1 Piɛl 4
4
Kutúm kifal kélém
1Aná Kilíis mɛɛ́n muyú kí imekú, panɔ́ kákáánɔ́ ánupián piɛ́tɛ piansɛ́: Ewú úmɛ́nyɛɛ́n muyú ɔ́ nuɔ́l másɔ́mb na kifal, 2ɔ́ kusɔ́tɔn kí ímekú kisikɛl kíɔ́nyilɔpɔ́ ɔ́ kusɔ́t ekue, kútipá ɔ́ pilɔk pí pilɔ́ɔ́ŋɛ́t pí pɛɛnd, maná ɔ́ kilɔ́ɔ́ŋɛ́t kí Támbák. 3Á kiákí ɔ́ kusɔ́t kúánɔ́ kú insúá, nuétépúkí kiándákáand kí kisikɛl ɛ́ kuɛlɛ kilɔ́nŋɛ́t kí péépé pátiányípá páátapan, nusɔ́tɔn ké ewémb, nulíkalika, kuótukon makɛp, nuɛlɛ ɔndundɔ́ na kisay kí pifɛ́lɛfɛ́lɛ. 4Nínúan pákanyɛɛ́ esímile aná nutiányípá nuanda kuɛndɛ nɔɔpɔ́ ɔ́ pilɔk pí iŋilí pákanyɛɛ́ anúsikan. 5Maná póónyóondinyonyi ewú unyɛɛ́ etényí ó kusóósosi pɔɔkɔ́si ne peekúén. 6Púú púnyɛɛ́ tɛ é peekúén páátían pɔ́ insɔ́m yi indámb, ɛ́ɛ́ tɛ pósóósosi pɔ́ɔ kí imekú ɛlɛɛ́ pɛɛnd pé kúúsí, pɔ́sɔ́tɔn kusɔ́t kú Támbák ké efúnukufúúmɛ.
Iŋuɛ́l ɔ́ kusɔ́t kú kiɔp
7Mamaná má puándá kitikit kanyɛ mekúye. Ɔ́nusɔ́tɔ́n kɔk kí insiŋí nuond nupá iŋuɛ́l ɛ́ núpísókolonyi. 8Kisíósíó, ɔ́nuɔyínɔ́n panúɛ na panúɛ, á kiákí iŋɔyɔ áyapan puólíkóoli pú pifal. 9Ánupáán kí iŋólio panúɛ na panúɛ káánɔ́ á tuya, tɛ kupíiŋunyit. 10Siki mɔɔndɛ, ó nupoo umaápiá wɔ́ɔkɔnɔkɔn pɔsɔ́k, nukapá kɔk pinɔ́k pí peelímoólí péndesíé kɔk tupoo tú Támbák túnyɛɛ́ á tunamá á tunamá ɛ́. 11Ɛ́ɛ́ ewú upianɛ́ nupoo nú kuyuukesi nukál, úyuukesi nukál nú Támbák; Ewú upianɛ́ nupoo nú kuɛlɛ pusɔ́m, wɛɛlɛ pɔ́ na pukaaka Támbák éékenye wɔ: Púókoówon ɛ́ɛ́, é Yésus Kilíis á puandá kitikit túómokosi Támbákɛ́ɛ upianɛ nuúmu na pukaaka é teeníík ne nííkée. Anakáánɛ́.
Kukɔ́l niap é muyu mú Yésus
12Pekúl páámɛ pí iŋɔyɔ, nutipíówón á kupá kí isényí í muyu, ɛlɛɛ́ puandá pú kilɔk mánúámɛ́n. 13Maná ɔ́nuɔ́pɔ́n ipali aká nupianɛ niap é muyu mú Kilíis, ɛ́ɛ́ aká weényítíínyenée nukúm núɛ́yɛ́, panɔ́ kákáánɔ́ núpá kí ipali na anyamɔ́. 14Índɛ páánusikan ɛ́ɛ́ nunyɛ popíónyí pé Kilíis, nunyɛ ká anyamɔ́, á kiákí kiliínditíe kí nukanyi, kiliínditíe kí Támbák nyɛ káánɔ́. 15Tɛ mɔɔnd káánɔ́ kɔ ɔlɔŋ utiɛn muyu ɛ́ɛ́ unyɛ oŋónónín, eŋépi kunyaánɛ oloki, kunyaánɛ umópíómbín ó puónyi putiányípá púyooson wɔ, 16maná indɛ mɔɔnd ɛ́ɛ́kɛɛ́nɛn muyú ɛ́ɛ́ unyɛ kilísitɛn, utiɔ́p ɛtɔ́ kunua, wóómokosi Támbákɛ́ɛ ɛ́ɛ́ kisiɛ́n kikáánɛ́ upítúúkanɛ́ɛ. 17Kisikɛl máásíám ikata túmenée é nikúli ní Támbák; Naánɛ́ kɔk ɛ́ɛ́ índɛ ísietúmin káásɔ́, púkapá tiɛkíɛ́ é peepe pátiányípá páátapan insɔ́m yi indámb í Támbák? 18Yá aná púnyɛɛ́ púɔ́ŋɔ́n ɛ́ɛ́: Índɛ péétúkune unyɛɛ́ indɛ́ndɛ́nɛ na kiandákáand kí muyu, púkapá kɔk tiɛkíɛ́ na afalfál no oloki? 19Akáánɛ́, epe pɛ́ɛ́nɛnɛ́ɛ muyú ɔ́ kuɔyɛt kú Támbák, péeki eluŋí u nulátát pumuundɛ púɔ́p nɛ kuɛlɛ peseé.
Currently Selected:
1 Piɛl 4: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL