Jọn 18
18
Ema Emum Jisọs
1Ke Jisọs ama ọkọbọñ akam ama, Enye ama ada mme mbet Esie ebe ebedeñ emi ekotde Kidrọñ ada ke edem eken. Ke edem oro mme eto ọlif ema eda ewak, ndien Enye ye mme mbet Esie ema esaña ekeduk do. 2Judas emi akatapde Enye ama ọdiọñọ ebiet emi, koro Jisọs esiwawak ndisobo do ye mbet Esie.
3Do Judas ama edi ke iñwañ eto emi onyuñ asaña ye mme mbio ekọñ Rom ye mme isuñutom mme ikpọ mbọbọ ekọñ, enyuñ ekama mme ñkpọ unan ye utueneikañ.
4Ke ini Jisọs ama ọkọfiọk kpukpru se iyomde nditibe ye Enye, ama ọwọrọ añwa okobup mmọ ete, “Mbufo eyom anie?” 5Mmọ ema ebọrọ ete, “Ñnyin iyom Jisọs eyen Nasaret” Jisọs ama ọdọhọ ete, “Ami ndi Enye.” Judas anditap Kraist akada do ye mmọ. 6Ke ini Jisọs ama ọkọdọhọ ete, “Ami ndi Enye,” mmọ ema efiak edem enyuñ eduọñọ ke isọñ.
7Enye ama ọtọñọ ntak obup mmọ ete, “Mbufo eyom anie?” Ndien mmọ ema ebọrọ ete, “Jisọs eyen Nasaret.”
8Jisọs ama ọbọrọ ete, “Ami mma ndọdọhọ mbufo nte ke edi Ami ndi Enye. Edieke mbufo ekeyomde Mi, eyak mme mmọ emi enyọñọ.” 9Emi eketibe man se Enye eketiñde ekeme ndisu: “Ami ñyakke ndomokiet ke otu mmọ emi Afo ọkọnọde Mi osop.”
10Do Saimọn Pita, emi ekenyenede akañkañ, ama oduri osio ke efọk onyuñ esibe eyen ufọk akwa oku utọñ ubọk nnasia. (Eyen ufọk akwa oku oro ekekere Malkọs).
11Jisọs ama owuk Pita ete, “Sin akañkañ fo ke efọk; nte ikpanaha Ami ñnwọñ kọb ukut emi Ete Mi ọkọnọde Mi?”
12Do ndien ke mme mbon ekọñ ye ada iso mmọ ye mme mbio utom mme Ju ekemum Jisọs, enyuñ ebọp Enye ubọk. 13Ndien ebem iso eda Enye eka ke edem Anas, emi ekedide ete añwan Kaifas, emi ekedide akwa oku isua oro. 14Kaifas ekedi enye emi ọkọnọde mme Ju item nte ke eyefọn edieke owo kiet akpade ke ibuot kpukpru owo eken. 15Saimọn Pita ama asaña ye mbet kiet efen etiene Jisọs oduk ke esit okure akwa oku. 16Edi Pita ekenyene ndibet ke añwa ke enyin usuñ. Mbet eken oro ekemehede ye akwa oku ama afiak edem editiñ ikọ ye eyen añwan emi okodude ke utom ukpeme usuñ, ndien enye ama ada Pita oduk esit okure. 17Eyen añwan emi ekekpemede usuñ ama obup Pita ete, “Nte afo udighe kiet ke otu mme mbet owo emi?” Enye ama ọbọrọ ete “Ami ndighe-o.”
18Ebiet ama ebit, do nditọ ufọk akwa oku ye mme mbio utom ema ebara ikañ ukañ eda ekanade ewebe. Pita ama ada ñko ye mmọ etiene ewebe ikañ.
19Akwa oku ama aka iso ndibup Jisọs mbaña mme mbet Esie ye mme ukpepñkpọ Esie.
20Jisọs ama ọbọrọ ete, “Ami mmetiñ ikọ añwa añwa nnọ ofuri ererimbot ndikop. Ami mmesika iso ndikpep ñkpọ ke mme ufọk akam ye ke mme Edisana Ebiet emi kpukpru mme Ju esibohode. Akananam Ami ntiñke ikọ ndomokiet ke ndibe. 21Ntak emi afo obupde Mi mbume-e? Kam bup mme mmọ emi ekekopde Mi. Ke akpanikọ mmọ ediọñọ kpukpru se Ami ñketiñde.”
