Mata 27
27
Jaɓ Yesu atama Pilatu
(Mrk 15.1; Luk 23.1-2; Yhw 18.28-32)
1A kwaf biŋ, magulakwakw maɗal kwakus aagi abə mashifshif ma ndza a hayak aagi, gar aa gar bəza aska a dza Yesu aka a mci. 2Dzaw aa dzaw ka, azha jaɓ aa jaɓanə, pa aa vəlanə a Pilatu, ala ma ndza aha hayak.
Mci ataa Yahuda
(Zlh 1.18-19)
3Ndə Yahuda, ala ma ber Yesu a gəra, guma ta dza Yesu aka a mci a mbəl bəza, dəba a aza marva a baraf azha leŋ a daaha yəm dala ma ramahkaɗ ndə aa ŋtaranə watsa, zhin a zhinatana ka, a magulakwakw maɗal kwakus aagi abə mashifshif ma ndza a hayak aagi. 4Zlap a zlapatana, iŋgaya: «Sa taɗal mpət aka, sa taber ampəs ala ma ŋkula gəy ma ka,» iy. Ama, zhin aa zhinanə, aagi iŋgaya: «Ma cini ana ni veme! A sarahu ana watsa!» Aagiy. 5Shak a kwiyatana yəm dala watsa ka a jak kwakus Bizlaf, tsaa kanda tə, zhaŋ a zhaŋ ha tə ka, mca a mca tə.
6Magulakwakw maɗal kwakus aagi kəram aa kwar dala watsa, aagi iŋgaya: «Ma ma garagar takwa tapəlahəji təf a mbasl shiŋ dala ma həna watsə a sənduk ataa jak kwakus Bizlaf akas, ara ndə a ɗa, dala ma daaha ata ampəs,» aagiy. 7A diwzha ndə aa kəɗaŋ ladzam ta bəza, dəba aagi asəkəm la dərish wala mzla ara ala ma kaꞌun, aska a kah mbələm aagi a tsutsa. 8Sha ana ndə, pa a akacihwa, həji kaya la watsa, «la ampəs.» 9A ɗal ikwa, aska a kəliy zlap ala ma ɗaf ma ndə a zlimazə ara Bizlaf Yerimiya, ndə a zlap, iŋgaya: Kəram aa kwar yəm dala ma ramahkaɗ: Dala ndə Isərayila aagi ghal ka a ŋtərə a heɗe. 10Səkəm aa səkəm la dərish wala mzla bəza abə sha andza ndə Bay Madagal a ghalaka ka, iy.
Yesu atama Pilatu
(Mrk 15.2-15; Luk 23.2-5, 13-25; Yhw 18.28; 19.16)
11Peteŋ Yesu atama ala ma ndza aha hayak aska a zla guma. Ɗiw a ɗiwzə ana ala watsa, iŋgaya: «Hwa ana bay ataa Yahuda aagi vəw?» iy. Yesu zhin a zhinanə, iŋgaya: «Hwa ana ma zlap,» iy. 12Ama kwa Yesu a kaji a zhin zlap ata tək ma ataa magulakwakw maɗal kwakus aagi abə mashifshif ma ndza a hayak aagi akas. 13Mbara azha, Pilatu ɗiw a ɗiwzə, iŋgaya: «Hwa kazlima ma ndə aa katək ata hwa tiwtiw watsə aagi səku azha vəw?» iy. 14Ama kwa Yesu tazhin zlap, kwa ŋtaɗ akas. Hak ala ma ndza aha hayak a ghərəŋ tə a heɗe a guɗaŋ.
