Mesali 19
19
1Mbaka mhushu yakalikala kwa kutenda maheri, kuliku muntu mzigizigi mweni milomu yakuyi ipotoka.
2Ifaandiri muntu kuwera pota umani, yakagenda kalongolalongola kalikwala.
3Muntu pakalyagamiziya kwa uzigizigi wakuyi, moyu gwakuyi gumkalalira Mtuwa Mlungu.
4Lunda zikwega maganja wavuwa wasyayi, kumbiti mhushu kalekwa ata na ganja.
5Kapitawu gwa mpayu hapenikaleki kwazibiwa, yakatakula upyota hapeni kashapili azabu.
6Wantu wavuwa wajera kulitula pakwegera na wakulu na kila muntu kafira kuwera ganja gwa muntu yakalaviya mafupu.
7Mhushu kakalalirwa na walongu wakuyi, wamaganja wakuyi ndo nentu: Wamtira! Ata pakawazyangazyanga ntambu gaa hawamlemi.
8Yakalipanana luhala kalifira mweni; yakagafata mahala hakaweri na mpatiru.
9Kapitawu yakatakula kwa mpayu hapeni kakosi kwazibiwa; yakatakula mpayu hakagamiri.
10Ifaandiri kwa mzigizigi kulikala makaliru gaherepa, kayi ndo idoda nentu mmanda kuwakolamlima wakulu.
11Yakana mahala hapenikakalali kalongola, kulekeziya vidoda ndo zyuma kwakuyi.
12Maya ga mfalumi ndo handa kuguguma kwa simba, kumbiti uheri wakuyi ndo handa mangami panani pa mihamba.
13Mwana mzigizigi ndo matatizu kwa tati wakuyi na mdala mndewi ndo handa mandonda ga mvula yagaperandiri.
14Numba na lunda ndo uhala wakapata muntu kwa walera wakuyi, kumbiti mdala yakana mahala kalawa kwa Mtuwa Mlungu.
15Uleri ujega mpota zizotopa, muntu yakalema lihengu hakatabiki kwa njala.
16Yakakola malagalira kaponiziya ukomu wakuyi, yakabeziya lagaliru hakahowi.
17Yakamtanga mhushu kampanana uwanda Mtuwa Mlungu, Mtuwa Mlungu hakamlipi kwa shitendu shakuyi shiheri.
18Gumwazibu mwana gwaku badu kwankali na litumbiru, kumbiti nagumwazibu mpaka kumwagamiziya.
19Muntu gwa maya ikalipa mpaka kazabu, pagumleka mara yimu gufiruwi kumleka kayi.
20Gupikanili magambiziya na kwanka mafunda, su gupati luhala kwa mashaka gagiza.
21Mumoyu gwa muntu mwana mipangu ivuwa, kumbiti shakafira Mtuwa Mlungu ndo shashifira kutendeka.
22Shashifiruwa kwa muntu ndo ufiru yawupera ndiri, mbaka muntu mhushu kuliku muntu yakapaya.
23Kumguwira Mtuwa Mlungu kujega ukomu, hakapananwi koyera ya kutosheya, pota hapeni kapatwi na malombu goseri.
24Mleri ndo handa muntu yakatula liwoku lyakuyi musahani ya shiboga, kumbiti kahera makakala ga kuyinyasula mpaka mlomu.
25Gumwazibu yakana lidufiya na mngalimahala hakapati mahala, gumberiziyi yakana mahala nayomberi hakapati umani.
26Yakamzulumu tati gwakuyi na kumwinga mawu gwakuyi, ndo mwana yakajega soni na kakalaziya nakamu.
27Mwanagwangu, paguleka kupikanira mafunda, hagwagamiri na hagulekani na visoweru vya luhala vya gulifunditi.
28Kapitawu yakafaandiri shintu kajongera mirandu yayifiriziwa na mlomu gwa mkontola guwugira ukontola.
29Azabu iwera kala kwa wana lidufiya, mboku zitandwa kala kulwapula migongu ya wazigizigi.
Currently Selected:
Mesali 19: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.