1 Corintios 13

Diamacã maquẽ maĩrẽ

1Marĩ, atibʉreco macãrã nipetirayere wederucũriʉserire wederucũmasĩcaperacãrã, Manigʉ̃rẽ wedecoteribasocaye wederucũriʉsericãrẽ wederucũmasĩcaperacãrã ãpẽrãrẽ came maĩrẽrẽ cʉohera niñerõcã marĩcã wederucũrẽ icãta wapamani. Marĩcã wederucũrẽ cõmetire pañerõcã bʉsʉrora abiro o campana cadariganiãrõrẽ pañerõcã ñañarõ bʉsʉrora abiro bʉsʉga. 2Ãpẽrãrẽ came maĩrẽrẽ cʉohera nicaperacãrã marĩcã Manigʉ̃cã wededotirere wedere ĩñerõcã cʉ̃yere sʉgueropʉ masĩñamaniriguere ñurõ tʉomasĩrẽ cʉore earecã icãta wapamani. Manigʉ̃rẽ marĩcã wedewõrẽ cʉoremenarã burore aperopʉ wamasĩñerõcã tirecã tairora icãta wapamani marĩcã ãpẽrãrẽ came maĩrẽrẽ cʉohera niñerõcãrã.#Mt 7:22; 17:20; 21:21; 1Co 12:9; 14:1. 3Ãpẽrãrẽ maĩrẽ cʉohericaperacãrã bopacaribasocare nipetire marĩcã cʉorere nʉnirẽ icãta wapamani. Manigʉ̃ marĩrẽ “mʉjã tiere tira ñurõ tira tiwʉ” ĩherigawi. Tairora marĩcã ãpẽrãrẽ maĩrẽ cʉohera niñerõcãrã Manigʉ̃yere tire wapamenarã cʉ̃rẽ ĩñamasĩheracã marĩya ũpʉ̃rĩrẽ catirerena soeñerõcã “cʉ̃jãrẽ titamurã tairo ya” ĩrẽcã icãta wapamani. Manigʉ̃ marĩrẽ “mʉjã ñurõ tira tairo tiwʉ” ĩherigawi.#Mt 6:2; Flp 2:16.

