Ruma 5
5
Ndza ma təwah abə Bizlaf
1Ayəw, həji tabəw takwa a həji ma dəlili aagi atama Bizlaf dawna ɗal awa, azha anawatsə həji ndza abə təwah abə Bizlaf gwara ara Bay Madagal takwa Yesu Kərist. 2Gwara ara Yesu, abə ɗal awa, həji talima təf a lima sənma Bizlaf ndə həji kandza a mən katkadək. Səkən ma kavəlahəji ɓas ci, tsa deŋ takwa ka a həji alima mavəy sləf takwa a sləf Bizlaf. 3Təwah tə ci, həji abə ɓas, kwa ndə həji kasa yaka. Ara ndə a ɗa, həji kasənə ci: yaka watsa ana ma kavəlahəji ŋcah a nda atama, 4ndə ala kaŋcah ya, a ndza abə deŋ ŋkwaɓ ŋtaɗ, kwa a ndza a yaka aagi. Ala ma kandza abə deŋ ŋkwaɓ ŋtaɗ ci, a ndza abə tsa deŋ a lima səkən. 5Azha, tsa deŋ ta lima səkən watsa a kaghut ala səku, ara ndə a ɗa, Bizlaf tatsa mayha tə ka a wəzaha a ꞌunəf takwa gwara ara Miɗ ma ghwaɗeɗe ndə a vəlahəji. 6Ayəw, avandza tiɗa ndə həji va a ɗa həji ŋkulaf aagi kwagwa ci, Kərist tamca tə aska həji ma gamak aagi, ata vah ndə Bizlaf a gar ka. 7Gədək ana ala a ji a mca a mavəy ala ma dəlili aka səku. Kata ala ma kaasakw ꞌunəf a mca a mavəy ala ma ŋtan aka kavəw. 8Ama Bizlaf taghalahəji, avaŋgəy abə a kamayahəji: Kərist tamca tə aska ŋkwa, azha ndə həji va a ɗa həji ma ɗal mpət aagi kwagwa. 9Anawatsə, ndə a vəla ha tə a mci, həji tabəw takwa a həji ma dəlili aagi atama Bizlaf. Azha a ɗa gber, Kərist a arehaŋkwa bəza yəm ara ghuɗek Bizlaf. 10Həji va ɗa həji jaga Bizlaf aagi, ama həji tadzəv ma takwa ka abə Bizlaf gwara ara mci Mbə tə. Ara ndə a dzəvahəji ma takwa ka, a ɗa ŋter Bizlaf a arehahəji bəza yəm gwara ara miɗ Mbə tə. 11Səkən pa a dəy zhana ci, ɓas takwa a ndza a Bizlaf gwara ara Bay Madagal takwa Yesu Kərist, ndə həji lima dzəv ma abə Bizlaf ata la ma ŋtaguleŋ anawatsə.
Adamu abə Yesu Kərist
12Mpət a ndaha ata manahayak dawna ala ŋtaguleŋ, ma ɗa Adamu, mpət tadaaha mci a manahayak. Ikwa abə mci a ndaha a həji ma ndza ata manahayak aagi tiwtiw, ara ndə a ɗa, həji aagi taɗal mpət aka tiwtiw. 13Tiɗa Bizlaf awli a vəlanə ma ma garagar aka a Musa ci, mpət ata manahayak aka tiw, ama tiɗa ndə ma ma garagar awli ya, Bizlaf a kacecef mpət takwa akas. 14Avəli ci, ꞌwa aka ambəɗa tə, a va ataa Adamu a vaŋ ata va Musa, mci taghal ŋgalaŋ tə, kwa ata həji ma ŋkula kaɗal mpət andza Adamu, ma ŋkula a hawanə a Bizlaf. Adamu ana ma kasaɓ abə ala ma kaaɓin a ndaha.
15Ama gəy ma ataa Adamu tasaɓ abə səkən ma ɓəlaakaka ndə Bizlaf a vələ səku, a ɗa ŋter, həji aagi vərəm aa tabazl ta dawna mpət ataa ala ŋtaguleŋ, ama sənma ataa Bizlaf ana səkən bay tə a guɗaŋ, zhana səkən tə ma tavəla ɓəlaakaka ana ma kazhiva a guɗaŋ. Səkən ma ɓəlaakaka watsa a vələ ci, dawna ala ŋtaguleŋ, sha ana Yesu Kərist, ikwa abə a ɓizh səkən tə ma təwah aka a ŋge ata həji aagi vərəm. 16Azha səkən ma ɓəlaakaka ataa Bizlaf, wəda zlən tə parpar abə mpət ndə ala ŋtaguleŋ a ɗalə. ꞌWa aka ata mpət ataa ala ŋtaguleŋ abə guma a lima təf ta dzaw ala bəza. Ama wəda zlən ataa səkən ma ɓəlaakaka Bizlaf ci, aska a bəwahəji aagi ka a ɗa həji ma dəlili aagi, kwa abə ɗal mpət takwa ma vərəm aagi. 17Ayəw, gwara ara ala ŋtaguleŋ, gwara ara mpət ala ŋtaguleŋ, mci taghal tə ata həji aagi tiwtiw ata manahayak, ama gwara ara Yesu Kərist ŋtaguleŋ tə ya, həji aagi talima səkən vərəm ara Bizlaf: A vəlatana səkən ma ŋtan tə aagi ɓəlaakaka, azha tabəwata ka a həji ma dəlili aagi. Gwara ara Kərist, həji aagi alima miɗ, zhana aagi aɗa bay abə sha. 18Andza ndə a ɗa, gwara ara mpət ala ŋtaguleŋ, abə dzaw a ndaha ata həji aagi tiwtiw. Ikwa yəm, gwara ara zlən ma dəlili ataa ala ŋtaguleŋ, abə a bəw həji aagi ka tiwtiw a ɗa həji ma dəlili aagi, zhana aska aagi alima miɗ. 19Ambəɗa tə ci, ala ŋtaguleŋ ana ma ŋkula a hawanə a Bizlaf, azha həji aagi vərəm aa tabəw ta a həji mpət aagi. Andza ikwa yəm, ndə ala ŋtaguleŋ a hawanə, azha həji aagi vərəm aagi abəw ta a həji ma dəlili aagi. 20Ma ma garagar taha, azha gəy ma ataa həji aagi tazhin a fəl tə vərəm a guɗaŋ. Ama kwa abə ndə mpət a fəl tə vərəm, sənma Bizlaf vərəm dəy aha zhana. 21Ambəɗa tə ci, mpət abə dagal ata həji aska a vəlahəji a mci. Ikwa yəm anawatsə, təwah Bizlaf abə dagal a bəwahəji ka a həji ma dəlili aagi, ikwa, azha həji kula a lima miɗ ma ŋkula kəɗaŋ abə Bizlaf gwara ara Yesu Kərist, Bay Madagal takwa.
Currently Selected:
Ruma 5: GOU
Highlight
Copy
Compare
Share
Want to have your highlights saved across all your devices? Sign up or sign in