Luka 1
1
Luka a kaghal ɗerewal tə
1-2Həji ndiɓi aagi aa tagəra səkən ndə Bizlaf a ɗalə ata diw tə, ara ni. A diwzha tə, aa taɗaf ma wiyə ma təwah watsa. Andza ndə aa ghal ka, dagala a taba takwa, həji aagi tadiw ka a ŋtir ma watsa tiwtiw. 3A ɗalaka təwah, a sa ŋtirahu ma watsa a heɗe a heɗe. A tsutsa meni, sa ŋcah abə wirwir aska sa gas a zlima səkən ma pew ambəɗa tə aagi, ata diw tə tiwtiw. 4Sa ɗalə ikwa, aska hwa sənə njiwin ana səkən ndə hwa lima a dərakw aagi, Madagal naka Tawfilus.
Ghal mbəwha Yahwana ma ɗal batem
5Tiɗa ndə a landza Haridus, ndə a ɗa bay hayak Yahudiya, ala minja aka, zləm tə Zakariya, a ɗa maɗal kwakus Bizlaf, ata shiŋ Abiya. Aa ɗa shiŋ maɗal kwakus Bizlaf aagi. Wala tə, zləm tə Elizabet. A ɗa shiŋ ataa Haruna, ma ɗa mampər maɗal kwakus ataa Yahuda aagi. 6Təmta gbak gbak, aa ɗa həji ma dəlili aagi ata nja Bizlaf. Aa kahawanə a ma ma dzawadzaw aagi, aa kasəbar səkən ndə Bizlaf Madagal a gar ka a heɗe a heɗe, kwa gulak a təmta akas. 7Mbə ta akas, ara ndə a ɗa ndil ana Elizabet. Zhana ya, təmta tə, gbak gbak, aa taŋgəl ta.
8Ata vah minja aka, Zakariya tsaa a nda a jak kwakus Bizlaf, aska a ɗal zlən ataa maɗal kwakus aagi. Pish watsa, vah ta ɗal zlən tə abə həji tə aagi a jak kwakus.
9Andza ndə, maɗal kwakus aagi gar ka a ɗalə, dəba aagi aji ala a taba ta a nda a jak kwakus ata pasla, la ma ghwaɗeɗe ndə Bizlaf a heɗe. Vah watsa, Zakariya ana ma nda ŋkəɗa səkən ma kanji tə təwah.
10Tiɗa ndə a kaŋkəɗa alef səkən ma kanji fiŋfiŋ, ŋgaɓa həji aagi aa katarha a bəza. 11Mbara, matəf Bizlaf paya ara Zakariya, gar a gar tə ka ata guva zəm, la kaŋkəɗa səkən. 12Ndə Zakariya a gəra, tanaana ka, ŋzliŋ tadzə bəza. 13Matəf Bizlaf i kəsha iŋgaya: «Hwa ɗal ŋzliŋ səku, Zakariya. Bizlaf tazlima tarha kwa, wala kwa Elizabet a aɓin a mbəwha mbə, hwa atsanə zləm tə Yahwana. 14A aɗa ara hwa ɓas a ɗa aka, lawaɗ, həji ndiɓi aagi andza abə ɓas dagala ata mbəwa tə. 15Ara ndə a ɗa ala ma ɗalanə zlən a Bay Madagal. A kaasa mavə abə səkən ta ŋhuz həji aagi akas, a aɗa mkpef abə miɗ Ma ghwaɗeɗe, tiɗa ndə awli kwagwa a mbəwha, ndza tə a dəməs mamən. 16A adaaha Isərayila aagi dagala a sən Bay Madagal Bizlaf ta. 17A andaha abə ɓərɓər Miɗ ma ghwaɗeɗe andza ala ma ɗaf ma ndə a zlimazə ara Bizlaf Iliya. Gwara ara abə dzəv ma a andza a taba cina wəzhi abə wəzhi ta aagi andza ndə Iliya a ɗalə. A abəw deŋ ŋkwaɓ həji ma gəy ma aagi bəza, a adaata ka a həji ma deŋ ŋkwaɓ aagi, həji ma dəlili aagi. A abəwata ka a ɗa həji ma ɗal awa aska ma ataa Bay Madagal.»