Guma tazlaya ata Yesu a dza ka a mci
(Mrk 15.6-15; Luk 23.13-25; Yhw 18.39; 19.16)
15Kala gwaygwaya Paska, ala ma ndza aha hayak, andza ndə a kava a ɗalə aska a pəlatana ala ma ndza a jak ta sa yaka ŋtaguleŋ ndə ŋgaɓa həji aagi kamayə. 16A tsutsa, ala badaway minja ndə həji aagi kasən kwa a vatəy a jak ta sa yaka, zləm tə Yesu Barabas. 17Tiɗa ndə, aa tadzamaya azha, Pilatu ɗiw a ɗiwzə ŋgaɓa həji ma ndza a tsutsa aagi, iŋgaya: «Huni may a sa a pəlahuni vaya: Yesu Barabas vəw, aka səku Yesu ndə həji kayə Kərist vəw?» iy. 18Pilatu a kasən katkadək ya, aa mbəlaha Yesu ara sərah. 19Tiɗa ndə, Pilatu a kandza ata la dzam guma, wala tə zlən a zlənha ma a heɗe, iŋgaya: «Ara hwa dəmɓa ha kwa a ma ataa ala ma dəlili watsə, ara ndə a ɗa, akacihwa, zaɗə zaɗə sa tawan səku ara shiŋshiŋ, dawna sha,» iy.
20Magulakwakw maɗal kwakus aagi abə həji ma shif shif ma ndza aha hayak aagi kaŋcah a ghalatana a ŋgaɓa həji aagi aska Pilatu a pəlatana Yesu Barabas aka, azha Yesu Kərist a dza ka a mci. 21Ala ma ndza aha hayak, dəba a azhin a zlap, iŋgaya: «Ala ndə huni mayə a taba həji ma gbak watsə aagi, a sa pəlahuni vaya?» iy. Aa zhinanə, aagi iŋgaya: «Barabas!» Aagiy. 22Ɗiw a ɗiwzata azha iŋgaya: «Səkən ndə sa kaaɗal mbara azha, abə Yesu ndə zləm tə Kərist veme?» iy. Tiwtiw aa zhinanə, aagi iŋgaya: «Dar ka ata mpi ma gəzlaŋgarak!» aagiy. 23Pilatu ɗiw a ɗiwzata, iŋgaya: «Zlən ma gamak ndə a ɗal veme?» Ama, dəba aagi adza wəla abə ɓərɓər tə, aagi iŋgaya: «Dar ka ata mpi ma gəzlaŋgarak!» aagiy. 24Pilatu sar a sarə, kat ma tə akas, ama wəla ana ma kavas a dza, leŋ a ji yəm, ban a ban ra tə bəza a tsutsa atama ŋgaɓa həji aagi, iŋgaya: «Mci ataa ala watsə, sa a mən səku, a sarahuni!» iy. 25Ŋgaɓa həji watsa aagi, iŋgaya: «Ni taji, nəs ataa ala watsa mandza ata ni abə wəzhi cini aagi,» aagiy. 26Azha, Pilatu pəl a pəlatana Barabas. Azha pa a vəlatana Yesu a gəzlə abə lakwatəy, a diwzha aa tsa kannda a dar ka ata mpi ma gəzlaŋgarak.
Suji aagi kaɓas ata Yesu
(Mrk 15.16-20; Yhw 19.2-3)
27Suji ataa Pilatu aagi, dəba aagi adaaha Yesu ata la ndza bay ataa ala ma ndza aha hayak, azha zliɓzliɓ suji abəra. 28Səɗ aa səɗanə rəkuts tə bəza ata zlikusəm, pa aa tsanə rəkuts ma viri ka ata zlikusəm. 29Azha, dəba aagi adaanə jigiɗ andza paɗ ha bay, pa aa tsanə ka a ha, leŋ aa ji ŋkem bəlam, pa aa vəlanə ka a ra zəm. A diwzha, gəliɓ aa gəliɓ ta ka atama tə aska a ɓas a heɗe, aa kazlap, aagi iŋgaya: «Aŋkwa Bay ataa Yahuda aagi!» aagiy. 30Aa kaŋtif majignek a heɗe azha, leŋ aa ji ŋkem bəlam ma ndza aska ra tə watsa, dəba aagi adzə abə sha a ha. 31Ndə aa ɓasɓa bəza ga andza ndə ꞌunəf ta a mayə a heɗe, səɗ aa səɗanə rəkuts ma viri nana bəza ata zlikusəm azha, zhin aa zhinanə rəkuts tə aagi ka, jaɓ aa jaɓi, a dar ka ata mpi ma gəzlaŋgarak.
Yesu tadaraya ata mpi ma gəzlaŋgarak
(Mrk 15.21-32; Luk 23.26-43; Yhw 19.17-27)
32Ndə aa kandaa ta a bəza, dəkdək aa lima ta abə ala ndə hayak Sirene, ndə həji kayə Simun, suji aagi dəba aɗalanə kuluk a tiw mpi ma gəzlaŋgarak ataa Yesu abə ɓərɓər. 33Peteŋ ata la minja ndə aa kayə «Gwalgwata,» ma kamay a ghal ya: «La kirŋgisl ha.» 34Azha a tsutsa, pa aa vəlanə mavə takəvəɗaya abə səkən ma ɗeghwek. A diwzha ndə a zlənzə, tamay a sə avəlis.
35Dar aa dar ka ata mpi ma gəzlaŋgarak azha, dəba aagi afak njil aska a ɓizh rəkuts tə. 36Azha, ka aa ndza ta ka a tsutsa a həbarə. 37A wəzəm ata ha tə, ata mpi ma kaslampalak, ma kaghal ma ndə aa dzə a heɗe taŋtiraya, iŋgaya: «Ala watsə, a ɗa Yesu, bay ataa Yahuda aagi!» 38Həji badaway ndiɓi aagi, gbak, aa tadaraya a tsutsa abəra ata mpi ma gəzlaŋgarak, ŋtaguleŋ ata guva zəm tə, ŋtaguleŋ ata gula tə.
39Həji ma kapew ata təf gwara a tsutsa aagi ya, aa kakpaslakpasla ha, aa karə. 40Aa kazlap, aagi iŋgaya: «Hwa ma kamay a ghurəm jak kwakus Bizlaf, a hwa ꞌun bəza ata wan mahkaɗ. Reh ha kwa bəza abə ha kwa azha! Andza hwa Mbə ataa Bizlaf, tadukha kwa a bəza ata mpi ma gəzlaŋgarak watsə!» 41Ikwa yəm, magulakwakw maɗal kwakus aagi, masərək ma ma garagar aagi abə həji ma shif shif ma ndza a hayak aagi, aa kaɓas a heɗe azha aa kazlap, aagi iŋgaya: 42«Tareh həji ndiɓi aagi bəza ci, kula a reh ha tə ana sha tə səku azha vəw!» A ɗa Bay Madagal ataa Isərayila aɓa wəra? Matadukha ha tə ata mpi ma gəzlaŋgarak watsə anawatsə, azha ikwa həji aɗalanə awa aska ma tə. 43Tavəlanə ha tə ka a Bizlaf tazlap, iŋgaya: «Sa ɗa Mbə Bizlaf!» Bizlaf mareh bəza anawatsə andza a kamayə. 44Azha yəm, həji badaway ma dara ka abəra watsa aagi, aa karə ikwa yəm.
Mci Yesu
(Mrk 15.33-39; Luk 23.44-48; Yhw 19.28-30)
45A pish ɗawarwar, ləvaŋ ata hayak tiwtiw a gwar a ŋtsəɓahw ata ler mahkaɗ. 46A ɗal bəza ler mahkaɗ ataa ŋtsəɓahw, Yesu dəba a adza wəla, iŋgaya: «Eli, Eli, lema sabaktani?» Ghal tə ci: «Bizlaf naka, Bizlaf naka, hwa mbaslaka ka avəy?» iy. 47Ndiɓi aagi a taba həji ma ndza a tsutsa aagi, ndə aa zlima zlap tə, aa kazlap: «Huni taŋzə, a kaya Iliya!» aagiy. 48A tsutsa, ala minja a taba ta, dəba a ashi abə guɗaŋ tə, leŋ a daaha səkən minja andza gwazlaŋgwats ndə a tsaɓazə ka a mavə ma məsməs, pa a tsə ata ŋkem, azha pa a vəlanə a Yesu aska a sə. 49Həji ndiɓi aagi, aa kazlap, aagi iŋgaya: «Kwagwa kiyzaŋkwa a tehzanə, andza Iliya a kaandaha a reh bəza!» aagiy.
