Bata 2
2
Pentecost dau Kemci Rabe kegwang
1Pentecost tingba#2:1 Pentecost tingba: Aide Jisu tinggim nghang kedicai nah Pentecost tingba kakga de rangbam. benai, kenlumme pelane heni gega ngkwabam. 2Ge zette tinggim gade tingkai guisüt kecu kenzwa makwa ge gwang, nah cide ne penui ntum kebam ki pelane de puidi. 3Cidau cika mi mleudung nzwa pet, nah cidungde penui hangge ge reuga gwangdi. 4Penui pelane Kemci Rabe le puidi eh helet kedadung gade marangdi, Kemci Rabe penuide ranglu kebui kepeune.
5Cipau tingdau Jewme, tinggim kang heleuh leune gade renet lam mting kelamedung Jerusalem ga lungh bam. 6Makwa aide siu luge, mina maadi gwang hekwalu nah penui swagahdi, kedanemene mi hange ge kecu penui let rip gade marang kebam siu kelune. 7Penui pekiene de penui ma canghdi nah penui swagahdi; nah penui hange ge dage rangdi, “Pielo, Marang kebam aidungde pelane Galileeme meni? 8Cine dainzwa anui mi hange ge kecu pekatei pe ramme let rip gade penui kerang siu zeu no? 9Parthiame nah Mediame nah Elamme, nah Mesopotamia, Judea nah Cappodocia ga kelunghme, Pontus nah Asia ga, 10Phrygia nah Pamphylia si eh, Egypt ga nah Libya cuikui Cyrene lebie kelunghme nah Rome gade mbeuh gwang kelame, 11Jewme nah Jewme renet mzai kedimedung, Creteme nah Arabiame. Nah anui Tinggwang bata kedi tei kegaidung penui anui let gade rang kebam siu.” 12Cine penui pelane penui macangh nah kebwakdi eh hangge ge dage rangdi, “Aide pekie daino?” 13Dede midungge penuide henui tei eh rangdi, “Penui au zau sakmie dida.”
Peter maadibe dage kerang
14Dede Peter mina kereieket baude ngngwa saplu delwe penui dage sahbak eh rangdi, “Judeamedung nah nnui Jerusalem ga lungh kebam pelane, acu peu aipau kiede nnui dage ranglia lo; a samdung kingnei sünne lu. 15Kedanemene mina aidungde nnui kecet nzwa zau sakmie ma, cu au tingcang bam hekui gwale mereu. 16Dede aide caihakecibe Joel ne kerang deda:
17‘Peting kekam lebie ainzwa dizie,’ Tinggwang rangla,
‘Mina leune dage Ih a Rabe ruigai zie.
Nnui napeime nah nnui napuime caihakecisam rang zie,
nah nnui rehangme marengeidung ngau zie,
nah nnui kecingpeidung hemangdung mmi zie.
18Cipau tingdau a kilame, mipei nah mipui dage
Ih a Rabe ruigai beuzie, nah penui caihakecisam rang zie.
19Ih nreule tingkam gade miswakegahdung#2:19 Miswakegahdung: Tinggwang ne tei kegai marehidung nah miswakegah batadung. teilia zie
nah ngkangle kideu gade marehidung teilia zie,
hejai nah mi nah mika cuidung.
20Tingnaimiak mui dizie
nah hekei hejai nzwa dizie,
Rampaube tingba kedi nah kendu de kegwang dwa.
21Iciu eh keheibede Rampaube zi qu kegaime de kelilu zie.’#2:21 Joe. 2:28-32
22Israelmedung, sam aidungde kingnei lulo: Tinggwang pe bata kedi, miswakegah nah marehidung gade Nazarethme Jisu de nnui dage keulia ndu gaida, cide Tinggwang nnui kakga de teigai, nnui cibam nzwa. 23Mina aipaude de, Tinggwang pa mrairiem teukela nah cetnswa teukela nzwa pecu mina kesiame ba gage kaigai beudi, nah nnui pecu cross gage gwak tsetdi. 24Pa au Tinggwang ne kwakcuh kelube ddeda, iciu eh ketsai rei gade pecu lungmpet beu, kedanemene pecu ketsai ne kaam nzeugai lakdi. 25Hegwangpei David pe ha rangla,
‘Ih Rampaube de a dwaga ngau muila,
kedanemene pa a ba zetlebie ga bamla iciu eh peu acu mlaidi melu kerane.
