Yoshuwa 11
11
Yoshuwa kankuwakanka wafalumi wa kushana
1Mfalumi Yabini gwa Mji gwa Hazori pakapatiti visoweru avi, kajegiti visoweru kwa mfalumi Yobabu gwa Madoni na mfalumi gwa Shimironi na mfalumi gwa Akishafi. 2Viraa kajegiti visoweru kwa wafalumi yawaweriti kumigongu ya kushana na walii yawaweriti Araba, Araba iweriti kusika mwa Kinereti, kulularanda na wafalumi yawaweriti Nafatidori muuwega wa kwaguzyeta mshenji. 3Mfalumi Yabini viraa kajegiti visoweru kwa Wakanaani yawaweriti wega za kwagulawa mshenji na kwaguzyeta mshenji, kwa Waamori na Wahiti na Waperizi na Wayebusi yawalikaliti mumigongu na kwa Wahivi yawalikaliti muluseleru lwa lugongu Herimoni muisi ya Mizipa. 4Su walawiti woseri na mashonta gawu goseri. Womberi waweriti wavuwa gambira muhanga gwa kumpeku mwa bahari pamuhera na mbutuka zivuwa na farasi wavuwa nentu. 5Wafalumi woseri awa walijimiraniti pamuhera na kubawira malingu gawu pakwegera na mubwiru za mashi aku Meromu su walikomangi nkondu na Waisraeli.
6Mtuwa Mlungu kamgambiriti Yoshuwa, “Naguwatira womberi toziya shirawu, shaka gambira ashi, haniwagamiziyi woseri kwa kuwatenda Waisraeli wawakanki, na mwenga hamuidumulangi mishipa ya magulu ga kumbeli ga farasi wawu na kulunguziya nakamu kwa motu mbutuka zawu zyazikwegwa na farasi.” 7Su Yoshuwa pamuhera na shonta lyakuyi lyoseri walawiriti na kuwakangila vumu kumbwiru ya aku Meromu. 8Mtuwa Mlungu kalitenda shonta lya Israeli liwakanki wankondu wawu, wawakomangiti na kuwawinga mpaka aku Sidoni nkulu na Misirefotimaimu, mpaka uwega wa kwagulawa mshenji mulularanda lwa Mizipa. Makomangu gendereyiti mpaka wankondu woseri pawalagwitwi woseri. 9Yoshuwa katenditi shilii shakalagaliritwi na Mtuwa Mlungu, kaidumuliti mishipa ya magulu ga kumbeli ga farasi wawu na kuzilunguziya nakamu kwa motu mbutuka zawu zyazikwegwa na farasi. 10Yoshuwa pakaweriti kankuwuya, kagutoliti kwa makakala mji gwa Hazori. Kamlagiti mfalumi gwa mji agu toziya ndo yakaweriti mlongoziya gwa falumi zoseri azi. 11Shakapanu kawalagiti wenikaya woseri wa mji gulii na kagulunguziya nakamu kwa motu mji gwa Hazori na kamlekiti ndiri ata muntu yumu. 12Viraa kayitoliti kwa makakala miji ilii imonga yoseri na kuwalaga wafalumi woseri wa miji ilii handa Musa ntumintumi gwa Mtuwa Mlungu ntambu yakamgaliriti. 13Kumbiti Shonta lya Israeli wayilunguziyiti ndiri miji yaiweriti kuvigongu vyavirawiriti na mahami gawu, su hera mji gwa Hazori gulii Yoshuwa kaguluziyiti nakamu kwa motu. 14Waisraeli watoliti vintu vyoseri vyawavitoliti kwa makakala pamuhera na wankanyama wa kulolerwa wa miji ayi, kumbiti wawalagiti wenikaya wakuwi woseri, pota kuleka ata shoseri shikomu. 15Mtuwa Mlungu kamlagaliriti Musa ntumintumi gwakuwi, Musa viraa kamlagaliriti Yoshuwa, Yoshuwa kagajimiriti malagalira goseri. Katendiiti kila shintu shilii Mtuwa Mlungu shakamlagaliriti Musa.
Isi zyazitolitwi kwa makakala na Yoshuwa
16Yoshuwa kayitoliti kwa makakala isi yoseri. Katoliti semu za kumigongu na semu zoseri za Negebu, enewu loseri lya Gosheni na isi laranda, isi ya Araba, migongu ya Israeli na semu zyakuwi zyaziwera kulularanda. 17Yomberi kazitoliti kwa makakala na kuwalaga wafalumi woseri wa isi azi kwanjira lugongu lwaluweriti lwahera shintu lwa aku Halaki pakwegera na Seiri mpaka Baaligadi mulularanda lwa Lebanoni, kusika mwa lugongu Herimoni. 18Nkondu yakalikomangiti Yoshuwa pamuhera na wafalumi woseri walii iweriti ya shaka shitangala kupela. 19Kwahera mji yagutenditi mapatanu ga ponga na Waisraeli, kumbiti hera mji gwa Gidiyoni, gulii gwawalikaliti Wahivi. Waisraeli wayitoliti kwa makakala miji imonga yoseri kwa kulikomanga nkondu. 20Iweriti nfiru ya Mtuwa Mlungu mweni kuyikamaziya miyoyu ya wantu wa maisi aga su walikomangi nkondu. Kafiliti nawawoneruwa lusungu kumbiti walaguwi. Hangu ndo Mtuwa Mlungu ntambu yakamlagaliriti Musa. 21Shaka shilii Yoshuwa kagenditi na kawagamiziyiti Waanaki yawalikaliti mumigongu aku Hebroni na Debiri na Anabu, isi yoseri ya vigongu vya Yuda na Israeli. Yoshuwa kawagamiziyiti wantu walii pamuhera na miji yawu. 22Kwahera muntu gwa likabila lya Anaki yakasigaliti muisi ya Israeli, wasigaliti wadidika hera mumiji ya Gaza na Gati na Ashidodi.
23Su Yoshuwa kayitoliti kwa makakala isi yoseri kulinganira na goseri galii Mtuwa Mlungu ntambu yakamlagaliriti Musa. Yoshuwa kawapananiti Waisraeli iweri yawu, walibagulila kulinganira na makabila gawu.
Shakapanu wantu woseri wa Israeli woyeriti na nkondu.
Currently Selected:
Yoshuwa 11: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.