2 Corintios 3

Jesucristocã basocare cametʉore quetire wedewõrẽ

1Ʉ̃sã anorã abiro Manigʉ̃ye quetire “tiritoro manirõrã bue” ĩrã ʉ̃sãbasurupera ʉ̃sãye maquẽrẽna ñurõ wederucũrãmerã ya. Ʉ̃sãbasurupera “ʉ̃sãpʉa queorora bue” ĩheri. Ãpẽrã bueribasoca mʉjã cʉtiro eatosʉguero cʉ̃jãcã bueriarare ĩcãpũpʉ cʉ̃jãcã buerere “tie queorora ña” ĩrẽrẽ ojadotiayura. Tairo tira mʉjã cʉtiro eara tipũrẽ mʉjãrẽ wiyoayura. Mʉjã ʉ̃sãpʉare masĩsia. Tairo tira ʉ̃sã cʉ̃jãrã abiro mʉjãrẽ tipũnorẽ ticoheri. Tairora aperopʉ buera waradaracã mʉjãrẽ tipũnorẽ ojabosañerõcãcãrẽ boheri.#Hch 18:27; 2Co 5:12; 12:11. 2Merẽ ʉ̃sãpʉare mʉjãrã nimocãrã ya “cʉ̃jã Manigʉ̃yere ñurõ buewa” ĩripũnorã abiro nirã. Mʉjã ʉ̃sãcã Jesucristoye quetire bueñerõcã tʉora cʉ̃rẽ wedewõwʉ̃, cʉ̃yere tisocowʉ. Basocape ʉ̃sãcã bueariarora abirora mʉjãcã tirecʉtiñerõcã ĩñarã, ʉ̃sãye maquẽrẽ ĩcãpũpʉ ojayoariguere bue, masĩrõno tira mʉjãcã tiremenarã ʉ̃sãrẽ “cʉ̃jã queorora buewa” ĩ masĩwã. Tairo tira ʉ̃sãpecãrẽ mʉjãrã tipũnorã abiro ʉ̃sãye yeripũnarĩpʉra “cʉ̃jã queorora Jesucristore wedewõwã, cʉ̃yere queorora tiquetatuwa” ĩ ʉ̃sãcã cʉoyorara nirã ya.#1Co 9:2. 3Jesucristoyere ʉ̃sãcã mʉjãrẽ wederosiro cʉ̃basurupera mʉjãrẽ cʉ̃rẽ wedewõrã eañerõcã ti, cʉ̃yere tiquetatura nirã eañerõcã tirigʉ niwĩ. Tairo tira mʉjã ĩcãpũ Jesucristocã cʉ̃basurupera ojayoriapũrã nirã ya. Mʉjã Jesucristobasurupera ojariapũrã abiro nirã tipũrẽ wederora abiro mʉjãcã cʉ̃yere tiremena merĩãwãmepe nirẽcʉtira earemenarã mʉjã basocare nirõrã cʉ̃yara nirẽrẽ masĩrã eañerõcã ya. Mʉjã cʉ̃basurupera ojayoriapũ nirãrẽ paperapũrẽ ojarigʉnomena ojaheririgʉ niwĩ; tairora Manigʉ̃cã cʉ̃ye dotirere Moisére cũriguere ʉ̃tãpĩpʉ ojayoriarora abiro tiheririgʉ niwĩ. Buripe doca mʉjãrẽ mʉjãye yeripũnarĩpʉpere Manigʉ̃ catirucũgʉ̃ya Espíritu Santomenape ojayoripũrã abiro nirã eañerõcã tirigʉ niwĩ. Tairo tiro tipũ, ĩña bueĩñarugarare nipetira ĩñacoropʉ nirõ ya.#Sal 40:8; Jer 31:33; Ez 11:19; 36:26; Heb 10:16. 4Jesucristocã titamurẽmena ʉ̃sã Manigʉ̃cã ĩñacorore ano ʉ̃sãcã wederere “tie queorora ña” ĩmasĩjomocã.#Ef 3:12. 