Ruma 15
15
1Ama a ɗa zlən takwa, ŋkwa həji ma ɓərɓər a wəzaha a ɗal awa aagi, aska a lamzə həji ŋkulaf aagi, ara həji a gasɓa səkən ma təwahaŋkwa aagi. 2Kwa vaye mamayanə təwah a masliji tə, sha ana ma ŋtan, aska a kərəɗ atama a wəzaha a ɗal awa. 3Ara ndə a ɗa, Kərist tagas səkən ma təwahanə aagi akas, aɓa azha, andza ndə a ŋtiraya a Ɗerewal ma ghwaɗeɗe, iŋgaya: Dahalay ndə aa karahu aagi aa tazaha ta ata sa. 4Ara ndə a ɗa, kala ma ma ŋtir aka ambəɗa tə a Ɗerewal ma ghwaɗeɗe, a ŋtirha aska ghalaŋkwa wirwir. Kadək aska aagi avəlaŋkwa səw ma abə ŋcah, aska həji atsa deŋ ata səkən ndə həji kaalima. 5A kaɗiw ci, Bizlaf mavəlahəji səw ma abə ŋcah, mavəlahuni ndza təwah a walaŋ kuni, andza ndə Yesu Kərist a kaɗiwi, 6aska a ɗa ci, abə ꞌunəf ma ŋtaɗ, abə ma ma ŋtaɗ, abə huni avəlanə sləf a Bizlaf, Cina Bay Madagal takwa Yesu Kərist.
Ma wiyə ma təwah aska həji aagi tiwtiw
7Mbara huni lamzə ha kuni andza ndə Kərist a lamzahuni, aska sləf Bizlaf. 8Sa zlapahuni, ara ndə a ɗa, ata zləm Bizlaf ma dəlili, Kərist tabəw ha tə ka a ɗa maɗal zlən ataa Yahuda aagi, aska a kəliy səkən ndə a ghalatana ka a jiji aagi. 9Ataa həji ma ŋkula ɗa Yahuda aagi ci, aa tsanə sləf a Bizlaf dawna hahər tə, andza ndə a ŋtiraya a Ɗerewal ma ghwaɗeɗe, iŋgaya: Sha ana ndə a ɗa sa aɓin a həmənahu a taba həji ndiɓi ma ŋkula sən Bizlaf aagi, sa aɓin a ya dərəf a sləf zləm kwa. 10Tazlapaya zhana: Hayak aagi, huni ɓas abə həji tə aagi. 11Zhana: Həji aagi, huni həmənə Bay Madagal tiwtiw, həji aagi mahəmənə tiwtiw. 12Isaya tazlap zhana: Mbə Yesa a aɓin a payha, sha ana ma kaagəlha a mar hayak ndiɓi aagi. Gwara ara sha abə həji ndiɓi aagi atsa deŋ ta ka a heɗe. 13A kaɗiw ci, Bizlaf ma kavəla tsa deŋ ata səkən ndə həji kaalima, mavəlahuni ɓas abə təwah wəzaha a ɗal awa kuni, aska deŋ kuni a fəl tə gwara ara ɓərɓər ataa Miɗ ma ghwaɗeɗe.
Zlən ataa Pul
14Zlina mana aagi, sa abə ha naka, sa kasənə huni tiwtiw, huni kaɗal səkən ma ŋtan, huni kasən səkən ma kazhiva aska huni asənata aagi, ɓərɓər ara huni a ghal ma a walaŋ kuni. 15Ama aska huni a deŋ ka, abə sa ŋtirahuni ma watsə. Sa taŋga ŋkwaɓ a zhin a ghalahuni ma ndə huni va a zlima aagi akas. Sa ɗalə dawna sənma ataa Bizlaf ndə a vəlaka, 16aska a sa a ɗa ala ma ɗal zlən ataa Yesu Kərist a taba həji ma ŋkula ɗa Yahuda aagi, sa ma tsaya a zlən ta ɗaf Ma wiyə ma təwah ataa Bizlaf, aska həji ma ŋkula ɗa Yahuda aagi, aska aagi abəw ta a ɗa səkən ndə həji a kaɗal kwakus abə sha, ndə Miɗ ma ghwaɗeɗe a bəw ka a ɗa təwahanə a Bizlaf. 17Sa teete a ɓas ndə sa ɗa dzəv abə Yesu Kərist, dawna zlən Bizlaf. 18Ara ndə a ɗa, sa kula a zlap ata səkən minja kwa akas, səy səkən ndə Kərist a ɗalə gwara ara sa, aska a jaɓ həji ma ŋkula ɗa Yahuda aagi a ɗal awa, gwara ara ma abə zlən, 19gwara ara ɓərɓər abə səkən tsaɓan gwara ara ɓərɓər ataa Miɗ Bizlaf. Ikwa ci, a ꞌwa aka a Wərusalima, a nda a vaŋ a hayak Iliriya, sa taŋcah a ɗaf Ma wiyə ma təwah ataa Kərist. 20Ama, sa may a sa ghal Ma wiyə ma təwah a həji ma ndza a ŋge a hayak ma ŋkula sən Kərist aagi gagagha kwagwa, sa ɗalə ikwa ci, sa Pul sa kanda a ꞌun ata ŋcah ndə ala minja a tsə səku. 21A ɗi ci, sa ɗalə andza ndə ma ŋtiraya a Ɗerewal ma ghwaɗeɗe a ghal ka: Həji ndə aa ŋkula va a ghalzatana aagi, aagi agəra, həji ma ŋkula va a zlimazə aagi, aagi azlima.
Zlən ndə Pul a kadeŋ a ɗalə
22Avəli ci təwah, zhin dagala ana səkən ma takaka a nda ara huni. 23Ama anawatsə, zlən naka kəɗaŋ a hayak watsə, va dagala sa kadeŋ a nda ara huni. 24Ndə sa kaanda a Espaniya ci, sa ji gwara ara huni a taŋzahuni ra, sa may a huni a lamzaka aska a nda, sa anda ndzazə kusəm ara huni a wan kajik ikwa. 25Ama anawatsə sa nda a Wərusalima aska zlən a həji ma ji ma Kərist ma ndza a hayak watsa aagi: 26ara ndə a ɗa, dzam həji Kərist ma ndza a Makeduniya aagi abə ma ndza a Akaya aagi, aa taji deŋ a lamzə həji Bizlaf ma ndza a Wərusalima aagi, dawna titikw ma ndza ata təmta. 27Ayəw, təmta ma deŋ abə ha ta a lamzata, ama ŋter meni, a ɗa dəwa ma ndza ata təmta, həji Kərist ma ɗa Yahuda aagi, aa taɓizh səkən ŋtsəɓ ta ma ndza a wəzlaf bəza abə həji ma ŋkula ɗa Yahuda aagi, kadək a həji aagi a lamzata a landza ta abə səkən ndə aa kamay aagi yəm. 28Ndə sa kəɗaŋ səkən watsə bəza, sa tavəlatana səkən watsa a təmta, sa aɓin a nda a Espaniya ndə sa kaanda gwara ara huni. 29Ama, sa kasənə, nda naka ma gwara ara huni ci, sa aɓin a ndaha abə pish bəzla ataa Kərist ma ŋtan.
30Ama sa kaghalahuni, zlina aagi, gwara ara Bay Madagal takwa Yesu Kərist, gwara ara mayha ataa Miɗ Bizlaf, ndə huni katsaksa abə dza kusəm ndə sa kadzə, abə tarha ndə huni katar Bizlaf aska sa, 31aska sa areh naka ara həji ma ŋkula ɗal awa ma ndza a hayak Yahudiya aagi, zhana, aska a həji ma ndza a Wərusalima aagi a lamzə səkən ndə sa kaajaɓatana a həji ma ghwaɗeɗe aagi. 32Ikwa abə sa anda ara huni abə ɓas, gwara ara may Bizlaf, aska sa alima nəp a taba kuni. 33Bizlaf ma ndza abə təwah mandza abə huni tiwtiw! Amen.
Currently Selected:
Ruma 15: GOU
Highlight
Copy
Compare
Share
Want to have your highlights saved across all your devices? Sign up or sign in