50Lik Yesu a zhin a dza wəla a guɗaŋ, las a mca tə. 51Azha a tsutsa, gidiwri ma ndza a jak kwakus, a ŋhwakha a wəzəm a ha a cap ata hayak, dəba hayak a anaana gərgər, kefe aagi kaŋta. 52Mpaŋ jiɓ aagi dəɗ ta, həji ma ɗal awa ma bazl ta aagi kagara ta a wəzəm a jiɓ. 53A diwzha zhinha Yesu a bəza a jiɓ, aa tsaa kanda ta a hayak Wərusalima, hayak ma dzamadzam ma ghwaɗeɗe, a tsutsa, həji aagi vərəm ana ma gərata.
54Ndə madagal ma ndza aha suji aagi, abə suji tə ma kahəbar Yesu aagi gəra kusah hayak abə səkən ma ɗal aagi tiwtiw ya, ŋzliŋ tadzata bəza, dəba aagi azlap, aagi iŋgaya: «Ŋter ala watsə, Mbə Bizlaf njiwin!» aagiy. 55Vərəm ana wali ma ndza a tsutsa aagi kataŋha la, abə gədək tə. Aa tasəbarha Yesu a hayak ma dzamadzam Galili, a ɗalanə zlən. 56A taba ta ya, Mariyama Magdala, Mariyama mana Yakuba abə Yusufu, abə mana wəzhi Zebede aagi.
Kah Yesu
(Mrk 15.42-47; Luk 23.50-56; Yhw 19.38-42)
57Ndə ŋtsəɓahw a ɗal tə ya, ala ma ŋtsəɓaŋtsəɓ minja, ndə hayak Arimatiya, taa tə, ndə zləm tə Yusufu, ma bəw tə a magəla Yesu yəm. 58Tsaw a nda ara Pilatu, a ɗiwha zlikusəm Yesu. Azha, Pilatu zlap a zlap aska aagi vəlanə. 59Leŋ Yusufu a ji zlikusəm Yesu, paɗ a paɗ ka a patak rəkuts wiyə ma ghwaɗeɗe. 60Azha pa a tsə ka a wiyə jiɓ tə, ndə həji ŋkula va a kahzə mci a mən, ndə a rə a dehweɗ. A diwzha, tuŋgul a tuŋgulha mabaleleŋ, zlərats a tsə bəza a ma jiɓ azha tsaa kanda tə. 61Mariyama ndə Magdala abə Mariyama minja watsa, aa kandza a ma jiɓ azha aa kataŋ la.
Mahəbar jiɓ aagi
62Apat tə, andza lazlap, vah ta nəp, magulakwakw maɗal kwakus aagi abə Farisa aagi tiwtiw, tsaw aa kanda ara Pilatu, 63dəba aagi azlapanə, aagi iŋgaya: «Bay Madagal, ni kasənakənə ata zlap, ataa bay gaɗaɗaŋ watsa tiɗa ndə a ndza tə kwagwa abə nja, tazlap, iŋgaya: “A diwzha wan mahkaɗ, sa azhina naka a bəza a jiɓ,” iy. 64Zlap aka galaɓa, aa mahəbar jiɓ tə watsa a gwar a wan mamahkaɗ, ara ndə magəli tə aagi kandaha a ŋhil zli tə a bəza a jiɓ ara ndə magəli tə aagi kandaha a ŋhil zli tə bəza, aa zlap: “Tagara tə wəzəm a jiɓ a taba həji ma bazl ta aagi.” Azha gaɗaɗaŋ ma kaazla a diwzha, a azhin a ɗa dəy aha mampər.» 65Pilatu zlap a zlapatana, iŋgaya: «Suji ta həbar jiɓ aagi, tsakwa, huni nda həbar jiɓ watsa andza ndə huni kadeŋi,» iy. 66Azha dəba aagi anda, nak aa nak ma jiɓ bəza katkadək, azha pa aa tsa mahəbar jiɓ aagi ka a taŋə la a heɗe.
