Luk 2
2
Nte Jisọs Akasañade Amana
1Ke iduọk ini oro ke Sisa Akọstọs, akwa Edidem ibuot ukara mbon Rom, okowuk ewuhọ ete ebat kpukpru owo enyuñ ewet enyiñ mmọ esin ke ñwed. 2Akpa ubat owo emi akada itie ke ini Kuirinọs ekedide ada ibuot ukara ke Siria.
3Ndien kpukpru owo ema eka ke obio emana mmọ kiet kiet ndisin enyiñ ke ñwed. 4Ntre ñko ke Josef okoto ke obio Nasaret ke Kalili aka Betelehem ke Judia, obio Edidem Defid, koro enye okotode ekpuk ye ñkọk emana Defid. 5Enye ama asaña ye Meri emi ekenyimede ndinọ enye ke ndọ aka ndisin enyiñ ke ñwed. Ini uman Meri ama ekpere.
6Ke adañaemi mmọ ekedude do, ini uman Meri ama ekem. 7Ndien enye ama aman akpa eyen esie, eyen eren. Enye ama awañ enye ke ọfọñ nna, onyuñ emen enye esin ke usin udia ufene, koro ufọk isen ke obio ama ọyọhọ kpak, anam mmọ ikenyeneke itie ke ufọk isen.
8Mme ekpemerọñ ema edu ke mme iñwañ ke edem obio oro emi ekekpemede erọñ mmọ ke okoneyo. 9Enjel Abasi ama ọwọrọ ke ufọt mmọ ndien ubọñ Abasi ayama akanade mmọ okuk. Ndik ama anam mmọ eti eti. 10Edi asaña-utom Abasi ọsọñọ mmọ esit ke ndidọhọ mmọ ete, “Ekufehe ndik! Ami nda ata eti mbuk akwa idaraesit nsọk mbufo.
11Mfin emi ke obio Defid, Andinyaña amana ọnọ mbufo; Enye edi Andinyaña Ọbọñ. 12Emi edidi idiọñọ inọ mbufo; mbufo eyekut nsekeyen emi ewañde ọfọñ nna, onyuñ anade ke usin udia ufene.”
13Ndo ndo oro udim mbon enyọñ ema edi edidiana ye enjel oro, enyuñ eka iso nditoro Abasi ke edidọhọ ntem:
14“Ubọñ enyene Abasi ke ata enyọñ, ndien emem odu ke isọñ ọnọ mme mmọ emi enemde Enye Esit.”
15Ke ini akwa udim mbon enyọñ ema ekefiak edọk ke enyọñ, mme ekpemerọñ ema eneme ke otu mmọ ete, “Eyak ñnyin ika ke Betelehem, ikese ñkpọ emi etibede, emi Ọbọñ ama eketiñ ọnọ ñnyin abaña.”
16Mmọ ema esọp eka, enyuñ eyom usuñ ekekut Meri ye Josef ye eyen oro, emi akamanade ke usin udia ufene. 17Ke ini mmọ ema ekekut Enye, mmọ ema ebuk enọ kpukpru owo mme ikọ emi. 18Idem ama akpa mme mmọ emi ekekopde se mme ekpemerọñ eketiñde enọ mmọ. 19Edi Meri ama odip kpukpru mbuk oro ke esit esie, onyuñ aka iso ndikere mbaña mmọ kietkiet.
20Mme ekpemerọñ ema efiak enyọñ ebine mme erọñ mmọ, enyuñ eka iso nditoro ñnyuñ nnọ Abasi ubọñ ke abaña kpukpru mme ñkpọ emi mmọ ekekutde enyuñ ekopde, emi ekedi ukem ukem nte eketiñde enọ mmọ.
21Ọyọhọ usen itiaita, ke ini emi ekekemde ndinim Enye mbobi, ema esio Enye enyiñ Jisọs, enyiñ emi enjel ọkọnọde Enye mbemiso eyeyomo Enye.
22Ke ini ama ekekem ọnọ Meri ye Josef ndinam nte mbet Moses eketemede, ke edinam idem mmọ asana ke ndiwa uwa, mmọ ema eda eyen emi eka ke Jerusalem man ekeyak Enye enọ Abasi. 23Nte ewetde ke mme mbet emi Abasi ọnọde, “kpukpru akpa eyen eren owo emi emanade, edikere edisana ñkpọ emi enyenede Ọbọñ.”
