१ कोरि 14
14
जिउ तेयाक् दान बाबोतते बा़ड़ति बाक्डाय जोङ
1दुला़ड़ खुदा़उपे, आर जिउ तेयाक् दानको ञाम ला़गित् जिद पे, मेनखान ढेरतेत् दो जेमोन पे ना़बि 2एनते एटाक् पा़रसिते#14:2 एटाक् पा़रसि:-ओनकान पा़रसि ओका दो मानवा तिस हों बाको आँजोमाकात् आर बाको बुजहा़उ। रोरोड़िच् दो होड़को तुलुच् दो बाङ, मेनखान इसोर तुलुच्ए रोड़ेदा, एनते ओकोय हों बाको बुजहा़उ ताया, मेनखान ओकोवाक्को जिउतेये रोड़ा। 3मेनखान ना़क्बियिच् दो होड़को ठेने रोड़ा बेनाव राक्काप्आक्, सिखा़उ पाड़हावाक् आर जिवि राक्ड़ेच्आक्गे। 4एटाक् पा़रसिते रोरोड़िच् दो आपनारगेये बेनाव राकाबोक्आ मेनखान ना़क्बियिच् दो का़लिसिया़रेनकोय बेनाव राकाप्कोवा।
5आर सानाञ काना, जेमोन आपे जोतो कोगे एटाक् पा़रसिकोते पे रोड़, मेनखान ढेरतेत् दो जेमोन पे ना़बि एनते एटाक् पा़रसि कोते रोरोड़िच् का़लिसिया़रेनको बेनाव राकाबोक् ला़गित् बाय तोरजोमाय खान ना़क्बियिच् दो उनि खोने सोरोसगेया। 6आदो ए बोयहा आर मिसराको, आपे ठेन सेनकाते एटाक् पा़रसिकोतेञ रोड़ले खान आपे दो चेत् इञ पोरहोवापेया, सोदोराक् से बाडायाक् से ना़क्बिवाक् से सिखा़उना रेयाक् बा़ञ गालमारावापे खान दो?
7साडेक्आक् बिन जिवियानाक्को हों, तिरिया़ ओरोङगेचेत्, पेड़ेसाङगे चेत्, ओनाको दो रा़ड़ आलोको बेगारले खान, चेकाते ओरोङोक्आ से बानामोक्आक् दो बाडाय ओरोमोक्आ? 8एनते सिङगा़ बिन पुसटा़उ साडेलेन खान, लाड़हा़इ ला़गित् ओकोय हालेये सापड़ावक्आ? 9ओनकागे आपे हों आलगाते बुजहा़उक्आक् आलाङते बापे फुटा़उले खान रोड़ोगोक्आक् दो चेकाते बुजहा़उकोक्आ? एनते होयरे गालमाक्रावकोपे होयोक्आ। 10धा़रतिरे तिना़क् लेकान पा़रसि चोङ मेनाक्आ, आर ओकाटाक् हों बिन भेद आनाक् दो बाङ काना। 11आदो पा़रसि रेयाक् भेद बाङ बाडायले खान, रोरोड़िच् ठेन बिदेसि होड़ इञ होयोक्आ, आर रोरोड़िच् दो इञ सामाङरे बिदेसि होड़गे। 12ओनकागे आपे हों जिउ तेयाक् दानको ला़गित् जिजिदकोकानतेपे, का़लिसिया़ बेनाव राकाबोक् ला़गित् आपेपे सारेड़ोक्आ मेनते ञाम बाड़ायपे।
13ओना इया़ते एटाक् पा़रसिते रोरोड़िच् दोए कोय जोङमा, जेमोने तोरजोमा दाड़ेयाक्। 14एनते एटाक् पा़रसितेञ कोयजोङ खान, इञाक् जिउ ए कोयजोङ काना, मेनखान इञाक् बुज दो बिन जो आनाक्गे। 15आदो एनडेखान चेत्? इञ दो जिउ तेञ कोयजोङा, बुजते हों कोय जोङा जिउतेञ सेरेञा, बुजते होंञ सेरेञा। 16बाङखान जिउ तेम गुनमानाव जोक्हार जोखेच् ओंडेये दुड़ुप् आकान बिन बाडाय होड़ दो चेकाते आमाक् गुनमानाव जोक्हाररे आमेन दोए रोड़ दाड़ेकेया? 17एनते ओकाटाक्एम रोड़ेदा, ओना मा बाङचोय बुजहा़वेत्, आम मा बेस ओकोच्तेगेम गुनमानाव जोक्हार कान, मेनखान उनि एटागिच् दो नासे हों बाय बेनाव राकाबोक् काना।
18इसोर इञ गुनमानाव जोहाराय काना, एनते इञ दो आपे खोन बा़ड़तिगे एटाक् पा़रसिकोतेञ रोड़ेदा। 19मेनखान मान्डेर तालारे एटाक् पा़रसिते गेल हाजार काथाञ रोड़ खोन बिचकोम इञाक् बुजते मोंड़ें गोटेच् काथागेञ रोड़केदा, जेमोन एटाक्को होंञ चेत् दाड़ेयाको।
20ए बोयहा मिसराको, बुजरे गिदरा़ दो आलोपे होयोक्आ, मेनेक् बा़ड़िच्आक्रे दो बाले गिदरा़ होयोक्पे, मेनखान बुजरे दो सेड़ाँको होयोक् पे। 21आ़नरे दो ओलआकाना,
“एटाक् पा़रसिरेनको होतेते,
आर एटाक्कोवाक् लुटिते नोको जा़तरेनको इञ गालमारावाकोवा,
