Xa̱bo̱ ebréo̱ 7
7
Rí nithán ga̱jma̱á numuu Melkisedék
1Melkisedék ninindxu̱u̱ thúngaa ná xuajen Salém, jamí dxakuiin máꞌ Ana̱ꞌlóꞌ Mikhuíí ñajuu̱n. Ni̱ꞌkhe̱e̱ gátsijnuu̱ Abraám nákhí rí na̱ꞌkha̱a ni̱ꞌngo̱o̱ ni̱tsa̱ñu̱u̱ꞌ gajmíí thúngaa, jamí neꞌne-tsakun-rámaa̱. 2Jamí Abraám nixnúu Melkisedék mbóó rí mbámbá gu̱wa̱ꞌ kíxnuu rí mbá xúgíí rí ni̱grui̱gú-jáꞌñúu̱ thúngaa. Rí mbiꞌyuu Melkisedék phú ginii jayu nandoo gáꞌthán ne̱, «Thúngaa tsí májáan», jamí xúꞌkhue̱n máꞌ mangaa «Thúngaa drígo̱o̱ Salém». Rúꞌkhue̱n nandoo gáꞌthán «Thúngaa tsí naꞌne rí ma̱ju̱wá tsímáá xa̱bo̱». 3Nimbáa tsíꞌyoo tsáa ñajuun tátée̱ ni máꞌ tsáa ñajuun nánée̱ ni máꞌ tsíin ñajúún táta̱-xi̱ꞌñúu̱ wajyúú. Ni tsiánguá nguáná ni̱gu̱maa̱ ni máꞌ na̱nguá nikujma xí nijáñuu̱. Kajngó asndo xómá A̱dée Ana̱ꞌlóꞌ jaꞌnii̱ rí jámuu ñajuu̱n dxakuun.
4A̱gu̱ya̱álaꞌ rí maphú gíꞌdoo numuu xa̱bo̱ tsíge̱ꞌ, rí asndo jmína̱a̱ꞌ máꞌ táta̱-xi̱ꞌñálóꞌ Abraám nixnúu̱ mbóó rí mbámbá gu̱wa̱ꞌ kíxnuu rí ni̱grui̱gú-jáꞌñúu̱ xa̱bo̱ sia̱nꞌ. 5Gakon máꞌ rí i̱ji̱in Lebí, tsí ñajúún dxakuun, guáꞌdáa̱ xtángoo rí mu̱dri̱guíi̱ mbóó rí mbámbá gu̱wa̱ꞌ kíxnuu rí gíꞌdoo mbámbáa xa̱bo̱ xuajen, tsí a̱nguíi̱n máꞌ, maske máꞌ i̱ji̱in Abraám ñajúún tsíge̱ꞌ mangiin. 6Xómáꞌ Melkisedék, maske máꞌ ra̱ꞌkháa xa̱bo̱ ri̱jyu̱u̱ꞌ Lebí ñajuu̱n, ni̱grui̱gíi̱ tsiakhe̱ mbóó rí mbámbá gu̱wa̱ꞌ kíxnuu rí nixná Abraám. A̱ꞌkhue̱n neꞌne-tsakun-rámaa̱ tsí nixuda-mina̱ꞌ Ana̱ꞌlóꞌ ga̱jma̱á nindxu̱u̱. 7Mbá xúgiáanꞌlóꞌ nduꞌyáá rí xa̱bo̱ tsí i̱tha̱án gíꞌdoo numuu naꞌne-tsakun-rámaa̱ xa̱bo̱ tsí na̱nguá gíꞌdoo guéño numuu. 8Gakon máꞌ rí xúge̱ꞌ nu̱drígú mbóó rí mbámbá gu̱wa̱ꞌ kíxnuu xa̱bi̱i Lebí, xa̱bo̱ numbaa tsí wéje̱ rí ma̱ja̱ñúú. Xómáꞌ nákhí xúꞌkhue̱n, ni̱grui̱gú ne̱ Melkisedék, tsí nithán numuu rí xtáa ndaꞌya asndo xúge̱ꞌ. 9Maske máꞌ xa̱bi̱i Lebí nu̱drígú mbóó rí mbámbá gu̱wa̱ꞌ kíxnuu rí xúge̱ꞌ, ma̱goo mu̱ꞌthánlóꞌ rí mangii̱n máꞌ nixnáa̱ Melkisedék mbóó rí mbámbá gu̱wa̱ꞌ kíxnuu ga̱jma̱á majñu̱u̱ Abraám. 10Numuu rí júwe̱e̱ꞌ máꞌ ná awúun ri̱jyu̱u̱ꞌ táta̱-xi̱ꞌñúu̱ nákhí rí Melkisedék ni̱ꞌkha̱ gátsijnuu Abraám.
