Roméne 3

Moto a ta ámó ɔ́wɔ́ ójó ndíŋgirííŋ

1Até kéye va Yúdene vá tímbámó otómbá vasɔ́ɔ́? Ye mpí e ámó ɔ́wɔ́ anáá o rií anjé anjé? 2Ɛɛŋ ekáné yá mpí e ámó ɔ́wɔ́ esene éyé va Yúdene káva Irɔŋgɔ a ma késyé o wó hwá epéŋgé yáa. 3Kó ámó ŋgava ra va Yúdene emo e ta ma béerye maró mwané, ye omówo wó ámó weŋga anáá até éyé Irɔŋgɔ a ma wó tánéná ka eŋgavena? 4Omówo wó ámó viváná, ŋgáno to no jembe anáá: Irɔŋgɔ a ojámó vatɔ́ɔ́tɔ́ kó vato bimé vá ámó na viváná. Ará va kárate ává mwáŋ mwáŋ vá járámó ndɔ́ŋɔ́ ra maró má Irɔŋgɔ, vá járámó anáá: «Vá géremenámó ojembe anáá o ámó ndíŋgirííŋ, kó vá wo jósyé mámó otimbe makevikye.» 5Kó ŋgé nyéŋgé íjí to eŋgámó yá tíhíyé anáá Irɔŋgɔ a ámó ndíŋgirííŋ na jósi waá, to né járámó eéné? Ye anáá Irɔŋgɔ a ta ámó ndíŋgirííŋ táma éjé a utámó mbésé raá? Ará njárámó ámó moto uŋgimé 6Mbéndɔ́ omówo wó ámó viváná! Ŋgé Irɔŋgɔ a ríi etéŋgé etéŋgé, twiŋí kówo a hítyámó ojósyé cí ra ndono? 7Moto omo a ámó ojárá, kó ŋgé na viváná vyámé, vatɔ́ɔ́tɔ́ vá Irɔŋgɔ vá enéyá anáá vá tíhíye niimí náa, twiŋí kówo vá ámó o njósyé ámó yeŋga mabé? 8Vato vámó vá só séyámó kó vá géremenámó o wó pwénísye, esene éyé vá cɔ́mónɔmó anáá to njárámó anáá: «Ŋgáno to no eŋga wobé ukú ójó anáá wusi wó humé!» Kó wusó wá até kówo visó ka eŋga wobé mwané? 9Kó ámó é ámó náná to ámó ojárá sɔ́ eéné? Ye visó ává va Yúdene to tómbámó vasɔ́ɔ́? Mbéndɔ́! Esené ŋgo ma késyé otíhíye anáá va Yúdene na ava ka rií va Yúdene vá ámó bimé veŋga mabé. 10Va kárate ává mwáŋ mwáŋ vá járámó anáá: Moto ójó ndíŋgirííŋ a ta ámó ɔ́wɔ́ ítɔɔ umwesií! 11Moto a ta ámó ɔ́wɔ́ ójó a taŋgámó, tɔɔ moto ójó a sɔsɔmó Irɔŋgɔ! 12Bimé vá ma urúkye usi wa pé, kó vá ámó ndáŋgéná, moto a ta ámó ɔ́wɔ́ ójó a eŋgámó wusi, tɔɔ umwesií. 13Iŋgɔŋɔ ráwó í húmíyámó vipéŋgé íví ví bévámó ámó evérá éyé hwɔ́ɔ́ŋ, vá jeényámó vasɔ́ɔ́ na erémbé yáwó, até éyé é húmánámó na byorá vyáwó yá uŋgúté é púranámó na nkemba ra péné, 14uŋgúté ráwó ó ámó táásé na anyamá orɔŋgɔ na vipéŋgé íví ví kánáanámó. 15Eŋgoró rawó e kúrámó otétá ukú ójó anáá vá endá oná, 16vá sásonámó wimé homó ówó vá tómbámó kó vá caánámó vitɔɔ pandó mwané. 17Vá ta jembé pé ra dɔ́ŋgɔrɔ́ɔ́ŋ, 18vá sɔ́tɔ́mó ka tíné Irɔŋgɔ tɔɔ dekétií. 19Wó je rií anáá to jembámó anáá até yimé éyé mbɛ́ŋdɔ́ e járámó, e járámó na wusó wá ava vá géremenámó obeerye mbéndɔ́. Táma mwané moto a ta hítí obune uŋgúté kó wó váŋgámó wenéyá anáá cí ra ndono iŋgimé e ámó na moba na aŋgísó rá Irɔŋgɔ. 20Wandá mwané kówo moto a ta mó o rií ndíŋgííŋ na aŋgísó rá Irɔŋgɔ esene éyé anáá a beeryámó mbéndɔ́, esene éyé mbéndɔ́ émwané yo eŋgámó bɛ́ŋ anáá vato vá jémbe anáá vá mó éŋga wobé.

