiu 16
16
Eyom Edinam Idiọñọ
1Mme Farisi ye mme Sadusi ema edi edidomo Enye ke edidọhọ Enye owut mmimọ idiọñọ otode ikpa enyọñ.
2Edi Enye ama ọbọrọ mmọ ete, “Ke ini mbubreyo mbufo edọhọ ete, usen eyefọn, koro enyọñ adatde. 3Ndien ke usenubọk mbufo edọhọ ete, usen eyediọk, koro enyọñ adatde, onyuñ ọfuhọde. Mbufo emediọñọ ndikabade mme idiọñọ ikpaenyọñ, edi mbufo ikemeke ndifiọk mme idiọñọ ini. 4Edi idiọk emana ye emana efibe eyom mme utibe idiọñọ, edi idinọhọ enye idiọñọ ndomokiet, ke ebede idiọñọ Jona.” Ndien Enye ama adaha ọkpọñ mmọ ke idaha.
5Mme mbet Esie ema efre ndida uyo ke ini mmọ ekebede ñkpọdiọhọ mmọñ eda ke edem eken.
6Jisọs ama oduri mmọ utọñ ete, “Etim ekpeme ibọk edimenede ndom uyo (yeast) mme Farisi ye Sadusi.”
7Mmọ ema etiñ ye idem mmọ ete, “Enye etiñ emi koro ñnyin mikadaha uyo ndomokiet ibe inyañ.”
8Jisọs ama ọfiọk ekikere mmọ ndien Enye ama ọdọhọ mmọ ete, “O mbufo mbio ekpri mbuọtidem, nsidi ntak emi mbufo etiñde ebaña unana uyo?” 9Nte itimke ifiọk ñkpọ kaña? Inyuñ itighi uyo ition emi tọsin owo ition eketade ye mme ibat akpasa emi mbufo eketañde? 10Inyuñ itighi uyo itiaba emi owo tọsin inañ eketade, ye ibat akpasa emi mbufo eketañde. 11Ntaha ndien mbufo mikemeke ndifiok nte ke Ami ñketiñke mbaña uyo? Edi ñkọdọhọ nte “Ekpeme idem mbufo kabaña ibọk umenede ndom uyo mme Farisi ye mme Sadusi.”
12Ndo ndo oro mmọ ema ediọñọ, ete, ke Enye iketiñke ye mmimọ ibaña ibọk unam uyo, edi ekedi kabaña mme ukpepñkpọ mme Farisi ye mme Sadusi.
Mbufo Ekere Ete Ami Ndi Anie?
13Kadaña emi Jisọs ekesimde Siseria Filipai, enye ama obup mbet Esie ete, “Mme owo edọhọ ete Eyen Owo edi anie?”
14Ndien mmọ ema ebọrọ ete, “Ndusuk owo edọhọ ete ke Enye edi Jọn Babtis, ndusuk edọhọ ete Elaiya, ndusuk ete Jerimaya, ndusuk ete kiet ke otu mme oku Abasi eset.”
15Enye ama obup mmọ, “Ndien mbufo-o? Edọhọ ete ke Ami ndi anie?”
16Do ke Saimọn Pita ọkọbọrọ enye ete, “Afo edi Kraist Eyen Odu Uwem Abasi.”
17Ndien Jisọs ama ọbọrọ enye ete, “Ọfọfọn ọnọ fi, Saimọn eyen Jona. Koro idighe obuk ye iyip akayarade ñkpọ emi ọnọ fi, edi Ete Mi emi odude ke enyọñ. 18Ke ntre, Ami ndọhọ fi idaha emi nte, Afo edi Pita (itiat), ndien ami ñyebọp ufọk Mi ke enyọñ itiat emi, ndien mme inuaotop itie ndutuhọ idinyuñ ikanke enye. 19Ami ñyenọ fi mme ukpọhọde Obio Ubọñ Abasi, ndien se ededi emi afo edibọpde ke isọñ, eyebọp ke enyọñ, se ededi emi afo editatde ke isọñ, eyetat ñko ke enyọñ.”
20Enye ndien ama owuk mme mbet Esie ete yak mmọ ekutiñ enọ baba owo ndomokiet nte ke Imọ idi Kraist.
21Ọtọñọde ke ini oro tutu aka iso, Jisọs ama ọtọñọ nditiñ iñwañ iñwañ nnọ mbet Esie mbaña edika Esie ke Jerusalem ye se idisimde Enye do ke ubọk mme ñyobio owo, ye mme ikpọ oku, ye mme andikpep mme Ju, ndien ke mmọ eyenyuñ ewot imọ, ndien ke ọyọhọ usen ita imọ iyeset.
22Ndien Pita ama ada Enye adaha ọkpọñ otu owo onyuñ ọtọñọ ndisua nnọ Enye ete, “Nsa Fo, O Ọbọñ, utọ ñkpọ oro ikemeke nditibe ye afo.”
23Edi Jisọs ọwọñọrede onyuñ ọdọhọ Pita ete, “Be da Mi ke edem, setan. Afo edi ñkpọ iduọ ọnọ Mi, koro usuñ ekikere fo idighe eke Abasi, edi eke owo.”
24Ekem Jisọs ama ọdọhọ mbet Esie ete, “Edieke owo ekededi oyomde nditiene Mi, yak enye akañ idem esie onyuñ emen mbiomo esie etiene Mi. 25Koro owo ekededi emi enimde uwem esie ọnọ idem esie, eyeduọk enye, edi owo eke ayakde uwem esie ọduọk ke ntak Mi eyefiak enyene uwem esie. 26Nso udori idu do, edieke afo enyenede ofuri ererimbot ndien ọduọk ukpọñ fo? Nso ke owo edida ikpuhọ ye ukpọñ esie? 27Koro Eyen Owo eyedi ke ubọñ Ete Esie ye mme enjel Esie ndien Enye eyenọ kpukpru owo kiet kiet utib etiene se enye akanamde.” 28“Ke akpanikọ ke ndọhọ mbufo nte, ndusuk owo edu ke otu emi edade mi, emi miditabike ñkpa tutu mmọ ekut Eyen owo edide ke ubọñ Esie.”
Currently Selected:
Matiu 16: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
