Genesis 24
24
Mkaza Isaka
1Ibulahimu adalahalisaga, naho Mnungu amvikilaga kwa kila kint'hu kiya adamanyaga. 2Zuwa dimwenga amgambaga mtumwa ywakwe uyo andaga mnyamp'hala mkulu mwe vint'hu vose andaga navo Ibulahimu, “Geleka umkono wako hasi ya mawambo yangu. 3Nakuunga uike kilapi kwa zina dya Mnungu, ywa kwe mbingu na we isi, kugamba homloze mwanangu ywe kilume kwa want'hu awa aha Kanaani. 4Nowiite kudya kwe isi idya nelekwe niyo wamzunguila mvele mwanagu Isaka uko kwa wandugu zangu.”
5Yudya mtumwa niyo auza, “Nevinde vivihi uneva uyo mvele analemela kwiza kwikala uku na miye? Neni mlekele mwanao aite akekale uko walawaga?”
6Niyo Ibulahimu ahitula, “Bule usekugeza kumvuza mwanangu kudya! 7Zumbe, Mnungu ywa kwe mbingu, uyo anilavaga kwe isi ya tate na wandugu zangu, niyo akelapiza kwangu kugamba naawenk'he welekwa wangu ino isi. Uyo Mnungu naamtume mtumigwa ywakwe akulongoele vileke ukapate mvele ywo kumloza mwanangu ukwo. 8Uneva uyo mvele haaunge mwizanye, nounde kulekelwa mwe kilapi changu. Mna usekugeza kumvuza mwanagu uko.” 9Ivo niyo yudya mtumwa aika umkono wakwe hagati ha mawambo ya Ibulahimu, mkulu ywakwe, no kuika kilapi kugamba naadamanye ayo agambilwe ni Ibulahimu.
10Umtumwa uyo andaga niye mnyamp'hala mkulu we vint'hu va Ibulahimu, aguhaga ngamia mlongo ya mkulu wakwe niyo aita komzi naakekala Naholi, mwe isi ya Mesopotamia. 11Eze abule azitendaga zingamia zifike madi he disima kuse yo mzi. Yandaga kisingi lupisi lwa wavele kugenda kuteka mazi. 12Niyo alombeza, “ We Zumbe, Mnungu ywa zumbe dyangu Ibulahimu unink'he uhumi dielo naho umkumbukile zumbe ywangu Ibulahimu. 13Kaula! Miye hikimala hagihi nedisima aha, naho wavele wo mzi naweze wateke mazi. 14Elo! Neinde ivi, yudya mndele huunga nimgambe ketule biga dyako niywe mazi, naye niyo ahitula, ‘nywa naho nenizinywese zingamia zako.’ Vinde uyu nie mvele umsaguile mndima ywako Isaka. Kwaivo inanda ivo, nenimanye kugamba kumdamanyila wedi mkulu ywangu.”
15Umwo andile akei kubinda kulonga, ivo Labeka mwana Betueli, mwana Milka mkaziwe dya Naholi nduguye dya Ibulahimu ezaga aketwikile dibiga dyakwe. 16Andaga mndele ahombweele ukamsinya, mwali na mazanga. Engilaga kwe disima niyo ateka mazi mwe dibiga dyakwe no kufosa kuse. 17Yudya mndima asunguzaga kumbwiila niyo amgamba, “Nalombeza unink'he mazi ya mwe dibiga dyako ninywe.”
18Niyo amgamba, “Haya nywa mkulu.” Niyo asunguza kuketula na kumtozela vileke anywe. 19Eze ibinde ukunywa amgambaga, “Iviaivia neni zinywese zingamia zako mpaka zigute.” 20Asunguzaga kuzigidila mazi zingamia yandaga mwe dibiga umwo mwo luhondo lwo kunywesela naho niyo aguluka kugenda kuguha matuhu. Azinywesaga zingamia zakwe zose. 21Yudya mnt'hu andaga akamkaula yudya mndele kwa hagihi haheina kulonga dyodyose akafanyanya kugamba mafani Zumbe kautenda utafi wakwe kunda wedi.
