Luk 20
20
1Ke usen kiet ke ini emi Jisọs okodude ke ufọk akam ke ekpep mme owo ñkpọ, konyuñ ọkwọrọ Eti Etop, mme ikpọ oku ye mme andikpep mme Ju ibet, adaha ye mme mbuot ema edi ebine Jisọs. 2Enyuñ edọhọ Enye ete, “Tiñ nọ ñnyin unen emi Afo enyenede emi anamde Fi aka iso ndinam mme ñkpọ emi? Anie ekenọ Fi unen emi ndinam mme ñkpọ emi?”
3Jisọs ama ọbọrọ mmọ ete, “Ami ñyebup mbufo mbume kiet, etiñ enọ Mi,
4Babtisim emi Jọn ekenimde, okoto Abasi mme okoto owo?”
5Ke mmọ ema ekediomi ema ke otu mmọ, ema edọhọ ete, “Edieke ñnyin idọhọde ite, okoto Abasi, Enye eyebup ñnyin ete, ‘Nsidi ntak ndien mbufo mikenimke enye ke akpanikọ?’ 6Onyuñ edieke ñnyin idọhọde ite ke idighe Abasi ọkọdọñ Jọn, mme owo eyetọñọ ñnyin ke itiat, koro kpukpru mmọ etim enim ke akpanikọ ete ke Jọn ekedi akwa Asiak Uduak Abasi.” 7Ke akpatre, mmọ ema ebọrọ Enye ete, “Ñnyin ifiọkke.”
8Ndien Jisọs ama ọdọhọ ete, “Ami ñko ndikemeke nditiñ nnọ mbufo ebiet emi odudu emi ndade nnam mme ñkpọ emi otode.”
9Enye ama aka iso ndibuk mbuk emi nnọ mmọ, “Owo kiet ama ọtọ iñwañ sokoro, onyuñ emen ọnọ mme ọtọ iñwañ efen ke ukpe okuk, onyuñ ọkpọñ mmọ ke anyan ini. 10Ke ini utet mfri ekekemde, enye ama osio eyen ufọk esie kiet ọdọñ ete ọkọbọ udeme mfri esie edi. Edi mme ọtọ iñwañ ema emia enye, enyuñ enam enye ọnyọñ ubọk ubọk. 11Ekem enye amana ọdọñ isuñutom efen, mmọ ema enyuñ emia enye oro ñko, esuene enye, enyuñ enam enye ọnyọñ ubọk ubọk. 12Enye ama osuk amana ọdọñ ọyọhọ owo ita, ndien mmọ ema enọ enye unan enyuñ esio enye etop eduọk.”
13“Do ke enyene iñwañ ọkọdọhọ, ete, ‘Nso ke ami ndinam? Ami ñyedọñ eyen mi, emi ami mmade, iso ọfọn mmọ ekeme ndikpono enye.’ ”
14“Edi ke ini mme ọtọ iñwañ ekekutde eyen esie, mmọ ema edọhọ ete, ‘Ifet ñnyin edi emi. Akparawa emi edidia akpa iñwañ emi ke ete esie ama akpa. Eyak ñnyin iwot enye, ndien iñwañ emi eyenyene ñnyin.’ ” 15Ntre, ke mmọ ekeduri enye esio ke iñwañ, ndien ewot enye. “Nso ndien ke ekere ete ke enyene iñwañ edinam ye mmọ?
16Ndọhọ mbufo nte ke enye eyedi, ndien owot mmọ onyuñ ayak iñwañ oro ọnọ mmọ efen.” Ke ini mme owo oro ekekopde ikọ emi, mmọ ema edọhọ ete, “Yak ñkpọ ntem okutibe.”
17Jisọs ama owuk enyin ese mmọ ete, “Nso ndien ke se ewetde ọwọrọ? ‘Itiat emi mme ọbọp ufọk ekesinde, amakabade edi itiat inuk ufọk.’ 18Owo ekededi emi ọduọde ke enyọñ itiat oro eyekpok enye mbai mbai, edi owo ekededi emi itiat emi ọduọde ọtọ enye eyekọk enye nte obu.”
19Mme ikpọ oku, ye mme ekpep ibet ema eyom usuñ nte ekpemumde Jisọs ke ndo ndo oro, koro mmọ ekediọñọde ete ke Enye ọkọnọ mbuk emi abaña mmimọ. Edi mmọ ema efehe otu owo.
20Mmọ ema eka iso ndikpeme Enye ñnyuñ ñyom eti ifet. Mmọ ema enọ mme owo ubọk edem ndinam nte ke mmimọ idi mme anam akpanikọ, enyuñ edọñ mmọ ndikoyom usuñ ndimum Jisọs, ke se Enye editiñde, man eyak Enye enọ ada ibuot ukara. 21Mme mbio uyep emi ema ekebup Jisọs ete, “Andikpep, ñnyin imọfiọk ite ke Afo etiñ onyuñ ekpep se inende, unyuñ uwutke ido utuk, edi Afo ekpep usuñ Abasi etiene nte akpanikọ Esie edide. 22Nam ñnyin idiọñọ, nte enen ñnyin ndisio etibe ukara nnọ Sisa andikara obio Rom, mme inenke?”
