Proverbs 3

Lulayilayi lwingi kwa fijana

1Mwana wangu kotoo kwivasuwa ng'ulilu yangu, topi kamuli findikulayilili kwa ndima yaku yosi. 2Findikuwulili dafikugoli wiyikali myaka yitangalili na ngalilu ya kusika na ya nyanyi munu. 3Kotoo kwisegha na ujumilwa na unakaka. Fiwopiwi mungulu yaku, na ufiyandiki mundima yaku. 4Pawugola nahawu dawujumiliwi na Chapanga pamu na vandu.

5Mwidumbili Bambu Chapanga waku kwa ndima yaku yosi. Kotoo kuyidumbila luhala lwaku umweni. 6Umwiholi Bambu kwa findu fyosi fiwugola, na mweni daholoshi deha shaku. 7Kotoo kwihola kucha umweni kuna luhunja, mtundamili Bambu Chapanga na kwilyepa na wafu. 8Leki pawugola nahawu dayivi kucha mtela mukuvili yaku, na kwidindasha mingendewu yaku. 9Wumutundamili Bambu Chapanga waku kwa mali shaku, na kwa fivelekwa fyaku fya kwaa kufuma muchitava chaku. 10Pawugola nahawu sanja shaku dasimemi fivelekwa, na ngwangu shaku dasimemi difwayi ya shonu.

11Mwana wangu, kotoo kubedala pakukayika Bambu Chapanga, wala kotoo kukalala pakulakalila 12Nongwa Bambu Chapanga akumkayika yula yamtamili, kucha tati pamkayika mwana mundu yamtamili. 13Ngiba mundu yula yavelili na luhunja, na mundu yavelili na umanyi. 14Nongwa luhunja lunofu pitu madini va mbiya, lukukugola wuvi mlundamali pitu chumang'andu. 15Luhunja lutalama pitu lubi, kwahela chindu chiwudobukela yichiwesha kwifwana na luhunja. 16Kwa liwoku lyaki lya mlilu luhunja dalukugayili ngalilu ya myaka yitangalili, kwa liwoku lyaki lya mkiyi dakugayili ulundamali na kutundamiliwa. 17Pawuva na luhunja dawuvi na ngalilu ya nyanyi, na fichuku fyaku fyonda dafigoleki kwa kusika. 18Luhunja ndi libiki lya unofu kwa vala yivamkusikila, vanemiliwa vala vonda yivamkamula davanemiliwi.

19Bambu Chapanga alumbili mlima kwa luhunja lwaki,

na alumbili lulanga kwa luhala lwaki.

20Kwa luhunja waki agolili nyeni situvi,

na mafundi kuponesha mitungwi mumlima.

21Mwana wangu, kamulili luhunja na luhala, kotoo kufileka fikuyaghamili. 22Afi dafikutangi mungalilu yaku, na davavi malembu va nyanyi mungulu yaku. 23Yuwi dawuyendi kwa kusika, na dawikwali ha. 24Pawikala dawuvi na lyogha ha, na pawuwonja dawupati ng'onju sha nyanyi. 25Dawutili ha tepu pawukapushiwa, hata mundu wa wafu padayila kukupundangila. 26Nongwa Bambu Chapanga ndi dakudimi. Mweni dakugoli wilyepi na mtambu.

27Wumtangi mundu yadayila kutangiwa, leki pawuwesha kugola naha. 28Kotoo kumuwombela mjofi waku veti chilawu dandikugayili, kunu yuwi ukuwesha kumutanga nalelu chila chadayila. 29Kotoo kwifukila kumugolela wafu mjofi waku, yayikala pabehi na yuwi kunu akukujumila. 30Kotoo kwishosha na mundu ngajila nongwa yoyosi, payiva kakuvifya chindu ng'odu. 31Kotoo kumuwonela weyi mundu mgombi, awu ukotoo kuyesha fyagola, 32kwanongwa Bambu Chapanga akuvanyekwa vandu vala va wafu, lakini mweni ndi ghanja wa vasangi. 33Bambu Chapanga akusilapila kaya sha vandu va wafu, lakini akusinemela kaya sha vandu vasangi. 34Bambu Chapanga akuvabedala yivavelili na bedalu, lakini akuvapa nemusi yivavelili vashishamoyu. 35Vandu yivavelili na luhunja davatundamiliwi, lakini vandu vapufi davapati chindipa.

Currently Selected:

Proverbs 3: OTNdambBL

Highlight

Copy