24Mmọ ñko enyuñ eda ibiom iba ye mme mbomoñkuku iba efọp uwa nte mme mbet Ọbọñ etemede. 25Ke ini oro, owo kiet emi ekekerede Simiọn ama odu ke Jerusalem, emi ekedide edinen owo emi eketeñede Abasi. Enye okosuk odori enyin ke edinyaña Isrel ndien enye ama ọyọhọ ye Edisana Spirit. 26Koro Edisana Spirit Abasi ama ayarade ọnọ enye ete ke enye idikpaha tutu enye okut Andinyaña emi Abasi ọkọñwọñọde. 27Ke ndausuñ Edisana Spirit, enye ama adaha aka edisana ebiet. Ndien ke ini ete ye eka edade nsekeyen emi ekerede Jisọs edi man enam ye Enye nte mbet etemede, 28Simiọn ama ọbọ Enye akama ke ubọk esie, ndien otoro Abasi onyuñ ọdọhọ ete,
29“Ọbọñ, yak ndien owo fo ọnyọñ ke ifure, nte Afo ọkọñwọñọde, 30koro enyin mi omokut edinyaña fo, 31emi Afo okotimde onim ke iso kpukpru owo. 32Uñwana emi ediyararede usuñ Fo inọ mme mmọ emi midighe mme Ju ndien ada ubọñ ọsọk ikọt Fo Isrel.”
33Idem ama akpa Josef ye Meri ke se mmọ ekekopde ebaña Enye.
34Simiọn ama ọdiọñ kpukpru mmọ, edi enye ọdọhọ eka esie Meri ete, Enim Eyen emi ndidi ñkpọ iduọ ye ñkpọ ñkọri nnọ ediwak owo ke Isrel. Onyuñ edi idiọñọ emi etiñde ikọ edian. 35Akañkañ eyesiak ukpọñ fo ñko, man oto do eyarade ekikere esit ediwak owo.
36Asiak Uduak Abasi ama odu emi ekekerede Anna, emi ekedide eyen Fanuel, emi okotode ekpuk Ashọr. Enye ama ọsọñ eti eti. Enye okodu ye ebe esie ke isua itiaba ke mmọ ema ekedian ndọ. 37Ndien enye edidi ebekpa tọñọ ke ini oro tutu enye osim isua anañ ye inañ. Enye akananam ikpọñke edisana ebiet (Temple), edi atuak ibuot ọnọ Abasi, okoneyo ye uwemeyo, ke utreudia ye akam.
38Enye ama asaña ekpere ke ini emi Simiọn akade iso nditiñ ikọ ye Meri ye Josef, ndien enye ñko ọtọñọ ndikọm Abasi ñnyuñ ntiñ nnọ kpukpru mmọ emi etiede ebet ndikut edifak Jerusalem.
Edifiak Ñnyọñ Nasaret
39Ekem ke ete ye eka Jisọs ema ekenam kpukpru ñkpọ nte akasañade ke mbet Abasi, mmọ ema efiak enyọñọ ke Nasaret, emi edide obio mmọ ke Kalili. 40Ndien eyen oro ọkọri, onyuñ akabarede edi okop odudu. Enye ama ọyọhọ ye ọniọñ, ndien mfọn Abasi onyuñ odu ye Enye.
41Kpukpru isua eka Jisọs ye Josef esika usọrọ uwọrọ ufin ke Jerusalem.
42Ke ini Enye ekedide eyen isua duopeba mmọ ema esaña ye Enye eka usọrọ emi ñko nte ido usọrọ mmọ esidide. 43Ke usọrọ ama okokure, mmọ ema etọñọ ndinyọñọ obio mmọ ke Nasaret, edi Jisọs ama ọsuhọde etie Esie ke Jerusalem, edi mmọ ikọfiọkke ibaña. 44Mmọ ekekere ete ke Enye ama odu ke udim isañ mmọ, oro anam mmọ ema esaña isañ ofuri usen, mbemiso mmọ etọñọ ndiyom Enye ke otu mme iman mmọ ye mme ufan mmọ. 45Edi ke ini mmọ mikekwe Enye, mmọ ema efiak eka Jerusalem ndiyom Enye.
46Ke usen ita ama ekebe, mmọ ema ekekut Enye ke okure Edisana Ebiet nte Enye etiede ke ufọt mme andikpep, onyuñ akpañde utọñ ọnọ mmọ, onyuñ obupde mmọ mme mbume. 47Idem ama akpa kpukpru mmọ emi ekekopde ikọ Esie ke abaña ifiọk ye mme ibọrọ mbume Esie.
48Idem ama akpa ete ye eka Esie ke ini mmọ ekekutde Enye. Eka esie ama ọdọhọ Enye ete, “Eyen, nsinam afo anamde ñkpọ ye ñnyin ntem? Ami ye ete fo ikodu ke oyomonsia ke ndiyom fi.”
49Enye ama obup mmọ ete, “Nsinam mbufo ekesañade eyom Mi? Nte mbufo ifiọkke ite ke Ami ñnyene ndidu ke ufọk Ete Mi?” 50Edi mmọ ikọfiọkke se ikọ oro Enye eketiñde ọwọrọde.
51Ntre ke Enye akafiak ọnyọñ Nasaret ye mmọ onyuñ edi eyen ñkop item ọnọ mmọ. Edi eka Esie ama omum kpukpru mme ñkpọ emi akama ke esit esie. 52Ndien Jisọs ama ọkọri ke ọniọñ ye idaha, onyuñ edi Eyen mfọniso ke iso Abasi ye ke iso owo.
Currently Selected:
Luk 2: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
