Bata 8
8
Ngqwabe keherei nah zangra kedi
1Saul Stephen de teitsetdi kerade kesuizwalu.
Cipaunai Jerusalem ga kebam ngqwa de teikehereisüt cuhdi; nah langkegaimedung gwale, kenlumme pelane Judea nah Samaria cuikui ga zangrala kapdi. 2Kenlummedung Stephen de hei eh hap sütgai eh kungdi. 3Dede Saul ngqwabe de teimsia sütdi, kige gade kige ga mie, mipeidung nah mipuidung de teukerei mpet delwe penuide hebaangki gage kaidi.
Philip Samaria ga
4Cu zangra kedi kenlummedung kehei leune ga mie samliakeyi de teu zierang tei pwaladi. 5Philip#8:5 Philip: Pa cingkume hena kakgade hangge, Bat. 6:5. Pecu pecai, “Evangelist,” de qudi. Samaria namdi ga nghung cika penui dage Khrista ha zierang tei. 6Cu penui pe sam siu nah pa miswakegah bata tei kegaidung ngau luge, hemaabe ngngwa ket tei eh Philip kerang samdung kingnei sünne lu. 7Kedanemene mina kekieege dade mcikemak rabedung sahbak gai eh mpetdi; nah kemnoime nah pisiame mina kekiee de tei ngkeilu. 8Cine namdi cika suiyi le puidi.
Simon kerekabe
9Dede namdi cika mige pe zi Simon#8:9 Simon: Pa mide kehemeu ta keteime ge, cine pezi Simon “Magus” pekie “Kehemeu” de qu la. lie kecuge bamla, pa kehemeu ta tei nah pa pekatei pecu kenlangme gelie eh Samariame de kemeu teugwang. 10Samariame pelane, ceutube gade gwang ditu kecang pe kwa kingnei sünne eh ranggai, “Aipau peide au Tinggwang kengkieng lie kela Kedi deda.” 11Penui pe sam kingneila, kedanemene pe kehemeu tale pwane pa peting ketie ge penuide kemeu teu kegwangne. 12Dede penui Philip Tinggwang hegwangram ha nah Jisu Khrista zi samliakeyi teu zierang teikegai nlum luge, penui mipei de nah mipui de duipum teilu. 13Simon de nlumlu, nah pa duipum tei kelucai Philip taiga ladi. Pa mimakecang nah miswakegah bata tei kegai ngau luge, pe swagahdi.
14Cu Jerusalem ga kebam langkegaimedung Samariame Tinggwang sam luu kelu ha siu luge, penui Peter penai John de penui dage langgai. 15Penai nghung luge peu penuide Kemci Rabe ngaulu kerane penui ziemne kekie teibeu. 16Kedanemene Kemci Rabe penui hangge dade gwang mereu, dede penui Rampaube Jisu zi gade duipum teikelu rünne reu. 17Cidau Peter penai John penai ba hwapwa penui reu gage kaigai, nah penui Kemci Rabe ngaulu. 18Cu Simon langkegaime penui ba hwagai ge Rabe ngaukelu ngau luge, pa penaide rangkang pwapeu. 19Pa rangdi, “Acude kengkieng aide peulo, iciude Ih keheibe dage a ba hwa gaide Kemci Rabe ngaulu kerane.” 20Dede Peter pe dage keligai, “Ngu rangkanggeu depeu ncu ngngwa kap dilu, kedanemene nang Tinggwang mapeu rangkang teu luilu kera cet kelane. 21Nang aipau dega n qwa kette gah, kedanemene nlung au Tinggwang dwa gade petaula melu.#Lei. 78:37 22Ciziemne nang n kesiadung gade nreulu delwe Rampaube dade kielu, ciude pa nlungning kesia gade n mau gibeu de cilaklu. 23Kedanemene nang n riaksiasüt nah kemau baang tei kebam Ih ngau.” 24Cidau Simon keligai, “A ziemne Rampaube dade kielo, iciu eh nang kerang samdung depeu a da magede gwang melu kerane.”
25Penai zierang tei nah Rampaube sam rang kegai cai, Peter penai John Samariame renamdung kekiee ge ga samliakeyi de zierang tei eh Jerusalem ga cailigwangdi.
Philip penai Ethopiame ge
26Tingnai ge Rampaube tinggimgwame ge Philip dage ranggai, “Cuhlu delwe tingpi lebie Jerusalem gade Gaza ga kemie lampui ga miecu.” (Lampui aide hangdeu ketsai gega bam.) 27Cine pa cuhlu delwe tetdi. Cidau Ethopiame pei ge, Eunuch#8:27 Eunuch: Aika eunuch de kecu de “Kengkim kedime, mede deuceu pie kerengeime” de rangbam. ge Ethopiame hegwangpui Candace kengkieng kangga ngkiengsüt kecu ge la. Pa pe mabam pelane pie rengeila. Pa reca kerane Jerusalem ga mie. 28Pa pe bagi reuga ntum eh pe deudi ga cailigwang la, nah caihakecibe Isaiah laisiu peila. 29Ge Kemci Rabe Philip dage rangdi, “Cika mie delwe bagi taiga lalu.” 30Cine Philip peda pakmie, nah pa Isaiah caihakecisam peibam eh siulwe keteu, “Nang pei kebam de nang ci kesang bam deni?” 31Pa keligai, “Dainzwa Ih cide ci lulai, mige acu sauliabeu mecai?” Cine pa Philip de pe taiga nghang bagi ga bam kera qu. 32Cu Ethopiame pei kebam kesanglaisiu samria de ainzwa,
“Pecu meurün gede daptset zielie ngngwa kegwang nzwa teuswa gwang,
nah meurünna ge pemai kebitbe dwade mlei la kemak nzwa,
cine pa pe mui ngkei ma.#8:32 Isa. 53:7-8
33Hengam gade pe kemzui tutiak keutetdi.
Caune pe leuhmedung ha rangkap lulai?
Kedanemene pe teilung kideu gade keuteu kedine.”#Isa. 53:7,8
34Cine eunuch Philip de keteudi, “Ih n dade kiela, caihakecibe cau ha rang bamno, pekatei pe ha mi, mi kedage ha rang lano?” 35Cine Philip pemui ngkeilwe kesanglaisiu gade ndeu eh pa pe dage Jisu samliakeyi ha zierang teigai. 36Iciu eh penai lampui ga tet keladau, penai gwang dui daulu, ge eunuch rangdi, “Pielo, aika dui bamda. Acu duipum ketei kekaam dai bam no?” 37#Kesa laisiudung ga pedum 37 de sila. [Philip rangdi, “Nang nlung pelane teu nlum lucai, nang duipum tei lubui.” Ethopiame pei keligai, “Jisu Khrista au Tinggwang Na lie kecu Ih nlum.”] 38Cine Ethopiame pei bagi mtak lulo aja kaigai. Pecai penai hangna na, Philip nah eunuch dui ga nghunglu delwe Philip pecu duipum teibeu. 39Penai dui gade mpet luge, Rampaube Rabe Philip de ngngwa tetdi, nah eunuch pecu madaude ngausi tadi, dede pa pe suiyi eh pe lampui ga tet gwangdi.#1 Heg. 18:12 40Dede Philip Azotus namdi gade peu mide pecu ngaugai nah pa Caesarea namdi ga gwang canglu kemaktane cipau cuikui namdidung pelane ga samliakeyi zierang teigwang.
Currently Selected:
Bata 8: NorthernZeme
Highlight
Share
Copy
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