आर ओनकाते हों बाको लुतुराक्तिञा, प्रोभुइ मेनेदा।” #जेसाया 28:11,12
22ओनाते एटाक् पा़रसिते रोरोड़ दो मित्टेच् चिनहा़ ला़गित् काना, पा़तिया़उको ला़गित् दो बाङ बिचकोम बिन पा़तिया़उको ला़गित्गे, मेनखान ना़क्बि दो बिन पा़तिया़उको ला़गित् दो बाङ, बिचकोम पा़तिया़उको ला़गित्गे।
23आदो मान्डेररेन जोतोको मित् ठेन हेच् जारवाकाते सानामकोगे एटाक् पा़रसिकोतेको रोड़ले खान, आर बिन बाडाय से बिन पा़तिया़उ होड़को बोलोलेन खान, बाको मेना, बा़उला़हा आकाना पे मेनते? 24मेनखान सानामगेको ना़क्बि खान, आर जाहाँय बिन पा़तिया़उ से बिन बाडाय होड़े बोलोलेन खान, सानामको होतेतेये निसड़ा़उक्आ, सानामको होतेतेये बिचा़रोक्आ। 25उनियाक् ओनतोर रेयाक् ओकोवाक्कोय सोदोरेदा, आर ओनकाते ओमबाक्काते इसोरे सेवावाय, आरे रोड़ सोदोरा, सा़रिगे इसोर दो आपे तालारे मेनाया मेनते।
मान्डेर देवा सेवारे ठिक धारा
26चेत् लेका काना एनडेखान, ए बोयहा मिसराको? आपे देवा सेवा ला़गित् पे हेच् जारवाक्रे मिमित् होड़ सेरेञ मेनाक् ताया, सिखा़उना मेनाक्ताया, सोदोराक् मेनाक्ताया, एटाक् पा़रसि मेनाक्ताया, तोरजोमा मेनाक्ताया। आदो सानामगे बेनाव राक्काप्आ मेनते होयोक् मा। 27जाहाँय होड़ एटाक् पा़रसितेये रोड़ खान, बार होड़ से आ़डिते आ़डि खोन पे होड़ पा़रि पा़रितेको रोड़मा, आर मित् होड़ दोए तोरजोमायमा। 28मेनखान तोरजोक्माको, बा़नुक्को खान मान्डेररे एटाक् पा़रसिते आलोय रोड़ मा, आर आच्रेगे इसोर ठेन बाड़ेये रोड़मा। 29आर ना़बिको दो बार से पे होड़को रोड़मा, आर एटाको दोको बिछना़उताको मा। 30मेनखान ओंडेये दुड़ुप आकान जाहाँय एटागिच् ठेन जाहानाक् सोदोर लेन खान, पा़हिलिच् दोए हापेक्मा। 31एनते मिमित् होड़ काते सानामकोगे पे ना़बि दाड़ेयाक्आ जेमोन सानामको चेत् जोङ आर सानामको सिखा़उ पाड़हाव ओचोक्। 32आर ना़बिकोवाक् जिउ दो ना़बिको गोबोलरेगे मेनाक्आ। 33चेदाक् जे इसोर दो गुलमालरेन इसोर दोए बाङ काना, मेनखान सुलुकरेन इसोरगे। सोनोत होड़कोवाक् जोतो मान्डेररे होयोक्कान लेका।
34मायजिउको दो मान्डेर जारवाक्रे हापे आकानको ताहेनमा, एनते रोरोड़ रेयाक् हुकुम दो बा़नुक्ताकोवा, मेनखानको गोबोलोक् मा, आ़न होंए मेनेत् लेका। 35आर जाहानाक्को चेत् जोङको मेनले खान, ओड़ाक्रे आपनार हेरेल बाड़ेको कुलिको मा, चेदाक् जे मान्डेर जारवाक्रे मायजिउको रोड़ दो लाजावपाड़ागेया।
36चेत् इसोराक् काथा दो आपे ठेन खोनगे ओडोकेना? से आपे एसकार ठेनगे सेटेरेना?
37जाहाँय होड़ ना़बि से जिउतेनिच् कानाय मेनतेये बुजहा़उक् खान, आपे ठेनिञ ओलेत् कानाक् दो प्रोभुवाक् हुकुम काना मेनतेये बुजहा़उ मा। 38मेनखान जाहाँय नोवा बाय बा़सुताक् खान, आच्हों बाय बा़सुत ओचोक्आ।
39ओना इया़ते ए इञरेन बोयहाको, ना़क्बि बाड़े जिदपे आर एटाक् पा़रसिकोते रोरोड़ दो आलोपे मानाकोवा। 40मेनखान सानामाक्को दो लेक लेकाते आर साजावक् लेकाते बाड़े होयोक्मा।
Currently Selected:
१ कोरि 14: NTSPt25
Highlight
Share
Copy
Want to have your highlights saved across all your devices? Sign up or sign in
The New Testament Books in Santhali Language © The Word for the World International and Santhali Translation Project, Nepal, 2025
