Zlən ataa həji ta zlən aagi 10
10
Piyer a wata Kurneliyus
1Ala minja a hayak Kaysariya aka, zləm tə Kurneliyus. A ɗa madagal ma ndza aha suji Ruma aagi, ndə həji kayə: «Suji Italiya». 2Abə haw, a ɗa ala ma dəlili atama Bizlaf, abə həji ma ndza a gi tə aagi tiwtiw, taji a lamzə həji titikw ma ndza a taba həji Yahuda aagi, zhana a katar Bizlaf kapish kapish. 3Ma vah minja aka, slaɓ a ɗa ler mahkaɗ ataa ŋtsəɓahw, matəf Bizlaf ghal a ghalanə ha tə, Kurneliyus tagəra abə nja tə. Azha, tsaw matəf Bizlaf a nda a wata tə, zlap a zlapanə, iŋgaya: «Kurneliyus!» iy. 4Kurneliyus a gəra ya, matəf Bizlaf, ghərek a ɗal ŋzliŋ aka, iŋgaya: «Ma ɗal tə veme, sa Bay Madagal?» Matəf Bizlaf zhin a zhinanə, iŋgaya: «Bizlaf tazlima tarha kwa abə səkən kwa ndə hwa ɓizhatana ɓəlaakaka a həji titikw watsə aagi, azha hwa kahashashaŋ ara Bizlaf kwa vepiy səku. 5Azha, anawatsə, zlən həji aagi a hayak Jupe aagi, aska aagi andaha a zhinha Simun ndə həji kayə zhana Piyer watsə. 6A ndza a wata Simun minja, ala ma kaɗal zlən gwabəla. Jak tə huk abəra mtil.» 7Ndə matəf Bizlaf a kazlapanə bəza, safay ata nja tə, Kurneliyus ya a yaha həji tə ma gbak ma kaɗal zlən a gi tə aagi abə suji minja ma ndza a taba suji tə aagi, ala watsa ŋkwaɓ tə ŋtaguleŋ ata Bizlaf. 8Ghal ghal a ghalatana ma tə aagi bəza tiwtiw, zlən a zlənzata a hayak Jupe.
Səkən ndə Piyer a gəra a Jupe
9Apat tə, həji ma ɗal zlən aagi abə suji aagi ata təf, ndə aa ɗa huk abəra hayak ma dzamadzam Jupe ya, Piyer taf a taf tə a wəzəm a ha jak ma ndza aha jak minja aska a tarha, slaɓ a ɗa pish ɗawarwar. 10Ama mintish a kadzə, azha may tə aska səkən zəm. Tiɗa ndə aa kadanə wəda ya, Piyer a gəra səkən minja a ndaha a wəzəm a wəzlaf ara Bizlaf. 11A gəra la ma ndza a wəzlaf a kadəɗ tə, zhana səkən minja a kandaha a wəzəm a wəzlaf. Səkən watsa a saɓ andza gidiwri ma dagal ndə həji mbəl ka ata mazləm tə ma ŋfaɗ aagi tiwtiw, a ndaha bəlik a bəlik tə ka ata hayak. 12Zhana, səkən ŋgas aagi a mən tiwtiw, abə səkən ma kanda abə mabəra ata hayak aagi, abə səkən ma kambir a wəzlaf aagi. 13Tazlima wəla minja, a kazlapanə: «Gar kwa a wəzəm, Piyer! Bazlata, azha hwa ɓamata,» iy. 14Piyer zhin a zhinanə, iŋgaya: «Aŋghə, Bay Madagal. Ara ndə a ɗa, ghala ndza naka, sa tava a zəm səkən ndə həji tak aka zəm abə səkən ma dadawər akas.» 15Zhana wəruk, Piyer a zlima ma watsa a magbak tə, iŋgaya: «Səkən ndə Bizlaf a yaɓ dadawər tə bəza, hwa, hwa ɗiw a sarə andza səkən ma dadawər səku.» 16Zhin səkən watsa mahkaɗ a ɗal, azha səkən watsa zhin a zhin tə a wəzəm a wəzlaf.
