2 Kɔlɛnt 2
2
1Índɛ́ epue yáányísɔ́mb: indiókoondó kuanɔ́ ɛ́ɛ́ indinúɔ́yíkínɛ́n insíkíl. 2Índɛ kɔk insianúák kí insíkíl, ɛ́nyɛ́ kɔk ukaányímfáan anyamɔ́, ewú ímányaák wɔ́ kí insíkíl á? 3Ɔmbɔp wáámɛ mapá ɛ́ɛ́, indipiá insíkíl nɛ pɛɛnd pásíápáánɛ́ɛ píímfá anyamɔ́ káámɛ á kuasiám. Yeémenyen kémuémue é púupú púnúyoosonée, ɛ́ɛ́ anyamɔ́ wáámɛ nyɛ kákáánɔ́ wáánɔ́ panɔ́ peem. 4Púnyɛ kɔk é muyú, ni insíkíl kɔ́ ɔtɛ́m, na andilɛ́ ké eŋis imɔɔ́núɔ́ŋɔ́n ɔmbɔp, pútimapá ɛ́ɛ́ ínúák insíkíl, maná ɛ́ɛ́ númenyi kiánd kí iŋɔyɔ imbianɛ́ káánɔ́ ó pusíó.
Póol máyapɛ́n ewú umɔɔ́lɔkɔ
5Índɛ mɔɔnd manúák kí insíkíl, utimiŋák niŋúɛ, maná panɔ́ peem umaánúák, tutiliíkésí kɔk puónyi. 6Nunamá nú mɔɔnd nukáánɛ́ kiɔp mɛ́ɛ́síkɛ́nɛ́n kuánsitɛn wɔ́, púɛ́sikɛn. 7púúpɔ́, numɛ́nyɛɛsíkɛ́nɛ́n kuyapɛn wɔ́, nuond nuákan wɔ́ ilúndɛ, opúsíon upia insíkíl inyɛɛ kuɛlɛ wɔ́ usulukiki imbɔk. 8Akáánɛ́ yoónúówon ɛ́ɛ́ énutíínyí ɛ́ɛ́ nuɔ́kɔɔyɔ wɔ́, 9á kiákí ɛ́ɛ́ púúpɔ́ imɔɔ́núɔ́ŋɛ́n á pɔ́ɔ, ɛ́ɛ́ yɛ́ɛ́n índɛ nunyɛ teeníík ni iŋɔ́pinɔ á puandá kitikit inúɔ́yɔɔnɛ́ɛ. 10Aká númányiyapɛ́n mɔɔnd, iŋúɛ kákáámɛ imáyapɛ́n wɔ́, índɛ yaápian puandá pú kuyapɛn wɔ́, yɛɛ́kɛɛlɛ púú káánɔ́ ó pusíó ké eŋis yé Kilíis, 11á nunamá nukáánɛ́ sáátan tipá ukutúpúlit, á kiákí tutipá tuleeme pipán píɛ́yɛ́.
Indúmútén i Póol
12Aká imiípɛ́ kuám Tolowas é kupéke insɔ́m yi indámb i Kilíis, nááná Ɔkɔ́n miímfuúnín niít ní kiansi kiandákáand, 13indimapá ɛ́ɛ́ ímbíɔ́yɛt aná imɛɛ́l indikítíkényí andimán áámɛ Tite. Yaátúkan kɔk nɔɔpɔ́ á kuyɔɔk Masetuan. 14Túlémbesi Támbákɛ́ɛ, á kiákí ɛ́ɛ́, é Kilíis waáyuukan naasɔ́ á kisikɛl kitikit á nipíányɛn, káásɔ́ wáand esélemendenyi elepínde u kumenyi kúɛ́yɛ́. 15Akáánɛ́, á Támbák tunyɛ niaŋ ní Kilíis é péépé pɔ́píɔ́kɔnɛ́ɛ ne péépé pényímenée; 16Epé pényímenée, kuɔ́lɔk kú nikú kúyuukanɛ́ɛ é punyím, pɔ́píɔ́kɔnɛ́ɛ, kuɔ́lɔk kú kusɔ́t kúyuukanɛ́ɛ ɔ́ kusɔ́t. Maná, ɛ́nyɛ́ kɔk unyɛɛ́ ni imbekí ɛ́ kuɛl pukáánɛ́ pusɔ́m é? 17Tutipá kɔk ɛlɛɛ́ puólíkóoli pɛ́ɛlɛnɛ́ nionyí na nukál nú Támbák; É kémuémue, púnyɛ ɛ́ kisiɛ́n kí Támbák, na nipílat é Kilíis, tukálanɛ́ɛ.
Currently Selected:
2 Kɔlɛnt 2: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL