Mawalanga 34
34
Mbaka za isi
1Mtuwa Mlungu kamgambiriti Musa, 2“Guwagambiri Waisraeli pagulonga. Pamwingira kanani, isi yaniwapananiti iweri uhala wenu, mbaka za enewu lya mwenga lyoseri haliweri ntambu ayi. 3Uwega wa kusika mbaka yenu hayiweri kulawa kushiwala sha Sini kupitara uwega wa Edomu hagwanjiri kwagulawa mshenji uwega wa kusika upeleru wa bahari ya Munyu. 4Shakapanu hagupindi kusika njira ya kugenda Akirabimu kupitira Sini mpaka Kadeshi Barinea, uwega wa kusika. Kulawa panu mbaka hayipindi kupitira kushana kwagulawa mshenji mpaka Hasari Adari na kupita mpaka Azimoni. 5Kulawa Azimoni hagupindi kugenda lushemba lwa Misri mumbaka ya Misri na kupelera bahari ya Mediteraniya.”
6“Mbaka yenu ya uwega wa kwaguzyeta mshenji hayiweri bahari ya Mediteraniya.”
7“Mbaka wenu ya uwega wa kushana hayiweri ntambu ayi kulawa bahari ya mediterania, hamtuli shigingi mpaka lugongu Hori. 8Kulawa lugongu Hori hamtuli shigingi mpaka njira ya Hamati na kwendeleya mpaka Sedadi, 9na kupita mpaka Zifironi na kupelera Hazari Enani, ayi hayiweri mbaka yenu ya kushana.”
10“Mbaka yenu ya uwega wa kwagulawa mshenji hamugutuli kulawa Hazari Enani mpaka Shefamu. 11Kulawa Shefamu hagugendi kusika mpaka Ribila, kwagulawa mshenji mwa Aini shakapanu mbaka ayi hayiseleri pasi mpaka kuluseleru lwa kwagulawa mshenji mwa litanda Kinereti, 12Shakapanu haguseleri kufata lushemba Yoridani mpaka bahari ya Munyu.”
“Ayi ndo hayiweri isi yaku handa mbaka ntambu yayiwera.”
13Su, Musa kawagambira Waisraeli, “Ayi ndo isi yamfira kuyihala kwa kugalambula simbi, isi yeni Mtuwa Mlungu kalagalira wagapanana makabila tisa na nusu. 14Likabila lya Rubeni na lya Gadi na nusu ya likabila lya Manasi gapata uhala wawu kulinganira na kolu zawu. 15Makabila aga mawili na nusu gapata uhala wawu kumwambu kulushemba Yoridani uwega wa kwagulawa mshenji pakwegera na Yeriku.”
Wakulu yawagolokera kubagula isi
16Mtuwa Mlungu kamgambiriti Musa, 17“Mtambika Eleazari na Yoshuwa mwana gwa Nuni ndo wawafira kuwabagulira wantu isi su iweri yawu. 18Viraa hagutoli mkulu yumu kulawa kila likabila katangi mukubagula isi.” 19“Aga ndo matawu gawu, kulawa likabila lya Yuda, kaweirti Karebu mwana gwa Yefuni. 20Kulawa likabila lya Simioni, kaweriti Shemueli mwana gwa Amihudi. 21Kulawa likabila lya Benjamini, kaweriti Elidadi mwana gwa Kisiloni. 22Kulawa likabila lya Dani, kaweriti Buki mwana gwa Yogili. 23Kulawa likabila lya Manase kaweriti mwana gwakuyi Yusufu, kaweriti Hanieli mwana gwa Efodi 24Kulawa likabila lya Efraimu, kaweriti mwana gwakuyi Yosefu, kaweriti Kemueli mwana gwa Shifitani. 25Kulawa likabila lya Zebuluni, kaweriti Elisafani mwana gwa Parinaki. 26Kulawa likabila lya Isakari, kaweriti Palitieli mwana gwa Azani. 27Kulawa likabila lya Asheri, kaweriti Ahihudi mwana gwa Shelomi. 28Kulawa likabila lya Nafutali, kaweriti Pedaheli mwana gwa Amihudi.” 29Awa ndo wantu walii Mtuwa Mlungu kawalagaliriti wawabagulili Wasraeli isi ya Kanaani iweri uhala wawu.
Currently Selected:
Mawalanga 34: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.