Mbríguii Jesús ga̱jma̱á Melkisedék
11Ana̱ꞌlóꞌ nixnúú xtángoo xa̱bo̱ Israél. Jamí ná xtángoo naꞌthán rí xa̱bo̱ tsí juya̱ iꞌdiuu Lebí ma̱nindxúu̱n dxakuun, xómáꞌ ikhii̱n táꞌngúu̱n gúni̱i̱ rí ma̱ꞌne káxi̱in xa̱bo̱. Ikhaa jngó ndiꞌyóo rí ma̱ꞌkha̱ i̱mba̱a̱ꞌ dxakuun tsí na̱nguá mbríguii ga̱jma̱á Aarón, rí mbáa tsí mbríguii ga̱jma̱á Melkisedék. 12Xí i̱mba̱ inii dxakuun ñajuun tsíge̱ꞌ, ndaꞌyóo rí ma̱xtiꞌkhu̱u xtángoo mangaa xúꞌkhue̱n rá. 13Jamí tsí nithán numuu ríge̱ꞌ, ná i̱mba̱ guꞌwíin xa̱bo̱ ni̱ꞌkhe̱e̱, ná tájanáá nimbáa maxnáxe̱ tsi̱gi̱jña̱ꞌ ná ja̱rngo̱xe̱ itsí. 14Numuu rí nduꞌyáá máꞌ májánlóꞌ rí Tátiálóꞌ Jesús ni̱ꞌkha̱ ná mbá guꞌwíin xa̱bi̱i Judá, jamí nda̱a̱ nitháan rí niꞌthán Moisés ga̱jma̱á numúú dxakuun ná ri̱jyu̱u̱ꞌ xa̱bo̱ tsíge̱ꞌ.
15Jamí i̱wa̱á máꞌ nduꞌyáá gúkuálóꞌ rí i̱mba̱ inii dxakuun ñajuun Jesús, xí xómá Melkisedék jaꞌnii̱. 16Numuu rí ikhaa̱ tági̱ꞌi̱i̱ ga̱jma̱á majñu̱u̱ xtángoo rí naꞌthán rí i̱ji̱in Lebí ma̱nindxu̱ún dxakuun, rí ni̱gi̱ꞌi̱i̱ ga̱jma̱á majñu̱u̱ ski̱yu̱u̱ꞌ mbiꞌyuu̱ rí xtáa̱ jámuu. 17Ga̱jma̱á numuu̱ ikhaa̱ naꞌthán ajngáa rawuun Ana̱ꞌlóꞌ ríge̱ꞌ:
«Ikháánꞌ jámuu ñajwaanꞌ dxakuun,
xómá ninindxu̱u̱ Melkisedék».#7.17 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 110.4.
18Ikhaa jngó, nánguá máꞌ gíꞌdoo numuu xtángoo rí ginii, numuu rí nda̱a̱ ski̱yu̱u̱ꞌ ne̱ ni máꞌ tsíꞌngo̱o̱ ne̱, 19numuu rí nitháan táꞌngo̱o̱ ne̱ gáꞌne-káxi̱in xa̱bo̱. Ikhaa jngó ríga̱ i̱mba̱ rí i̱tha̱án máján guáꞌthi̱ín ikháánꞌlóꞌ ga̱jma̱á mbá jañii a̱kia̱nꞌlóꞌ, ga̱jma̱á majñu̱u̱ rúꞌkhue̱n nu̱xu̱ꞌmá-mijnálóꞌ ná inuu Ana̱ꞌlóꞌ.