26Aide ziemne, a lung pesui yi nah a mleu pesui yila.
Kesang, a pumteih de keregui aide ga lungh luzie.
27Kedanemene nang a rabe de ketsaime deu gage gi dilak,
mede n Kemci kilabe depeu herau gade tim dilak.
28Nang kering lampuidung acu liagaida;
nang acu ngngwa la eh peu acu a suiyi le pui zie.’#2:28 Lei. 16:8-11
29Mipeimedung, sinamedung, Ih nnui dage anui pau David ha rangkera puikaam gede gah. Pa tsaidi eh pecu kungdi, nah henai kecangde pe rau anuida bam.#2:29 1 Heg. 2:10 30Pa au caihakecime ge nah Tinggwang pecu ngngwa sampet kelude pa ci, cide cai peu pe leuhme gede pe hegwangbam ga bamkera.#2:30 Lei. 132:11 31Paucai teigwang kerabe ngau eh pa Khrista ringcuhdai kecu ha ranggai,
‘Pecu ketsaime deu gage gigai dima, mede pe pumteih herau gade tim dima.’#2:31 Lei. 16:10
32Jisu aipaude de Tinggwang kwakcuh luda, nah cide ga anui pelane zierangme da. 33Cine pecu peu Tinggwang ba zetle bam dida, nah peibe dade Kemci Rabe ngau luda, pa sampet kebeu nzwa. Nnui ngau nah siu kebam aide pa nnui dage rui gaibeu da.
34Kedanemene David Tinggim ga nghang kecube ma, dede pa ranggai,
‘Rampaube a Rampaube#2:34 Rampaube a Rampaube: samria aika Rampaube au Peibe Tinggwang da nah a Rampaube de kecu au Jisu de rangbam; Jisu de ketsai gade teu cuhlu eh Tinggwang ne pecu Rampaube nah Messiah teigai. dage rangdi, “A ba zetle bamlu,
35Ih n ngauraume de pwa n pidau teidi kemaktane.”’#2:35 Lei. 110:1
36Ciziemne, nnui gwak kedi Jisu aipaude de, Tinggwang pecu Rampaube nah Khrista tei kedi Israelme pelane de peu cisiakte lulo.”
37Cu penui aide siu luge penui lung kehereidi, delwe Peter nah langkegaime kedame dage rangdi, “Sinamedung, anui dai tei laino?” 38Cidau Peter penui de keligai, “Helungnreulu, nah duipum teilu, nnui hangge ge kecu Jisu Khrista zi gade nnui maudung gilu kerane, iciude nnui Kemci Rabe mapeude ngau luzie. 39Kedanemene sampet aide au nnui, nnui name nah kemdei ga kelame pelane ziemne nah Rampaube anui Tinggwang pe dage qugai kelu leune ziemne.”#2:39 Joe. 2:32 40Pa sam keda kekiee teu zierang teigai nah penuide kecung eh ranggai, “Aipau ceheu kesiade gade nnuide kelilu lo.” 41Cine pe sam nlum kelume duipum teilu, nah cipaunai mina cangcum ge nlumkelume maa ga silu.
Kenlumme kangbau
42Pecai penui langkegaime keledeu sam kingnei, ngngwa kekangbau nah ketaktyei nah kekie ketei jüja bamdi.
43Mina pelane reu kengngi gwangdi, nah langkegaimedung miswakegah nah mimakecangh bata kekiee ge teigai. 44Nlum kelume pelane ngngwa ket teidi nah ma pelane ga ngngwa kemacütdi, 45nah penui penui gunia nah mabamdung zwalwe, cidungde teumaikesiame de mzi beudi. 46Penui tingba ramsang ne kerecaki ga gwang ngkwala, nah penui kidung gade tangku tei poplwe penui suiyi nah ket tei eh ngngwa ketak tyeila, 47Tinggwang de twa nah mina pelane de ngngwa kezuyi bamdi. Nah Rampaube Tingba ramsangne kelikelume de penui maa gage si gaibeu bamdi.
Currently Selected:
Bata 2: NorthernZeme
Highlight
Share
Copy
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
