YOANI 12

Malia asopei malasi ta mako ma Yesu

(Hokea koko Mat 26, 6-13; Mal 14, 3-9)

1Maswi masamano boso ba Pasika ɛ Bayuda, Yesu akɛɛ ta Betania, esika ɛdaka Ladjalo, ona ɔpusoa yo ta ndanda ɛ bago. 2Oho, bakalea mia tina ɛ Yesu. Malata atanda mesa ko Ladjalo adaka omɔti ɔ bato ibadaka na Yesu ta mesa. 3Malia atomba ekenge ɛ litele ɛ molangi ma malasi ma motwuia monɛnɛ, ena ɛkɔɔmɔ na nalade esɛnɔke amasopa ta mako ma Yesu, ko amahakoa na swee djande. Ndako esusu ɛluma na so epele ɛ malasi. 4Bea omɔti ɔ batingami ba nde, Yudasi Isikaliote – ona omokabalea – abala boo: 5«Tina edai bo pɛpɛ otɛkɛ malasi mia na pata dja falanga mikama misato bɛngɛ ladjipɛ odii bakwali nda?» 6Aibalaka bea ta elɔkɔ ɛ boo akɛsɛlɛkɛ na bakwali, endolo tina ɛ boo adaka moibi: ɔpeaka yo tɔmbi ɛ falanga adaka bihole bisusu adjiiba. 7Endolo Yesu abala boo: «Mokinani ogoo! Akɔi mua tina ɛ olɛdja iswi ipusealeani bo. 8Odiini na bakwali bihole bisusu, endolo odɛteleani na mbai bihole bisusu.»

Kuta diko la Ladjalo

9Emumu ɛ Bayuda ɛoka boo Yesu adii ta Betania. Baikɛ etoko ta ɛlɔkɔ ɛ Yesu, endolo koko tina ɛ oenɛ Ladjalo ona ɔpusoa Yesu ta ndanda ɛ bago. 10Bea bakumu ba banganga ba Ndjambe baingea kuta ɛ owa koko Ladjalo, 11tina ɛ boo diko la nde Bayuda bike babakina ko badhima Yesu.

Yesu aingei ta Yelusalɛmɛ

(Hokea koko Mat 21, 1-11; Mal 11, 1-11; Luk 19, 28-40)

12Ngɔngɔ dja iswi imɔti, emumu ɛ bato ɛɛdua ta tɛkɛ ɛ Bayuda ɛ Pasika ɛoka boo Yesu aduake ta Yelusalɛmɛ. 13Ibo basusu batomba maango ma mabia ko baimana ta ibonga tina ɛ osaka na nde; bagamaka boo: «Iya koko! Adjongoame ona ɔdoake ta kombe ɛ Kumu! Yɛɛ Ndjambe adjongoe kumu ɔ Isalɛlɛ!» 14Yesu atanea mwana ɔ punda ko abakama diko la nde, okimana na moda imabalaka Makomi:

15«Pɛpɛ obanga, ibonga la Siona!

Hokea, kumu ɔ wɛ adoi, adii diko la mwana ɔ punda#12, 15 Hokea Mal 11,2.»

16Batingami ba nde baipakasipoa midjɔ mia imakɔmɔkɔ; endolo ehole ɛkumedjama Yesu, balɛdjana boo mia misusu makomama diko la nde ko oko moda mua imaakɔ bo ta tina ɛ nde. 17Bato basusu ibadaka engbanga na Yesu ehole ɛbea yo Ladjalo boo aimane sokolu ɛ mobombo ko ehole ɛmopusoa yo ta ndanda ɛ bago, bapa tati ɛ mia imaenɛ bo. 18Na tina hee emumu ɛ bato bakɛɛ asaka na nde: baoka boo edii yo moto ɔkɔɔ embete ena ɛ okamoa. 19Na bea Bafalusai basabaleana boo: «Oenini, otahɔnɔni noko okɔ eka emɔti: tina ɛ boo bato basusu babangi omokimana!»

Bakina ba Gɛlɛki bahombi Yesu

20Bakina ba Gɛlɛke badaka ta ndanda ɛ bato ibaduaka ta Yelusalɛmɛ tina ɛ okumedja Ndjambe ta ehole ɛ tɛkɛ. 21Babatama na Pilipo, ona ɔdaka ɔ ngando ɛ Betesaida ta Galilai, ko bamohɔdja boo: «Tata, lapalaka laenɛ Yesu.» 22Pilipo akɛɛ atɔndɔ Andele, ngɔngɔ djia ibo basusu babae bakɛɛ atɔndɔ Yesu. 23Yesu abasɔmbɛdja boo: «Ehole eimei ena eboani Mwana ɔ moto aingee ta ekumu ɛ nde. 24Edii bea, nabali na nu sooti boo: nga mombuma ma ndongo imokwi ta kpɔtɔ momiti gwa, modikai oko mombuma momɔti. Endolo mokagwa, moboti mbuma djike. 25Ona oopali mohelo ma nde amobungedjalea, endolo moto oolonalea mohelo ma nde ta ngondo hee amobanealea tina ɛ mohelo ma kɔbili. 26Nga moto akapala osaleani, aboani akimaneni; bea, mosali ɔ mbai adalea koko ena ta esika edii mbai. Tata akumedjalea moto ona ɔsaleakani.»

