Ŋgengéná 6

Vá ijátámó vato báráátó na umweesií anáá vá aká enásá

1Itíndíkáná mwané, táŋgó ra vihoóhóná e katé naátana, kó va Yúdene ává vá katé járá to geréke vá ma késyé ojáréna va Yúdene ává vá ma járá eberéyá vá járá anáá: «Isí yimé, itíndíkáná íjí vá táŋgámó manyá, vá ta timbááná wusi na kúsú íjí na iwónjá rá visó.» 2Kó enásá éjé yábɔ́t na eba e ma wónjééná vihoóhóná bimé, váye nawó anáá: «Wó ta nyemé anáá to tɔɔ woja ówó maró má Irɔŋgɔ esene éyé anáá manyá má otáŋgá. 3Wandá mwáne kówo va mbísó, ijátáno vato báráátó na umweesií na raaté wa vinó ává moto uŋgimé a rukyámó, táásé na Mwáŋ mwáŋ wa Ireréŋgi kó na peyɔ índi to wó hwá manɔnɔwɔ mwané. 4Kaá visó, to né endámó na wusó na ovásoóriye, na voja ówó maró má Irɔŋgɔ.» 5Iwónjá iŋgímé í ma ríi mií na mbuŋgáná mwané, kó vá ma Ijátá Ítyene, moto táásé na ŋgɔ́tééná na Mwáŋ mwáŋ wa Ireréŋgi, wijata hónó Fíripi, Porokóre, Nikanɔ́ɔrɔ, Timóno, Parámenásá, na Nikorása, moto ójó na edɔŋgɔ yá Antiyóso, ómwané a ma atɔ́wɔ́ nyévé ra va Yúdene. 6Vá ma endá nawó na enásá, kó enásá e ma vásóóríyé, o wó táryáana embɔɔ́.

7Maró má Irɔŋgɔ má katé enda na wusó na osasavena, táŋgó ra vihoóhóná e ma ré naátana mbunu na Yerúsareme kó ombunu rá vacekiye mómí o katé atɔ́wɔ Yésusu.

Kambeena ra Ítyene

8Irɔŋgɔ a ma nwíyé Ítyene táásé na ŋguru raá kó na ntá ráa. Kó a katé eŋga mesimbá na mamba má okémbyé na raaté wa noyɔŋɔ. 9Vato vámó vá ma késyé opékáana na Ítyene. Wó katé rií vato ává na yanje yá mbásóóríyé éyé na wusó wá vato ává vá ma ríi mbékí kó vá etá pirí, na vató ává na edɔŋgɔ yá Siréne na edɔŋgɔ yá Arekesandiríya, vato ává na edɔŋgɔ yá Ciricíyá na ava na Asíyá. 10Amó vá ta ma hítí opetaana naá esene éyé Mwáŋ mwáŋ wa Ireréŋgi a ma me hwá peyɔ rá enjárá, 11kó vá ma kusé vato índi vá endá járá anáá: «To mó ová Ítyene a seyá Mósese, a seyá honó Irɔŋgɔ.» 12Naná kówo vá ma nehíyé noyɔŋɔ nimé, vagónó ává na edɔŋgɔ na vayéere vá mbéndɔ́ kó va ma purúmáná Ítyene na ibwiye wenda naá na yanje yá jósi. 13Vá ma enda hónó na va wúsinete vá viváná ává vá katé tiseenye anáá: «Moto ojó a ta tɔwɔ́ ojáréna ówó pandó ra visó éjé mwáŋ mwáŋ na ojáréna ówó mbɛ́ŋdɔ́ ra Mósese. 14To mó ová a járá anáá Yésusu ójó na Nasaráte a né sasonámó pandó ra visó éjé mwáŋ mwáŋ, owunde océndyé ntumu íjí Mósese a ma só yééré.» 15Vato bimé ává na iwónjá rá va rɔ́yá vá katé néména Ítyene kó vá ma ená anáá wusó wáa wó katé rií ámó wusó wá éŋgerese.

Currently Selected:

Ŋgengéná 6: tii

Highlight

Copy