20Jamí Ana̱ꞌlóꞌ nixuda-mina̱ꞌ ga̱jma̱á numuu ríge̱ꞌ mangaa. 21Numuu rí tsí i̱ꞌwíin, tánindxúu̱n dxakuun ga̱jma̱á majñu̱u̱ rí nixuda-mina̱ꞌ Ana̱ꞌlóꞌ. Xómáꞌ tsíge̱ꞌ ninindxu̱u̱ dxakuun ga̱jma̱á majñu̱u̱ ajngáa ríge̱ꞌ:
«Nixuda-mina̱ꞌ Táta̱,
jamí ma̱xáthanga̱a a̱kuii̱n:
“Ikháánꞌ jámuu ñajwaanꞌ dxakuun,
xómá ninindxu̱u̱ Melkisedék”».#7.21 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «xómá ninindxu̱u̱ Melkisedék». Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 110.4.
22Ikhaa jngó, Jesús ninindxu̱u̱ tsí ma̱ꞌne-mbánuu mbá awan rí i̱tha̱án máján.
23Tsí i̱ꞌwíin dxakuun maphú mbaꞌii̱n ni̱ka̱-raꞌne, numuu rí nimbáa tsí ikhii̱n na̱nguá xtáa jámuu. 24Xómáꞌ Jesús jámuu xtáa̱, ikhaa jngó tsíyoo rí ma̱xtiꞌkhuii̱, numuu rí ikhaa̱ jámuu ñajuu̱n dxakuun. 25Jamí gíꞌdoo̱ tsiakhe̱ mangaa rí ma̱ꞌne-jáwíi̱n jámuu tsí nu̱xu̱ꞌmá-mijná ná inuu Ana̱ꞌlóꞌ ga̱jma̱á majñu̱u̱ ikhaa̱, numuu rí ndaꞌyee̱ jámuu kajngó maꞌthán-jáñuu̱ Ana̱ꞌlóꞌ ga̱jma̱á numúú tsúꞌkhue̱n.
26Numuu rí Jesús ñajuun tsí jayá idxu̱ún dxakuun tsí phú ndaꞌyálóꞌ. Ikhaa̱ jaꞌwii̱, nda̱a̱ aꞌkhúu̱n, nda̱a̱ rí xkawe̱ꞌ ná a̱kuii̱n, tsíꞌnii̱ rí nune̱ xa̱bo̱ tsí nune̱ aꞌkhán, jamí i̱tha̱án tsída̱ꞌ xtáa̱ ná inuu mbá xúgíí mikhu. 27Jamí tsíꞌyóo̱ rí tsitsíí maxnáxii̱n xu̱kú tsí nijáñúú ga̱jma̱á numuu aꞌkhúu̱n ikhaa̱ ginii, jamí nda̱wa̱á ga̱jma̱á numuu aꞌkhúún xa̱bo̱ xuajen, xómá ene̱ i̱ꞌwíin tsí juya̱ idxu̱ún dxakuun. Numuu rí Jesús mbóó miꞌtsú nixnáxi̱i̱ tsi̱gi̱jña̱ꞌ jamí jámuu gíꞌdoo numuu ne̱ numuu rí jmína̱a̱ꞌ máꞌ nixnáxe̱-mine̱e̱ꞌ. 28Numuu rí xtángoo drígo̱o̱ Moisés naskuíji̱in xa̱bo̱ numbaa tsí na̱nguá káxi̱in rí ma̱nindxu̱ún tsí juya̱ idxu̱ún dxakuun, xómáꞌ ajngáa rí nixuda-mina̱ꞌ Ana̱ꞌlóꞌ rá, rí ni̱ꞌkha̱ nda̱wa̱á, niꞌgíi̱ A̱dée Ana̱ꞌlóꞌ tsí jámuu ni̱gu̱ma-káxi̱i̱ rí ma̱nindxu̱u̱ tsí jayá idxu̱ún dxakuun.
Currently Selected:
Xa̱bo̱ ebréo̱ 7: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
