Ŋgengéná 4

Pyéere na Yohánese na aŋgísó rá iwónjá rá rɔ́yá

1Pyéere na Yohánese vá ma ríi vá arɔ́wɔ́ na ojáráana na vato kó vacekiye mómí, ogónó wa vagíré yanje yá Irɔŋgɔ na va Sadusyeéne vá ma kerá berebe nawó. 2Vá katé ová ekáné yá mbésé ámó Pyéere ná Yohánese vá katé yeére vato, vá wó ojána anáá Yésusu a ma honówá na nugwé, naná wó etá anáá vigwé ví hítyámó owundana na esɔ́tɔ́. 3Kó vá ma ambááná Pyéere na Yohánese o wó nɔ́ na mbóó hwɔs ibeesí esene éyé wó ma ríi enéŋgá. 4Ombunu rá vato ává vá ma vátɔ́rɔ́ maró má Irɔŋgɔ vá ma atɔ́wɔ́, kó vá ma ríi vá etá berebe toósini isáánó.

5Mívéri máa, njwé rá va Yúdene, vagónó ává ná edɔŋgɔ na vayéere vá mbéndɔ́ ává vá katé ríi na Yerúsareme vá ma váwójééná. 6Hána ójó ogónó wa acekiye mómí a ma ríi ɔ́wɔ́, na Kayípe, na Yohánese, Arekesándere na toyómó tá vagónó vá vacekiye mómí bimé gwɔ́s. 7Vá ma eŋgá anáá vá wó uréna na Pyéere na Yohánese kó vá ma wo súsé anáá: «Na ŋguru ajaté? Kó hónó na ebérááná yá áné kówo no mó ondóna isúsuúru?» 8Kó Pyéere, táásé na Mwáŋ mwáŋ wa Ireréŋgi a ma járá nawó anáá: 9«Nnjwé rá noyɔŋɔ na vagoó, vá só súsámó cúcáná wusí owó esene éyé to mó éŋga isúsuúru wusi, váye hónó anáá to ojá twiiŋí kówo to mó me ondóna. 10Íjímáno sɔ́ vinó bimé na noyɔŋɔ ná Ísayéere nimé anáá, wó ámó na ŋguru ra ebérááná yá Yésusu Kirítu ójó na Nasaráte, ójó no má ondááná na koroso, kó Irɔŋgɔ a má me honóná na nugwé, na ŋguru raá kówo moto ójó a ténámó na wusó wá vinó omójo a mó ondówa. 11Yésusu a ámó moto ójó va Kárate ává mwáŋ mwáŋ vá ojámó anáá: Itááné éné vinó ává vahaá byanje no ma váráŋgá, kéne nó ma búndé itááné ná otóndó. 12Yésusu moká kójo a hítyámó o só sótyé, esene éyé na cí ra ndono, Irɔŋgɔ a ta ma eréena vato ebérááná índyé éyé to hítyámó osɔ́téna ɔ́wɔ́.»

13Vato ává na iwónjá rá va rɔ́yá vá katé kémbyé esene éyé vá ma ená ámó Pyéere na Yohánese vá ma ré járá na ipití íŋgímé, vá je jembe anáá vá ámó va seese vá vato ává ka na sukúru na ucé, vá je jembe hónó anáá vá ámó na ncámbá ra Yésusu. 14Kó vá katé néména moto ójó vá ma ondóná, a téné berebe nawó, kó vá ta ma timbé wandá wá owundye. 15Vato ává na iwónjá rá va rɔ́yá vá ma járá anáá vá húmyé Pyéere na Yohánese índi vámwané na vámwané vá cáná ováana. 16Vá katé járá vámwané na vámwané anáá: «To né eŋgámó twíiŋi na vato ává? Esené wó ámó vatɔ́ɔ́tɔ́ anáá vá mó éŋga asimbá, vato bimé ává na Yerúsareme vá jémbámó naná kó to ta hítí ovásáŋgá. 17Wó ta geréméná anáá to mice cómó mwané e sárámanda hée mbunu na raaté wa vato, ŋgáno to no wó húmyéna nisó, to wó váyéna mbéndɔ́ anáá vámwané ka ne tɔ́ hée ebérááná yá Yésusu na aŋgísó rá moto.» 18Kó vá ma wundé obéráana Pyéere na Yohánese o wó váyéna mbéndɔ́ anáá vámwané ka ne járá tɔɔ oyeére vato na ebérááná yá Yésusu. 19Kó Pyéere na Yohánese vá ma wó wundíyé anáá: «Vinó maté ojáno até éyé é ámó ndíŋgirííŋ na aŋgísó rá Irɔŋgɔ: Ye o nó ová ówó vinó kee wová ówó Irɔŋgɔ? 20Na até éyé é só néménámó, visó to ta hítí otámbá ka oja até éyé to má ená na até éyé to má ová.» 21Vato vá yanje yá jósi vá ma bámáná hée Pyéere na Yohánese kó vá ma wó mícé ámó vá ta ma ená pé ra o wó pwénísye esene éyé vato bimé vá katé eréena Irɔŋgɔ niimí na wusó wá mamba ámá má katé tómbávena. 22Moto ójó a ma ondówá na asímbá amája a katé timbe otómbá maá mɔ́wɔ́ mááné.

Mbásóóríyé ra vatɔ́wɔ

23Ará vá ma wó micé, kó Pyéere na Yohánese vá ma endá ená va mbérá váwó o wó ojána até yimé éyé vagónó vá vacekiye mómí na vagónó vá edɔŋgɔ vá ma járá nawó. 24Ará vá ma maná ovátɔ́rɔ́ maró mwané, kó bimé otémá omwéesií vá ma késyé ovásoóriyé Irɔŋgɔ vá járá anáá: «Okí, mámó ójó o ma héndá cí, máná, máŋá na motéé mwimé úmú ɔ́wɔ́, 25mámó ójó na ŋguru ra Mwáŋ mwáŋ wa Ireréŋgi o ma váá vipéŋgé iví na uŋgúté rá Dáviti kókó wa visó, moto wɔɔ wa manɔnɔwɔ kó a ma járá anáá:

Na wusó wá até sɔ́ kówo mayɔŋɔ má béresanámó?

Vá tánámó mamba má wéŋga, na sásáá!

26Mahumu ámá na cí má ma heéhéndá vitá

kó njwé í ma váwónjééná

índí vá rií wandá wúmwéesií kaá vá nywáana na Okí, vá nywáana hónó na Ojo a ma tómá.

27Eeŋ, vá ma váwónjééná mwané na oŋgórá ojó, Eróde na Pɔ́ɔŋsɔ Piráta bayete na menɔ́ na mayɔŋɔ má Ísayéere, anáá vá nɔ́ vitá na Yésusu, mwáŋ mwáŋ wa moto wɔɔ wa manɔnɔwɔ ójó o ma tómá. 28Na ŋgeŋgéná mwané, vá ma eŋgá wandá wimé ówó o ma sómbá na póná, wandá wimé ówó o ma diŋgé anáá wo eŋga na ŋguru iŋgimé. 29Kaá tetee ojó, Okí, o só váámó aŋgísó na nótó, kaá índí wo eŋga anáá vato wɔɔ́ vá manɔnɔwɔ vá ojá maró mɔɔ́ na ipitíiŋgímé. 30Tóndíyé ombɔɔ́ rɔɔ́ ukú ójó anáá wondó, mesimbá na mamba má okémbyé mó eŋgávena na ebérááná yá Yésusu mwáŋ mwáŋ wɔɔ wa eŋga manɔnɔwɔ.» 31Ará vá ma maná mbásóóríyé, homó ówó vá ma vawónjééná wó ma vééryé. Kó vámwané bimé vá ma núwé táásé na Mwáŋ mwáŋ wa Ireréŋgi kaá vá ma késyé woja maró má Irɔŋgɔ na ipitíiŋgímé.

Vatɔ́wɔ vá váámó ekúmé ráwó mpuré

32Ncumbí wa vatɔ́wɔ a katé rií wandá wumwéesií na otémá kó na ireréŋgi. Moto omo ójó na raaté wawó a ta ma ré járá anáá: «Wandá owó wó ámó íwáámé!» Vedá vá katé vaána motéé mwáwó mwimé mpuré. 33Enásá e katé tiseenye na ekáné yá ŋguru anáá Okí Yésusu a ma honówá na nugwé, kó Irɔŋgɔ a katé wó tíhíye ekáné yá ntá vámwané bimé. 34Moto na raaté wawó a ta ma ré jámá wandá, esene éyé bimé ává vá katé timbe kondo tɔɔ byanje vá katé sérá wurána na mwení, 35ondo eréena enásá, kó vá katé táŋgáana ámó moto ŋgava éjé e geremenámó na mayátá máa.

36Naná kówo moto omo ójó na noyómó ná Révi, ebérááná anáá Yosévé, obyánávena na ihómá ná Sípere, enásá o me rowa anáá Baranabása ójó a tirevanámó anáá moto ójó a reryámó nótó. 37Moto mwané a ma sérá apúú ráa, wuré na mwení ondo eréena enásá.

Currently Selected:

Ŋgengéná 4: tii

Highlight

Copy