Proverbs 5
5
Ngayikilu ya uwoni
1Mwana wangu, pikanishi luhunja lwangu, tegheli matu vaku kupikana umanyi wangu. 2Ili uweshi kulamula finofu, na milomu yaku yideti kucha kuna umanyi. 3Mlomu wa mdadala muwoni fikufuma filongu finowili kucha njuki, filongu fyaki finyamuka kucha mafuta va miseyituni, 4lakini pambeli vakalipa kucha nyongu, kucha lipanga livelili vekuveku kunu na kunu. 5Mweni dakuyeghi kunjifwa, na njila yaki yikuyenda kumambi. 6Mweni akwihola ha deha yitulongosha kuunofu, deha shaki siva sha kuyeleja hela lakini mweni kayimanya ha.
7Ponopa vana vangu mumbikanishi, mukotoo kwivasuva filongu fyangu. 8Wikali kutali na mdadala muwoni! Kotoo kuselilela mlyangu wa nyumba yaki. 9Pawugola nahawu liwovi lyaku ukuvagayila vengi, na davayangishi myaka yaku vakumupa mundu makuluhu. 10Nakaka, vahenja davatoli ulundamali waku wonda, na liwovi lyaku dafipeleli kunyumba ya mundu wingi. 11Mbelu ya unofu waku dawulili kwa lihingili, kwanongwa matami davagoli mvili waku wuvi msosuvafu. 12na dawudeti, “Nongwa liki ndalemili kuwuliwa? Na nongwa liki ndalemili ngayikilu mundima yangu? 13Ndavapikanishili ha vawuli vangu, na lijeji lyangu lyalemili kupikana fivang'ulili. 14Ponopa samba danganyika nakamu, gati ya lipinga lya vandu.”
15Landi machi kufuma mulitepu lyaku umweni, machi yivatuva kufuma mufiseselu fyaku umweni. 16Nongwa liki fiseselu fyaku fya machi fiyendi kutali? Na nyeni shaku sha machi kumbuga. 17Vavi vaku wekahela, kotoo kwihasha na vandu vengi. 18Fiseselu fyaku fya machi finemiliwi, na wumusekileli mwehi wa ujana waku. 19Mweni kava penu kucha mbavala. Mleki chipindi chosi utami waki ukugoli wuvi na seku, mleki akugubiki na utami waki. 20Nongwa liki yuwi mwana wangu ukukoliwa luhala na mdala wa panji? Nongwa liki ukumkusikila pachifuva mdala mhenja? 21Bambu Chapanga akusiwona deha sha kila mundu. Kokosi kuwuyenda mweni akukuwona. 22Mundu mwafu akuwomishiwa kwa wafu waki mweni. Sambi shaki siva kucha luwoyi lumuwomesha mweni. 23Mweni akudanganyika kwanongwa ya kulema kukayikiwa. Akudangayika kwa upufi waki.
Currently Selected:
Proverbs 5: OTNdambBL
Highlight
Share
Copy
Want to have your highlights saved across all your devices? Sign up or sign in
The Old Testament in Ndamba @The Word for The World International and Ndamba Language translation. All rights reserved.