5Ʉ̃sã ʉ̃sãbasurupe timasĩrẽrẽ icãta cʉoheri “Manigʉ̃cã ʉmʉãwesepʉ cʉ̃yarare dotirere sesawʉmʉãñerõcã tirara ya” ĩmasĩrã eabora. Buripe Manigʉ̃basurupepʉra ñawĩ ʉ̃sãrẽ cʉ̃yere padedemasĩrĩbasoca nirã eañerõcã tigʉ.#Jn 15:5; 1Co 3:5; 15:10; 2Co 2:16. 6Tairo tigʉ ʉ̃sãrẽ cʉ̃ Manigʉ̃rã cʉ̃cã mama wãmepe basocare “mʉjãrẽ ñurõ tigʉda” ĩriguere queoro buemasĩrã nirã eañerõcã yawí. Atie sʉgueropʉ Manigʉ̃cã Moisére cʉ̃ye dotirere ojacũriguera abiro niheri. Buripe Manigʉ̃cã Espíritu Santomenape mama catire nʉnirẽpe ña. Merẽ dotire bʉcʉniguẽ basocare buripe cõwõãna niñerõcã tiriaro niwʉ̃ tiecã dotiriwãmerã yʉcũtimasĩhera niriasiro niñerõcã. Mama wãmepe Manigʉ̃cã Espíritu Santore nʉnirẽmenape catire petiherere cʉomasĩrã nirã eañerõcã ya.#Mt 26:28; Jn 6:63; Ro 2:27, 29; 7:6; Ga 3:10; Heb 8:6, 8. 7Manigʉ̃cã “abiro tigʉda” ĩrigue bʉcʉniguẽ cʉ̃cã Moisérẽ ʉ̃tãpĩrĩpʉ oja dotire nʉnirigue, basocare tiecã dotiriwãmerã queoro tipetiheremena cõwõãrẽ wado neãtiriguemañu ñucametʉariwãme, Manigʉ̃ cʉ̃ye asibateremena Moisére tie dotirere wiyogʉ tirigue paca niriaro niwʉ̃. Tairo wañerõcã israelyabumacãrã Manigʉ̃ye asibatere Moisépʉre asidocaturiasiro niñerõcã cʉ̃jã cʉ̃ya wãnimacãrẽ capemoyora ĩñadocatumasĩheririara niwã, tiecã nocãrõgãmerã petiduiwate nicapetacã.#Ex 24:12; 31:18; 34:1, 28-35; Ro 7:5; Ga 3:21. 8¡Atiejoromañu anorã abiro wariasiro niñerõcã Manigʉ̃cã mama wãmepe basocare “mʉjãrẽ ñurõ tigʉda” ĩriguere wederemena Espíritu Santocã basocapʉre nirẽ eare doca nocãrõ ñucametʉaro asibateriwãmemenape biro eamasĩheriroagari!#Ga 3:5. 9O aperore Manigʉ̃cã Moisérẽ ʉ̃tãpĩrĩpʉ oja dotire nʉnirigue, basocare tiecã dotiriwãmerã queoro tipetiheremena cõwõãrẽ wado neãtiriguemañu, ñucametʉaro Manigʉ̃ye asibateremena eariasiro niñerõcã ¡nocãrõ tiesotoape Manigʉ̃cã Jesucristore tiriguemenape marĩrẽ “mʉjã ñurã wapa cʉohera pʉtʉa” ĩrẽpe ñucametʉare nirõ eamasĩrõãgari!#Dt 27:26; Ro 1:17; 3:21-22. 10Tairo tiro Manigʉ̃cã mama wãmepe basocare “mʉjãrẽ ñurõ tigʉda” ĩriguemenape cʉ̃cã tiriguere ñurõ ĩñañerõcã cʉ̃cã “abiro tigʉda” ĩrigue bʉcʉniguẽ ñucametʉare niriguesotoape ñucametʉanʉcãrẽ bi. 11Tie dotire cũyoriguecã nocãrõgãmerã petiduiwatemañu ñucametʉaro asibateremena wariasiro niñerõcã tairo nirucũãte mama wãmepe basocare mʉjãrẽ “ñurõ tigʉda” ĩrigue doca atiesotoape ñucametʉanʉcãrõ asibateremena nirõ eañerõcã timasĩrõãcu. 12Manigʉ̃cã mama wãmepe basocare “mʉjãrẽ ñurõ tigʉda” ĩriguere petiheriaterena tairora biroacu ĩmasĩnirãrã ʉ̃sã atie maquẽrẽ tocãrõjoro tutuaromena wede.#2Co 7:4; Ef 6:19. 13Ʉ̃sã tiere wedera Moisécã cʉ̃ya wãnimacãrẽ ñucametʉare asibatere warigue petiduiwarere Israelyabumacãrãrẽ ĩñarĩ ĩgʉ̃ cʉ̃cã suticaseromena acutariarora abiro tiheri.#Ex 34:29-35. 14Tocawatoapʉre Israelyabumacãrã Manigʉ̃cã Moisére cʉ̃ye dotire cũrẽmena cʉ̃cã tirugariguere icãta tʉomasĩheririara niwã. Tairora marĩcʉoropʉcãrẽ Moisécã acutariacaserora abiro cʉ̃jãpʉre acutaricasero nirucũñerõcãrã bʉcʉ dotirere buera icãta tʉomasĩheriwa. Tairo binirã ticaserore necõãyoherinirã cametʉore maquẽrẽ icãta tʉomasĩheriwa. Manigʉ̃ wadora ti acutaricaserore necõãmasĩwĩ Jesucristore wedewõrã earemena wadora.#Ro 11:7. 15Atibʉrecopʉcãrẽ cʉ̃jã Moisécã ojariguere bueñerõcã tʉora icãta tʉomasĩheriwa. Cʉ̃jãcã tʉomasĩborere ĩcã suticaseromena acutayoariarara abiro nimocãwã. 16Buri ĩcʉ̃no atiere tʉomasĩgʉ̃ eamasĩwĩ Jesucristoyagʉ nigʉ̃ eagʉ wadora. Tairo tigʉ cʉ̃ sua cʉ̃cã tairo tiremena cʉ̃ye tʉomasĩrẽrẽ cʉ̃rẽ tʉomasĩdotiheriñerõcã tiro acutariacaserore necõãyogʉra abiro pʉtʉagʉ eagʉ yawí.#Ex 34:34; Ro 11:23-26. 17Merẽ Nirũpʉ̃ Jesucristo Espíritu Santora nigʉ̃ yawí. Espíritu Santocã nirõre dotire doca niriarora abiro niñerõcã tiheri.#Is 61:1-2; Jn 8:32; Hch 16:6-7; 1Co 15:45; Ro 8:2, 9-10; Ga 2:20. 18Tairo tira marĩ nipetira marĩya wãnimacãrẽ acutariacaserore necõãyoriara ninirã eñorõrã abiro Nirũpʉ̃cã ñucametʉaro asibaterere eñomasĩrãrã nirã ya. Ĩñerõcã cʉ̃cã nirĩwãmerã abirora marĩcã õpẽmena cʉ̃rã abirora niwʉmʉãrã ya; merẽ marĩ cʉ̃ye ñucametʉarerena nemorõpe cʉowʉmʉãrã ya. Marĩ tiere tairo ya Nirũpʉ̃ya Espíritu Santo marĩpʉre nigʉ̃cã marĩrẽ titamumasĩrẽmena.#1Co 13:12; 2Co 4:4, 6; Ro 8:29; Ga 4:19; 1Jn 3:2; Jn 17:5; Heb 1:3.

Currently Selected:

2 Corintios 3: yui

Highlight

Copy