Kendeu 2
2
1Ciciu eh tinggimdung nah kideu tei canglu, nah cidung de teipui kebam kering kaune leune. 2Lang henane benai Tinggwang pa tei kebam gade pe ta teicanglu nah pa lang henane benai pe ta leune gade mtaklu.#Heb. 4:4 3Tinggwang lang henane benai de samlam gai nah tei mcilu, kedanemene cipau nai gade pa damgai kelu pe bata leune gade mtak kelune.
Adam penai Eve
4Aidung de tinggimdung nah kideu dam gwang kelu ha, cipau nai RAMPAUBE Tinggwang tinggimdung nah kideube tei kelu dau cidung de damgai lu. 5Kideu ga luh rebang gede lungh cu mereu, nah luh mabangdung gede pwakcu mereu, kedanemene RAMPAUBE Tinggwang kideu reu ga peu tingrui gai mereu kecune, nah mina mige de hangdeube ga heta tei kera gah reu kecune. 6Dede dui ge kideu kang gade hang eh hangdeu reu pelane hetau hwalu. 7RAMPAUBE Tinggwang hangdeu gade ndei keulu delwe cide teu mina gede teilu, nah pe ngkieki gage keringcui ngngi gai beu ge minabe ringcuhdi.#2:7 1 Cor: 15:45 8RAMPAUBE Tinggwang naimiak kepetle Eden gage hegurie ge linglu, delwe pa teikelu minabe de pa cika ge kailu. 9RAMPAUBE Tinggwang hangdeu gade tsingbang hezukeyi nah ketyeipok ziemne keyi leune peu lungh petlu kera teigai. Aide hegurie sum ga kebam tsailihei bang, nah keyi kesia maci peu kela bang de de si.#2:9 Rev: 2:7, 22:14 10Kereuki ge Eden gade lwa pet eh hegurie dui ketau beu. Cika de cide mzipwa kereuki mdai teilu.#Keu. 22:2 11Kereuki keraibe zi cai Pishon. Cide Havilah deu pelane ga lwa twagwa kebam de da, kecak kebam dega. 12Cipau deu de gu kecak au yi. Cika bdellium nah onyx tangtsu de bamla. 13Kereuki kenabe zi cai Gihon. Aide Cush deu pelane ga lwa twagwa bamla. 14Kereuki kecumbe zi cai Tigris, cide Ashur naimiak kepetle lwa bamla. Kereuki mdaide cai Euphrate. 15RAMPAUBE Tinggwang minabe de cide tatyei nah kwa kera Eden gurie gage pecu kailu. 16RAMPAUBE Tinggwang mina be dage aja kai eh ranggai, “Nang hegurie be gade tsingbang keheibe tsi de tyei lubui. 17Dede keyi kesia maci peu kela bang de gade nang tyei so, kedanemene nang cide gade tyei kelu benai gade, nang tsai bi zie.”
18Pecai RAMPAUBE Tinggwang rangdi, “Minabe pekatei lungh kebam yi mada. Ih pecu ngha kera pe kangngwa ge teibeu zie.” #2:18 1 Cor: 11:9 19RAMPAUBE Tinggwang tangdei le hangdeu ga makaune pelane nah ting ga nruine pelane teigai. Delwe pa cidung de minabe da ngngwa gwang beu pa cidung de de hezi dai msiak ziebi pie eh. Keheibe de minabe kering kaune ket ket kecu zi msiak gai kebeube, cide pe zilu. 20Minabe kauruine pelane, ting ga nruinedung pelane, nah hangdeu ga makaune pelane zidung msiaklu. Dede minabe de ziemne pecu ngha kera ket de kangngwa petau be ngau luma. 21RAMPAUBE Tinggwang minabe de peu zip zingdi kera teigai, cine minabe zipdi. RAMPAUBE Tinggwang minabe hetura ket keulu delwe pa hetura keu kedi pumteih de pe jam kaudi. #2:21 1 Cor: 11:8 22RAMPAUBE Tinggwang minabe hetura keu kelu de le, Pa mipui gede teilu delwe minabe da pecu ngngwa gwang beu.#1 Tim. 2:13 23Minabe rangdi,
“Henai pia, aide au pera a radung gade keu lu, nah pe chi a chi gade.
Pecu ‘mipui’ de qu zie, kedanemene pecu au minabe dade keu mpet kelune.”
24Ciziemne mipei ge pepui pepei de gidi eh pa pe nau de ngngwa ket tei dizie,#2:24 Mat: 19:5, Mark: 10:7-8, Eph: 5:31 nah penai ngngwa pumteih ket dizie. 25Penai hang nana paula bam, minabe nah pe naube, dede ngngamdi ma.
Currently Selected:
Kendeu 2: NorthernZeme
Highlight
Share
Copy
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