Currently Selected:
Mata 27: GOU
Highlight
Share
Copy
Want to have your highlights saved across all your devices? Sign up or sign in
Mata 27
27
Jaɓ Yesu atama Pilatu
(Mrk 15.1; Luk 23.1-2; Yhw 18.28-32)
1A kwaf biŋ, magulakwakw maɗal kwakus aagi abə mashifshif ma ndza a hayak aagi, gar aa gar bəza aska a dza Yesu aka a mci. 2Dzaw aa dzaw ka, azha jaɓ aa jaɓanə, pa aa vəlanə a Pilatu, ala ma ndza aha hayak.
Mci ataa Yahuda
(Zlh 1.18-19)
3Ndə Yahuda, ala ma ber Yesu a gəra, guma ta dza Yesu aka a mci a mbəl bəza, dəba a aza marva a baraf azha leŋ a daaha yəm dala ma ramahkaɗ ndə aa ŋtaranə watsa, zhin a zhinatana ka, a magulakwakw maɗal kwakus aagi abə mashifshif ma ndza a hayak aagi. 4Zlap a zlapatana, iŋgaya: «Sa taɗal mpət aka, sa taber ampəs ala ma ŋkula gəy ma ka,» iy. Ama, zhin aa zhinanə, aagi iŋgaya: «Ma cini ana ni veme! A sarahu ana watsa!» Aagiy. 5Shak a kwiyatana yəm dala watsa ka a jak kwakus Bizlaf, tsaa kanda tə, zhaŋ a zhaŋ ha tə ka, mca a mca tə.
6Magulakwakw maɗal kwakus aagi kəram aa kwar dala watsa, aagi iŋgaya: «Ma ma garagar takwa tapəlahəji təf a mbasl shiŋ dala ma həna watsə a sənduk ataa jak kwakus Bizlaf akas, ara ndə a ɗa, dala ma daaha ata ampəs,» aagiy. 7A diwzha ndə aa kəɗaŋ ladzam ta bəza, dəba aagi asəkəm la dərish wala mzla ara ala ma kaꞌun, aska a kah mbələm aagi a tsutsa. 8Sha ana ndə, pa a akacihwa, həji kaya la watsa, «la ampəs.» 9A ɗal ikwa, aska a kəliy zlap ala ma ɗaf ma ndə a zlimazə ara Bizlaf Yerimiya, ndə a zlap, iŋgaya: Kəram aa kwar yəm dala ma ramahkaɗ: Dala ndə Isərayila aagi ghal ka a ŋtərə a heɗe. 10Səkəm aa səkəm la dərish wala mzla bəza abə sha andza ndə Bay Madagal a ghalaka ka, iy.
Yesu atama Pilatu
(Mrk 15.2-15; Luk 23.2-5, 13-25; Yhw 18.28; 19.16)
11Peteŋ Yesu atama ala ma ndza aha hayak aska a zla guma. Ɗiw a ɗiwzə ana ala watsa, iŋgaya: «Hwa ana bay ataa Yahuda aagi vəw?» iy. Yesu zhin a zhinanə, iŋgaya: «Hwa ana ma zlap,» iy. 12Ama kwa Yesu a kaji a zhin zlap ata tək ma ataa magulakwakw maɗal kwakus aagi abə mashifshif ma ndza a hayak aagi akas. 13Mbara azha, Pilatu ɗiw a ɗiwzə, iŋgaya: «Hwa kazlima ma ndə aa katək ata hwa tiwtiw watsə aagi səku azha vəw?» iy. 14Ama kwa Yesu tazhin zlap, kwa ŋtaɗ akas. Hak ala ma ndza aha hayak a ghərəŋ tə a heɗe a guɗaŋ.
Guma tazlaya ata Yesu a dza ka a mci
(Mrk 15.6-15; Luk 23.13-25; Yhw 18.39; 19.16)
15Kala gwaygwaya Paska, ala ma ndza aha hayak, andza ndə a kava a ɗalə aska a pəlatana ala ma ndza a jak ta sa yaka ŋtaguleŋ ndə ŋgaɓa həji aagi kamayə. 16A tsutsa, ala badaway minja ndə həji aagi kasən kwa a vatəy a jak ta sa yaka, zləm tə Yesu Barabas. 17Tiɗa ndə, aa tadzamaya azha, Pilatu ɗiw a ɗiwzə ŋgaɓa həji ma ndza a tsutsa aagi, iŋgaya: «Huni may a sa a pəlahuni vaya: Yesu Barabas vəw, aka səku Yesu ndə həji kayə Kərist vəw?» iy. 18Pilatu a kasən katkadək ya, aa mbəlaha Yesu ara sərah. 19Tiɗa ndə, Pilatu a kandza ata la dzam guma, wala tə zlən a zlənha ma a heɗe, iŋgaya: «Ara hwa dəmɓa ha kwa a ma ataa ala ma dəlili watsə, ara ndə a ɗa, akacihwa, zaɗə zaɗə sa tawan səku ara shiŋshiŋ, dawna sha,» iy.
20Magulakwakw maɗal kwakus aagi abə həji ma shif shif ma ndza aha hayak aagi kaŋcah a ghalatana a ŋgaɓa həji aagi aska Pilatu a pəlatana Yesu Barabas aka, azha Yesu Kərist a dza ka a mci. 21Ala ma ndza aha hayak, dəba a azhin a zlap, iŋgaya: «Ala ndə huni mayə a taba həji ma gbak watsə aagi, a sa pəlahuni vaya?» iy. Aa zhinanə, aagi iŋgaya: «Barabas!» Aagiy. 22Ɗiw a ɗiwzata azha iŋgaya: «Səkən ndə sa kaaɗal mbara azha, abə Yesu ndə zləm tə Kərist veme?» iy. Tiwtiw aa zhinanə, aagi iŋgaya: «Dar ka ata mpi ma gəzlaŋgarak!» aagiy. 23Pilatu ɗiw a ɗiwzata, iŋgaya: «Zlən ma gamak ndə a ɗal veme?» Ama, dəba aagi adza wəla abə ɓərɓər tə, aagi iŋgaya: «Dar ka ata mpi ma gəzlaŋgarak!» aagiy. 24Pilatu sar a sarə, kat ma tə akas, ama wəla ana ma kavas a dza, leŋ a ji yəm, ban a ban ra tə bəza a tsutsa atama ŋgaɓa həji aagi, iŋgaya: «Mci ataa ala watsə, sa a mən səku, a sarahuni!» iy. 25Ŋgaɓa həji watsa aagi, iŋgaya: «Ni taji, nəs ataa ala watsa mandza ata ni abə wəzhi cini aagi,» aagiy. 26Azha, Pilatu pəl a pəlatana Barabas. Azha pa a vəlatana Yesu a gəzlə abə lakwatəy, a diwzha aa tsa kannda a dar ka ata mpi ma gəzlaŋgarak.
Suji aagi kaɓas ata Yesu
(Mrk 15.16-20; Yhw 19.2-3)
27Suji ataa Pilatu aagi, dəba aagi adaaha Yesu ata la ndza bay ataa ala ma ndza aha hayak, azha zliɓzliɓ suji abəra. 28Səɗ aa səɗanə rəkuts tə bəza ata zlikusəm, pa aa tsanə rəkuts ma viri ka ata zlikusəm. 29Azha, dəba aagi adaanə jigiɗ andza paɗ ha bay, pa aa tsanə ka a ha, leŋ aa ji ŋkem bəlam, pa aa vəlanə ka a ra zəm. A diwzha, gəliɓ aa gəliɓ ta ka atama tə aska a ɓas a heɗe, aa kazlap, aagi iŋgaya: «Aŋkwa Bay ataa Yahuda aagi!» aagiy. 30Aa kaŋtif majignek a heɗe azha, leŋ aa ji ŋkem bəlam ma ndza aska ra tə watsa, dəba aagi adzə abə sha a ha. 31Ndə aa ɓasɓa bəza ga andza ndə ꞌunəf ta a mayə a heɗe, səɗ aa səɗanə rəkuts ma viri nana bəza ata zlikusəm azha, zhin aa zhinanə rəkuts tə aagi ka, jaɓ aa jaɓi, a dar ka ata mpi ma gəzlaŋgarak.
Yesu tadaraya ata mpi ma gəzlaŋgarak
(Mrk 15.21-32; Luk 23.26-43; Yhw 19.17-27)
32Ndə aa kandaa ta a bəza, dəkdək aa lima ta abə ala ndə hayak Sirene, ndə həji kayə Simun, suji aagi dəba aɗalanə kuluk a tiw mpi ma gəzlaŋgarak ataa Yesu abə ɓərɓər. 33Peteŋ ata la minja ndə aa kayə «Gwalgwata,» ma kamay a ghal ya: «La kirŋgisl ha.» 34Azha a tsutsa, pa aa vəlanə mavə takəvəɗaya abə səkən ma ɗeghwek. A diwzha ndə a zlənzə, tamay a sə avəlis.
35Dar aa dar ka ata mpi ma gəzlaŋgarak azha, dəba aagi afak njil aska a ɓizh rəkuts tə. 36Azha, ka aa ndza ta ka a tsutsa a həbarə. 37A wəzəm ata ha tə, ata mpi ma kaslampalak, ma kaghal ma ndə aa dzə a heɗe taŋtiraya, iŋgaya: «Ala watsə, a ɗa Yesu, bay ataa Yahuda aagi!» 38Həji badaway ndiɓi aagi, gbak, aa tadaraya a tsutsa abəra ata mpi ma gəzlaŋgarak, ŋtaguleŋ ata guva zəm tə, ŋtaguleŋ ata gula tə.
39Həji ma kapew ata təf gwara a tsutsa aagi ya, aa kakpaslakpasla ha, aa karə. 40Aa kazlap, aagi iŋgaya: «Hwa ma kamay a ghurəm jak kwakus Bizlaf, a hwa ꞌun bəza ata wan mahkaɗ. Reh ha kwa bəza abə ha kwa azha! Andza hwa Mbə ataa Bizlaf, tadukha kwa a bəza ata mpi ma gəzlaŋgarak watsə!» 41Ikwa yəm, magulakwakw maɗal kwakus aagi, masərək ma ma garagar aagi abə həji ma shif shif ma ndza a hayak aagi, aa kaɓas a heɗe azha aa kazlap, aagi iŋgaya: 42«Tareh həji ndiɓi aagi bəza ci, kula a reh ha tə ana sha tə səku azha vəw!» A ɗa Bay Madagal ataa Isərayila aɓa wəra? Matadukha ha tə ata mpi ma gəzlaŋgarak watsə anawatsə, azha ikwa həji aɗalanə awa aska ma tə. 43Tavəlanə ha tə ka a Bizlaf tazlap, iŋgaya: «Sa ɗa Mbə Bizlaf!» Bizlaf mareh bəza anawatsə andza a kamayə. 44Azha yəm, həji badaway ma dara ka abəra watsa aagi, aa karə ikwa yəm.
Mci Yesu
(Mrk 15.33-39; Luk 23.44-48; Yhw 19.28-30)
45A pish ɗawarwar, ləvaŋ ata hayak tiwtiw a gwar a ŋtsəɓahw ata ler mahkaɗ. 46A ɗal bəza ler mahkaɗ ataa ŋtsəɓahw, Yesu dəba a adza wəla, iŋgaya: «Eli, Eli, lema sabaktani?» Ghal tə ci: «Bizlaf naka, Bizlaf naka, hwa mbaslaka ka avəy?» iy. 47Ndiɓi aagi a taba həji ma ndza a tsutsa aagi, ndə aa zlima zlap tə, aa kazlap: «Huni taŋzə, a kaya Iliya!» aagiy. 48A tsutsa, ala minja a taba ta, dəba a ashi abə guɗaŋ tə, leŋ a daaha səkən minja andza gwazlaŋgwats ndə a tsaɓazə ka a mavə ma məsməs, pa a tsə ata ŋkem, azha pa a vəlanə a Yesu aska a sə. 49Həji ndiɓi aagi, aa kazlap, aagi iŋgaya: «Kwagwa kiyzaŋkwa a tehzanə, andza Iliya a kaandaha a reh bəza!» aagiy.
