Efesiɛ́ŋ 1
1
Imbíkélíe
1Iŋúɛ Póole, etúmí u Yésus Kilíis ɔ́ kuɔyɛt kú Támbák, yɔɔ́ŋɔnɛ́ Punya Támbák pɛ́nyɛɛ́ Ifɛ́ɛs, pópíóndonyeé ɔtɛ́m pɔ́ andíkɛ́k nulátát ne Yésus Kilíis. 2Ɛ́nyɛɛ́ Támbákɛ́ɛ Síí waasɔ́ nɛɛyɛ́ nɔ Ɔkɔ́n Yésus Kilíis nútíínyi ɔtɛ́m peseé wɔ́ɔ́p póond pánúfá kiyeéwe.
Peseé ukati nimanɛ́n
3Ɛ́nyɛɛ́ túlémbesi Támbákɛ́ɛ, Síí u Ɔkɔ́n waasɔ́ Yésus Kilíis. Umetúpínúún káásɔ́ á nipílat ne Kilíis, waatúfá kipínúun kitikit kínyɛɛ́ mɛnɛ́mɛnɛ́ɛ kíolinonée ké Emfúnukufúúmɛ. 4Támbák mɛɛlɛ́ umanyi utipundɔ́ kúúsí, waatápukɛn é Kilíis waatúyɔ́ɔn ɛ́ɛ́ túpá epé pɔ́ɔ́pɔninɛ́ɛ wɔ́, kati kipalalá kɛ́ɛ́yɛ́ ó pusíó. Kɛ́ɛ́yɛ́ kí iŋɔyɔ, 5Támbák masɔ́mb tɔɔm insúá ɛ́ɛ́ tuányítápúkanɛn é Yésus Kilíis, tupáan paán pɛ́ɛ́yɛ́; púúpú makánákana mɛ́ɛ́yɛ́ maámba. 6Ɛ́nyɛɛ́ túlémbesi kɔk Támbákɛ́ɛ ɛ́ kitɛ́fɛk kí nupoo umeétúeki ɔ́ Kinɔ́k kíɛ́yɛ́ wɔɔyɔɔnɛ́ɛ táásɛ. 7Kɛ́ɛ́yɛ́, manɔ́ŋ mɛ́ɛ́yɛ́ túáŋunanɛ́ɛ ɔ́ kilɔk, Támbák óond utúyapɛn káásɔ́ á pifal. Anakáánɛ Támbák meétútíínyí aná ɔtɛ́m peseé wɛ́ɛ́yɛ́ nyɛ kiandákáand; 8weetúeki wuú kutek pútúfáan na tutátɔ́ ne meéne mowóónón. 9Wɛkɛɛl ɛ́ɛ́ túmenyi insipit i nuketi núɛ́yɛ́ enú umaásɔ́mb tɔɔm insúá, kɛ́ɛ́yɛ́ á makánákana, ɛ́ɛ́ waányítápukɛn é Kilíis ó kuwóónyi núɔ. 10Nuketi nukáánɛ́ Támbák óónyíwóónyée á mamaná ma puandá kitikit nyɛ ɛ́ɛ́, úlat epú púnyɛɛ́ e kúúsí nɛ mɛnɛ́mɛnɛ́ɛ á kipia kí efuŋ táŋ omoómí, Kilíise. 11A nipílat ne Kilíis andíkɛ́k, Támbák matuyɔ́ɔ́n tɔɔm insúá, waatúfá niásɔ́ niap, wɔɔŋɔn é nuketi núɛ́yɛ́ weendesíe aná wɔɔyɔnɛ́ɛ. 12Túlémbesi kɔk Támbákɛ́ɛ kɛ́ɛ́yɛ́ á nukanyi, pasɔ́ tumaátúán kupíóndi ɔtɛ́m ne Kilíis. 13Á nipílat ne Kilíis andíkɛ́k nuɔkɔɔ́p nukál nú kémuémue, insɔ́m yi indámb inusóótosie. Nuond nuakaátap, Kilíise waanúák pulinsí pú Emfúnukufúúmɛ umaák indan. 14Emfúnukufúúmɛ óótúondonyi ɔtɛ́m ɛ́ɛ́ tuányípia maánda kitikit me peseé Támbák mɛɛ́nɛkin nikúli níɛ́yɛ́. Waátúfán pipíóndínyí ɔtɛ́m ɛ́ɛ́ tukatáŋap máanda kitikit aká kitúkune kíásɔ́ óónyípíwóónyosíe. Túlémbesi kɔk Támbákɛ́ɛ á kiákí ɛ́ɛ́ unyɛ kiandákáand.
Póol óópísókolonyi ó pusíó pú peétépí
15Púpukánɛ niŋúɛ kákáámɛ kutúm aná imɛɛ́l yɔɔ́pɔn kuátap kúánɔ́ kɔ Ɔkɔ́n Yésus ní iŋɔyɔ yaanɔ́ é peétépí peem, 16indipa yaándan kuekenyi Támbákɛ́ɛ ilémbie káánɔ́ ó pusíó aká imbísókolonyée. 17Ɛ́nyɛɛ́ Támbákɛ́ɛ u Ɔkɔ́n waasɔ́ Yésus kilíis, Taatɛ́ɛ nukanyi ɔ́ɔ́pinɔnɛ́ɛ wɔ, núfá kiliínditíe kí insiŋi kí kɔɔ́nyínúɔ́sunɛn wɔ́ kíond kínútíínyi wɔ́ é kémuémue. 18Únúfuun itɛ́m kɛ́ɛ́yɛ́ é kisie, ɛ́ɛ́ númenyi pipíóndínyí ɔtɛ́m ɔmbílíkínɛ́n wɛ́ɛ́yɛ́ núfáanɛ́ɛ, na punɛ́m púɛ́yɛ́ pú nukanyi, ne kiséé unúapaninɛ́ɛ ne peépé pɔ́ɔ́pɔninɛ́ wɔ. 19Tuékeémenyi kiandá kí pukaaka Támbák meétíínyí káásɔ́ ó pusíó pasɔ́ tuátapanɛ́ɛ wɔ, imbekí yɛɛyɛ́, na pukaaka púɛ́yɛ́ puukɔ́n, 20Umetíínyí mɔ́ aká umeényí Kilíise á pilɔ́ŋ woonyómbiti wɔ́ kɛ́ɛ́yɛ́ kɔ́ ɔmbɔk wɔɔnɛ́m mɛnɛ́mɛnɛ́ɛ. 21Akáánɛ́ Kilíise waanyálimɛt á numíánsina kitikit, kipia, pukaaka, pufuŋ puukɔ́n kitikit. Unyɛ andíkɛ́k kɛ́ ɛtɔ ú kisiɛ́n kitikit kínyɛɛ́ kupítɛɛtɛn tɛ e kúúsí ekue, tɛ é kúúkú kúólonée. 22Kemuemue Támbák nyɛ aŋákán puandá kitikit kɛ́ɛ́yɛ́ kí imbaná imbánɛ́ɛ sí pikɔ́nd woond wɛɛtɛ́k wɔ́ Ɔkɔ́n u ɔlɔŋ ú peétépí. 23Ɔlɔŋ u peétépí nyɛ nuɔ́l nú Kilíis, kɔ́ɔ́kɔ́ unyɛ́ ɔnyɔ́l kati insúkie, wúú uwóónyosíe puandá kitikit.
Currently Selected:
Efesiɛ́ŋ 1: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL