Lomɛ́ŋ 4

Ápilahámɛ eŋétépí

1Kiákí tuɔ́nyɔɔ́yɔnɛ́ɛ ó pusíó pú Ápilaháam sí ɔkɔ́nɛ́ɛ waasɔ́? Kiákí umaápiá ɛlɛɛ́ mɔɔnd. 2Indɛ Ápilaháam mɛɛ́nɛ́k indɛ́ndɛ́nɛ ó pusíó pú Támbák é púúpú umɛɛ́lɛ́ usiápá kupíméketesi, maná utipá kupíméketi ké eŋís yá Támbák. 3Ɛ́ kuɛn índɛ́ epue pifúúmak pí ifiɔ́ŋ ɔ́ɔ́yɔɔnɛ́ɛ: Ápilaháam maátáp Tambák ɛ́, akáánɛ́ kɔk Támbákɛ́ɛ weemeny wɔ́ ɛlɛɛ́ u indɛ́ndɛ́nɛ. 4Índɛ mɔɔnd ɔ́ɔ́kɔtɔ póond páyákan wɔ́ é púúpú úmɛ́nyɛɛlɛ́ epú péekenyé wɔ́ tipá nupoo nú sɛ́kisɛ́k punyɛ puandá pápianɛ́ wɔ. 5Maná, aká mɔɔnd tiányípá wɛɛlɛ tɛ puandá, waátapanɛ́ kɔ́ɔ́m ɛ́ɛ́ Támbák akaákan afalfál indɛ́ndɛ́nɛ, Támbák áákaanan wɔ́ kɔ́ ɔlɔŋ ú pííndɛndɛnɛ, á kiákí ɛ́ɛ́ umaátáp. 6Yá anakáánɛ́ Tafíit ɔ́ɔ́yɔɔnɛ́ɛ peseé u mɔɔnd ewú Támbák kɔ́lɔnɛ́ ɛlɛɛ́ u indɛ́ndɛ́nɛ tɛ kuák epú wɛɛlɛnɛ́ ɔ́ niɔlɔ́.

7Wɔɔ́kɔyɔ ɛ́ɛ́: «Imak ne epé Támbák maáyapɛ́n pɔ́ kɔ́ɔ́p á pipínanɔ́ na pifal piɔ́p!

8Ipal na mɔɔnd ewú Ɔkɔ́n tiányípá waákan pifal piɛ́yɛ́ ɔ́ niɔlɔ́!»

9Punyɛ akɛ ɛ́ɛ́ peseé wɛɛ́tɛ nyɛ kɔ́ɔ́m ó pusíó pú péépé pɛ́nyɛɛ́ paánsán á? Púnyaánɛ unyɛ ó pusíó pú polókólok á? Epú tuɔyɔnɛ́ nyɛ ɛ́ɛ́: Ápilaháam mopióndónyí ɔtɛ́m na Támbák kúúkɔ́ umeémenyí wɔ́ ɛlɛɛ́ u indɛ́ndɛ́nɛ. 10Maná níík Támbák meémenyi wɔ́ ɛlɛɛ́ u indɛ́ndɛ́nɛ? É kélém kú puansá puɛ́yɛ́ éé, kisíósíó? Aákóo pútipá é kélém maná kisíósíó. 11Pámansá Ápilaháam ɛ́ɛ́ ukanyi indɛ́ndɛ́nɛ, puansá pukáánɛ́ mapá kɔ́ɔ́m pulinsí pú indɛ́ndɛ́nɛ ɛ́ɛ́ waápian kuátap. Yá anakáánɛ́, Ápilaham mɛɛ́yɛ́ Síí u péépé kitikit páátapanɛ́ Támbákɛ́ɛ tɛ pányɛ no pilók Támbák éemenyen pɔ́ ɛlɛɛ́ pííndɛ́ndɛ́nɛ. 12Ápilaham nyɛ kɛ́k Síí u paaŋansán. Anakáánɛ́ kunyɛ ɛ́ɛ́ epé pátiányípá paánsán kɔ́ɔ́m ɔ́ nuɔ́l, maná epé pɛ́ɛndɛnɛ́ ká ambaná yá kuátap yé Síí waasɔ́ Ápilaháam, umaápiá pipíóndínyí ɔtɛ́m á Támbák kisíósíó ɛ́ɛ́ páans wɔ. 13Pútipá ɛ́ɛ́ Ápilaháam mɛnɛkɛ́ kikotí kúúkɔ́ Támbák maákɛ́n wɔ́ indan, wɔ́ na niindaanda niɛ́yɛ́ ɛ́ɛ́ pátáŋap kúúsí ekue. Aákóo umaákɛ́n wɔ́ indan ikáánɛ́ á kiákí ɛ́ɛ́ unyɛ indɛ́ndɛ́nɛ ó pusíó ɛ́ waákaátapan. 14Índɛ epú Támbák maátán mapá kɔ́ɔ́m ó pusíó pú péépé pɔ́mɔɔ́pínɔ́n kikotí, kuátap siápá sɛ́kísɛ́k indan yɛ́ɛ́yɛ́ siápá kifólí. 15Ɛ́ kuɛn aká mɔɔnd mányikuá kikotí Támbák ɔ́ɔ́kɔɔ́pɔn kutɛɛ, maná tutipá kukɔɔn ó kikotí índɛ kítipá. 16Akáánɛ́ epú Támbák maátán é péépé páátapanɛ́ wɔ́ ɛ́ɛ́ púpá nupoo. Akáánɛ́ kɔk indan ikáánɛ́ áányípá ó pusíó pú niindaanda ní Ápilaháam. Pukáánɛ́ tiányipá kɔ́ɔ́m é péépé pɔ́ɔ́pinɔnɛ́ɛ kikotí maná kɛ́k é péépé kitikit páátapanɛ́ Támbákɛ́ɛ, aná sí waasɔ́ u peem Ápilaháam maátáp wɔ. 17Ɛ́ɛɛ pifúúmak pí imbɔp ɔ́ɔ́kɔɔyɔ nɔ: Yeényíkutényikenyi sí u piɛ́nɛɛ́n kutek. Ápilaháam nyɛ Síí waasɔ́ ó pusíó pú Támbákɛ́ɛ ewú umaátáp, unyɛ Támbákɛ́ɛ weenyesíé piku wɛɛlɛnɛ́ ɛ́ɛ́ epú putiányípá, púpa. 18Ápilaháam mapián pipíóndínyí ɔtɛ́m, upétenyi indan i Támbák tɛ aná pómotí mɔɔ́yɔ́ ɛ́ɛ́ pútipá kupiɛl anakáánɛ́. Púu pukáánɛ́ Támbák moówóónyi indan yɛɛyɛ́ nɛ kuɛl epú umɔɔ́yɛ́t ɛ́ɛ́: Niindaanda níáwɔ áányípá kutek kétek. Yá anakáánɛ́ Ápilahám mɛɛ́yɛ́ Síí u piɛ́nɛɛ́n kutek. 19Tɛ aná Ápilaham maápá ukanyɛ sol kilunú, umapián puandá pú tuɔŋ etín átáán, kuátap kúɛ́yɛ́ mɔlɔpɔ́ kulúndán. Umopíóndónyí ɔtɛ́m tɛ aná wɔ́ muɛ́t umɛɛ́píɛ́nɛ́n ɛ́ɛ́ utikápá, kɛ́k Salá akányí wɛɛyɛ́ mapá kikíl 20Tɛ puɔ́s utimaák imfɛ́l kí indan eyí Támbák maákɛ́n wɔ́, maná pipíóndínyí ɔtɛ́m umaápián piékeeki wɔ́ malúnda woómokosi Támbákɛ́ɛ. 21Puandá púmoómí umɛɛ́lɛ́ utiákán imfɛ́l á pɔ púú púnyɛ ɛ́ɛ́: Epú Támbák maákɛ́n pɛɛnd indan, unyɛ na pukaaka pú kuɛl pɔ. 22Púú pukáánɛ́ Támbák meémenyí Ápilahám ɛ́ɛ́ ɛlɛɛ́ u indɛ́ndɛ́nɛ. 23Aká pifúúmak pí infiɔ́ŋ ɔ́ɔ́yɔɔnɛ́ɛ: Támbák memenyí wɔ́ ɛlɛɛ́ u indɛ́ndɛ́nɛ, tukál etue pɔ́mɔɔ́ŋ kɔ́ ɔmbɔp ú Támbákɛ́ɛ umɔkɔ́l Ápilaham ɛ́ɛ́ wééŋény ɛlɛɛ́ u indɛ́ndɛ́nɛ tútimapá túɛ́yɛ́ wééŋény. 24Túmapá kɛ́k káásɔ́ ó pusíó. Á kiákí Támbák ɛ́kɛɛ́nɛn ɛ́ɛ́ tuápian kuɛ́tɛ kuátap kúmoómí aná tuátapanɛ́ wɔ, wɔ umeényí Yésus é Ɔkɔ́n waasɔ́ á pilɔ́ŋ. 25Támbák meekí wɔ́ ɛlɛɛ́ kifunɔ́ á kuamaná ɛ́ɛ́ úkú káásɔ́ á pifal maná weekeenyi wɔ́ é niku. É kutúéyi indɛ́ndɛ́nɛ kɛ́ɛ́yɛ́ ó pusío.

Currently Selected:

Lomɛ́ŋ 4: yav

Highlight

Copy