22Ke ini Jisọs ama eketiñ ntem, kiet ke otu mme ada ukpeme do ama amia Enye ufia onyuñ ọdọhọ ete, “Afo asaña didie etiñ ikọ ke utọ usuñ oro ye akwa oku!”
23Jisọs ama ọbọrọ enye ete, “Edieke Ami ntiñde ikọ ndomokiet emi ọdiọkde tiñ nọ kpukpru owo emi se ikọ oro ekedide. Edi edieke ñketiñde se idide akpanikọ, ntaha afo akamiade Mi ufia-a?”
24Do ke Anas ọkọnọ Enye kpa nte ekebọpde Enye ọsọk Kaifas, akwa oku.
25Nte Saimọn Pita okosuk adade ewebe ikañ, ema ebup enye ete, “Nte afo udighe kiet ke otu mme mbet owo emi?” Pita akañ ete, “Ami ndighe.”
26Kiet ke otu mme nditọ ufọk akwa oku, iman owo emi Pita ekesibede enye utọñ, ama obup enye ete, “Nte ami ñkekwe fi ye Enye ke iñwañ eto ọlif?”
27Pita ama ọtọñọ ntak akañ, kpa ke ndo ndo oro ekikọ ama ọkpọk.
Jisọs Ke Iso Pailet
28Ke tughi tughi usenubọk, ema eda Jisọs ewọrọ ke esa Kaifas, eka ufọk andikara mbon Rom (Konsin). Mme mbuot mme Ju ikodukke esit okure Kọnsin, koro mmọ ekeyomde ndinim idem mmọ asana nte mbet ido ukpono mmọ etemede, man mmọ ekeme ndidia udia usọrọ uwọrọ ufin. 29Ke ntre, Pailet ama ọwọrọ añwa ebine mmọ okonyuñ obup ete, “Mbufo edọhọ ete owo emi anam nso?”
30Mmọ ema ebọrọ ete, “Edieke Enye mikpedighe abiat ibet, ñnyin ikpeyakke Enye isin fi ke ubọk.”
31Pailet ama ọdọhọ mmọ ete, “Mbufo eda Enye eka ekekpe ikpe Esie ke idem mbufo nte ibet mbufo etemede.” Mme Ju ema efaña ete, “Edi ñnyin inyeneke odudu ndibiere ikpe ñkpa nnọ owo.” 32Emi eketibe man mme ikọ emi Jisọs eketiñde abaña uduot ñkpa emi Enye edikpade osu.
33Pailet ama adaha ndien afiak edem oduk okure onyuñ okot Jisọs ndien obup Enye ete, “Nte Afo edi Ọbọñ mme Ju?”
34Jisọs ama obup ete, “Nte emi edi ekikere esit fo, mme edi mme mmọ efen etiñ ye afo ebaña Mi?”
35Pailet ama ọbọrọ Enye ete, “Afo ekere ete ke ami ndi kiet ke otu mme Ju? Ekedi ikọt mbufo ye akwa oku mbufo ekeyak fi esin mi ke ubọk. Afo akanam nso?”
36Jisọs ama ọbọrọ ete, “Obio ubọñ Mi idighe ke isọñ emi. Edieke ekpedide ntre, mme nditọ ufọk Mi ekpeñwana eñwan ndibiọñọ mme Ju ndimum Mi. Edi idahaemi obio ubọñ Mi oto ebiet efen.”
37Pailet ama obup Enye ete, “Nte afo ndien edi Edidem?” Jisọs ama ọbọrọ ete, “Afo ọmọdọhọ ete ke Ami ndi Edidem. Ekeman Mi, ndien ami ñkonyuñ ndi ke ererimbot ke ntak kiet emi, nditiñ ikọ mbaña akpanikọ oro. Owo ekededi emi adade ke ñkañ akpanikọ oro eyekpañ utọñ ọnọ Mi.”
38Pailet ama obup Enye ete, “Ndien nso idi akpanikọ?” Ke idak mbume emi ke Pailet akafiak ọwọrọ añwa ebine mme Ju ndien ọkọdọhọ mmọ ete, “Ami ñkwe isọñ emi ami ñkpadade mbiom owo emi ikpe. 39Edi ido mbufo nte Ami ñyak owo ñkpọkọbi kiet nnọ mbufo ke ini usọrọ uwọrọ ufin. Nte mbufo emeyom mi nsana Edidem mme Ju Enye ñyak?”
40Mmọ ema efiori ke ọkpọsọñ uyo, ete, Ih, Ih, kuyak Enye, edi yak Barabas nọ ñnyin. Barabas emi ekedi owo ñwo.
Currently Selected:
Jọn 18: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
