Rawma iyi 16
16
Mbele iyi
1Sa kələɓaheni, zliŋmana takwa Febe, wala mə ɗal kəzəɗ tə əŋ jam talaŋ tə hedi makuw ma iyi tə əŋ Keŋkereya#16:1 Kəzəɗ tə Mələɓ iyi 18:18.. 2Hi kuwu abə miya tə Bay Bayta, mənaŋ məsəkəŋ tiɗe ley ɗal əŋ faŋw tə hedi makuw ma iyi. Hi dahaŋ mətər təheni iyi tə əŋ məsəkəŋ iyi fuk, mbiŋ mə mba tə ndəra təheni. Mbiŋ seh, kətər hedi iyi mbeh səku, sa abə talaŋ na kətəraka za bahayim.
3Hi ɗalaŋta mbele əŋ Piriskilla abə Akilas, hedi nini mə ɗal kəzəɗ lalaŋ iyi tə əŋ kəzəɗ tə Yesu Almasihu#16:3 Kəzəɗ tə Mələɓ iyi 18:2.. 4I kəmba za ley kuɗəp mədəŋcur tata ley reh mədəŋcur na. Ar sa taataɗ sa mə nda i ɗalaŋta sʉse səku, ama jam talaŋ tə hedi makuw ma iyi tə əŋ hayak tə hedi Yahudiya iyi səku fuk i kəɗalaŋta sʉse bahayim. 5Hi ɗalaŋta mbele əŋ jam talaŋ tə hedi makuw ma iyi makwas tə ge tata iyi bahayim. Hi ɗalaŋ mbele əŋ maday na mamba Epaynetʉs, mbiŋ seh, hedi titʉz ley kuw ma tə Almasihu əŋ hayak tə Aziya#16:5 Kəzəɗ tə Mələɓ iyi 16:6.. 6Hi ɗalaŋ mbele əŋ Mariyama, mbiŋ seh, kəɗal kəzəɗ mbeh səku əŋ heni. 7Hi ɗalaŋta mbele əŋ Andərawnikʉs abə Yuniyas, ar vəŋ na iyi, i mbə əŋ daŋgay abə sa. Tata seh, ar mələɓ masəŋ lawlaw iyi, i kəmbaɗ za əŋ hedi tə Almasihu iyi məpər a sa.
8Hi ɗalaŋ mbele əŋ Ampiliyatʉs, maday na sa mə mbaza mbeh səku tə əŋ jam talaŋ tə Bay Bayta. 9Hi ɗalaŋ mbele əŋ Ʉrbanʉs, hedi nakwa mə ɗal kəzəɗ lalaŋ tə əŋ kəzəɗ tə Almasihu. Mənaŋ mba bahayim, əŋ maday na mamba Istakis. 10Hi ɗalaŋ mbele əŋ Apelles, hedi mə gizehe kuw ma ŋga sə lawlaw abə Almasihu. Hi ɗalaŋta mbele əŋ hedi tə ge Aristawbul iyi. 11Hi ɗalaŋ mbele əŋ Herawdiyaŋw, vəŋ na. Hi ɗalaŋta mbele əŋ hedi tə ge Narsis iyi hedi mə kuw ma tə Bay Bayta iyi.
12Hi ɗalaŋta mbele əŋ Tirifena abə əŋ Tirifawsa, hedi mə ɗalaŋ kəzəɗ əŋ Bay Bayta iyi, hi ɗalaŋ mbele bahayim əŋ maday na mamba Persis, kəɗalaŋ kəzəɗ za mbeh səku əŋ Bay Bayta. 13Hi ɗalaŋ mbele əŋ Rʉfʉs#16:13 Markus 15:21. hedi masəŋ lawlaw, mə ɗalaŋ kəzəɗ tə Bay Bayta. Mənaŋ mba bahayim, mama ŋga seh, ar mama na bahayim. 14Hi ɗalaŋta mbele əŋ Asiŋkirit, Felegaŋw, Hermes, Patawrawbas, Hermas abə zliŋge tata manja tə abə tata iyi fuk. 15Hi ɗalaŋta mbele əŋ Filawlawgʉs abə Yuliya, mənaŋ mba bahayim, əŋ Neriyʉs abə zliŋgeŋ hazləma hazləma, Awlimpas abə hedi tə Almasihu manja tə abə tata iyi fuk.
