Loma 14
14
Musitonge bamwe
1Unhu unakudimbwa kushoma, untambuleni, koga musikakabajane naye pezhulu pokusiyana naye munjeyo. 2Umwe unodimbwa kuti angalya chili chose, koga unhu unakudimbwa kushoma unolya undibo chete. 3Yoyo unolya ajilokwelela kushunda yoyo usinolya, akale yoyo usinolya ajilokwelela kutonga yoyo unolya nokuti Mwali wakotambula. 4Uli ani iwi kupa untongo kunshingi womwe? Zwiko kunaTezi uwe kuti ebe iye unoleba bubi nobubuya bwonshingi uwe. Tezi unoontunhumwija akale onte kuti ebhudilile.
5Umwe unhu unokujisisa izhuba limwempela kuti ibuya kupinda limwe, koga umwe unhu unokuja mazhuba ose zwilokwelana. Umwe nomwe ngebe nokugunchikana kuzhele mundangalilo jije. 6Iye unolemekeja izhuba, unolilemekeja ekuja Tezi. Iye unolya, neebo unolya ekuja Tezi, sezwo unopa kuboka kunaMwali; yoyo unoleka, unoleka ekuja Tezi akale unopa kuboka kunaMwali. 7Akuna umwe wedu unozwilalamila akale akuna umwe wedu unozwifila. 8Kana tilalama tolalamila Tezi, akale kana tifa tofila Tezi nokudalo kojoba tili bapenyu kana tingofa tili baTezi. 9Nokuti Kristo wakafa akamuka mukufa, kutila kuti ebe Tezi wabakafa nabapenyu. 10Ini upa untongo kumwanakwaina uwo? Kana iwi ini ushunda mwanakwaina uwo? Nokuti tose tinooma mbeli kwechigalo chobutongo bwaMwali.
11“Zwandili umpenyu, unodalo Tezi
chose chivi chinoondifhigamila,
akale lwose lulimi lunookuja Mwali.”
12Nokudalo umwe noumwe wedu unozwishandulila kunaMwali.
Musiwige bamwe
13Nokudalo ngatilekeni kupa untongo kunabamwe, koga yeyani kuti musibinde kana kubiga chikoneso munzila yomwanakwaina. 14Ndinoziba akale ndilobwetekejwa munaShe Jesu kuti chinhu chose chichena, koga chiloswibhijwa nendangalilo joyo unochiyeya alo. 15Kana mwanakwaina uwo elwajilwa nozwo zwaunolya, auchinokwenda muludo. Usivumile zwaunolya kuti zwiwige umwe wakafilwa naKristo. 16Nokudalo musileke bubuya bwenu bulebelekwa sobubi. 17Nokuti bushe bwaMwali abutobeli kulya nokunwa, asi kululama nolunyalalo nokushanta muMpepo uNchena. 18Iye unoshingila Kristo unotambulwa kunaMwali akale unotambulwa nabanhu.
19Ngatitobelejeni yozwo zwinobuza lunyalalo, akale nokukubusana mukubakana. 20Musibulaye unshingo waMwali pezhulu pokulya. Zwose zwichena kasa, koga zwibi kuti umwe ewige bamwe pezhulu pezwaanolya, 21zwilolulama kusolya inyama kana kusonwa iwayini kana kuta chimwe chinhu chingagubhula mwanakwaina uwo. 22Londota luvumilo lwaunanalo, pakati papo naMwali; uloshanta yoyo usina chisoko chokuzwipa untongo muna zwaanovumila. 23Koga iye unokahajika unolashwa, kana akalya, nokuti ajimuzwita mukudimbwa, nokuti zwose zwinotiwa mukusodimbwa luchinyo.
Currently Selected:
Loma 14: LTP
Highlight
Copy
Compare
Share
Want to have your highlights saved across all your devices? Sign up or sign in
The word for The World International