YouVersion Logo
Search Icon

2 Korénte 3

3
Va eŋga manɔnɔwɔ vá mpkámáká ra iretye
1Ye to geremenámó o ne késyé ovátíhíye visó maté na vinó? Ye ó súsámó anáá vato vá tíre va kárate anáá vá só támana anáá to ámó vesi vá vato ámó vasɔ́ɔ́ avámó? Ye visó honó to geremenámó o nó súsé va kárate mwané? 2Kárate wa visó wó ámó vinó maté, a ámó tiré tiré na etémá ra visó, moto uŋgimé a me jembámó kó a me banámó. 3Ɛɛŋ, wó ámó wandá ówó moto a ta hítí opetaana anáá, Kirítu maté a ma tiré kárate mwané, kó visó káva to ma uré naá. A ta ámó tiré tiré na yɔŋgɔ́wɔ, a ámó tiré tiré na Ireréŋgi yá Irɔŋgɔ ójó a hwenámó. A ta ámó tiré tiré na akɔ́kɔ́ rá atááné, vedá a ámó tiré tiré na etémá ra vato éjé e ámó akɔ́kɔ́ rá nótó rawó. 4Na aŋgísó rá Irɔŋgɔ, to timbámó ipitímwané na wusó wá Kirítu. 5Esené to ta buŋgáná anáá na visó maté to timbámó ŋguru ra weŋga ówó wandá, vedá Irɔŋgɔ kójo a ma só hwá ŋguru ra weŋga até éyé to eŋgámó.
6Ómwané kójo a ma eŋga anáá to rií veŋga manɔnɔwɔ vá mkpámáká ra iretye. Iretye mwané é ta ure na mbéndɔ́ éjé vá ma tiré, vedá yó urámó na Mwáŋ mwáŋ wa Ireréŋgi. Mbéndɔ́ éjé tiré tíré yo eréenámó nugwé, vedá Mwáŋ mwáŋ wa Ireréŋgi a eréenámó esɔ́tɔ́. 7Mbéndɔ́ mwané e ma ríi tiré tiré naáté yá itááné, kó Mósese a katé nɔnɔwené mbéndɔ́ mwané éjé yo eréenámó nugwé. Ítɔɔ naná, manɔnɔwɔ mwané má katé me hwá ekáné yá niimí. Kó na wusó wá niimí mwané éné nó katé nanja na móndá raá, vaná vá Ísayéere vá ta ma ré hítí o me néména naáté yá aŋgísó, ndeke niimí mwané no ta ma géremena oriye. 8Vedá manɔnɔwɔ má Mwáŋ mwáŋ wa Ireréŋgi má mó eréenámó niimí éné nó námó caka waŋgá. 9Esené wó a ríi anáá manɔnɔwɔ má mbéndɔ́ ámá má sómbámó ntóró ra nugwé má ma ríi táásé na niimí, kaá manɔnɔwɔ má Mwáŋ mwáŋ wa Ireréŋgi ámá má búndyámó vato ndíŋgirííŋ má eréenámó hée ekáné yá niimí otómbá naná. 10Táma mwané visó ojárá honó anáá niimí éné nó ma nanjá na póná nó ta ámó wandá na wusó wá ekáné yá niimí éné tetee ojó. 11Esené ŋgé motéé úmú mó ta riyé mó ma ríi táásé na niimí, kaá umu mó ríyámó mó ámó hée táásé na niimí otómbá naná. 12Naáté yá ipitímwané, to ámó táásé na wonotó. 13To ta eŋgá ámó Mósese ójó a katé ovábútyé wusó na ekoo yá cunú, ukú ójó anáá vaná vá Ísayéere ka ená mamana má niimí éné ka riye. 14Vedá peyɔ rawó e ma vábéndééná kó hwɔs wusí owó, ará vá bánámó va kárate vá iretye yá póná, ekoo yá cunú mwané yó arɔ́wɔ́. É ta ámó uryérí, yó urúkyámó bɛ́ŋ na wusó wá ojo a ámó ndata na Kirítu. 15Esené hwɔs wusí owó, táma iŋgimé éjé vaná vá Ísayéere vá bánámó va kárate vá Mósese, ekoo yá cunú emó é bwéenámó etémá rawó. 16Vedá táma iŋgimé éjé vató vá búndámó na Okí, ekoo yá cunú yó obámó. 17Esené Okí ará wó ámó Ireréŋgi éyé Mwáŋ mwáŋ, kó táma éjé Ireréŋgi yá Okí é ámó ɔ́wɔ́, wopirí wó ámó ɔ́wɔ́. 18Visó bimé, wusó wá visó wó ta ámó bwébwé na ekoo yá cunú, kó niimí na Okí nó némáanámó na visó ámó na iyéné. Táma mwané, Okí ójó a ámó Ireréŋgi a só céndyámó. A só bundyámó ámó ómwané, na niimí éné nó aŋgámó na waŋgá.

Currently Selected:

2 Korénte 3: tii

Highlight

Share

Copy

None

Want to have your highlights saved across all your devices? Sign up or sign in