Proverbs 1
1
Kudayiliwa kwa detelu
1Asi ndi detelu sha Solomoni mwana mlumi wa Dawudi, mutwa wa Isilaeli.
2Asi ndi detelu sikuvapa vandu luhunja na ngalilu nofu, sikuvagola vamanyi detelu sivelili na mana ngomi. 3Detelu asi dasivawuli yumwi muvi na luhunja na mgoli fya usangi na mgoli ngimu wuyidayiliwa. 4Sikuvagola vasisihi vavi na umanyi na kuvawula fijana fyakugola na ndambu yaki. 5Yavelili na luhunja apikani na kuyongesha luhala lwaki na vala yivangajila umanyi yiweshi kuvalongosha, 6Topi davamanyi mana ya detelu na filangushilu, na davaweshi kumanya filongu fya vandu yivavelili na luhunja na findu fidindalili kumanya.
Lulayilayi kwa fijana
7Kumtundamila Bambu Chapanga ndi kukanda kwa umanyi, lakini vapufi vakubedala fya luhunja na vakulema kwiwula.
8Mwana wangu, pikanishi chakuwombela tati waku na kotoo kuleka ng'ulilu ya mawaku. 9Afi fivakuwulili dafivi kucha likokoma limelimeta lya nemusi kumutwi yaku, na kucha ukufu wumelimeta mungulu yaku.
10Mwana, wangu pawujangiwa na vandu vawafu, ukotoo kuvapikana. 11Pavadeta, “Tuyendi tumtendeli mundu na kumuwulagha; wisi tuvapundangili yivangajila mbatiwa! 12Datuvamili vakali vanofu ngimu sembi wuyimila, davavi kucha vala yivadubukila mulyowu lingajila mbelu! 13Datupati mali shonda sitalamili, nyumba shetu dasimemi findu tufifikamulili! 14Wisi wilumbi na yufwi, findu fyosi datufipati datuvaghani.”
15Yuwi mwana wangu, ukotoo kwilongosha nawu. Kotoo kuyenda na veni. 16Nongwa veni vava ndemindemi kugola fya wafu, vakulopukesha kuwulagha. 17Wuva chindu ha, mtambu wuteghiwa kunu mbongu akukulola, 18lakini vandu kucha ava vakwitendela na kwiwulagha veni, vakutegha mtambu wa kwiwomesha ndima shawu veni. 19Nahawu ndi wivelili kwa vala vonda vapoki, vapoki vakudanganyisha ndima shawu.
Luhunja lukukema
20Pikanishi! Luhunja lukukema kwa lishu likomi mudeha na kusoku, 21lukukema kwa lishu likomi mumilyangu ya kwingilila mumbwani, pala pavayikungasha vandu kulamula misayisayi.
22“Yumwi vasisighi! Mukudayila kuva vapufi mbaka ndili? Na yumwi yimuvelili na bedalu damsekileli bedalu yenu mbaka ndili? Na vapufi kunyekwa luhunja? 23Mupikani achi chindivakayika, dandivasukulili hoshu shangu, na chideta chimanyiki kwa yumwi. 24Nongwa ndavakemili, mwalemili kumbikanisha, ndavapungili liwoku mwisi mwalemili kwisa kwa nenga. 25Mwabedalili fyonda findivawombilili na mwalemili ngayiku yangu, 26na nenga dasekileli pamgobuleka, dandivadanili pamuva na lyogha, 27na lyogha palivakamula kucha majinga makomi, goboleku payivakamula kucha lingukumbi, goboleku na lihingili palivawona. 28Topi, damungemi lakini dandivanyitikili ha, damunsaki wee lakini damung'oni ha. 29Nongwa mwawunyekwili umanyi, mwalemili kumtundamila Bambu Chapanga. 30Yumwi mwalemili kupikanisha malawu vangu, ngayiku shangu shosi mkovekela ha. 31Topi, damugayiliwi ngimu wumudayiliwa kugayiliwa na damgobuleki kwa fila fimgolili. 32Kwanongwa vapufi vakwiwulaya kwa kulema luhunja. Vasisihi vakwiwulagha kwanongwa ya kwipufya, 33lakini yambikanisha dayikali pekesu, dayikali ngajila kuyipwelesha wafu.”
Currently Selected:
Proverbs 1: OTNdambBL
Highlight
Share
Copy
Want to have your highlights saved across all your devices? Sign up or sign in
The Old Testament in Ndamba @The Word for The World International and Ndamba Language translation. All rights reserved.