17Piyer a kasən səkən ndə a kamay a ghalə ana sha tə abə ha tə səku, dəba a azlap: «Səkən ndə sa gəra watsə a may a zlap avaŋga?» A tsutsa, həji ndə Kurneliyus a zlənata aagi kagas jak ataa Simun, tiɗa aa a bəza a majak. 18Dəba aagi aya, aa kaɗiwi, aagi iŋgaya: «Simun Piyer a ndza a ɗi a gi watsə vəw?» aagiy. 19Piyer a kadeŋ səkən ndə a gəra, ama, Miɗ ma ghwaɗeɗe zlap a zlapanə, iŋgaya: «Tsakwa, həji mahkaɗ aa kagasahu. 20Tadukha anawatsə anawatsə, səbarata ara hwa ŋga ŋkwaɓ! Ara ndə a ɗa, sa ma zlənata.» 21Piyer taduk a tadukha ka, azha zlap a zlapatana a həji watsa aagi, iŋgaya: «Huni gas ala aka vəw? A ɗa sa! Ma ma daahuni veme?» 22Zhin aa zhinanə, aagi iŋgaya: «Madagal ma ndza aha suji Kurneliyus ma zlənani, suji ma dagal ataa Ruma aagi, ala ma dəlili atama Bizlaf, ma kahəmən Bizlaf, zhana zlən tə təwah ata nja Yahuda aagi tiwtiw. Matəf Bizlaf ma ndaha a ghalanə shiŋ ma watsə: “Zlapanə a Piyer mandaha a jak kwa, azha hwa zlima ma ndə a kaazlapahu.”» 23Azha, Piyer jaɓ a jaɓ həji watsa aagi ka a gi, aa wan a tsutsa. A kwaf tə, Piyer tsaa kanda tə abə təmta kahkah. Həji Kərist ma ndza a hayak ma dzamadzam Jupe aagi talahzata.
24Apat tə, ndə aa ɗa gwar a hayak Kaysariya. Kurneliyus a kateh ta, tadzam vən tə aagi abə ŋgwanambə tə ŋter aagi. 25Tiɗa ndə Piyer a kagwarha, Kurneliyus a kandaha ara, gəliɓ gəliɓakənə atama, aska a zlapzanə abə haw katkadək. 26Ama Piyer zlap a zlapanə, iŋgaya: «Gar kwa a wəzəm! Sa, sa ɗa ala yəm,» iy. 27Azha, ndə aa kazlap abə Kurneliyus, tsaw aa nda ta a gi tə. A tsutsa Piyer a gəra həji aagi vərəm aa tadzama ta ka. 28Zlap a zlapatana iŋgaya: «Andza ndə huni kasənə, təf ara ndə Yahuda a ɗal ŋgwanambə abə ndə mbələm akas, kwa a nda a gi tə. Ama, sa, Bizlaf a ꞌwal a ghalaka səkən minja, ara sa deŋ ka ci, ala watsə dadawər, aka səku, ala ma gamak. 29Sha ana ndə sa ndaha, nda naka ci, sa taŋga ŋkwaɓ aka səku. Sa may a sənə, huni yaaka aska veme?» 30Azha, Kurneliyus zhin a zhinanə, iŋgaya: «A ɗa wan mahkaɗ anawatsə, ata ler mahkaɗ ataa ŋtsəɓahw, sa katarha a wata naka. A tsutsa a tsutsa, peteŋ ala minja atama naka abə rəkuts ma tizlizli ma kaɓal, 31azha, tazlapaka, iŋgaya: “Kurneliyus, Bizlaf tazlima tarha kwa, tahashashaŋ səkən ndə hwa vəlatana ɓəlaakaka a həji titikw watsə aagi səku, a ha tə kwa vepiy. 32Zlən həji aagi a hayak ma dzamadzam Jupe, aska a zhinha Simun ndə aa kayə Piyer a ɗi yəm. A ndza a mazləm mtil, a wata Simun minja ma kaɗal zlən gwabəla,” iy. 33Anawatsə anawatsə, sa tazlən həji aagi a wata kwa, hwa tamay a ndaha. Anawatsə, tsakwa azha, ni atama kwa, a teh ma ndə Bay Madagal a mbaslahu ka tiwtiw, a ghalani.»
