1 Juáán 1
1
Ajngáa tsí naꞌne rí ma̱ju̱wá mbá jámuu xa̱bo̱
1Nu̱tha̱nxo̱ꞌ rí mu̱dxawíínlaꞌ ga̱jma̱á numuu tsí xtáa máꞌ asndo nákhí ginii jayu, tsí ni̱dxawíínxo̱ꞌ, tsí ndi̱ya̱áxo̱ꞌ ga̱jma̱á idaxo̱ꞌ, tsí ni̱ya̱xi̱íxo̱ꞌ, jamí asndo ni̱xkajmaaxo̱ꞌ ga̱jma̱á ñawánxo̱ꞌ. Ikhaa tsíge̱ꞌ ñajuun Ajngáa tsí naꞌne rí ma̱ju̱wá mbá jámuu xa̱bo̱. 2Tsúꞌkhue̱n nisngájma-mina̱ꞌ jamí ikháanꞌ ndi̱yáaxo̱ꞌ, ikhaa jngó nu̱tha̱nxo̱ꞌ rí gakon nikujmaa̱, xúꞌkhue̱n máꞌ nu̱tha̱n-ráꞌalaꞌxo̱ꞌ rí ma̱goo ma̱juwalaꞌ mbá jámuu. Ikhaa̱ xtáa̱ jayu ga̱jmáa̱ Ana̱ꞌlóꞌ Mikhuíí, jamí nisngájma-mine̱e̱ꞌ ná inaxo̱ꞌ. 3Rí ndi̱ya̱áxo̱ꞌ ga̱jma̱á rí ni̱dxawíínxo̱ꞌ, ikhaa rúꞌkhue̱n nu̱tha̱nxo̱ꞌ rí mu̱dxawíínlaꞌ, kajngó mangáanꞌlaꞌ mbóó gámbáxa̱ꞌlaꞌ ga̱jma̱á nindxa̱ꞌxo̱ꞌ, xómá rí ikháanꞌxo̱ꞌ nambáxa̱ꞌxo̱ꞌ gajmiáxo̱ꞌ Ana̱ꞌlóꞌ Mikhuíí, xúꞌkhue̱n máꞌ ga̱jma̱á nindxu̱u̱ Jesukrísto̱, tsí A̱dée̱ máꞌ ikhaa̱. 4Nu̱tháánxo̱ꞌ i̱yi̱i̱ꞌ ríge̱ꞌ ma̱ꞌga inalaꞌ kajngó ma̱ꞌne káxe̱ rí gagi a̱kia̱nꞌlaꞌ.#1.4 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «gagi a̱kia̱nꞌlóꞌ».
Ana̱ꞌlóꞌ naꞌne mba̱a̱ a̱kui̱in jaꞌyoo aꞌkhánlóꞌ
5Ríge̱ꞌ ñajuun ajngóo Jesukrísto̱ rí ni̱dxawíínxo̱ꞌ rí niꞌthée̱n, jamí nu̱tha̱nxo̱ꞌ ne̱ rí mu̱dxawíínlaꞌ: Ana̱ꞌlóꞌ Mikhuíí ñajuun agu rí nambiꞌi taꞌa, jamí nda̱a̱ nitháan rí mijína ná inuu̱ ikhaa̱. 6Xí nuꞌthánlóꞌ rí nambáxa̱ꞌlóꞌ gajmiálóꞌ Ana̱ꞌlóꞌ, jamí xóó ngriga̱ꞌlóꞌ ná mijína, a̱ꞌkhue̱n rí nu̱ꞌne̱-nduwalóꞌ, jamí na̱nguá juwalóꞌ nu̱ꞌne̱ rí gakon. 7Xúꞌkhue̱n máꞌ xí ngriga̱ꞌlóꞌ ná nambiꞌi agu, xómá rí Ana̱ꞌlóꞌ Mikhuíí xtáa ná nambiꞌi agu, a̱ꞌkhue̱n rí nambáxa̱ꞌlóꞌ gajmiálóꞌ a̱ngia̱nꞌlóꞌ jamí ga̱jma̱á majñu̱u̱ iꞌdiuu Jesukrísto̱, Ana̱ꞌlóꞌ naꞌne mba̱a̱ a̱kui̱in jaꞌyoo mbá xúgíí aꞌkhánlóꞌ.
8Xí nuꞌthánlóꞌ rí na̱nguá guaꞌdáálóꞌ aꞌkhán, nu̱ꞌne̱-nduwa-mijná máꞌ ikháánꞌlóꞌ, jamí na̱nguá ríga̱ rí gakon ná awúun a̱kia̱nꞌlóꞌ. 9Xúꞌkhue̱n máꞌ xí nu̱ꞌne̱-maphú aꞌkhánlóꞌ ná inuu Ana̱ꞌlóꞌ, ikhaa̱ phú májáan a̱kuii̱n jamí phú jmbii̱ rí ma̱ꞌne mba̱a̱ a̱kuii̱n jaꞌyoo̱ aꞌkhánlóꞌ. Xúꞌkhue̱n máꞌ ma̱ꞌne-jaꞌwáa̱nꞌlóꞌ inuu mbá xúgíí rí ra̱máján ne̱ꞌne̱lóꞌ. 10Jamí xí nuꞌthánlóꞌ rí na̱nguá gíꞌmáálóꞌ aꞌkhán, nuꞌthánlóꞌ rí mi̱nduwaa Ana̱ꞌlóꞌ, jamí nakujma rí na̱nguá ríga̱ ajngóo̱ ná awúun a̱kia̱nꞌlóꞌ.
Currently Selected:
1 Juáán 1: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
