Hechos 6

Jesúcã beseriara cʉ̃jãrẽ titamuãnarẽ beserigue

1Tibʉrecorire õpemena pajʉ Israelyabumacãrã Jesúre wedewõwʉmʉãyura. Tairo tiro cʉ̃jãbasurupere came asiasore wayuro. Griegoyemena wederucũrã, hebreoye wederucũrãpere: “Queoro tiheri mʉjã” ĩyura cʉ̃jãyara wapeariara nomiãrẽ cʉ̃jãcã bʉrecoricãrõ yariguere queoro batoheriñerõcã ĩñarã. 2Tairo tira Jesúcã doce beseriara nipetira Jesúre wedewõrãrẽ sio neãpoyura. Topʉ cʉ̃jãrẽ abiro ĩ wedeyura:

—Ʉ̃sãrẽ Manigʉ̃ye maquẽpere wedepitimocã yariguepere batoribasoca niñerõcã ñuheri. 3Tairo tira ʉ̃sãyara, mʉjã Jesúre wedewõrã siete ʉmʉã mʉjã watoa nirãrẽ beseya yarigue batoanarẽ. Ñurẽ tirecʉtirare, masĩrẽ cʉorare, Espíritu Santocã dotirere tirucũrãrẽ beseya. Ʉ̃sã mʉjãcã beseariarare yariguere batoana sonerõãcu. 4Tairo tira ʉ̃sãpe Manigʉ̃rẽ ñubuerucũ cʉ̃ye maquẽ wadore wede buerucũmocãrãcu ―ĩyura.

5Cʉ̃jãcã tairo ĩñerõcã tʉora ĩcãrõmena nipetira “Tairora waro” ĩyura. Tairo tira Esteban wãmecʉtigʉre Jesúre ñurõ wedewõgʉ̃rẽ Espíritu Santocã dotirere tirucũgʉ̃rẽ beseyura. Ãpẽrã: Felipe#6:5 Ãni Felipe Jesúcã beserigʉ niheriwi. Felipe Hechos 1:13pʉ nigʉ̃ Jesúcã beserigʉ ñawĩ., Procoro, Nicanor, Timón, Parmenas, Nicolás niyura. Nicolás Antioquía macʉ̃#6:5 Lucacã atipũrẽ ojarigʉ Antioquía macʉ̃rã niyugʉ. judío basocʉ nihericapeicã judío basocara abirora Manigʉ̃rẽ wedewõgʉ̃ niyugʉ. 6Cʉ̃jãrẽ besetuwa Jesúcã beseriara cʉtiro neãyura. Cʉ̃jãcã nejeañerõcã cʉ̃jãya dʉpopawʉre ñapeo Manigʉ̃rẽ ñubue sãĩbosayura cʉ̃jãcã padedeatere titamuaro ĩrã. 7Jesúcã beseriara Manigʉ̃ye maquẽrẽ wede buewõnoñerõcã nipetiropʉ tie sesayuro. Tairo tira Jerusalénpʉre õpemena pajʉ basoca Jesúre wedewõwʉmʉãyura. Ĩñerõcã pajʉ paiapʉra Jesúre wedewõyura.

Estebanrẽ nirũpãrã cʉtiropʉ ñewʉmʉãrigue

8Esteban Manigʉ̃cã ñurõ tiyogʉ Manigʉ̃cã tutuaremena diarecʉtirare ñujeañerõca tiyugʉ tiwãmerã apeye ñurẽ tiẽñoyugʉ basoca watoapʉre. 9Cʉ̃cã tairo tiñerõcã ĩñarã ĩcãrã judío “Dotiepeyoribasoca Duwiocoyoriaracã Neãporiwi”#6:9 Judío basocacã neãporiwi pecamasãyemena “sinagoga” wãmecʉti. wãmecʉtiriwipʉ neãporibasoca, ãpẽrã judío basoca Cirene macãrã, Alejandría macãrã ĩñerõcã Cilicia dita macãrã, Asia dita macãrã Estebanmena cametuti wederucũsocoyura. 10Estebancã Espíritu Santocã masĩrẽ nʉnirẽmena cʉ̃jãrẽ wederucũñerõcã cʉ̃jãpe cʉ̃rẽ wederucũ apõtĩõheriyura. 11Cʉ̃jã cʉ̃mena wederucũ apõtĩõherinirã yajioropʉ ãpẽrã basocare niyeru wapatiyura ĩritodotira. Abiro ĩdotiyura:

—‘Esteban marĩ ñecʉ̃ Moisécã ojariguere, Manigʉ̃cãrẽ ñañarõ ĩ wederucũrẽrẽ tʉowʉ’#6:11 Moisécã ojarigue Manigʉ̃rẽ ñañarõ wederucũrãnorẽ ʉ̃tãperimena docasĩãdotiyuro (Lv 24:14-16). ĩ basocapʉre wedeya ―ĩyura.

12Cʉ̃jãcã ĩritodotiariguere wedeñerõcã tʉora nipetira basoca, ãpẽrã judío basoca bʉtoa dotira ĩñerõcã Moisécã ojariguere bueribasoca Estebanmena bʉtoro cuayura. Mata cʉ̃rẽ ñe Nirũpãrã Neãporibasoca#6:12 Ãnijã Israelyabumacãrãrẽ nipetira nirũpãrãsotoa nirũpãrã niriara niwã. Cʉ̃jãrã pecamasãyemena Junta Suprema wãmecʉtiyura. Setenta y unojoro niyura nipetira (Lc 22:66). cʉ̃jãcã neãporopʉ neãyura. 13Cʉ̃rẽ topʉ nejea ãpẽrãrẽ abiro ĩritonemodotiyura tamʉ. Tairo tira cʉ̃jã cʉ̃rẽ abiro ĩ wedesãyura:

—Ãni Manigʉ̃wire ñañarõ wederucũwĩ. Moisécã ojariguecãrẽ ñañarõ wederucũwõnowĩ. 14‘Jesús Nazaret macʉ̃ Manigʉ̃wire mʉtõdujiocomocãgʉagawi#6:14 Icãta Jesús: “Manigʉ̃wire mʉtõdujiocogʉda” ĩheriyugʉ (Lc 2:16).; Moisécã marĩrẽ dotire cũriguecãrẽ wasoagʉagawi’ ĩñerõcã tʉoawʉ ―ĩyura.

15Cʉ̃jãcã tairo ĩñerõcã tʉora judío basoca nirũpãrã ĩñerõcã nipetira topʉ duira Estebanrẽ ĩñacora cʉ̃ya wãnimacãrẽ Manigʉ̃rẽ wedecoteribasocʉya wãnimacãrã abiro ñurõ asibateriwãnimacã ĩñayura.

Currently Selected:

Hechos 6: yui

Highlight

Copy