16Hi ɗal mbele əŋ faŋw təheni abə məl wucum mənaŋ zliŋge iyi. Jam talaŋ tə hedi makuw ma tə Almasihu iyi fuk, i kəɗalaheni mbele.
Ŋgəz maɗ ma
17Zliŋmana iyi, sa kərəkaheni, hi sla wucum a hedi mə pələk ley wuɗak hedi iyi, mə ndəv hedi makuw ma tə Bizlaf iyi abə ley zlap ma madawar a talaŋ sərək heni mə lim. Hi jel guduk abə tata. 18Məŋgəvday hedi mənaŋ wa iyi wa seh, i kəɗalaŋ kəzəɗ əŋ Almasihu Bay Bayta takwa səku, ama sey məŋgəvday dəməs#16:18 Filippi iyi 3:19. tata iyi dap! Kəɗi zlap tata səntaŋ iyi, abə ŋgalaw tata kə bim hedi iyi mba, i kəkuɗəp hedi mə səŋ ley wuɗak məsəkəŋ səntaŋ abə məsəkəŋ madawar səku iyi. 19Hedi iyi fuk i kəsəŋ waŋ talaŋ təheni əŋ Bay Bayta. Sa kəsəsəm a talaŋ təheni mbeh səku, ama sa mə mba seh, hi mbaɗ əŋ hedi tə abə burŋguzl iyi ley ɗal məsəkəŋ səntaŋ, sə kweɗek, amba heni yak ley ɗal məsəkəŋ madawar. 20Bizlaf seh, ar nje yim tə zahay, kəvəlaheni fagay za ley ɗal bay gula a talaŋ Sayɗanu, heni nda i kərapu əŋ gədaŋ ŋgas təheni iyi.
Səntaŋ tə Bay Bayta takwa Yesu mə nja abə heni!
21Timawte, hedi na nini mə ɗal kəzəɗ bəkta tə əŋ kəzəɗ tə Almasihu#16:21 Kəzəɗ tə Mələɓ iyi 16:1-3., a kəɗalaheni mbele. Lʉkiyʉs, Yasaŋw abə Sawsipater, baba na iyi, i kəɗalaheni mbele bahayim.
22Sa, Tertiyʉs, hedi mə wuzlelehe letir wa, sa kəɗalaheni mbele əŋ jam talaŋ takwa tə abə Bay Bayta mə jamanakwa wa.
23Gayus, hedi mə kuwaka tə əŋ ge ŋga, a kəɗalaheni mbele. Ar a ge ŋga jam talaŋ tə hedi makuw ma iyi fuk i kəkwas. Erastʉs, hedi mə məl dala tə əŋ berne ta, a kəɗalaheni mbele. Kawartʉs, zliŋmana takwa bahayim a kəɗalaheni mbele.
24Səntaŋ tə Bay Bayta takwa Yesu Almasihu mə nja abə heni fuk. Amen!
Həmən maɗ ma
25Mazukwa i həmən Bizlaf!
Mbiŋ abə mazla ley vəlaheni fagay əŋ kuw ma,
mənaŋ Labara Səntaŋ Lawayaŋ sa mə giz wa. Labara Səntaŋ Lawayaŋ ta seh, a kəgiz ma tə Yesu Almasihu,
a kəgiz kəzəɗ məndiwiŋ tə Bizlaf maɓah kə reh hedi iyi#16:25 Markus 4:11..
Kəzəɗ məndiwiŋ maɓah ta seh mar zlezle.
26Ama mənjawa, kəzəɗ kə reh ta kəgizehe ŋga za a lay mawaɗ kəɗi Ɗerewel tə hedi mə giz ma abə miya tə Bizlaf iyi.
Mənaŋ zlap tə Bizlaf mə zlap,
zlap ta, i kəgizeŋta za əŋ hedi Yahuda iyi səku
amba i mə ɗiy kuw ma tata a mbiŋ, i mə waŋgaŋ talaŋ.
27Bizlaf taataɗ ŋga, hedi tə abə burŋguzl, həmən mə nja əŋ mbiŋ,
kəɗi Yesu Almasihu kwa a pipi a pipi!
Amen.
Currently Selected:
Rawma iyi 16: xmd
Highlight
Share
Copy
Want to have your highlights saved across all your devices? Sign up or sign in
