1 Piɛl 3
3
Kusɔ́t kú nuɔ́ndɔ́n
1Panɔ́ kákáánɔ́, pakáand ɔ́nuɔ́pínɔ́n pɔnɛ́m páánɔ́, ɛ́ kuɛ́nyɛ́ɛlɛɛ́ tɛ epé pátiányípá páátapan nukál nú Támbák, pónuyooson aná nusɔ́tɔnɛ́ɛ, pápia kuátap, tɛ nutikálɛ́t. 2Pókoyooson kɔɔ́mɔ kusɔ́t kúánɔ́ nuákanɛ́ ɔ́ niɔlɔ́ kunyɛɛ́ kati kipalalá. 3Nutitɛ́fɛ́ kɔ́ɔ́m nuɔ́l núɛ́nikɛnikɛ́ɛ; Kuɛyɛn tuúnye, mɛlɛŋ mó kóol, kúnyaánɛ pinɔ́k pí indifunɔ́. 4Ánuambá kupɔ́t kú nɛkɛtɛ́ɛ waanɔ́, mɛlɛŋ matinyípá ménúkesi ne kilinditíé kínyɛ iŋɔ́pinɔ ne yeéwúe kínyɛɛ́ na kinúm kí piɔŋɔ́n ké eŋís yá Támbák. 5Yá aná pifúúmak pí pakáandɔ́ pí insúá pámaápá pápian pipíóndipínyí ɔtɛ́m á Támbák maápá pɛ́pílɛŋɛ́, pámapá pɔ́ɔ́pinɔn pɔnɛ́m pɔ́ɔ́p: 6Túkɔ́l pulinsí á Sala umɔɔ́pínɔ́n Ápilaháamɛ, upílan wɔ́ ɛ́ɛ́ Ɔkɔ́n waamɛ, wɔ́ núányímaná kuɛ́yɛ́ paán pɛ́ɛ́yɛ́ aná nuɛlɛnɛ́ɛ peseé nuond nutipián puwaá ɛ́ɛ́ puandá núpueŋitenyi. 7Panɔ́ pɔnɛ́m, ɔ́nusɔ́tɔ́n na pakányí páánɔ́ numenyen ɛ́ɛ́ pányɛ nikɛŋɛny; Énuekényí pɔ́ nukum, á kiákí pákatáŋap naanɔ́ peseé u kusɔ́t, ɛ́ɛ́ tɛ puandá pútiák kipindikɛ káánɔ́ kí imbísókólí.
Kusɔ́t kú embul
8Á mamaná, ánupá ɔtɛ́m omoómí ni imbítáákítɛ́n, ɔ́nuɔyínɔ́n ɛlɛɛ́ paandimán, anupáan nɛ niɛ́nɔsúkɛ peepíselesí. 9Nutiondínyónyí kilɔk ɔ́ kilɔk, kúnyaánɛ insikɛ́ kí insikɛ́; É kupítúnukin kɔk, énupínúúne á kiákí ɛ́ɛ́ púúpú páányínúpílíkɛ́n á pɔ, ɛ́ɛ́ nútáŋap kipínúun. 10Á kiákí ɔnfíɔ́ŋ ɔ́ɔ́kɔɔyɔ ɛ́ɛ́, ewú waambanɛ́ɛ kuɔyɔ kusɔ́t, wóond wɛ́ɛ́n pinɔ́k pí metúk, mɛ́ɛ́síkɛ́ɛ́nɛ́n kuen kuɛlɛ imbásia na kisupɔ́. 11Pétúm kilɔk kélém póond pɛ́ɛlɛ peseé, páamba kiyeéwe póond pɔ́ɔ́ŋɔn á kɛ́ɛ. 12Á kiákí eŋís yí Ɔkɔ́n nyɛ é péépé pɛnyɛɛ́ indɛ́ndɛ́nɛ, itú siɛ́yɛ́ ɔ́ɔ́kɔɔ́pɔn imbísókólí síɔ́p; Maná Ɔkɔ́n éétúme épé pɛ́ɛ́lɛnɛ́ kilɔk kélém.
Pipíóndínyí ɔtɛ́m kí inséésítényí
13Ɛ́nyɛ́ ukɛɛ́nyínuɛl kilɔk, índɛ nunyɛ tuɔ́l kuwáa ɛ́ kuɛlɛ peseé? 14Tɛ kupá ɛ́ɛ́ nuɛ́kɛɛ́nɛn iŋɛ́n á kiákí ɛ́ɛ́ nuɛ́kɛndɛ kí indɛ́ndɛ́nɛ, nunyɛ ká anyamɔ́. Nutitííné pɔ, nutiɛlɛ́ é kipueŋitenye. 15Maná énuekényí Kilíise unyɛɛ́ Ɔkɔ́n ninyɔ́lí ní kutúan káánɔ́ kí itɛ́m. Ánupá tɛ níík petényí ɔ́ kuondinyonyi é péépé pónúówonée, nútíínyi pipíóndínyí ɔtɛ́m píánɔ́. 16Maná ɛ́nuɛlɛ́ pú ne kiyeéwe nɛ nutɛɛtinɛ, nupian pinɔ́k pí imbítáákítɛ́n, ɛ́ɛ́ tɛ pánúkálan kilɔk káánɔ́ ɔ́ pinɔ́k pí meelíe é Kilíis, páápá é kipueŋitenye. 17Á kiákí púnyɛ peseé ɛ́ kuɛ́nɛn muyú aká ɛɛlɛnɛ́ peseé, índɛ púnyɛ kilɔ́ɔ́ŋɛ́t kí Támbák, kukányɛn ɛ́ɛ́ ɛ́ɛ́lɛ kilɔk.
Kipíányɛn kí Yésus nyɛ káánɔ́
18Á kíakí Kilíise wɔ́ muɛ́t mɛɛ́n muyú ó pusíó pú pifal kiyɔn kimoómí ó pusíó pú peépé pátiányípá indɛ́ndɛ́nɛ, wɔ́ umaápá indɛ́ndɛ́nɛ, ɛ́ únútíínyi á Támbák, pɔ́ɔ́n wɔ́ ɔ́ nuɔ́l nú imekú, maná woond ɔ́ kusɔ́t ké enfúnukufúúmɛ. 19Púnyɛ á pukaaka pú efúnukufúúmɛ umaáyɔɔ́k é kuepékén piliíndítíe á kiansi kí imbíne, 20é kupílimbit kú Támbák é metúk Noe maáwááká kitóoŋ kiikɔ́n, kímoósóti muɔ́nɔ́ u kitáám kí pɛɛnd pánamanɛ́ pɔ́mɔɔ́sɔ́t ó moomb. 21Kímapá kiɛ́yɛ́ kí induén kínúsótosíe nínúan: Itipá inúsukuna pinyík pí nuɔ́l, maná kipíekie á Támbák ɔ́ kinɔ́k kí iŋɔnyɛ́. Woonúsótosi na kuám á pilɔ́ŋ kú Yésus Kilíis, 22wáányímákát mɛnɛ́mɛnɛ́ɛ kɔ́ ɔmbɔk wɔɔnɛ́m ú Támbák kɔɔ́mɔ Peéŋele ɔ́ɔ́pinɔnɛ́ wɔ́ ne epé pápianɛ́ kipia ne epé papianɛ́ pukaaka.
Currently Selected:
1 Piɛl 3: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL