MATAYO 14

Yogo e Yoane Mobatisi

(Boindja pongono a Mal 6, 14-29; Luk 9, 7-9)

1Ta ehole iyena, Elode odaledjaka Galileya, aoka gala e Yesu. 2Abala na basali ba nde bo: «Edii Yoane Mobatisi: asisoi ta tei e bato bago! Ta tina emina adii na ngulu e bokɔɔ midjɔ mi bokamoa.» 3Modjɔ mo, Elode apea Yoane, amonanga mbɔti ko amoisa ta bɔlɔkɔ ta tina etingi na Elodiade, mwali o mwana o nango Pilipo#14, 3 Boindja Mal 6, 17 ko na nase.. 4Modjɔ mo Yoane abalaka na Elode bo: «Baopiti ndjea e bomotomba ondingo mwali o wɛ!#14, 4 Boindja Lew 18, 16; 20, 21.» 5Elode ahombaka amoowodje, endelo abangaka emumu e bato, ta tina e bo batombaka Yoane ondingo motɛli. 6Enakoboa, ta tɛkɛ e bobotama bo Elode, mwana mwali o Elodiade, adaaka abua ta boso bo bato bakabeebo ta tɛkɛ. Iboa asepedja Elode bobuke mɛnɛ 7aso akata seleka bo apadea mokandoli mwali eka esusu ewadjadea iyo. 8Na mondumba momolindedja nango, abala bo: «Pani iyaa ta saani molo mo Yoane Mobatisi!» 9Aoka ndjokwa; endelo ta tina e seleka ko tina e bato babea iyo ta tɛkɛ, mokondji apa mitindo bamopɛ molo momina. 10Ko aloma moto omɔti akɛe alena molo mo Yoane ta bɔlɔkɔ. 11Batomba molo mo nde ta saani ko bapa na mokandoli mwali, atomba ko apa na nango. 12Iboa batingami ba Yoane badoa atomba ebembe e nde ko baesambea ta ikila; ko ngɔngɔ baso bakɛɛ atɔndea Yesu.

Yesu ayedji baami koto itano

(Boindja pongono a Mal 6, 30-44; Luk 9, 10-17; Yoa 6, 1-14)

13Ehole eoka Yesu mwako imua, atomba bwato bɛngi asatswɛ moo bohali na bato ta etengelenge. Endelo bimumu baoka baimana ta ngando djinɛnɛnɛnɛ ko bamokimana na mako. 14Ta ehole eduboa Yesu ta bwato, aɛnɛ emumu e bato banɛnɛ, ko abaokea pɛhɛ ko abangaka bobaheledja na bego dji bobo. 15Ama imea busa mɔkɔmɔkɔ, batingami bakɛɛ abala na nde bo: «Esika iyeye edii etengelenge. Ko ehole esi bonɔɔ sɔmbedja bimumu ibibi bi bato bɛngi bakɛe asomba leka loboyaka ta ngando.» 16Endelo Yesu abasɔmbedja bo: «Ediiti na tina ebo bakɛe iho; bapani ino bɛnɛ leka lo boyaka!» 17Endelo bamosɔmbedja bo: «Lodii iyaa oto na miɛmbɛ mitano ko na swi babae.» 18Ko Yesu abala na bu bo: «Doani na lu ta dii mbi». 19Apa mitindo ta dii bimumu badae na bondo ta ndjani; atomba miɛmbɛ mitano na swi ba bae, aangɔdjɔ miso ta busa ko aso apa midjongoa adii Ndjakomba. Ngɔngɔ djimina abuka ipa ko apa ta dii batingami, ko batingami bakabana na bimumu bi bato. 20Moto na moto ayaka ko agola. Ko batingami baandoana bikenge balumedja mitinga doomi na mibae midikaka#14, 20 Boɛngɛ 2Ba 4, 42-44.. 21Bato baami bayaka badaaka mbuti na koto itano pɛpɛ bolanga bali na bɛngɛ.

Yesu adali ta diko di ibeke

(Boindja pongono a Mal 6, 45-52; Yoa 6, 15-21)

22Nambala emɔti, Yesu aloma batingami ba nde batitee ta bwato ko basue boso bo nde ta dɔɔngɔ dikina di mokula mo ibeke, ta ehole eyanedjaka yo bimumu bi bato. 23Ngɔngɔ dji boyanedja bimumu bi bato, aiweya ta ngomba ta tina e boangɔnɔ asabudjea mweka. Ta ehole eimea mɔkɔmɔkɔ adaaka iho, oko iyo mɛnɛ; 24enakoboa oko ta ehole emina bwato boimeaka bohali na mokula, bodaaka bokumanake na mbonge, ta tina ebo mopɛpɛ mosɔmbedjaka bwato ngɔngɔ. 25Ta bihindihindi, Yesu aduaka dɔɔngɔ didaaka ibo akɛkɛ adale ta diko di madiba. 26Ta ehole eɛnɛ batingami akɛkɛ adale ta diko di madiba baluma na bɔɔ ko babala bo: «Edii edjo!» Bagamaka na bɔɔ. 27Endelo Yesu abala na bu mbala emɔti bo: «Sapingedjani, edii mbi, pɛpɛ bobangani!» 28Petelo amosɔmbedja bo: «Kumu, ekadaa wɛ pani mitindo nadoe ta di wɛ adale ta diko di madiba.» 29Yesu abala na nde bo: «Dua!» Petelo aimana ta bwato abanga bodala ta diko di madiba ko akimana Yesu. 30Endelo ama iyo eɛnɛ bo mopɛpɛ modaaka mopipo, aimeaka na bɔɔ. Abangaka bodinda ko agama: «Kumu, heledjani!» 31Na mbala emɔti, Yesu aninodja ebɔ, amopea ko abala bo: «Moto o edhimeli bokɛkɛ, tina ebomakadea na wɛ kitɛ nda?» 32Batitea ibo basusu ta bwato ko mopɛpɛ motita. 33Iboa, bato badaaka ta tei e bwato bakwa magbunda ta boso bo Yesu ko babala na nde bo: «Odii sooti Mwana o Ndjakomba!»

Yesu aheledji bato ba bego ta Genedjalɛtɛ

(Boindja pongono a Mal 6, 53-56)

34Basidja bokatisa ibeke ko baso baimea ta ibongu di Genedjalɛtɛ#14, 34 Boindja Mal 6, 53 ko na nase.. 35Bato ba esika iyena badjeba Yesu ko bananganedja gala e nde mɔɔngɔ masusu ko bamolwɛkɛ bato basusu ba bego. 36Bamoangɔnɔkɔ bamobɛndjɛe nongo ta sɔngɔ e esendja e nde; ko bato basusu bamobɛndjɛkɛ bahelaka.

Currently Selected:

MATAYO 14: ngc

Highlight

Copy