Zlap ataa Piyer a wata Kurneliyus
34Mbara azha, Piyer dəba a adəɗ ma a zlap, iŋgaya: «Sa kasən ŋter ci, Bizlaf a lamzə həji aagi tiwtiw a wata tə. 35Andza ala a kahawanə abə ŋkwaɓ, zhana a kaɗal səkən ma dəlili, ala watsa a təwahanə a Bizlaf. 36Bizlaf tazlənha ma, ata həji Isərayila aagi, taghalatana Ma wiyə ma təwah ataa landza ma təwah gwara ara Yesu Kərist, sha ma ɗa Bay Madagal ataa həji aagi tiwtiw.
37Zhana, huni kasən ma watsa taɗal a hayak Yahudiya tiwtiw, a diwazə a hayak Galili a diwzha ɗaf ma ɗal batem ndə, Yahwana a ɗalə. 38Yesu ndə Nasaratu, huni kasənə abə Bizlaf a vəlanə ɓərɓər ataa Miɗ ma ghwaɗeɗe, ata la ndə a nda tiwtiw a ŋge a hayak aagi, təwah ana ndə a ɗalə, abə mbəl həji ndə Wəliɓi a kasatana yaka aagi tiwtiw, ara ndə a ɗa, Bizlaf abəra. 39Ni abə həji ndiɓi aagi, ni kasən zlən tə ndə a ɗalə tiwtiw a hayak Yahuda, andza mandza a Wərusalima. Sha tə, ndə aa safay bəza, aa tadar ka ata mpi ma gəzlaŋgarak. 40Bizlaf tagarazə a wəzəm bəza a jiɓ ata wan mamahkaɗ tə, tavəlanə a ghalha ha tə a həji aagi, 41a həji aagi tiwtiw səku, ama aska ni, ara ndə a ɗa, Bizlaf tadiw a dəmani bəza mpər andza həji ma kaghal səkən ndə ni gəra abə ndə ni zlima a heɗe aagi. Ndə Yesu a gara tə a wəzəm a bəza a jiɓ, ni tazəm səkən abə sha, zhana ni tasa səkən aagi abə sha. 42Zhana, tazlapani ka a ghalatana Ma wiyə ma təwah a həji aagi, abə səkən ndə ni gəra abə ndə ni zlima aagi. Sha ana ndə a ɗa, Bizlaf a tsəz ka andza mazla guma atama həji ma bazl ta aagi abə həji ma ndza abə nja aagi.» 43A heɗe abə həji ma ɗaf ma ndə aa zlimazə ara Bizlaf aagi zlap tiwtiw, aagi iŋgaya: «Kwa vaye ma ɗal awa aska ma Yesu, a lima pəl mpət ata zləm tə,» aagiy.
Ndaha Miɗ ma ghwaɗeɗe ata həji ma ŋkula ɗa Yahuda aagi
44Tiɗa ndə Piyer a kazlap kwagwa, Miɗ ma ghwaɗeɗe peteŋ taa tə aha həji ma teh ma Bizlaf aagi. 45Həji Kərist ma ɗa Yahuda aagi ma ndaha abə Piyer, hak aa ghərəŋ ta a guɗaŋ, ara ndə a ɗa, Bizlaf tavəlatana Miɗ ma ghwaɗeɗe kwa a həji ma ŋkula ɗa Yahuda aagi! 46Həji Kərist aagi kazlima zlap həji watsa aagi, aa kazlap abə ma ma ŋkula a ɗa ma ta abə həmən dagal Bizlaf. Azha, Piyer, iŋgaya: 47«Həji watsa aagi talima Miɗ ma ghwaɗeɗe andza ni, həji takata ka, a ɗal batem a yəm, ara veme?» 48Piyer zlap a zlapatana azha a ɗalatana batem ata zləm Yesu Kərist, zhana zlap aa zlapanə, aska a ɗalzə wan kajik atama abə təmta.