22Ngamia zize zibinde ukunywa, yudya mnt'hu aguhaga kipini cha zahabu cha yombe kulu niyo amwink'ha bangili nk'hulu za yombe kulu za zahabu no kumvika mwe mikono yakwe, 23niyo agamba, “Hake nigambile, iso ni ani. Miye na want'hu wangu nekipate hant'hu ho kugona kwenyu nekilo?”
24Labeka niyo agamba, “ Miye ni mwana Basueli elekwe na Naholi kwa mkazewe Milika.” 25Ongezelaga akagamba, “Kwetu kaya yeyuko mani yo kuzink'ha zingamia zako naho heaho hant'hu ukudaha kuhumula.”
26Yudya mnt'hu niyo afika madi no mkumvika Zumbe.
27Niyo agamba, “Atogolwe Zumbe, Mnungu ywa mkulu Ibulahimu hejaile kiya alagane na mkulu. Zumbe kanilongoza mpaka kwa wanduguze dya mkulu.”
28Yudya mndele agulukaga mpaka kwa wanduguze dya nine no kuwagambila mbuli zose. 29Labeka andaga na lumbudye etangagwa Labani agulukaga kuse kuita kwe disima ukwo wandaga uukwo wandima wa Ibulahimu. 30Umwo andile akei kuita, Labani aonaga kipini cha mwe mp'hula ne zibangili zandaga mwe mikono ya lumbudye, na ivo evaga lumbudye Labeka andaga akalonga, ayo agambilwe ni uyo mnt'hu. Aitaga kwa mndima ywa Ibulahimu andaga kakimala hagihi ne zingamia zawe kwe disima, 31niyo awagamba, “So kaya weye uvikilwe ni Zumbe, nii mkimaila kuse name hiwaikilani lumwe ugono we zingamia zenyu.”
32Niyo yudya mgeni eza kwe nyumba ya Labani naye azitulaga zingamia imizigo niyo azink'ha mani ya kudya, niyo wadya want'hu andile nawo awenk'ha mazi ya kuhaka hamwenga na yehe mwenye. 33Amtengelaga nk'hande mna niyo agamba, “Henidye nk'hande mpaka ninde kulonga kiya kinigale.”
Labani niyo amgamba, “Haya longa.”
34Akongaga kulonga akagamba, “Miye ni mndima ywa Ibulahimu. 35Zumbe kamvikilisa mkulu niyo amtenda mgoli. Kamwink'ha mafyo ya ngoto na mbuzi na ng'ombe na vint'hu vidamanywe kwa maiwe ya yombe kulu na zahabu na watumwa wagosi na wavele na ngamia na mp'hunda. 36Sala uyo mkaziwe dya mkulu, apataga mwana kilume mwo udala wakwe, mkulu ywangu kamwink'ha mwana uyo kila kint'hu kunda chakwe. 37Mkulu ywangu kanigambila miye kwa kilapi nidamanye kiya alongile. Agambaga, usekumsaguila mwanagu mvele kulawa kwa wandele wa Kanani. 38Vituhu vakwe wiite kwe isi yangu want'hu wa kwetu ukamsaguile mwanangu mvele. 39Naho nehi muuza mkulu, nevinde vihi uneva hinezile naye? 40Amhitulaga kugamba, Zumbe akunilongoza kila zuwa naakwink'he mtumigwa ywa kwe mbingu mndanye, niyo naikint'hize int'hambo yako. Noumpatile mwanangu mvele kulawa kwa want'hu wangu naho kulawa kwe mp'huga ya tate. 41Uneva unaita kwa want'hu wangu niyo waleka kukwink'ha uyo mndele, weye nounde mlekelwa mwe kilapi chako.”