18Zakariya i matəf Bizlaf iŋgaya: «Sa asən abə a ɗal ŋter avaŋga? Sa msəra mawəl tiw, wala naka taŋgəl tə.» 19Matəf Bizlaf i kəsha iŋgaya: «Sa, sa ana Jibərla, sa ana ma ndza atama Bizlaf kapish kapish a ɗalanə zlən. Sha ma zlənaka ara hwa, a zlapahu, a daahu ma wiyə ma təwah watsə. 20Ama andza ndə hwa ŋkula ɗal awa aska ma naka, hwa ɗa madəŋə, hwa kazlap akas a vaŋ ata vah ndə səkən watsa aagi kaaɗal, andza ndə Bizlaf a mayə, ayəw, aagi aɗal ana səkən watsa aagi,» iy.
21A tsutsa, ndə həji aagi kateh Zakariya, hak aa ghərəŋ ta, ndə aa gəra ɗekɗek a jak kwakus ata la ma ghwaɗeɗe a guɗaŋ, ndə həji kayə la ndza Bizlaf. 22Ndə a nda tə a bəza a jak, kula kazlap səku, həji aagi kasənə ci, səkən minja taakənə ara Bizlaf aka. A zlapatana abə ra, a ndza madəŋə.
23Tiɗa ndə Zakariya a kəɗaŋ vah ta ɗal zlən tə bəza a jak kwakus Bizlaf, tsaa kanda tə a wata tə. 24Wan kajik ikwa, a diwzha tə, wala tə Elizabet ɗal i dəməs aka, ŋtəra dzaɓən a kaji a kaghaləs. Ataa aŋtə a zlap iŋgaya: 25«Tsakwa ana səkən ndə Madagal Bizlaf a ɗalaka, tagam haw naka bəza ata nja həji aagi,» iy.
Matəf Bizlaf a kaghal mbəwha Yesu
26Ata ŋtəra maŋkwah ataa Elizabet abə dəməs, Bizlaf zlən a zlənha matəf tə Jibərla a hayak ma dzamadzam Galili, ndə həji kayə Nasaratu. 27A zlənazə ara dahalay minja, ma ŋkula sənzə mawəl, ma ɗa dəma ataa ala ndə zləm tə a ɗa Yusufu, ma ɗa shiŋ bay Dawda. Zləm dahalay watsa Mariyama. 28Matəf Bizlaf, tsaw a ndaa ara, zlap a zlapanə iŋgaya: «Ɓas ara hwa, Bizlaf Madagal taɗal may tə abə hwa, a ndza abə hwa.» 29Zlap watsa taghərnəkanə ŋkwaɓ aka a Mariyama, a kadeŋ səkən ndə zlap watsa a kamay a ghalə.
30Matəf Bizlaf i kəsha iŋgaya: «Hwa ɗal ŋzliŋ səku Mariyama, ara ndə a ɗa Bizlaf taɗal may tə ata hwa. 31Tsakwa, atama kajik hwa aɗal dəməs, hwa ambəwha mbə mawəl, hwa atsanə zləm tə Yesu. 32A aɓin a ɗa Bay Madagal, aagi ayə Mbə Bizlaf Madagal ma ndza a wəzəm. Bizlaf Bay Madagal a avəlanə bay andza jiji tə Dawda. 33Sha ana ma kaaɗa bay ataa həji Isərayila aagi kwa vepiy, bay tə a kaakəɗaŋəs.»