Currently Selected:
Zlən ataa həji ta zlən aagi 10: GOU
Highlight
Share
Copy
Want to have your highlights saved across all your devices? Sign up or sign in
Zlən ataa həji ta zlən aagi 10
10
Piyer a wata Kurneliyus
1Ala minja a hayak Kaysariya aka, zləm tə Kurneliyus. A ɗa madagal ma ndza aha suji Ruma aagi, ndə həji kayə: «Suji Italiya». 2Abə haw, a ɗa ala ma dəlili atama Bizlaf, abə həji ma ndza a gi tə aagi tiwtiw, taji a lamzə həji titikw ma ndza a taba həji Yahuda aagi, zhana a katar Bizlaf kapish kapish. 3Ma vah minja aka, slaɓ a ɗa ler mahkaɗ ataa ŋtsəɓahw, matəf Bizlaf ghal a ghalanə ha tə, Kurneliyus tagəra abə nja tə. Azha, tsaw matəf Bizlaf a nda a wata tə, zlap a zlapanə, iŋgaya: «Kurneliyus!» iy. 4Kurneliyus a gəra ya, matəf Bizlaf, ghərek a ɗal ŋzliŋ aka, iŋgaya: «Ma ɗal tə veme, sa Bay Madagal?» Matəf Bizlaf zhin a zhinanə, iŋgaya: «Bizlaf tazlima tarha kwa abə səkən kwa ndə hwa ɓizhatana ɓəlaakaka a həji titikw watsə aagi, azha hwa kahashashaŋ ara Bizlaf kwa vepiy səku. 5Azha, anawatsə, zlən həji aagi a hayak Jupe aagi, aska aagi andaha a zhinha Simun ndə həji kayə zhana Piyer watsə. 6A ndza a wata Simun minja, ala ma kaɗal zlən gwabəla. Jak tə huk abəra mtil.» 7Ndə matəf Bizlaf a kazlapanə bəza, safay ata nja tə, Kurneliyus ya a yaha həji tə ma gbak ma kaɗal zlən a gi tə aagi abə suji minja ma ndza a taba suji tə aagi, ala watsa ŋkwaɓ tə ŋtaguleŋ ata Bizlaf. 8Ghal ghal a ghalatana ma tə aagi bəza tiwtiw, zlən a zlənzata a hayak Jupe.
Səkən ndə Piyer a gəra a Jupe
9Apat tə, həji ma ɗal zlən aagi abə suji aagi ata təf, ndə aa ɗa huk abəra hayak ma dzamadzam Jupe ya, Piyer taf a taf tə a wəzəm a ha jak ma ndza aha jak minja aska a tarha, slaɓ a ɗa pish ɗawarwar. 10Ama mintish a kadzə, azha may tə aska səkən zəm. Tiɗa ndə aa kadanə wəda ya, Piyer a gəra səkən minja a ndaha a wəzəm a wəzlaf ara Bizlaf. 11A gəra la ma ndza a wəzlaf a kadəɗ tə, zhana səkən minja a kandaha a wəzəm a wəzlaf. Səkən watsa a saɓ andza gidiwri ma dagal ndə həji mbəl ka ata mazləm tə ma ŋfaɗ aagi tiwtiw, a ndaha bəlik a bəlik tə ka ata hayak. 12Zhana, səkən ŋgas aagi a mən tiwtiw, abə səkən ma kanda abə mabəra ata hayak aagi, abə səkən ma kambir a wəzlaf aagi. 13Tazlima wəla minja, a kazlapanə: «Gar kwa a wəzəm, Piyer! Bazlata, azha hwa ɓamata,» iy. 14Piyer zhin a zhinanə, iŋgaya: «Aŋghə, Bay Madagal. Ara ndə a ɗa, ghala ndza naka, sa tava a zəm səkən ndə həji tak aka zəm abə səkən ma dadawər akas.» 15Zhana wəruk, Piyer a zlima ma watsa a magbak tə, iŋgaya: «Səkən ndə Bizlaf a yaɓ dadawər tə bəza, hwa, hwa ɗiw a sarə andza səkən ma dadawər səku.» 16Zhin səkən watsa mahkaɗ a ɗal, azha səkən watsa zhin a zhin tə a wəzəm a wəzlaf.