4Marĩ ãpẽrãrẽ came maĩrẽrẽ cʉora cʉ̃jãmenarẽ nipetirepʉrena nʉcãpetimocãrãrã ĩñerõcã ĩñamaĩrẽcãrẽ cʉomasĩrãrã nirã ya. Marĩ ãpẽrãrẽ came maĩrẽrẽ cʉora cʉ̃jãrẽ ĩñatutihera nirã ya. “Cʉ̃jãsotoape nirã ña” ĩhera nirã ya. “Cʉ̃jãsotoape masĩcametʉanʉcãrã ña” ĩhera nirã ya.#Pr 10:12; 1Pe 4:8. 5Marĩ ãpẽrãrẽ came maĩrẽ cʉora ñañarĩwãme ĩheriboriwãmepe wederucũheri. Tairora marĩye wado niãte wadorena amaheri. Matara noboremenarã cʉaboyera niheri. Tairora cʉ̃jãmenarẽ yoariwatoa cua tʉoiñarucũrã niheri.#1Co 10:24; 2Co 5:19; Flp 2:4. 6Marĩ ãpẽrãrẽ maĩrẽ cʉora cʉ̃jãcã ñañarẽrẽ diamacã maquẽ niherepere tiñerõcã ĩñarã ʉseaheri. Cʉ̃jãcã ñurẽrẽ diamacã maquẽ nirẽpere tiñerõcã doca ĩñarãpe ʉsea.#2Jn4. 7Marĩ ãpẽrãrẽ maĩrẽ cʉora cʉ̃jãcã marĩrẽ ñañarĩwãme ticapetacarã marĩpe maĩrucũmocã. Marĩmena cʉ̃jãrẽ dicawatirugañerõcã bohera marĩ cʉ̃jãrẽ “ñurõ tira yawa” ĩ wãcũrẽ cʉorugarucũrã nirã ya. Marĩ cʉ̃jãrẽ “apewatoa tira tosiropʉre ñurẽpere tira earoagawa” ĩ wãcũnirã tairo ya. Marĩ cʉ̃jãrẽ icãta maĩduheri.#Ro 15:1; 1Co 9:12. 8Marĩcã ãpẽrãrẽ came maĩrẽ cʉore dibʉreconope icãta petiro eaheriga. Buri Manigʉ̃ cʉ̃yere wededotirere docare ĩcãbʉreco tiere wededuñerõcã tigʉ tiere petiañerõcã tigʉagawi. Tairora basocaburicã wederucũriʉserire wederucũmasĩrẽcãrẽ tʉoyamaniñerõcã tigʉ petiañerõcã tigʉagawi. Manigʉ̃yere ñurõ tʉomasĩrẽmena wedemasĩrẽrẽ cʉore eariguecãrẽ petiañerõcã tigʉagawi.#13:1-2. 9Marĩcʉorore marĩcʉ̃ Manigʉ̃yere marĩcã masĩrẽ cʉore nirĩwãmejoro niheri. Manigʉ̃cã marĩrẽ wededotirere wedecaperacãrã nirĩwãmejoro wedeheri marĩcʉ̃.#1Co 8:2; Ro 11:33-36. 10Buri siropʉ Jesucristo Manigʉ̃yere masĩpetigʉcã watiriwatoapʉ doca nipetirere queoro nirĩwãmejoro masĩrã earoacu; tiere tʉomasĩheriga ĩheriga sua. Queoro niheririgue ditipetiasuroacu. 11Yʉ wĩmagʉ̃ nigʉ̃pʉ wĩmarãcã queoro wãcũrõ manirõ wederucũrõrã abiro wederucũgʉ̃, cʉ̃jãcã wãcũrõrã abiro wãcũgʉ̃, cʉ̃jãcã tʉomasĩrõrã abiro tʉomasĩgʉ̃ nicucũwʉ̃. Buri bʉtituajea bʉcʉ nigʉ̃ eagʉ yʉcã wĩmagʉ̃rã abiro nigʉ̃ tirecʉtiriguere tinemogʉ̃ eaheriwʉ tiere cõãpetimocãwʉ̃. 12Tairora marĩ anocawatoare ñurõ tʉomasĩheri. Ẽñorõ bʉcʉro ñurõ baututuaheroniãrõmena marĩcã baurere ĩñañerõcã ñurõ ĩñamasĩña manirõrã abiro marĩ Manigʉ̃rẽ ñurõ nirĩwãmejoro ĩñamasĩrã eaheri marĩcʉ̃. Buri sirosãñurõ nipetirecã queoro nirĩwãmerã pʉtʉaro eariwatoamena Manigʉ̃rẽ ñurõ baunirõpʉ cʉ̃mena apõtĩõnʉcãjearara abiro cʉ̃rẽ ĩñamasĩrã earoacu. Marĩcʉorore marĩcʉ̃ marĩcã cʉ̃rẽ ĩñamasĩrẽ eare nipetirepʉ nirĩwãmejoro niheri. Buri ĩcãbʉreco nipetirecã queoro nirĩwãmerã pʉtʉaro eariwatoamena cʉ̃rẽ nirĩwãmerã ñucametʉaro ĩñamasĩpeti ĩñamasĩrã earoacu cʉ̃cã marĩrẽ ñucametʉariwãme ĩñamasĩrucũrõrã abiro.#Gn 32:30; Nm 12:8; 1Co 8:3; 2Co 5:7; Flp 3:12; 1Jn 3:2; Stg 1:23. 13Anorẽ itia wãme ña ñucametʉare icãta petiheriate: Manigʉ̃rẽ wedewõrẽ cʉore “Manigʉ̃ marĩrẽ ñurõ tigʉagawi” ĩ ʉseayuerucũrẽ ĩñerõcã ãpẽrãrẽ maĩrẽ cʉore. Atie itia wãme watoare bʉtoro wapacʉtiro nicametʉanʉcãrõ ãpẽrãrẽ maĩrẽ cʉorera ña.#1Co 16:14; 1Jn 4:8, 10, 16-18; Jn 13:34-35; Ro 5:1-5; Col 1:4-5; 1Ts 1:3; 5:8; 2Ts 1:3-4.

Currently Selected:

1 Corintios 13: yui

Highlight

Copy