Mata 23
23
Mbəla ŋkwaɓ ara Farisa aagi abə masərək ma ma garagar aagi
(Mrk 12.38-40; Luk 20.45-47; 11.39-52)
1Azha, Yesu zlap a zlapatana a ŋgaɓa həji aagi abə magəli tə aagi, iŋgaya: 2«Masərək ma ma garagar aagi abə Farisa aagi, zlən ta ci, ghal ma ma garagar ataa Musa. 3Huni lamzə ma ndə aa kaghalahuni, huni ɗalə, andza ndə aa kazlapahuni, ama huni ɗiw a ji ɗal zlən ndə aa kaɗal aagis. Ara ndə a ɗa, ma ndə aa kazlap, aa kaɗal abə sha akas. 4Aa dzawatana səkən ma ndəlndəl a həji aagi tiwi ata wəla, ama aŋta, aa kaji a dish ra ta a heɗe səku. 5Zlən ta tiwtiw, aska həji aagi tsa nja ata təmta. Ikwa, rəkuts ndə aa katsə, cap abə ma ŋgas ta, aa tadzaw gwagumay aka a mazləm rəkuts ta, a ma wənək ta, ra ta aagi dzəsl abə səkən minja andza gwadzahwpa, azha aa kula a sənaktana a ma dzawadzaw ataa Bizlaf. 6La zəm səkən ta aagi ndza atama,la ndza mampər aagi. A jak ta tarha, la ndza ta atama, la ndza mampər aagi. 7Aa ɗiw ci, həji aagi zlapzatana abə haw a ŋge ata la ꞌwat aagi, zhana, aa may həji aagi yata: “Masərək”. 8Ama, huni ɗiw a ji a həji aagi a yahuni “Masərək” səku, ara ndə a ɗa, huni ɗa zlina mama aagi tiwtiw, azha, Masərək kuni ŋtaguleŋ tiw. 9Azha, huni ɗiw a ji a ya ala ata manahayak watsə “Vava” səku, ara ndə a ɗa, Vava kuni ŋtaguleŋ, ma ndza a wəzəm a wəzlaf. 10Huni ɗiw a ji a həji aagi a yahuni “Bay” səku, ara ndə a ɗa, Bay kuni ŋtaguleŋ, ma ɗa Kərist. 11Ala ma dagal ma ndza a taba kuni, mabəw ha tə ka, ana ala ma ɗalahuni zlən a taba kuni. 12Ala ma kagəl ha tə ka, a ahahay tə. Ama, ala ma hahay ha tə ka, a agəl tə.
13Dadawər ata huni, huni, masərək ma ma garagar aagi abə Farisa aagi, ŋgwashŋgwash aagi! Huni katsakatana majak la ndza bay ma ndza a wəzəm a wəzlaf aka a həji aagi, huni abə ha kuni, huni kaji a nda səku, ama, həji ma kamayɓa aagi ka, huni kapəlatana təf səku.
14Dadawər ata huni, huni, masərək ma garagar aagi abə Farisa aagi, ŋgwashŋgwash aagi, huni la səkən wali wədə aagi, kala səkən ma ndza a ra ta aagi, zhana huni tarha jiŋ aska həji aagi asənahuni. Dawna sha abə guma kuni aɗa ndelek a guɗaŋ.
15Dadawər ata huni, huni, masərək ma ma garagar aagi abə Farisa aagi, ŋgwashŋgwash aagi! Huni kadzəsl manahayak abə mtil aagi, aska huni a lima ala ŋtaguleŋ a njin ma ma garagar huni, azha a diwzha ndə, huni kaalima ala bəza, zlən kuni aska huni bəw ka ana ala ma kazhiva a nda a kwahu ma ŋkula mca kwa vepiy, zhin gbak dəy aha huni.
16Dadawər ata huni, huni, həji ma ghalatana təf a həji aagi, ma ŋkula gəra la aagi! Huni ma kazlapatana a həji aagi: “Andza ala meɗ abə jak kwakus Bizlaf, tagwar andza meɗ aka səku. Ama, andza a meɗ abə wəshi ma ndza a jak kwakus watsa, sha ana meɗ,” huniy. 17Həji ma bamabam aagi, həji wələf aagi! Ma pa ma dagal tiw wəshi abə jak kwakus Bizlaf ndə həji kaɓah wəshi watsa a mən ma ndza a vata? 18Huni kazlap zhana wəruk, huni iŋgaya: “Andza ala a meɗ abə pasla, tagwar a meɗ səku. Ama, andza a meɗ abə səkən ndə həji tsə ka ata pasla watsa, sha ana meɗ,” huniy. 19Həji wələf aagi! Ma pa ma dagal tiw səkən ndə həji tsə ka ata pasla abə pasla ci, ma ndza a vata? 20Ala ma meɗ abə pasla ci, a meɗ ata pasla abə səkən ma katsa a heɗe aagi tiwtiw. 21Ala ma meɗ abə jak kwakus Bizlaf, a meɗ abə jak kwakus Bizlaf abə Bizlaf. 22Ala ma meɗ abə la ma ndza a wəzlaf ya, a meɗ abə la ndza Bizlaf abə Bizlaf ma kandza ata la watsa.
23Dadawər ata huni, huni, masərək ma ma garagar aagi abə Farisa aagi, ŋgwashŋgwash aagi! Huni kavəlanə ŋtaguleŋ a wam wiri ndə həji kayata, wiri miŋti, wiri anisa abə wiri səkən ma kasaɓ andza kwekwirneh a Bizlaf. Ama, ma ma ŋtan ma ndza a ma ma garagar ataa Musa, huni tambasl aka ata paŋ: Ndza ma dəlili, təwah abə ndza ata deŋ ŋkwaɓ ŋtaguleŋ. Sha ana mayɓa bəza ndə huni kanjini a ɗalə, səkən ndiɓi aagi vərəm zhana. 24Həji ma ghal təf a həji aagi, ma ŋkula gəra la aagi! Huni zher zher səkən ndə huni kasə, ara ndə səkən ma fashiɗ aagi kaanda ta a mən, ama, huni a miɗ ŋgaluba a dəməs kuni.
25Dadawər ata huni, huni, masərək ma ma garagar aagi abə Farisa aagi, ŋgwashŋgwash aagi! Yaɓ huni yaɓ dəɓa tikshiyəm abə tekiɗ bəza ghwaɗeɗe ci, la ma ndza a mən mkpef abə səkən ŋhil aagi abə səkən ma gamak ndə huni kadeŋ ta aagi. 26Ndə Farisa ma wələf tə! Yaɓ la ma ndza a ꞌunəf tikshiyəm bəza kwagwa abə hwa yaɓ dəɓa tə.
27Dadawər ata huni, huni, masərək ma ma garagar aagi abə Farisa aagi, ŋgwashŋgwash aagi! Huni saɓ andza jiɓ ndə həji slərəɓata bəza peɗek, a bəza, a kazhiva ata nja, ama, la ma ndza a mən ci, mkpef ana kirŋgisl ataa həji ma bazl ta aagi a mən abə səkən ma raɗata aagi. 28Huni tə yəm, ata varvara, huni mayə a ghalatana a həji aagi ya, huni həji ma dəlili aagi, ama, ꞌunəf kuni mkpef abə ŋgwashŋgwash, abə səkən ma gamak aagi.
29Dadawər ata huni, huni, masərək ma ma garagar aagi abə Farisa aagi, ŋgwashŋgwash aagi! Huni batana jiɓ həji ma ɗaf ma ndə aa zlimazə ara Bizlaf aagi ka təwah, zhana huni zhivatana jiɓ həji ma dəlili ka katkadək, 30azha, huni kazlap: “Andza ni ji a ni a dzəv abə jiji cini aagi ci, ni kagwar a dzəv abəra təmta a bazl həji ma ɗaf ma ndə aa zlimazə ara Bizlaf aagi səku,” huniy. 31Azha, huni kaghalə abə ha kuni, huni ɗa wəzhi həji ma bazl həji ma ɗaf ma ndə aa zlimazə ara Bizlaf aagi. 32Ya, kadək, huni yəm, huni ŋcah a nda atama a kəɗaŋ səkən ndə jiji kuni aagi diwazə ka! 33Sheshuk aagi, shiŋ ŋkuraslə aagi! Huni aꞌwa ka, abə huni areh kuni ara guma kwahu ma ŋkula mca kwa vepiy avaŋga? 34Sha ana ndə a ɗa, tsakwa sa, sa kazlənahuni həji ma ɗaf ma ndə aa zlimazə ara Bizlaf aagi, həji ma wirwir aagi abə masərək ma ma garagar aagi. Huni abazl ndiɓi aagi ka, huni adar ndiɓi aagi ka, zhana huni agəzl ndiɓi aagi abə lakwatəy a ŋge a jak ta tarha kuni aagi, huni akapata aara a hayak ma dzamadzam aagi tiwtiw, tsaa a ɗi, tsaa a ɗi. 35Aska a azhinha ata huni ana ampəs həji ma dəlili, ndə huni bazlata ɓəlaakaka ata hayak aagi tiwtiw. ꞌWa aka ata ampəs ataa Habila ala ma dəlili a gwar ata ampəs ataa Zakariya, mbə ataa Barakiya ndə huni dzə ka a walaŋ tiw pasla abə la ma ghwaɗeɗe a guɗaŋ. 36Sa zlapahuni a ɗa ŋter, dadawər tə tiwtiw, a ɗa mba ata həji ma ndza akacihwa aagi», iy.
Yesu a kahan Wərusalima
(Luk 13.34-35)
37Azha, «Wərusalima, Wərusalima, hwa, hwa ma bazl həji ma ɗaf ma ndə aa zlimazə ara Bizlaf aagi, ma ŋgwaf həji ndə Bizlaf a zlənahu aagi abə ŋkəɗaŋ! Zhin vana abə sa gasə a dzam wəzhi kwa aagi ka andza mana gamtak ma dzam wəzhi tə aagi ka aska papa tə! Ama, huni tajis. 38Azha, ya kadək, jak kwakus Bizlaf kuni a aɗa pəcir mba ka a ŋkif. 39Ara ndə a ɗa, sa zlapahuni, huni kaazhin a gəraka kwa akas, a gwar ata vah ndə huni kazlap: Bizlaf mapish bəzla tə ma təwah aka ata ala ma kandaha ata zləm Bay Madagal! huniy.»
Currently Selected:
Mata 23: GOU
Highlight
Share
Copy
Want to have your highlights saved across all your devices? Sign up or sign in
Mata 23
23
Mbəla ŋkwaɓ ara Farisa aagi abə masərək ma ma garagar aagi
(Mrk 12.38-40; Luk 20.45-47; 11.39-52)
1Azha, Yesu zlap a zlapatana a ŋgaɓa həji aagi abə magəli tə aagi, iŋgaya: 2«Masərək ma ma garagar aagi abə Farisa aagi, zlən ta ci, ghal ma ma garagar ataa Musa. 3Huni lamzə ma ndə aa kaghalahuni, huni ɗalə, andza ndə aa kazlapahuni, ama huni ɗiw a ji ɗal zlən ndə aa kaɗal aagis. Ara ndə a ɗa, ma ndə aa kazlap, aa kaɗal abə sha akas. 4Aa dzawatana səkən ma ndəlndəl a həji aagi tiwi ata wəla, ama aŋta, aa kaji a dish ra ta a heɗe səku. 5Zlən ta tiwtiw, aska həji aagi tsa nja ata təmta. Ikwa, rəkuts ndə aa katsə, cap abə ma ŋgas ta, aa tadzaw gwagumay aka a mazləm rəkuts ta, a ma wənək ta, ra ta aagi dzəsl abə səkən minja andza gwadzahwpa, azha aa kula a sənaktana a ma dzawadzaw ataa Bizlaf. 6La zəm səkən ta aagi ndza atama,la ndza mampər aagi. A jak ta tarha, la ndza ta atama, la ndza mampər aagi. 7Aa ɗiw ci, həji aagi zlapzatana abə haw a ŋge ata la ꞌwat aagi, zhana, aa may həji aagi yata: “Masərək”. 8Ama, huni ɗiw a ji a həji aagi a yahuni “Masərək” səku, ara ndə a ɗa, huni ɗa zlina mama aagi tiwtiw, azha, Masərək kuni ŋtaguleŋ tiw. 9Azha, huni ɗiw a ji a ya ala ata manahayak watsə “Vava” səku, ara ndə a ɗa, Vava kuni ŋtaguleŋ, ma ndza a wəzəm a wəzlaf. 10Huni ɗiw a ji a həji aagi a yahuni “Bay” səku, ara ndə a ɗa, Bay kuni ŋtaguleŋ, ma ɗa Kərist. 11Ala ma dagal ma ndza a taba kuni, mabəw ha tə ka, ana ala ma ɗalahuni zlən a taba kuni. 12Ala ma kagəl ha tə ka, a ahahay tə. Ama, ala ma hahay ha tə ka, a agəl tə.
13Dadawər ata huni, huni, masərək ma ma garagar aagi abə Farisa aagi, ŋgwashŋgwash aagi! Huni katsakatana majak la ndza bay ma ndza a wəzəm a wəzlaf aka a həji aagi, huni abə ha kuni, huni kaji a nda səku, ama, həji ma kamayɓa aagi ka, huni kapəlatana təf səku.
14Dadawər ata huni, huni, masərək ma garagar aagi abə Farisa aagi, ŋgwashŋgwash aagi, huni la səkən wali wədə aagi, kala səkən ma ndza a ra ta aagi, zhana huni tarha jiŋ aska həji aagi asənahuni. Dawna sha abə guma kuni aɗa ndelek a guɗaŋ.
15Dadawər ata huni, huni, masərək ma ma garagar aagi abə Farisa aagi, ŋgwashŋgwash aagi! Huni kadzəsl manahayak abə mtil aagi, aska huni a lima ala ŋtaguleŋ a njin ma ma garagar huni, azha a diwzha ndə, huni kaalima ala bəza, zlən kuni aska huni bəw ka ana ala ma kazhiva a nda a kwahu ma ŋkula mca kwa vepiy, zhin gbak dəy aha huni.
16Dadawər ata huni, huni, həji ma ghalatana təf a həji aagi, ma ŋkula gəra la aagi! Huni ma kazlapatana a həji aagi: “Andza ala meɗ abə jak kwakus Bizlaf, tagwar andza meɗ aka səku. Ama, andza a meɗ abə wəshi ma ndza a jak kwakus watsa, sha ana meɗ,” huniy. 17Həji ma bamabam aagi, həji wələf aagi! Ma pa ma dagal tiw wəshi abə jak kwakus Bizlaf ndə həji kaɓah wəshi watsa a mən ma ndza a vata? 18Huni kazlap zhana wəruk, huni iŋgaya: “Andza ala a meɗ abə pasla, tagwar a meɗ səku. Ama, andza a meɗ abə səkən ndə həji tsə ka ata pasla watsa, sha ana meɗ,” huniy. 19Həji wələf aagi! Ma pa ma dagal tiw səkən ndə həji tsə ka ata pasla abə pasla ci, ma ndza a vata? 20Ala ma meɗ abə pasla ci, a meɗ ata pasla abə səkən ma katsa a heɗe aagi tiwtiw. 21Ala ma meɗ abə jak kwakus Bizlaf, a meɗ abə jak kwakus Bizlaf abə Bizlaf. 22Ala ma meɗ abə la ma ndza a wəzlaf ya, a meɗ abə la ndza Bizlaf abə Bizlaf ma kandza ata la watsa.
23Dadawər ata huni, huni, masərək ma ma garagar aagi abə Farisa aagi, ŋgwashŋgwash aagi! Huni kavəlanə ŋtaguleŋ a wam wiri ndə həji kayata, wiri miŋti, wiri anisa abə wiri səkən ma kasaɓ andza kwekwirneh a Bizlaf. Ama, ma ma ŋtan ma ndza a ma ma garagar ataa Musa, huni tambasl aka ata paŋ: Ndza ma dəlili, təwah abə ndza ata deŋ ŋkwaɓ ŋtaguleŋ. Sha ana mayɓa bəza ndə huni kanjini a ɗalə, səkən ndiɓi aagi vərəm zhana. 24Həji ma ghal təf a həji aagi, ma ŋkula gəra la aagi! Huni zher zher səkən ndə huni kasə, ara ndə səkən ma fashiɗ aagi kaanda ta a mən, ama, huni a miɗ ŋgaluba a dəməs kuni.
25Dadawər ata huni, huni, masərək ma ma garagar aagi abə Farisa aagi, ŋgwashŋgwash aagi! Yaɓ huni yaɓ dəɓa tikshiyəm abə tekiɗ bəza ghwaɗeɗe ci, la ma ndza a mən mkpef abə səkən ŋhil aagi abə səkən ma gamak ndə huni kadeŋ ta aagi. 26Ndə Farisa ma wələf tə! Yaɓ la ma ndza a ꞌunəf tikshiyəm bəza kwagwa abə hwa yaɓ dəɓa tə.
27Dadawər ata huni, huni, masərək ma ma garagar aagi abə Farisa aagi, ŋgwashŋgwash aagi! Huni saɓ andza jiɓ ndə həji slərəɓata bəza peɗek, a bəza, a kazhiva ata nja, ama, la ma ndza a mən ci, mkpef ana kirŋgisl ataa həji ma bazl ta aagi a mən abə səkən ma raɗata aagi. 28Huni tə yəm, ata varvara, huni mayə a ghalatana a həji aagi ya, huni həji ma dəlili aagi, ama, ꞌunəf kuni mkpef abə ŋgwashŋgwash, abə səkən ma gamak aagi.
29Dadawər ata huni, huni, masərək ma ma garagar aagi abə Farisa aagi, ŋgwashŋgwash aagi! Huni batana jiɓ həji ma ɗaf ma ndə aa zlimazə ara Bizlaf aagi ka təwah, zhana huni zhivatana jiɓ həji ma dəlili ka katkadək, 30azha, huni kazlap: “Andza ni ji a ni a dzəv abə jiji cini aagi ci, ni kagwar a dzəv abəra təmta a bazl həji ma ɗaf ma ndə aa zlimazə ara Bizlaf aagi səku,” huniy. 31Azha, huni kaghalə abə ha kuni, huni ɗa wəzhi həji ma bazl həji ma ɗaf ma ndə aa zlimazə ara Bizlaf aagi. 32Ya, kadək, huni yəm, huni ŋcah a nda atama a kəɗaŋ səkən ndə jiji kuni aagi diwazə ka! 33Sheshuk aagi, shiŋ ŋkuraslə aagi! Huni aꞌwa ka, abə huni areh kuni ara guma kwahu ma ŋkula mca kwa vepiy avaŋga? 34Sha ana ndə a ɗa, tsakwa sa, sa kazlənahuni həji ma ɗaf ma ndə aa zlimazə ara Bizlaf aagi, həji ma wirwir aagi abə masərək ma ma garagar aagi. Huni abazl ndiɓi aagi ka, huni adar ndiɓi aagi ka, zhana huni agəzl ndiɓi aagi abə lakwatəy a ŋge a jak ta tarha kuni aagi, huni akapata aara a hayak ma dzamadzam aagi tiwtiw, tsaa a ɗi, tsaa a ɗi. 35Aska a azhinha ata huni ana ampəs həji ma dəlili, ndə huni bazlata ɓəlaakaka ata hayak aagi tiwtiw. ꞌWa aka ata ampəs ataa Habila ala ma dəlili a gwar ata ampəs ataa Zakariya, mbə ataa Barakiya ndə huni dzə ka a walaŋ tiw pasla abə la ma ghwaɗeɗe a guɗaŋ. 36Sa zlapahuni a ɗa ŋter, dadawər tə tiwtiw, a ɗa mba ata həji ma ndza akacihwa aagi», iy.
Yesu a kahan Wərusalima
(Luk 13.34-35)
37Azha, «Wərusalima, Wərusalima, hwa, hwa ma bazl həji ma ɗaf ma ndə aa zlimazə ara Bizlaf aagi, ma ŋgwaf həji ndə Bizlaf a zlənahu aagi abə ŋkəɗaŋ! Zhin vana abə sa gasə a dzam wəzhi kwa aagi ka andza mana gamtak ma dzam wəzhi tə aagi ka aska papa tə! Ama, huni tajis. 38Azha, ya kadək, jak kwakus Bizlaf kuni a aɗa pəcir mba ka a ŋkif. 39Ara ndə a ɗa, sa zlapahuni, huni kaazhin a gəraka kwa akas, a gwar ata vah ndə huni kazlap: Bizlaf mapish bəzla tə ma təwah aka ata ala ma kandaha ata zləm Bay Madagal! huniy.»
Currently Selected:
:
Highlight
Share
Copy
Want to have your highlights saved across all your devices? Sign up or sign in