34Mariyama zhin a zhinanə a matəf Bizlaf, iŋgaya: «Sa tava a dzəvzə kusəm a mawəl aka səku, a asən a ɗal avaŋga?» 35Matəf Bizlaf watsa i kəsha iŋgaya: «Miɗ ma ghwaɗeɗe ma kaandaha ata hwa, ɓərɓər Bizlaf ma ndza a wəzəm a adəpahu andza kushaŋ. Sha ana ndə, mbə ma kaambəwha a aɗa ala ma ghwaɗeɗe, həji aagi ayə Mbə Bizlaf. 36Sarzə, abə dəməs ana vən kwa Elizabet a alima mbə kwa ndə a ŋgəl tə. Wala ndil ana həji aagi kəsha ghala va watsə. A ɗa ŋtəra maŋkwah tə anawatsə abə dəməs. 37Ndə a ɗa meni, səkən ma ɗal takum ara Bizlaf akas.» 38Mariyama iŋgaya: «Sa ɗa maɗalanə zlən a Bay Madagal, maɗalaka tiwtiw andza ndə hwa a zlap.» Matəf Bizlaf tsaa kanda tə.
Nda Mariyama aska a zlapazanə a Elizabet
39Kajik, ikwa atama, Mariyama, dəba a anda kahkah, a nda gwara hayak ma dzamadzam minja ata bəra bərla Yahudiya. 40Peteŋ i a wata ataa Zakariya, zlap a zlapazanə a Elizabet. 41Ndə Elizabet a zlima zlap Mariyama, dəba mbə a akusah a dəməs tə, ꞌunəf tə mkpef abə Miɗ ma ghwaɗeɗe. 42A dza wəla abə ɓərɓər tə ana Elizabet iŋgaya: «Bizlaf taɗal bəzla tə ma təwah ata hwa Mariyama, a taba wali ndiɓi aagi, azha tapish mbə ma ndza a dəməs kwa ka. 43Sa ɗa vaya, ndə mana Bay naka Madagal, a ndaha ara sa? 44Ara ndə hwa tagəra vəw, ndə sa zlima zlap kwa, mbə ma ndza a dəməs naka takusah aka abə ɓas. 45Təwah ara hwa, ara ndə hwa ɗal awa, a aɗal andza sha ana səkən ma ghal aka.»
Dərəf Mariyama
46Mariyama dəba a azlap mbara azha:
«Ndza naka tiwtiw, sa həmən Bizlaf abə guɗaŋ tə,
47ꞌunəf naka abə təwah dagala,
ara ndə Bizlaf ma rehaka.
48Ara ndə a mayə, tatsa nja tə ka ata sa, sa mava tə ma ɓəlaakaka.
Ya, kadək, həji aagi aghalə ma naka tiwtiw, kala vah,
Bizlaf tapishaka bəzla ma təwah, aagiy, kwa vepiy.
49Ara ndə Bizlaf ma ɓərɓər taɗalaka səkən ma təwah aagi dagala.
A ɗa Bizlaf ma ghwaɗeɗe.
50Za hahər tə dagala kwa vepiy, ata həji ma kahawanə aagi.
51Taghalatana ɓərɓər tə a həji aagi,
tapəlatana təf a həji ghav aagi akas.
52Tatadukha həji ma ɓərɓər aagi bəza a bay,
takaf həji ŋkulaf aagi ka, ata la ndza ma tsəham.
53Tazəmatana səkən ma təwah ndar a həji ma ndza abə mintish aagi,
tagam həji ma ŋtsəɓaŋtsəɓ aagi aara, ra ta pataktak.
54Talamzə həji Isərayila, ma ɗalanə zlən tə aagi,
azha tasənakənə a hahər tə ma ndza ata həji.
55Andza ndə, a zlapanə ka a jiji takwa aagi, gwara ara Ibərahima abə shiŋ tə aagi kwa vepiy,» iy.
56Ka Mariyama a ndzazə kusəm abə Elizabet, a ɗal bəza ŋtəra mahkaɗ, azha tsaa kazhin tə a wata.
Mbəwha Yahwana ma ɗal batem
57Ndə wan Elizabet a vaŋ tə mbəw, a mbəwha mbə mawəl. 58Ndə masliji aagi abə vən tə aagi zlima, Bizlaf Madagal taza hahər tə a heɗe, dəba aagi aɓas abə sha.