23Enye ama ọfiọk ñkari mmọ, onyuñ ọdọhọ ete, 24“Ewut Mi okuk mbufo, ndise anie owo ke emiñ ke okuk emi? Enyiñ anie ñko ke ewet ke esit?” Mmọ ema ebọrọ ete, “Eke Sisa, akwa ada ibuot ukara mbon Rom.”
25Jisọs ama ọbọrọ ete, “Ọfọn ama, ekpe enọ Sisa se inyenede enye, enyuñ ekpe enọ Abasi se inyenede Enye.”
26Mmọ ikekemeke ndimum Enye ke se Enye eketiñde do añwa añwa. Idem ama akpa mmọ, ndien mmọ ema ekibi inua.
27Ndusuk mme Sadusi, mme mmọ emi enimde ke akpanikọ ete ke ñkpa edi akpatre uwem, ndien ke ediset ke ñkpa iduhọ 28ema edi ebine Jisọs, enyuñ ebup Enye ete, “Andikpep, Moses ama ewet ọnọ ñnyin ete edieke eyeneka owo akpade ọkpọñ ñwan emi mikenyeneke eyen inọ enye, eyeneka esie eren enyene ndidọ ebekpa oro man obon nditọ ke ibuot eyeneka esie.
29Ndien ama odu nditọ eka itiaba. Akpa owo ke otu mmọ ama ọdọ ñwan ndien ama akpa ikenyeneke eyen. 30Eyen eka esie ọyọhọ iba ama ada ebekpa oro ọdọ, ndien enye ñko akpa ikobonke eyen. 31Ndien ntre ñko ke ọyọhọ ita ọkọdọ enye, ndien kpa ukem ukem ñkpọ emi eketibe ye mmọ mbitiaba emi ekedọde ñwan emi, mmọ kpukpru ema ekpaña, ikenyeneke eyen. 32Ke akpatre, ñwan oro ama akpa ñko.
33Idahaemi mbume ñnyin edi, ñwan anie owo ke enye edidi ke ediset ke ñkpa, koro kpukpru mmọ ekedọde enye?”
34Jisọs ama ọbọrọ ete, “Edi mbon emana emi eka iso ndidọ ndọ, enyuñ emen iban enọ ke ndọ. 35Edi mme mmọ emi ebatde nte edot ediset ke ñkpa ñnyuñ ndu uwem ke emana emi edidide ididọhọ ndọ, mme ndinọ mme owo ke ndọ, 36ndien mmọ idikpaha aba ñkpa, koro mmọ etiede nte mme enjel (mme asañautom Abasi) mmọ edi nditọ Abasi, koro mmọ edide nditọ emi esetde ke ñkpa eduk ke obufa uwem.
37Ndien Moses ama eneñede ayarade owut ete ke ema emenede mme akpaña ñkpa efiak edu uwem, ke nde ñwed emi abañade ikọt emi akatade ikañ, enye etiñ abaña Abasi nte, ‘Abasi Ebraham, Abasi Aisik, ye Abasi Jekọb.’ 38Emi owut ete ke Enye edi Abasi mme odu uwem, idighe eke mme akpaña ñkpa, koro kpukpru mmọ edude uwem enọ Enye.”
39Ubak mme ekpep ibet mme Ju ema ebọrọ, ete, “Emetim etiñ, Andikpep.” 40Ndien owo ndomokiet ikedomoke nditọñọ ntak mbup Enye mme mbume efen aba.
41Ndien Jisọs ama ọdọhọ mmọ ete, “Ekeme didie ndidọhọ ete ke Andinyaña edito ke ubon Defid? 42Koro Defid ke idem esie ekewet ke ñwed Sam ete,
‘Abasi ọkọdọhọ Ọbọñ mi, Andinyaña, ete,
Tie mi ke ubọk nnasia Mi,
43tutu nda mme asua fo
nnim ke idak ikpat Fo, nte ñkpọ udori ukot.’
44Defid okot Enye ‘Ọbọñ.’ Enye ekeme didie ndien ndidi eyen esie?”
45Ke ini kpukpru owo ekesuk ekpañde utọñ, Jisọs ama ọdọhọ mme mbet Esie ete, 46“Ekpeme idem mbufo ye mme ekpep ibet mme Ju. Mmọ ema ndiwọrọ nsaña ye nduọ nduọ ewura, enyuñ ema ekọm mmọ ke añwa urua, ndien eyom mme akpan itie ke ufọk akam ye mme ñkoñkoñ itie ukpono ke mme itie usọrọ. 47Edi kadaña emi mmọ ebọñde anyan akam ye ọkpọsọñ ñwutidem, nte ke mmimọ imọfọn ikan, mmọ ke ekekere usuñ nte etukde mme ebekpa ebọ inyene mmọ. Mme utọ owo emi eyebọ ufen eke odobide eti eti.”
Currently Selected:
Luk 20: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