17Piyer a kasən səkən ndə a kamay a ghalə ana sha tə abə ha tə səku, dəba a azlap: «Səkən ndə sa gəra watsə a may a zlap avaŋga?» A tsutsa, həji ndə Kurneliyus a zlənata aagi kagas jak ataa Simun, tiɗa aa a bəza a majak. 18Dəba aagi aya, aa kaɗiwi, aagi iŋgaya: «Simun Piyer a ndza a ɗi a gi watsə vəw?» aagiy. 19Piyer a kadeŋ səkən ndə a gəra, ama, Miɗ ma ghwaɗeɗe zlap a zlapanə, iŋgaya: «Tsakwa, həji mahkaɗ aa kagasahu. 20Tadukha anawatsə anawatsə, səbarata ara hwa ŋga ŋkwaɓ! Ara ndə a ɗa, sa ma zlənata.» 21Piyer taduk a tadukha ka, azha zlap a zlapatana a həji watsa aagi, iŋgaya: «Huni gas ala aka vəw? A ɗa sa! Ma ma daahuni veme?» 22Zhin aa zhinanə, aagi iŋgaya: «Madagal ma ndza aha suji Kurneliyus ma zlənani, suji ma dagal ataa Ruma aagi, ala ma dəlili atama Bizlaf, ma kahəmən Bizlaf, zhana zlən tə təwah ata nja Yahuda aagi tiwtiw. Matəf Bizlaf ma ndaha a ghalanə shiŋ ma watsə: “Zlapanə a Piyer mandaha a jak kwa, azha hwa zlima ma ndə a kaazlapahu.”» 23Azha, Piyer jaɓ a jaɓ həji watsa aagi ka a gi, aa wan a tsutsa. A kwaf tə, Piyer tsaa kanda tə abə təmta kahkah. Həji Kərist ma ndza a hayak ma dzamadzam Jupe aagi talahzata.
24Apat tə, ndə aa ɗa gwar a hayak Kaysariya. Kurneliyus a kateh ta, tadzam vən tə aagi abə ŋgwanambə tə ŋter aagi. 25Tiɗa ndə Piyer a kagwarha, Kurneliyus a kandaha ara, gəliɓ gəliɓakənə atama, aska a zlapzanə abə haw katkadək. 26Ama Piyer zlap a zlapanə, iŋgaya: «Gar kwa a wəzəm! Sa, sa ɗa ala yəm,» iy. 27Azha, ndə aa kazlap abə Kurneliyus, tsaw aa nda ta a gi tə. A tsutsa Piyer a gəra həji aagi vərəm aa tadzama ta ka. 28Zlap a zlapatana iŋgaya: «Andza ndə huni kasənə, təf ara ndə Yahuda a ɗal ŋgwanambə abə ndə mbələm akas, kwa a nda a gi tə. Ama, sa, Bizlaf a ꞌwal a ghalaka səkən minja, ara sa deŋ ka ci, ala watsə dadawər, aka səku, ala ma gamak. 29Sha ana ndə sa ndaha, nda naka ci, sa taŋga ŋkwaɓ aka səku. Sa may a sənə, huni yaaka aska veme?» 30Azha, Kurneliyus zhin a zhinanə, iŋgaya: «A ɗa wan mahkaɗ anawatsə, ata ler mahkaɗ ataa ŋtsəɓahw, sa katarha a wata naka. A tsutsa a tsutsa, peteŋ ala minja atama naka abə rəkuts ma tizlizli ma kaɓal, 31azha, tazlapaka, iŋgaya: “Kurneliyus, Bizlaf tazlima tarha kwa, tahashashaŋ səkən ndə hwa vəlatana ɓəlaakaka a həji titikw watsə aagi səku, a ha tə kwa vepiy. 32Zlən həji aagi a hayak ma dzamadzam Jupe, aska a zhinha Simun ndə aa kayə Piyer a ɗi yəm. A ndza a mazləm mtil, a wata Simun minja ma kaɗal zlən gwabəla,” iy. 33Anawatsə anawatsə, sa tazlən həji aagi a wata kwa, hwa tamay a ndaha. Anawatsə, tsakwa azha, ni atama kwa, a teh ma ndə Bay Madagal a mbaslahu ka tiwtiw, a ghalani.»
