Ọbọsuru 23
23
1Pọl ama owuk enyin ese esop oro ndien ama ọdọhọ ete, “Nditọ ete mi! Esit mi añwaña ke mfọnmma usuñ kabaña ofuri uwem mi ke iso Abasi tutu esim idem usen mfin emi.”
2Akwa oku Ananayas ama ọdọhọ mme mmọ emi ekedade ekpere Pọl emia enye inua.
3Pọl ama ọdọhọ enye ete, “Abasi iditreke ndimia fi usiene, afo ibibene emi eyetde afia ñkpọ! Afo etie do ndikpe ikpe nnọ mi nte ibet etemede, kpa ye oro afo abiat ibet ke edidọhọ mmọ emia mi!”
4Mme mmọ emi ekedade ekpere Pọl ema edọhọ enye ete, “Nte afo ọsọñọ enyin ye akwa oku Abasi?”
5Pọl ama ọbọrọ ete, “Ami ñkediọñọke, nditọ ete, nte ke enye edi akwa oku. Ñwed Abasi ọmọdọhọ ete, ‘Mbufo inyeneke nditiñ idiọk ikọ mbaña andikara mbufo.’ ” 6Ke ini Pọl ama okokut ete ke ubak otu emi ekebohode ekedi Sadusi, ndien mme mmọ eken ekedi Farisi, enye ama emenede uyo ke esop ete, “Nditọ ete mi! Ami ndi Farisi, eyen Farisi. Ami nda ke ikpe mi koro ami ndoride enyin nte ke mme akpaña ñkpa eyeset efiak edu ke uwem!”
7Enye eketetiñ ikọ emi ama, mme Farisi ema etọñọ utọk ye mme Sadusi ndien esop emi ama abahade ada. 8Koro mbio Sadusi edọhọ ete ke mme owo idisetke ke ñkpa, ndien ñko ke mme enjel mme mme spirit iduhọ; edi mme Farisi enim mbita ke akpanikọ.
9Uyom ama okpon ndien ubak mme ekpe mbet emi edude ke ñka mme Farisi ema edaha eda enyuñ efaña ke ọkpọsọñ uyo ete, “Ñnyin ikwe baba ñkpọ ndomokiet emi owo emi anamde edue! Ekeme ndidi Spirit mme enjel ke akpanikọ eketiñ ikọ ye enye.”
10Eneni emi ama ọsọñ eti eti tutu ada iso ekọñ ama ekere ete ke ekeme ndiwai Pọl mbai mbai. Do enye ama ọdọhọ mme mbon ekọñ esie eduk ke ufọt otu owo eka ekesio Pọl ke otu mmọ, ndien efiak eda enye eka ebiet iduñ mme mbon ekọñ.
11Ke okoneyo emi eketienede, Ọbọñ ama ọwọrọ ada Pọl ke ñkañ onyuñ ọdọhọ ete, “Sọñ idem afo ọmọnọ ikọ ntiense abaña mi mi ke Jerusalem, ndien ana afo anam kpa ntre ke Rom.”
12Ke usenubọk ke ndañ nsiere, ubak mme Ju ema ekesobo ọtọ kiet enyuñ enam ediomi. Mmọ ema eda uñwọñọ ete ke mmimọ ididiaha ñkpọ, idinyuñ iñwọñke ñkpọ kiet ekededi tutu mmimọ iwot Pọl. 13Mmọ ema ewak ebe owo aba emi ekenamde ediomi emi. 14Ndien mmọ ema ebine mme ikpọ oku ye mme mbuot ekedọhọ ete, “Ñnyin imida uñwọñọ ọtọ kiet ite ididiaha ñkpọ ndomokiet tutu ñnyin iwot Pọl. 15Idaha emi afo ye esop ukara enọ uyo esọk ada iso ekọñ ete enye ada Pọl ọsọk mbufo, enyene ndibiaña nte ke eyom ndimana mbup enye mbume ndidiọñọ akpanikọ mbaña enye. Edi iyebeñe idem ndiwot enye mbemiso enye esesim mi.”
16Edi eyen eren eyen eka Pọl añwan ama okop abaña ediomi emi, do ke enye akaka okoduk ebiet iduñ mbon ekọñ eketiñ ọnọ Pọl.
17Pọl ama okot akamba owo ekọñ kiet onyuñ ọdọhọ enye ete, “Da akparawa emi ka bine ada iso ekọñ, enye enyene ñkpọ nditiñ nnọ enye”.
