Tetkempet 18
18
Jethro Moses de miekepie
1Jethro, Midian cingkupei, Moses pau, Tinggwang ma pelane Moses ziemne nah Israel pe mina ziemne teikegai siulu. Pa RAMPAUBE ne Israelme de Egypt gade ngngwampet kelude siulu. 2Jethro, Moses nau-pei, Zipporah, Moses nau de ngngwalu, pa pe ki gage langgai kedi cai, 3nah pe napei kenade; pe napei hangge zi cai Gershom#18:3 Gershom: Sangme, kedanemene Moses rangkecu, “Ih sangme deu ga sangme tei eh lungh gwang.” 4Kedabe pei zi decai Eliezer, kedanemene, Moses rangkecu, “A paume Tinggwang au acu kenghabe. Pa ne acu Pharaoh kingtie gade kelibeu.” 5Jethro, Moses pau, Moses namedung nah penau de ngngwa hetaideu Tinggwang lamlwa#18:5 Tinggwang lamlwa: Sinai Deutu ga pa ramzeuki teipwa kebam ga Moses da gwang. 6Pa Moses dage rangdi, “Ih, n pau Jethro, n nau nah pe na kenade ngngwalwe n da gwangla.” 7Moses pe pau de redau kerane mie, keumie, nah pecu kemaam gai. Penai hangge ge ha keteugai nah cipaucai paiki ga nlütdi. 8Moses pe pau de RAMPAUBE ne Pharaoh nah Egyptme dage Israelme ziemne ma pelane tei kegai, lampuiki ga keherei kecu penui da kegwang, nah dainzwa RAMPAUBE penuide kelibeu bi kecu paubeu. 9RAMPAUBE ne Israelme ziemne makeyi leu tei kegai, pa ne penuide Egyptme ba gade keli kebeune Jethro pe suidi. 10Jethro rangdi, “RAMPAUBE de twalu, kedanemene pa ncu Egyptme ba gade nah Pharaoh ba gade kelibeu nah mina dungde Egyptme ba gade keli kebeune. 11Cu Ih RAMPAUBE au rabedung pelane swa diki kecu cilu, kedanemene Egyptme Israelme de ma sipei mene kebamdau, Tinggwang pe mina dungde kelibeu da.” 12Jethro, Moses pau, keru ratak nah recadung de Tinggwang ziemne keugwang. Aaron nah Israel ga hangkiame pelane Tinggwang dwa gade nah Moses pau de ngngwa kemci taktyei tyei kera gwang.
13Pecai benai Moses minadung hetu tiak kerane bamlu. Minadung tingcang gade tinghegi kecang pecu sap twagwa bamdi. 14Moses pau minadung ziemne pa teikegai pelane ngau luge, pa rangdi, “Nang minadung de ngngwa matei kebam aide daino? Daitei eh nang rünne ntumbam eh minadung be ntaiga tingcang gade tinghegi kecang sap twagwa bamno?” 15Moses pe pau dage rangdi, “Mina Tinggwang puisau keteu kera a da gwangla. 16Penui ma kehebwak bam dige, penui ada gwangla. Ih penui kakga caube nzeu bi kedet beula, nah Ih penuide Tinggwang samdung nah hezaidung ledeu beula.” 17Moses pau pe dage rangdi, “Nang tei kebamde au yiham meda. 18Nkatei ncu tei leubi zieda, nang nah ncu ngngwa kebam mina dungde de. Aipau pwet de au n ziemne rüt ham dida. Nang au nkatei cide teigai lakta. 19A kwa kingnei lu. Ih ncu sam keyi peuzie nah Tinggwang ncu ngngwa lazie, kedanemene nang au mina keleu tei eh Tinggwang da kegwangbe, nah nang penui kehebwak de peda keugwang beula la. 20Nang penuide pe samdung nah hezaidung ledeu beu maisia. Nang penui tet kera lampui nah tei kera ta keu liagai maisia. 21Cipau reude, minadung kakgade teilu kebuime, Tinggwang de kerütme, kesamsangme petau kemakbe pesui kemakme de nang kedetlu maisia. Nang penuide mina cang, hai, riakngei nah kerei reu rengei kera muiteumedung kai maisia. 22Penui ne pe ha leune minadung tutiak zie, dede penui pe ha kehungbe nda teugwang zie. Pe ha keceunabe pelane au penui katei cidungde tiak lubui. Cinzwa eh cide n ziemne relui luzie, nah penui ncu ngngwa hepwet kerüt de pung luzie. 23Nang aide tei lucai, nah Tinggwang ncu tei lulo beucai, nang teilu buida, nah mina pelane mnung eh penui kiga gwang luzie.” 24Cine Moses pe pau samdung kingneilu nah pa rangkebeu leune teilu. 25Moses Israelme pelane kakgade teilu kebuimedung de kedetlu delwe penuide mina cang, hai, riakngei nah kerei reu rengei kera muiteume teibeu. 26Penui teilu kebuigade mina tutiak beula. Dede pe ha tiak kepabedung penui Moses da teugwang beula, dede pe ha keceunadung au penui katei tiak dila. 27Pecai Moses pe pau de pütdi, nah Jethro pekatei pe deuga cailigwang di.
Currently Selected:
Tetkempet 18: NorthernZeme
Highlight
Copy
Compare
Share
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