42“Dielo nizenize kwe disima niyo nalombeza hagamba, ‘Zumbe, Mnungu ywa mkulu Ibulahimu nakulombeza ukint'hize mwa iki hudamanya. 43Hikimala aha he disima. Neeze mndele ateke mazi nimgambe, nalombeza mazi ninywe kulawa mwe dibiga dyako. 44Anazumila kunink'ha mazi, niyo azink'ha mazi zingamia zangu, uuyo naande niye mvele umsagule kunda mke mwana ywo mkulu ywangu.’ 45Umwo nandile nikei kubinda kulonga ivo mwo moyo wangu, Labeka ezaga ahagate dibiga dyakwe mwa mayega niyo aseela kwe disima ateke mazi. Niyo namgamba, Nalombeza mazi ninywe. 46Niyo asunguza kuketula dibiga dyakwe niyo kugamba, Nywa naho neni zinywese zingamia zako. Naywaga niyo azinywesa ne zingamia zangu. 47Naho namuuzaga, iso niani? Naho ahitulaga, miye mwana Bethueli mwana Naholi na Milika. Niyo namvala kiswaufu cha zahabu na bangili mwo mkono. 48Nafikaga madi hamvika Zumbe na kumtogola Mnungu ywo mkulu dyangu Ibulahimu anilongoze vedi kwa mndele mwana ywo lukolo ywa wandugu wa zumbe dyangu kwajili ya mwanawe. 49Naivo nigambileni, uneva nomumtendele mkulu ywangu kwa wedi na uhuwilwa hegu bule nigambileni nimanye cho kudamanya.”
50Labani na Besueli niyo wahitula, “Kwaviya mbuli ino ilawa kwa Zumbe, suwe dyokulonga hadihali. 51Mguhe uyo Labeka, uite naye naho akande mkaza mkulu ywako enga ivo Zumbe Mnungu alongile.” 52Yudya mndima ywa Ibulahimu eze eve ivo, afikaga madi no amvika Zumbe. 53Yudya mndima alavaga vint'hu va masawa na va zahabu na suke niyo amwink'ha Labeka. Iviyaiviya amwink'haga mageleko ya yombe kulu lumbudye na nine dya Labeka.
54Niho yehe hamwenga na want'hu wandaga aho wadya na kunywa. Ize ibule mtondo yudya mndima agambaga, “Gojeni niuye kwa mkulu ywangu.”
55Mna wanduguze dya Labeka na mami yawe wagambaga, “Mndele ande kwikala nawo kwa mazuwa heye kuhunguka mlongo, akajika naaite.”
56Mna niyo agamba, “Mse kunizulusa kwaviya Zumbe kaitenda int'hambo yangu kunda ya uhumi nilekeleni niuye kwa mkulu ywangu.”
57Niyo wamgamba, “Goja kimwitange, kimtegeleze mwenye.” 58Ivo wamwitanga Labeka niyo wamuuza “Togola waunga wiite na mnt'hu uyu?”
Yehe niyo ahitula, “Heiye.”
59Ivo wamzumilaga Labeka aite hamwenga na mnyamp'hala ywa Ibulahimu na want'hu wakwe. 60Niyo wamvikila Labeka wakagamba,
“Weye lumbu dyetu, unde mwelesi dya wana wengi heweina mnt'hu hakudaha kuwawaza.
Welekwa wako wawahume wank'hondo wao!”
61Niyo Labeka na wandima wakwe we kivele wakwela mwe zingamia no kuitanya na yudya mndima ywa Ibulahimu.
62Mwo lupisi ulo Isaka ahalawaga Beer Lahai Loi niyo ekala uko Negebu. 63Kisingi kimwenga Isaka atalamkaga kwe nk'honde vileke ande ekedu na kufanyanya, niyo aona kweza ngamia. 64Labeka eze amuone aseelaga hasi kulawa mwe ngamia, 65niyo wamuuza mndima ywa Ibulahimu “Yudya akugenda mwe nk'honde akwiza kukisingila ni ani?”
Yudya mndima niyo amhitula, “Ni mkulu ywangu.” Niyo Labeka aguha suke no kugubika uso wakwe.
66Wudya wandima wamgambilaga Isaka yose yadya wadamanyaga. 67Isaka amwigalaga Labeka kwe dihema idyo nine Sala andaga akekala. Amguhaga Labeka niyo anda niye mkaziwe. Isaka amuungisaga Labeka naivo aonaga utondowazi kwaviya nine abanikaga.
Currently Selected:
Genesis 24: NguuBV
Highlight
Copy
Compare
Share
Want to have your highlights saved across all your devices? Sign up or sign in
The Old Testament in Nguu @The Word for The World International and the Nguu Language translation, 2025. All rights reserved.