Zlap ataa Piyer a wata Kurneliyus
34Mbara azha, Piyer dəba a adəɗ ma a zlap, iŋgaya: «Sa kasən ŋter ci, Bizlaf a lamzə həji aagi tiwtiw a wata tə. 35Andza ala a kahawanə abə ŋkwaɓ, zhana a kaɗal səkən ma dəlili, ala watsa a təwahanə a Bizlaf. 36Bizlaf tazlənha ma, ata həji Isərayila aagi, taghalatana Ma wiyə ma təwah ataa landza ma təwah gwara ara Yesu Kərist, sha ma ɗa Bay Madagal ataa həji aagi tiwtiw.
37Zhana, huni kasən ma watsa taɗal a hayak Yahudiya tiwtiw, a diwazə a hayak Galili a diwzha ɗaf ma ɗal batem ndə, Yahwana a ɗalə. 38Yesu ndə Nasaratu, huni kasənə abə Bizlaf a vəlanə ɓərɓər ataa Miɗ ma ghwaɗeɗe, ata la ndə a nda tiwtiw a ŋge a hayak aagi, təwah ana ndə a ɗalə, abə mbəl həji ndə Wəliɓi a kasatana yaka aagi tiwtiw, ara ndə a ɗa, Bizlaf abəra. 39Ni abə həji ndiɓi aagi, ni kasən zlən tə ndə a ɗalə tiwtiw a hayak Yahuda, andza mandza a Wərusalima. Sha tə, ndə aa safay bəza, aa tadar ka ata mpi ma gəzlaŋgarak. 40Bizlaf tagarazə a wəzəm bəza a jiɓ ata wan mamahkaɗ tə, tavəlanə a ghalha ha tə a həji aagi, 41a həji aagi tiwtiw səku, ama aska ni, ara ndə a ɗa, Bizlaf tadiw a dəmani bəza mpər andza həji ma kaghal səkən ndə ni gəra abə ndə ni zlima a heɗe aagi. Ndə Yesu a gara tə a wəzəm a bəza a jiɓ, ni tazəm səkən abə sha, zhana ni tasa səkən aagi abə sha. 42Zhana, tazlapani ka a ghalatana Ma wiyə ma təwah a həji aagi, abə səkən ndə ni gəra abə ndə ni zlima aagi. Sha ana ndə a ɗa, Bizlaf a tsəz ka andza mazla guma atama həji ma bazl ta aagi abə həji ma ndza abə nja aagi.» 43A heɗe abə həji ma ɗaf ma ndə aa zlimazə ara Bizlaf aagi zlap tiwtiw, aagi iŋgaya: «Kwa vaye ma ɗal awa aska ma Yesu, a lima pəl mpət ata zləm tə,» aagiy.
Ndaha Miɗ ma ghwaɗeɗe ata həji ma ŋkula ɗa Yahuda aagi
44Tiɗa ndə Piyer a kazlap kwagwa, Miɗ ma ghwaɗeɗe peteŋ taa tə aha həji ma teh ma Bizlaf aagi. 45Həji Kərist ma ɗa Yahuda aagi ma ndaha abə Piyer, hak aa ghərəŋ ta a guɗaŋ, ara ndə a ɗa, Bizlaf tavəlatana Miɗ ma ghwaɗeɗe kwa a həji ma ŋkula ɗa Yahuda aagi! 46Həji Kərist aagi kazlima zlap həji watsa aagi, aa kazlap abə ma ma ŋkula a ɗa ma ta abə həmən dagal Bizlaf. Azha, Piyer, iŋgaya: 47«Həji watsa aagi talima Miɗ ma ghwaɗeɗe andza ni, həji takata ka, a ɗal batem a yəm, ara veme?» 48Piyer zlap a zlapatana azha a ɗalatana batem ata zləm Yesu Kərist, zhana zlap aa zlapanə, aska a ɗalzə wan kajik atama abə təmta.
Currently Selected:
:
Highlight
Share
Copy
Want to have your highlights saved across all your devices? Sign up or sign in