59Vah madzamahkaɗ tə ata lambəw, aa taa ta a zla mazhemter mbə. Aa may a tsanə zləm Zakariya, andza ataa cin. 60Mamən dəba a azlap: «Aŋghə, zləm tə a aɗa Yahwana,» iy. 61Aagi kəsha, iŋgaya: «Ata shiŋ kuni ci, ala ma ndza abə zləm watsə aka səku.» 62Azha, aa ɗiwzə cina mbə abə bet ra, aska aagi ɗiwzə zləm ndə a kamay a tsanə a mbə tə. 63Zakariya ɗiw a ɗiwzata abə ra aska aagi adaanə mpi ma kəslampalah aska a ŋtiri, ŋtir a ŋtir: «Zləm tə ci Yahwana,» iy. Hak aa ghərəŋ ta a heɗe tiwtiw. 64A tsutsa a tsutsa, mpaŋ a dəɗanə zlap aka, madəŋ zhanas, a kazlap, dəba a ahəmən Bizlaf abə ɓərɓər tə. 65Azha, masliji aagi tiwtiw hak aa ghərəŋ ta, həji watsa aagi ara ŋzliŋ akas. Tiwtiw a hayak Yahudiya, aa kaghal ma ma pew. 66Həji ma zlima ma watsa aagi tiwtiw, aa tambəl ka a ꞌunəf ta. Aa ɗiwzə: «A aɓin a ndza ana mbə watsa avaŋga?» Fat, ɓərɓər Bizlaf abə sha.
Həmən Bizlaf ataa Zakariya
67Azha Zakariya cina mbə ma feŋ watsa, ꞌunəf tə mkpef abə Miɗ ma ghwaɗeɗe. A kazlap andza ala ma ɗaf ma ndə a zlimazə ara Bizlaf, iŋgaya:
68«Sləf a Bay Madagal, Bizlaf Isərayila aagi,
ara ndə a taŋha la ata həji tə aagi, tarehata bəza.
69Tavəlaŋkwa, Marehahəji ma ɓərɓər ata shiŋ Dawda, ma ɗalanə zlən tə.
70Andza ndə a ghalazə ka gwara ara ala ma ɗaf ma ndə a zlimazə ara Bizlaf ma ghwaɗeɗe ma ndza ambəɗa tə aagi:
71Taghalahəji ka, a aɓin a rehahəji bəza ara həji jaga takwa aagi,
zhana a ra həji mshiɗ takwa aagi.
72Taɗalatana təwah tə a jiji takwa aagi,
ikwa abə a deŋ ka ata dzəvha tə ma təwah.
73Ara ndə a ɗa ya Bizlaf tameɗanə ka a jiji takwa Ibərahima, a ɗalaŋkwa.
74Zhana ndə a areh a həji aagi bəza ara ɓərɓər həji jaga takwa aagi,
a apəlaŋkwa təf a həji a səbarə kwa abə ŋzliŋ akas.
75Aska həji a aɗa həji ma ghwaɗeɗe aagi abə ma dəlili aagi atama tə,
kala pish ma mbirha a vaŋ ata lamca takwa.»
76Zakariya iŋgaya «Hwa azha, mbə naka, həji aagi ayahu, ala ma ɗaf ma ndə a zlimazə ara Bizlaf ma ndza a wəzəm.
Ara ndə, hwa ana ma kaanda atama ataa Bizlaf ma dagal aska a lamanə təf.
77Tsakwa ana səkən ndə hwa kaaghalatana a həji tə aagi. Aska hwa ghalatana a həji tə aagi, aska aagi areh ta,
abə pəlatana mpət ta.
78Bizlaf takwa abə hahər, abə təwah dagala aska həji,
sha ana ndə a zlənahəji weɗ la ma ndza a wəzəm ma kaɓal ata aŋkwa andza pish ma kambirha.
79Aska a weɗatana la a həji ma ndza a ləvaŋ aagi, abə mandza a kushaŋ mci aagi,
aska a lah ŋgas takwa ata təf ma təwah.»
80Mbə a kagəl tə, ŋkwaɓ taɗal zlən ma ŋtan aagi kandanə, tandza tə ka ata dərzləm a vaŋ a vah ndə a kaaghalatana ha tə a həji Isərayila aagi.
Currently Selected:
Luka 1: GOU
Highlight
Share
Copy
Want to have your highlights saved across all your devices? Sign up or sign in
Luka 1
1
Luka a kaghal ɗerewal tə
1-2Həji ndiɓi aagi aa tagəra səkən ndə Bizlaf a ɗalə ata diw tə, ara ni. A diwzha tə, aa taɗaf ma wiyə ma təwah watsa. Andza ndə aa ghal ka, dagala a taba takwa, həji aagi tadiw ka a ŋtir ma watsa tiwtiw. 3A ɗalaka təwah, a sa ŋtirahu ma watsa a heɗe a heɗe. A tsutsa meni, sa ŋcah abə wirwir aska sa gas a zlima səkən ma pew ambəɗa tə aagi, ata diw tə tiwtiw. 4Sa ɗalə ikwa, aska hwa sənə njiwin ana səkən ndə hwa lima a dərakw aagi, Madagal naka Tawfilus.
Ghal mbəwha Yahwana ma ɗal batem
5Tiɗa ndə a landza Haridus, ndə a ɗa bay hayak Yahudiya, ala minja aka, zləm tə Zakariya, a ɗa maɗal kwakus Bizlaf, ata shiŋ Abiya. Aa ɗa shiŋ maɗal kwakus Bizlaf aagi. Wala tə, zləm tə Elizabet. A ɗa shiŋ ataa Haruna, ma ɗa mampər maɗal kwakus ataa Yahuda aagi. 6Təmta gbak gbak, aa ɗa həji ma dəlili aagi ata nja Bizlaf. Aa kahawanə a ma ma dzawadzaw aagi, aa kasəbar səkən ndə Bizlaf Madagal a gar ka a heɗe a heɗe, kwa gulak a təmta akas. 7Mbə ta akas, ara ndə a ɗa ndil ana Elizabet. Zhana ya, təmta tə, gbak gbak, aa taŋgəl ta.
8Ata vah minja aka, Zakariya tsaa a nda a jak kwakus Bizlaf, aska a ɗal zlən ataa maɗal kwakus aagi. Pish watsa, vah ta ɗal zlən tə abə həji tə aagi a jak kwakus.
9Andza ndə, maɗal kwakus aagi gar ka a ɗalə, dəba aagi aji ala a taba ta a nda a jak kwakus ata pasla, la ma ghwaɗeɗe ndə Bizlaf a heɗe. Vah watsa, Zakariya ana ma nda ŋkəɗa səkən ma kanji tə təwah.
10Tiɗa ndə a kaŋkəɗa alef səkən ma kanji fiŋfiŋ, ŋgaɓa həji aagi aa katarha a bəza. 11Mbara, matəf Bizlaf paya ara Zakariya, gar a gar tə ka ata guva zəm, la kaŋkəɗa səkən. 12Ndə Zakariya a gəra, tanaana ka, ŋzliŋ tadzə bəza. 13Matəf Bizlaf i kəsha iŋgaya: «Hwa ɗal ŋzliŋ səku, Zakariya. Bizlaf tazlima tarha kwa, wala kwa Elizabet a aɓin a mbəwha mbə, hwa atsanə zləm tə Yahwana. 14A aɗa ara hwa ɓas a ɗa aka, lawaɗ, həji ndiɓi aagi andza abə ɓas dagala ata mbəwa tə. 15Ara ndə a ɗa ala ma ɗalanə zlən a Bay Madagal. A kaasa mavə abə səkən ta ŋhuz həji aagi akas, a aɗa mkpef abə miɗ Ma ghwaɗeɗe, tiɗa ndə awli kwagwa a mbəwha, ndza tə a dəməs mamən. 16A adaaha Isərayila aagi dagala a sən Bay Madagal Bizlaf ta. 17A andaha abə ɓərɓər Miɗ ma ghwaɗeɗe andza ala ma ɗaf ma ndə a zlimazə ara Bizlaf Iliya. Gwara ara abə dzəv ma a andza a taba cina wəzhi abə wəzhi ta aagi andza ndə Iliya a ɗalə. A abəw deŋ ŋkwaɓ həji ma gəy ma aagi bəza, a adaata ka a həji ma deŋ ŋkwaɓ aagi, həji ma dəlili aagi. A abəwata ka a ɗa həji ma ɗal awa aska ma ataa Bay Madagal.»
18Zakariya i matəf Bizlaf iŋgaya: «Sa asən abə a ɗal ŋter avaŋga? Sa msəra mawəl tiw, wala naka taŋgəl tə.» 19Matəf Bizlaf i kəsha iŋgaya: «Sa, sa ana Jibərla, sa ana ma ndza atama Bizlaf kapish kapish a ɗalanə zlən. Sha ma zlənaka ara hwa, a zlapahu, a daahu ma wiyə ma təwah watsə. 20Ama andza ndə hwa ŋkula ɗal awa aska ma naka, hwa ɗa madəŋə, hwa kazlap akas a vaŋ ata vah ndə səkən watsa aagi kaaɗal, andza ndə Bizlaf a mayə, ayəw, aagi aɗal ana səkən watsa aagi,» iy.
21A tsutsa, ndə həji aagi kateh Zakariya, hak aa ghərəŋ ta, ndə aa gəra ɗekɗek a jak kwakus ata la ma ghwaɗeɗe a guɗaŋ, ndə həji kayə la ndza Bizlaf. 22Ndə a nda tə a bəza a jak, kula kazlap səku, həji aagi kasənə ci, səkən minja taakənə ara Bizlaf aka. A zlapatana abə ra, a ndza madəŋə.
23Tiɗa ndə Zakariya a kəɗaŋ vah ta ɗal zlən tə bəza a jak kwakus Bizlaf, tsaa kanda tə a wata tə. 24Wan kajik ikwa, a diwzha tə, wala tə Elizabet ɗal i dəməs aka, ŋtəra dzaɓən a kaji a kaghaləs. Ataa aŋtə a zlap iŋgaya: 25«Tsakwa ana səkən ndə Madagal Bizlaf a ɗalaka, tagam haw naka bəza ata nja həji aagi,» iy.
Matəf Bizlaf a kaghal mbəwha Yesu
26Ata ŋtəra maŋkwah ataa Elizabet abə dəməs, Bizlaf zlən a zlənha matəf tə Jibərla a hayak ma dzamadzam Galili, ndə həji kayə Nasaratu. 27A zlənazə ara dahalay minja, ma ŋkula sənzə mawəl, ma ɗa dəma ataa ala ndə zləm tə a ɗa Yusufu, ma ɗa shiŋ bay Dawda. Zləm dahalay watsa Mariyama. 28Matəf Bizlaf, tsaw a ndaa ara, zlap a zlapanə iŋgaya: «Ɓas ara hwa, Bizlaf Madagal taɗal may tə abə hwa, a ndza abə hwa.» 29Zlap watsa taghərnəkanə ŋkwaɓ aka a Mariyama, a kadeŋ səkən ndə zlap watsa a kamay a ghalə.
30Matəf Bizlaf i kəsha iŋgaya: «Hwa ɗal ŋzliŋ səku Mariyama, ara ndə a ɗa Bizlaf taɗal may tə ata hwa. 31Tsakwa, atama kajik hwa aɗal dəməs, hwa ambəwha mbə mawəl, hwa atsanə zləm tə Yesu. 32A aɓin a ɗa Bay Madagal, aagi ayə Mbə Bizlaf Madagal ma ndza a wəzəm. Bizlaf Bay Madagal a avəlanə bay andza jiji tə Dawda. 33Sha ana ma kaaɗa bay ataa həji Isərayila aagi kwa vepiy, bay tə a kaakəɗaŋəs.»
34Mariyama zhin a zhinanə a matəf Bizlaf, iŋgaya: «Sa tava a dzəvzə kusəm a mawəl aka səku, a asən a ɗal avaŋga?» 35Matəf Bizlaf watsa i kəsha iŋgaya: «Miɗ ma ghwaɗeɗe ma kaandaha ata hwa, ɓərɓər Bizlaf ma ndza a wəzəm a adəpahu andza kushaŋ. Sha ana ndə, mbə ma kaambəwha a aɗa ala ma ghwaɗeɗe, həji aagi ayə Mbə Bizlaf. 36Sarzə, abə dəməs ana vən kwa Elizabet a alima mbə kwa ndə a ŋgəl tə. Wala ndil ana həji aagi kəsha ghala va watsə. A ɗa ŋtəra maŋkwah tə anawatsə abə dəməs. 37Ndə a ɗa meni, səkən ma ɗal takum ara Bizlaf akas.» 38Mariyama iŋgaya: «Sa ɗa maɗalanə zlən a Bay Madagal, maɗalaka tiwtiw andza ndə hwa a zlap.» Matəf Bizlaf tsaa kanda tə.
Nda Mariyama aska a zlapazanə a Elizabet
39Kajik, ikwa atama, Mariyama, dəba a anda kahkah, a nda gwara hayak ma dzamadzam minja ata bəra bərla Yahudiya. 40Peteŋ i a wata ataa Zakariya, zlap a zlapazanə a Elizabet. 41Ndə Elizabet a zlima zlap Mariyama, dəba mbə a akusah a dəməs tə, ꞌunəf tə mkpef abə Miɗ ma ghwaɗeɗe. 42A dza wəla abə ɓərɓər tə ana Elizabet iŋgaya: «Bizlaf taɗal bəzla tə ma təwah ata hwa Mariyama, a taba wali ndiɓi aagi, azha tapish mbə ma ndza a dəməs kwa ka. 43Sa ɗa vaya, ndə mana Bay naka Madagal, a ndaha ara sa? 44Ara ndə hwa tagəra vəw, ndə sa zlima zlap kwa, mbə ma ndza a dəməs naka takusah aka abə ɓas. 45Təwah ara hwa, ara ndə hwa ɗal awa, a aɗal andza sha ana səkən ma ghal aka.»
Dərəf Mariyama
46Mariyama dəba a azlap mbara azha:
«Ndza naka tiwtiw, sa həmən Bizlaf abə guɗaŋ tə,
47ꞌunəf naka abə təwah dagala,
ara ndə Bizlaf ma rehaka.
48Ara ndə a mayə, tatsa nja tə ka ata sa, sa mava tə ma ɓəlaakaka.
Ya, kadək, həji aagi aghalə ma naka tiwtiw, kala vah,
Bizlaf tapishaka bəzla ma təwah, aagiy, kwa vepiy.
49Ara ndə Bizlaf ma ɓərɓər taɗalaka səkən ma təwah aagi dagala.
A ɗa Bizlaf ma ghwaɗeɗe.
50Za hahər tə dagala kwa vepiy, ata həji ma kahawanə aagi.
51Taghalatana ɓərɓər tə a həji aagi,
tapəlatana təf a həji ghav aagi akas.
52Tatadukha həji ma ɓərɓər aagi bəza a bay,
takaf həji ŋkulaf aagi ka, ata la ndza ma tsəham.
53Tazəmatana səkən ma təwah ndar a həji ma ndza abə mintish aagi,
tagam həji ma ŋtsəɓaŋtsəɓ aagi aara, ra ta pataktak.
54Talamzə həji Isərayila, ma ɗalanə zlən tə aagi,
azha tasənakənə a hahər tə ma ndza ata həji.
55Andza ndə, a zlapanə ka a jiji takwa aagi, gwara ara Ibərahima abə shiŋ tə aagi kwa vepiy,» iy.
56Ka Mariyama a ndzazə kusəm abə Elizabet, a ɗal bəza ŋtəra mahkaɗ, azha tsaa kazhin tə a wata.
Mbəwha Yahwana ma ɗal batem
57Ndə wan Elizabet a vaŋ tə mbəw, a mbəwha mbə mawəl. 58Ndə masliji aagi abə vən tə aagi zlima, Bizlaf Madagal taza hahər tə a heɗe, dəba aagi aɓas abə sha.
59Vah madzamahkaɗ tə ata lambəw, aa taa ta a zla mazhemter mbə. Aa may a tsanə zləm Zakariya, andza ataa cin. 60Mamən dəba a azlap: «Aŋghə, zləm tə a aɗa Yahwana,» iy. 61Aagi kəsha, iŋgaya: «Ata shiŋ kuni ci, ala ma ndza abə zləm watsə aka səku.» 62Azha, aa ɗiwzə cina mbə abə bet ra, aska aagi ɗiwzə zləm ndə a kamay a tsanə a mbə tə. 63Zakariya ɗiw a ɗiwzata abə ra aska aagi adaanə mpi ma kəslampalah aska a ŋtiri, ŋtir a ŋtir: «Zləm tə ci Yahwana,» iy. Hak aa ghərəŋ ta a heɗe tiwtiw. 64A tsutsa a tsutsa, mpaŋ a dəɗanə zlap aka, madəŋ zhanas, a kazlap, dəba a ahəmən Bizlaf abə ɓərɓər tə. 65Azha, masliji aagi tiwtiw hak aa ghərəŋ ta, həji watsa aagi ara ŋzliŋ akas. Tiwtiw a hayak Yahudiya, aa kaghal ma ma pew. 66Həji ma zlima ma watsa aagi tiwtiw, aa tambəl ka a ꞌunəf ta. Aa ɗiwzə: «A aɓin a ndza ana mbə watsa avaŋga?» Fat, ɓərɓər Bizlaf abə sha.
Həmən Bizlaf ataa Zakariya
67Azha Zakariya cina mbə ma feŋ watsa, ꞌunəf tə mkpef abə Miɗ ma ghwaɗeɗe. A kazlap andza ala ma ɗaf ma ndə a zlimazə ara Bizlaf, iŋgaya:
68«Sləf a Bay Madagal, Bizlaf Isərayila aagi,
ara ndə a taŋha la ata həji tə aagi, tarehata bəza.
69Tavəlaŋkwa, Marehahəji ma ɓərɓər ata shiŋ Dawda, ma ɗalanə zlən tə.
70Andza ndə a ghalazə ka gwara ara ala ma ɗaf ma ndə a zlimazə ara Bizlaf ma ghwaɗeɗe ma ndza ambəɗa tə aagi:
71Taghalahəji ka, a aɓin a rehahəji bəza ara həji jaga takwa aagi,
zhana a ra həji mshiɗ takwa aagi.
72Taɗalatana təwah tə a jiji takwa aagi,
ikwa abə a deŋ ka ata dzəvha tə ma təwah.
73Ara ndə a ɗa ya Bizlaf tameɗanə ka a jiji takwa Ibərahima, a ɗalaŋkwa.
74Zhana ndə a areh a həji aagi bəza ara ɓərɓər həji jaga takwa aagi,
a apəlaŋkwa təf a həji a səbarə kwa abə ŋzliŋ akas.
75Aska həji a aɗa həji ma ghwaɗeɗe aagi abə ma dəlili aagi atama tə,
kala pish ma mbirha a vaŋ ata lamca takwa.»
76Zakariya iŋgaya «Hwa azha, mbə naka, həji aagi ayahu, ala ma ɗaf ma ndə a zlimazə ara Bizlaf ma ndza a wəzəm.
Ara ndə, hwa ana ma kaanda atama ataa Bizlaf ma dagal aska a lamanə təf.
77Tsakwa ana səkən ndə hwa kaaghalatana a həji tə aagi. Aska hwa ghalatana a həji tə aagi, aska aagi areh ta,
abə pəlatana mpət ta.
78Bizlaf takwa abə hahər, abə təwah dagala aska həji,
sha ana ndə a zlənahəji weɗ la ma ndza a wəzəm ma kaɓal ata aŋkwa andza pish ma kambirha.
79Aska a weɗatana la a həji ma ndza a ləvaŋ aagi, abə mandza a kushaŋ mci aagi,
aska a lah ŋgas takwa ata təf ma təwah.»
80Mbə a kagəl tə, ŋkwaɓ taɗal zlən ma ŋtan aagi kandanə, tandza tə ka ata dərzləm a vaŋ a vah ndə a kaaghalatana ha tə a həji Isərayila aagi.
Currently Selected:
:
Highlight
Share
Copy
Want to have your highlights saved across all your devices? Sign up or sign in