50Lik Yesu a zhin a dza wəla a guɗaŋ, las a mca tə. 51Azha a tsutsa, gidiwri ma ndza a jak kwakus, a ŋhwakha a wəzəm a ha a cap ata hayak, dəba hayak a anaana gərgər, kefe aagi kaŋta. 52Mpaŋ jiɓ aagi dəɗ ta, həji ma ɗal awa ma bazl ta aagi kagara ta a wəzəm a jiɓ. 53A diwzha zhinha Yesu a bəza a jiɓ, aa tsaa kanda ta a hayak Wərusalima, hayak ma dzamadzam ma ghwaɗeɗe, a tsutsa, həji aagi vərəm ana ma gərata.
54Ndə madagal ma ndza aha suji aagi, abə suji tə ma kahəbar Yesu aagi gəra kusah hayak abə səkən ma ɗal aagi tiwtiw ya, ŋzliŋ tadzata bəza, dəba aagi azlap, aagi iŋgaya: «Ŋter ala watsə, Mbə Bizlaf njiwin!» aagiy. 55Vərəm ana wali ma ndza a tsutsa aagi kataŋha la, abə gədək tə. Aa tasəbarha Yesu a hayak ma dzamadzam Galili, a ɗalanə zlən. 56A taba ta ya, Mariyama Magdala, Mariyama mana Yakuba abə Yusufu, abə mana wəzhi Zebede aagi.
Kah Yesu
(Mrk 15.42-47; Luk 23.50-56; Yhw 19.38-42)
57Ndə ŋtsəɓahw a ɗal tə ya, ala ma ŋtsəɓaŋtsəɓ minja, ndə hayak Arimatiya, taa tə, ndə zləm tə Yusufu, ma bəw tə a magəla Yesu yəm. 58Tsaw a nda ara Pilatu, a ɗiwha zlikusəm Yesu. Azha, Pilatu zlap a zlap aska aagi vəlanə. 59Leŋ Yusufu a ji zlikusəm Yesu, paɗ a paɗ ka a patak rəkuts wiyə ma ghwaɗeɗe. 60Azha pa a tsə ka a wiyə jiɓ tə, ndə həji ŋkula va a kahzə mci a mən, ndə a rə a dehweɗ. A diwzha, tuŋgul a tuŋgulha mabaleleŋ, zlərats a tsə bəza a ma jiɓ azha tsaa kanda tə. 61Mariyama ndə Magdala abə Mariyama minja watsa, aa kandza a ma jiɓ azha aa kataŋ la.
Mahəbar jiɓ aagi
62Apat tə, andza lazlap, vah ta nəp, magulakwakw maɗal kwakus aagi abə Farisa aagi tiwtiw, tsaw aa kanda ara Pilatu, 63dəba aagi azlapanə, aagi iŋgaya: «Bay Madagal, ni kasənakənə ata zlap, ataa bay gaɗaɗaŋ watsa tiɗa ndə a ndza tə kwagwa abə nja, tazlap, iŋgaya: “A diwzha wan mahkaɗ, sa azhina naka a bəza a jiɓ,” iy. 64Zlap aka galaɓa, aa mahəbar jiɓ tə watsa a gwar a wan mamahkaɗ, ara ndə magəli tə aagi kandaha a ŋhil zli tə a bəza a jiɓ ara ndə magəli tə aagi kandaha a ŋhil zli tə bəza, aa zlap: “Tagara tə wəzəm a jiɓ a taba həji ma bazl ta aagi.” Azha gaɗaɗaŋ ma kaazla a diwzha, a azhin a ɗa dəy aha mampər.» 65Pilatu zlap a zlapatana, iŋgaya: «Suji ta həbar jiɓ aagi, tsakwa, huni nda həbar jiɓ watsa andza ndə huni kadeŋi,» iy. 66Azha dəba aagi anda, nak aa nak ma jiɓ bəza katkadək, azha pa aa tsa mahəbar jiɓ aagi ka a taŋə la a heɗe.
Currently Selected:
:
Highlight
Share
Copy
Want to have your highlights saved across all your devices? Sign up or sign in