18Akamba owo ekọñ emi ama ada enye ebine ada iso ekọñ ọkọdọhọ enye ete, “Pọl owo ñkpọkọbi okokot mi onyuñ ebeñe mi ndida akparawa emi ndi iso fo koro enye enyene se enye oyomde nditiñ nnọ fi.” 19Ada iso ekọñ ama omum enye ke ubọk onyuñ ada enye adaha, ndien okobup enye ete, “Nso ke afo enyene nditiñ nnọ mi?”
20Enye ama ọdọhọ ete, “Mme andikara mme Ju ema ebiere ndibeñe fi ñkpọñ nte afo ada Pọl edi ke esop ukara, ke abiaña nte ke esop ukara eyom nditọñọ ntak nnam nduñọde mbaña enye. 21Edi kukpañ utọñ unọ mmọ, koro mme irenowo emi ebede aba edu emi edidibede ibet enye. Mmọ eta uñwọñọ mmọ, ndien ebet ndikop ibọrọ fo.”
22Ada iso ekọñ ama ọdọhọ enye ete, “Kutiñ unọ owo ndomokiet ete ke imeditiñ ikọ emi inọ mi.” Ndien enye ama osio akparawa oro unyọñ. 23Do ke ada iso ekọñ okokot mme ikpọ owo esie iba ndien ọdọhọ ete, “Enam ibat mbon ekọñ owo ikie ye iba edu ke mbeñe idem ndika Siseria, ye mme andiwat ke enyọñ enañ mbakara owo ata ye duop, ye mme akama eduat ikie ye iba, ndien edu ke mbeñe idem ndidaha ke ñkanika usukkiet okoneyo emi. 24Ebeñe mme enañ mbakara idem enọ Pọl ndiwat, man ekeme ndida enye ke ifure nsọk ada ibuot ukara ete Feliks.”
25Do ke ada iso ekọñ ekewet ñwed emi ekewetde ntem:
26Klaudiọs Lisias, ọnọ ñwed emi esọk Akwa etie ada ibuot ukara Feliks:
27“Mme Ju ekemum owo emi ke odudu ndien mmọ ekeyom ndiwowot enye. Ami mma ñkop nte ke enye edi amana isọñ eyen Rom, ke ntre ami mma ñka ye mme mbon ekọñ mi ñkanyaña enye. 28Ami ñko mma ñyom ndidiọñọ se mmọ ekebiomde enye ikpe ebaña; ntem, ami mma nda enye ñka ke esop ukara mmọ. 29Ami mma ñyarade ñkut nte ke enye ikeduehe isop ndomokiet emi enye okpodotde ñkpa mme ndika ñkpọkọbi. Se eketiñde edian enye ekenyene ñkpọ ndinam ye mme mbume emi otukde ibet mmọ. 30Ndien ke ini ekenamde mi mfiọk nte ke mme ubak mme Ju ke ekenanam ediomi ñkpa ebaña enye, ami mma mbiere ndinọ enye esọk fi. Ami mma ndọhọ mme mmọ emi edade ke ikpe ye enye edi edibon mme ndudue esie ke iso fo.”
31Mme mbon ekọñ emi ema enam nte ekedọhọde mmọ enam. Mmọ ema eda Pọl kpa ke okoneyo oro ekesim Antipatris. 32Ke udiana usen mme mbon ekọñ emi ekesañade ke ikpat ema efiak enyọñ ebiet ukpeme mmọ, ndien ema ekpọñ mme mbio ekọñ emi ekewatde ke enañ mbakara ndika iso ke isañ emi ye Pọl.
33Mmọ ema eda enye ekesim Siseria, ndien ema eyak ñwed enọ ada ibuot ukara, enyuñ eyak Pọl esin enye ke ubọk. 34Ada ibuot ukara ama okot ñwed ndien ama obup Pọl ñkanñkuk emi enye okotode. Ke enye ama ọkọdiọñọ nte ke Pọl okoto Silisia, 35enye ama ọdọhọ ete, “Ami ñyekop ikpe fo ke ini mme andidori fi ikọ ema edisim.” Enye ndien ama ọnọ uyo ete enim Pọl ke idak ukpeme ke ufọk Edidem Erọd.
Currently Selected:
Ọbọsuru 23: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
