Ọbọsuru 3
3
Pita Ye Jọn Ekọk Owo Mbuñọ
1Usen kiet Pita ye Jọn ema eka ke Edisana Ebiet ke ñkanika ita uwemeyo, ke ini akam. 2Do ke “Ediye Inua Otop” nte ekekotde enye, owo kiet ama etie do emi ekedide mbuñọ toto ke usen emana esie. Kpukpru usen esimemen enye eketem do man enye ebeñe mme mmọ emi esidukde eka akam ke Edisana Ebiet okuk. 3Ke ini emi enye okokutde Pita ye Jọn nte eyomde ndiduk, enye ama ebeñe mmọ enọ enye ñkpọ;
4Mmọ ema ewuk enyin ese enye, ndien Pita ama ọdọhọ enye ete, “Wuk enyin se ñnyin,” 5do enye ama owuk enyin ese mmọ ye idorenyin edibọ ñkpọ nto mmọ. 6Pita ama ọdọhọ enye ete, “Ami ñnyeneke okuk ndomokiet, edi ami ñyenọ fi se ami ñnyenede. Mowuk fi ke Enyiñ Jisọs Kraist eyen Nasaret, nte saña.”
7Ndien Pita ama omum enye ke ubọk nnasia esie onyuñ añwam enye ndidaha nda, inikiet ikpat ye itọñukot owo emi ema esọñ idem. 8Enye ama ọfrọ ke enyọñ, ndien adada ke ikpat esie onyuñ ọtọñọ ndisaña ñkanade. Do ke enye eketiene mmọ oduk esit Edisana Ebiet, ke asaña, ke ọfrọ, ke onyuñ ọnọ Abasi ekọm.
9Ofuri otu owo ema ekut enye nte asañade isañ onyuñ otorode Abasi, 10ndien ke ini emi ekeyararede ediọñọ nte ke enye edi ebeñe ebeñe oro eketiede ke inua otop Edisana Ebiet emi ekotde “Ediye Otop”, idem ama akpa mmọ eti eti kabaña se iketibede ye enye. 11Nte owo emi okomumde Pita ye Jọn akama, ama akpa kpukpru owo idem ndien mmọ ema efeñe ebine mmọ ke ñkañ Edisana Ebiet emi ekotde Etehe Sọlọmọn.
12Ke ini emi Pita okokutde mme owo oro, enye ama ọdọhọ mmọ ete, “Mbufo mbon Isrel, ntaha idem akpade mbufo kabaña ñkpọ emi-e? Ntaha mbufo ewukde enyin ese ñnyin-e? Mme mbufo ekere ete ke ekedi ke odudu idem ñnyin ye ọkpọsọñ edidiọñọ Abasi akanam ñnyin ikeme ndinam owo emi asaña? 13Abasi Ebraham, Aisik ye Jekọb, Abasi mme ete ete ñnyin, ọnọ isuñ Esie Jisọs ubọñ. Mbufo ekemum Enye enọ mme akara ukara, enyuñ esin Enye ke iso Pailet, kpa ye ke ini emi Pailet okoyomde ndisana Enye ñyak. 14Enye ekedi Edisana onyuñ ọfọn ido, edi mbufo esin Enye, ekabade ebup ete Pailet anam inemesit ọnọ mbufo ke edisana owotowo ñyak ke ibuot Esie. 15Ndien mbufo ema ewot Enye emi adade mme owo usuñ ekesim uwem. Edi Abasi ama emenede Enye osio ke ñkpa, ndien ñnyin idi mme ntiense ibaña ñkpọ emi.”
16Ekedi odudu enyiñ Esie ọkọnọ owo mbuñọ emi nsọñidem. Se mbufo ekutde enyuñ ediọñọde ekenam ke mbuọtidem ke Enyiñ Esie; ekedi mbuọtidem ke Jisọs akanam enye okop nsọñidem nte emi ekutde enye ke idem mbufo.
17“Ndien ke emi, nditọ ete mi, ami mọfiọk nte se mbufo ye mme adausuñ mbufo ekenamde ye Jisọs ekenam ke unana ifiọk. 18Abasi ke ata anyan ini ama ọtọt toto ke inua mme Asiak Uduak Esie ete ke Kraist enyene ndibọ ndutuhọ; ndien Enye amanam emi edi akpanikọ ke usuñ emi. 19Etua ñkpọfiọk idahaemi, enyuñ ewọñode etiene Abasi, man Enye ọsọhi mme idiọkñkpọ mbufo efep, 20man oto do mme ini idọñesit ke spirit ekpedi oto iso Ọbọñ, ndien Enye ọkpọdọñ Jisọs emi edide Andinyaña emi Enye ama ekememek ọnọ mbufo. 21Enye enyene ndisuhọ ke enyọñ tutu ini edinam kpukpru ñkpọ ọwọrọ obufa ekem, nte Abasi ọkọtọtde oto inua mme ndisana mme Asiak Uduak Esie ke ata anyan ini. 22Koro Moses ama ọdọhọ ete, Ọbọñ Abasi mbufo eyenọ Asiak Uduak Abasi esọk mbufo, kpa nte Enye ọkọdọñde mi, emi edidide oruk mbufo. Mbufo enyene ndikpañ utọñ nnọ kpukpru ñkpọ emi Enye etiñde nnọ mbufo. 23Owo ekededi emi mikpañke utọñ inọ se Asiak Uduak Abasi oro etiñde eyebahade enye esio ke otu ikọt Abasi enyuñ esobo enye.”
24“Ke akpanikọ kpukpru mme Asiak Uduak Abasi ọtọñọde ke Samuel ka iso, kpukpru mmọ emi ekenyenede etop, ema etiñ ñkpọ ebaña mme usen emi ñko. 25Mme eñwọñọ Abasi emi Enye ekebede ke inua mme Asiak Uduak Esie ọnọ enyene mbufo, ndien mbufo emenyene udeme ke ediomi emi Abasi akanamde ye mme ete ete mbufo. Nte enye eketiñde ye Ebraham ete, ‘Edito ke mme mmọ emi ewọñọde ke ubon fo, ke Ami ndidiọñ ofuri isọñ!’ 26Ndien ke ntre Abasi emek onyuñ osio isuñ Esie ọdọñ ọnọ mbufo ke akpa itie man ọdiọñ mbufo ke edinam kpukpru mbufo ewọñọde ekpọñ mme oburobut usuñ mbufo.”
Currently Selected:
Ọbọsuru 3: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