Yesu abali tina ɛ ogwa ba nde

27«Hadɛdi molema ma mbai motungeami. Ɛbalaka mbai yee? Nabale boo: Tata, heledjani ta ehole hee ɛ monɔngɔ? Endolo nadoa mɛɛnɛ oko bɛngɛ naoke monɔngɔ muu. 28Tata, kombe ɛ wɛ ɛ kumame!» Bea moholi madonga ta busa ko maokama boo: «Na yekumedja ehele ko na ye kumedjabi koko.» 29Emumu ɛ bato ɛdaka ena ɔɔka boo moholi mua babala boo: «Ena ɛdaka ngilimo ɛ bɛi!» Bakina babalaka boo: «Obwɛndi abali na nde!» 30Endolo Yesu abala boo: «Moholi mua mookamiti ta tina ɛ mbai endolo ta tina ɛ boono. 31Edii hadɛdi esambi ɛ ngondo hee; hadɛdi adumbalea kumu ɔ ngondo hee osokolu. 32Ko, ehole eihwedjamabi mbai donga kpɔtɔ, nakolabi bato basusu odii mbai.» 33Abalaka bea, tina ɛ oinedja moda ma ogwa ba nde. 34Emumu ɛmosɔmbɛdja boo: «Laoka ta mobeko boo Masia ahelamabi kɔbili. Na bea, moda mohɔni yo obala boo Mwana ɔ moto aboani aihwedjame nda? Odii Mwana ɔ moto nda?» 35Yesu abala na bu boo: «Ohuu bodii ta ndanda ɛ boono tina ɛ maa ehole mokɛkɛ. Dalani ehole edino na ohuu, bɛngɛ boo modidi mosaka okundumodjani, tina ɛ boo ona ɔdalaka ta modidi tadjebe esika ɛkeke yo. 36Dhimani ohuu ehole edino na bu, bɛngɛ boo oimeeni bana ba ohuu.» Ngɔngɔ dja obala bea, Yesu akɛɛ ko asabomba ohali na bu.

Bayuda baloni odhima Yesu

37Noko ɔkɔ yo bimbete baokamoa bike boso ba bobo, baimodhimeaka. 38Bea, ɛkokedjama oko moda mabala motɛli Isaya:

«Kumu, ona ɔdhima eleho ɛ booso nda?

Ona oinedja Kumu ngulu ɛ nde nda?»

39Isaya abala koko tina edaka bato pɛpɛ ohonɔ odhima:

40«Ndjambe adipa miso ma bobo ko aimedjae milema ma bobo mipipo,

bɛngɛ basakaenɛ na miso ma bobo, ko owɛi ba bobo batake esipoli.

Batahekodja milema ko mbai natabaheledja.»

41Isaya abala bea tina ɛ boo aenɛ ekumu ɛ Yesu ko abalaka tina ɛ nde.

42Noko bea bike ta ndanda ɛ bakumu ba Bayuda bamodimea. Endolo, ta bɔɔ ba Bafalusai, baibalaka ohuu, tina ɛ boo basaka babengana ta ndako ɛ miɔngɔnɔ ɛ Bayuda. 43Tina ɛ boo bapalaka ekumu ɛ bato endolo titi odii Ndjambe.

Esambi na ndjia ɛ ebaeli ɛ Yesu

44Na bea Yesu abala na moholi diko boo: «Ona ɔdhimeakani, ta sooti atadhimaka mbai, endolo adhimaka koko ona ɔlomani. 45Ona oenɛkɛni, aenɛkɛ koko ona ɔlomani. 46Mbai, nadoa ta ngondo oko elengɛɛ ohuu, bengɛ boo moto na moto ona ɔdhimeakani atanɛngɛdja ta modidi. 47Nga moto akaoka bibaeli ba mbai ko abisumiti, editi mbai moto omodumbalea na ikambo, tina ɛ boo nadoa aheledja ngondo endolo titi ayedumba na ikambo. 48Moto ona oolonini ko adimiti bibaeli ba mbai, adii namosambedjeli ɔ nde: eleho edii mbai opa emosambedjabi ta busa ba suka. 49Na tina hee, naibala na opala ba mbai mɛɛnɛ, endolo Tata ona ɔlomani ainedjani yo mɛɛnɛ modjɔ moboani mbai obala ko olaka. 50Ko nadjebaka boo: elomu ɛ nde ekapɛ mohelo ma kɔbili. Na tina hee nadii obala midjɔ mii oko moda imatɔndɔni Tata.»

Currently Selected:

YOANI 12: ngc

Highlight

Copy