Otimbe ówó ŋgɔ́tééná ó bundyámó moto ndíŋgirííŋ

21Vedá tetee ojó, Irɔŋgɔ a má só tíhíyé twiiŋí kówo a só bundyámó ndíŋgirííŋ ka na mbéndɔ́. Mbéndɔ́ ra Mósese na Vahúmíye maró vá Irɔŋgɔ vá tíhíyámó wandá mwané. 22Vá tíhíyámó anáá Irɔŋgɔ a bundyámó vato ndíŋgirííŋ na ŋgɔ́tééná éjé vá tímbámó na Yésusu Kirítu. A eŋgámó naná na wusó wa vato bimé ává vá atɔ́wɔmó Kirítu kó cená e ta ámó na raaté wawó, 23esene éyé bimé vá ma eŋg á wobé kó vá ta geréméná na niimí ná Irɔŋgɔ. 24Vedá naáté yá usi wa otémá waá, Irɔŋgɔ a wó bundyámó ndíŋgirííŋ na sásáá, na ebérááná yá Yésusu Kirítu ójó a wó atámó na nyéŋgé. 25-26Ómwané kójo Irɔŋgɔ a ma ijátá anáá a sowa mabé na miné máa, mabé má ava vá me atɔ́wɔmó. Naná Irɔŋgɔ a ma tíhíyé anáá a ámó táma iŋgimé ndíŋgirííŋ. A ma ríi naná na póná ará a ma menévé vató ka wó pwénísye na wusó wá nyéŋgé ráwó, kó a ámó ndíŋgirííŋ wusí owó esene éyé a diŋgámó anáá a rií ndíŋgiríí índi a wunde obúndyé honó ava vá atɔ́wɔmó Yésusu ndíŋgirííŋ. 27Ye wandá womó wó ámó hée ɔ́wɔ́ wá ovágíté ikiní ɔ́wɔ́? Mbéndɔ́, ka na womó! Na wusó wá até sɔ́? Esené éyé anáá até éyé é ámó mpí é ta ne rií obeerye ówó mbéndɔ́, vedá até éyé é ámó mpí é ámó watɔ́wɔ ówó Yésusu. 28Esené to buŋganámó kó wó ámó vatɔ́ɔ́tɔ́ anáá, moto a búndámó ndíŋgirííŋ na aŋgísó rá Irɔŋgɔ até esene éyé a beeryámó mbéndɔ́, vedá esene éyé a atɔ́wɔmó Yésusu. 29Tetee omójo, Ye Irɔŋgɔ a ámó bɛ́ŋ Irɔŋgɔ wa va Yúdene? Ye a ta ámó honó Irɔŋgɔ wa ava vá ta ámó va Yúdene? Ɛɛŋ, a ámó honó Irɔŋgɔ wa vasɔ́ɔ́ mayɔŋɔ, 30esene éyé Irɔŋgɔ a ámó bɛ́ŋ umwesií, kó ómwané kójo a né bundyámó va Yúdene ndíŋgirííŋ esene éyé vá atɔ́wɔmó Yésusu, sɛ́ɛm ójó a né bundyámó honó mayɔŋɔ amámó ndíŋgirííŋ esene éyé má atɔ́wɔmó Yésusu. 31Kaá táma éjé to atɔ́wɔmó, ye naná wó tírevenámó anáá mbéndɔ́ e ta ne tímbe mpí? Áayé! Naná wó ámó anáá tó me hwámó jiní waá uŋgimé.

Currently Selected:

Roméne 3: tii

Highlight

Copy